ਮੁੰਬਈ - ਬਾਲੀਵੁੱਡ ਦੇ 'ਹੈਂਡਸਮ ਹੰਕ' ਕਹੇ ਜਾਣ ਵਾਲੇ ਸੁਪਰਸਟਾਰ ਰਿਤਿਕ ਰੋਸ਼ਨ ਇਕ ਵਾਰ ਫਿਰ ਸੁਰਖੀਆਂ 'ਚ ਹਨ। ਹਾਲ ਹੀ 'ਚ ਰਿਤਿਕ ਦੀ ਬੈਸਾਖੀ ਦੇ ਸਹਾਰੇ ਚੱਲਣ ਵਾਲੀ ਇਕ ਵੀਡੀਓ ਵਾਇਰਲ ਹੋਈ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਦੇ ਪ੍ਰਸ਼ੰਸਕ ਕਾਫੀ ਚਿੰਤਤ ਸਨ। ਹੁਣ ਅਦਾਕਾਰ ਨੇ ਸੋਸ਼ਲ ਮੀਡੀਆ 'ਤੇ ਜ਼ਿੰਦਗੀ ਅਤੇ ਮੌਤ ਨੂੰ ਲੈ ਕੇ ਇਕ ਬੇਹੱਦ ਰਹੱਸਮਈ ਪੋਸਟ ਸਾਂਝੀ ਕੀਤੀ ਹੈ, ਜਿਸ ਵਿਚ ਉਨ੍ਹਾਂ ਨੇ ਖੁਲਾਸਾ ਕੀਤਾ ਹੈ ਕਿ ਜਹਾਜ਼ 'ਚ ਸਫਰ ਦੌਰਾਨ ਉਨ੍ਹਾਂ ਨੂੰ 'ਮੌਤ ਦਾ ਡਰ' ਸਤਾਉਣ ਲੱਗਦਾ ਹੈ।
"ਮੌਤ ਦਾ ਸੌਦਾਗਰ ਮੇਰੇ ਮੋਢੇ 'ਤੇ ਬੈਠ ਜਾਂਦਾ ਹੈ..."
ਰਿਤਿਕ ਨੇ ਇੰਸਟਾਗ੍ਰਾਮ 'ਤੇ ਫਲਾਈਟ ਦੇ ਅੰਦਰ ਦੀ ਇਕ ਤਸਵੀਰ ਸਾਂਝੀ ਕਰਦਿਆਂ ਲਿਖਿਆ ਕਿ ਜਿਵੇਂ ਹੀ ਕੈਪਟਨ ਉਡਾਣ ਭਰਨ ਦਾ ਐਲਾਨ ਕਰਦਾ ਹੈ, ਉਨ੍ਹਾਂ ਦਾ ਮਨ ਇਕ ਅਣਜਾਣ ਡਰ ਨਾਲ ਭਰ ਜਾਂਦਾ ਹੈ। ਉਨ੍ਹਾਂ ਭਾਵੁਕ ਹੁੰਦਿਆਂ ਲਿਖਿਆ, "ਜਿਵੇਂ ਹੀ ਕੈਪਟਨ ਕਹਿੰਦਾ ਹੈ ਕਿ ਅਸੀਂ ਉਡਾਣ ਭਰਨ ਲਈ ਤਿਆਰ ਹਾਂ, ਮੌਤ ਦਾ ਸੌਦਾਗਰ ਬਿਲਕੁਲ ਉਸੇ ਸਮੇਂ ਮੇਰੇ ਖੱਬੇ ਮੋਢੇ 'ਤੇ ਆ ਕੇ ਬੈਠ ਜਾਂਦਾ ਹੈ ਅਤੇ ਇਕ ਧੁਨ ਗੁਣਗੁਣਾਉਣ ਲੱਗਦਾ ਹੈ। ਉਸ ਦੀ ਮੌਜੂਦਗੀ ਮੈਨੂੰ ਬੇਚੈਨ ਕਰ ਦਿੰਦੀ ਹੈ।"
ਬਚਪਨ ਦੀਆਂ ਯਾਦਾਂ ਅਤੇ ਅੰਧਕਾਰ ਦਾ ਜ਼ਿਕਰ
ਅਦਾਕਾਰ ਨੇ ਅੱਗੇ ਲਿਖਿਆ ਕਿ ਉਹ ਮੌਤ ਦੇ ਉਸ ਅੰਧਕਾਰ ਨੂੰ ਗੌਰ ਨਾਲ ਦੇਖਦੇ ਹਨ ਜੋ ਉਨ੍ਹਾਂ ਵੱਲ ਵਧ ਰਿਹਾ ਹੁੰਦਾ ਹੈ। ਰਿਤਿਕ ਮੁਤਾਬਕ, ਮੌਤ ਦਾ ਇਹ ਸੌਦਾਗਰ ਉਨ੍ਹਾਂ ਦੇ ਬਚਪਨ ਦੀ ਕੋਈ ਜਾਦੂਈ ਧੁਨ ਸੁਣਾਉਂਦਾ ਹੈ। ਉਨ੍ਹਾਂ ਨੇ ਆਪਣੀ ਜ਼ਿੰਦਗੀ ਦੇ ਸਫਰ ਨੂੰ ਸੰਘਰਸ਼ ਅਤੇ ਪਿਆਰ ਦਾ ਇਕ ਖੂਬਸੂਰਤ ਸੁਮੇਲ ਦੱਸਿਆ ਹੈ। ਉਨ੍ਹਾਂ ਲਿਖਿਆ, "ਮੇਰਾ ਮਾਸੂਮ ਦਿਲ ਇਕ ਅਣਕਹੀ ਉਮੀਦ ਨਾਲ ਧੜਕਦਾ ਹੈ... ਇੰਨੀ ਉਮੀਦ ਕਿ ਦਿਲ ਟੁੱਟ ਜਾਂਦਾ ਹੈ।"
ਪ੍ਰਸ਼ੰਸਕਾਂ ਨੇ ਜਤਾਈ ਚਿੰਤਾ
ਰਿਤਿਕ ਰੋਸ਼ਨ ਦੀ ਇਸ ਪੋਸਟ ਨੇ ਸੋਸ਼ਲ ਮੀਡੀਆ 'ਤੇ ਹਲਚਲ ਮਚਾ ਦਿੱਤੀ ਹੈ। ਅਦਾਕਾਰ ਦੇ ਪ੍ਰਸ਼ੰਸਕ ਲਗਾਤਾਰ ਕਮੈਂਟ ਕਰਕੇ ਉਨ੍ਹਾਂ ਦੀ ਸਿਹਤ ਬਾਰੇ ਪੁੱਛ ਰਹੇ ਹਨ ਅਤੇ ਉਨ੍ਹਾਂ ਦੀ ਸਲਾਮਤੀ ਲਈ ਦੁਆਵਾਂ ਕਰ ਰਹੇ ਹਨ। ਕੁਝ ਸਮਾਂ ਪਹਿਲਾਂ ਰਿਤਿਕ ਨੇ ਕਿਹਾ ਸੀ ਕਿ ਕਦੇ-ਕਦੇ ਸਰੀਰ ਦੇ ਕਈ ਅੰਗ ਅਚਾਨਕ ਕੰਮ ਕਰਨਾ ਬੰਦ ਕਰ ਦਿੰਦੇ ਹਨ, ਜਿਸ ਕਾਰਨ ਲੋਕ ਹੁਣ ਉਨ੍ਹਾਂ ਦੀ ਸਿਹਤ ਨੂੰ ਲੈ ਕੇ ਜ਼ਿਆਦਾ ਫਿਕਰਮੰਦ ਨਜ਼ਰ ਆ ਰਹੇ ਹਨ।
ਰਿਟਾਇਰਮੈਂਟ ਮਗਰੋਂ ਅਰਿਜੀਤ ਸਿੰਘ ਨੂੰ ਮਿਲਿਆ ਸਲੀਮ ਸੁਲੇਮਾਨ ਦਾ ਸਾਥ
NEXT STORY 
