ਮੁੰਬਈ- ਹੈਦਰਾਬਾਦ ’ਚ ਹੋਏ ਮਿਸ ਵਰਲਡ 2025 ਮੁਕਾਬਲੇ ਵਿਚ 108 ਸੁੰਦਰੀਆਂ ਨੂੰ ਪਛਾੜ ਕੇ ਥਾਈਲੈਂਡ ਦੀ 21 ਸਾਲਾ ਓਪਲ ਸੁਚਾਤਾ ਚੁਆਂਗਸਰੀ ਨੇ ਖਿਤਾਬ ਆਪਣੇ ਨਾਂ ਕੀਤਾ ਹੈ। 31 ਮਈ ਨੂੰ ਹੈਦਰਾਬਾਦ ਦੇ ਹਾਈ-ਟੈਕ ਪ੍ਰਦਰਸ਼ਨੀ ਕੇਂਦਰ ’ਚ ਚੈੱਕ ਗਣਰਾਜ ਦੀ ਕ੍ਰਿਸਟੀਨਾ ਪਿਸ਼ਕੋਵਾ ਨੇ ਸੁਚਾਤਾ ਨੂੰ ਤਾਜ ਪਹਿਨਾਇਆ। ਮਿਸ ਵਰਲਡ ਦਾ ਤਾਜ ਪਹਿਨਣ ਤੋਂ ਬਾਅਦ ਸੁਚਤਾ ਨੇ ਪੰਜਾਬ ਕੇਸਰੀ/ਨਵੋਦਿਆ ਟਾਈਮਜ਼/ਜਗ ਬਾਣੀ/ਹਿੰਦ ਸਮਾਚਾਰ ਲਈ ਪੱਤਰਕਾਰ ਜਿਓਤਸਨਾ ਰਾਵਤ ਨਾਲ ਖ਼ਾਸ ਗੱਲਬਾਤ ਕੀਤੀ। ਪੇਸ਼ ਹਨ ਮੁੱਖ ਅੰਸ਼...
ਓਪਲ ਸੁਚਾਤਾ ਚੁਆਂਗਸ਼੍ਰੀ
ਪ੍ਰ. ਮਿਸ ਵਰਲਡ ਬਣਨ ਤੋਂ ਤੁਰੰਤ ਬਾਅਦ ਸਭ ਤੋਂ ਪਹਿਲਾਂ ਮਨ ’ਚ ਕੀ ਆਇਆ ਅਤੇ ਸਭ ਤੋਂ ਪਹਿਲਾਂ ਕਿਸ ਨਾਲ ਗੱਲ ਕੀਤੀ?
ਜਿਉਂ ਹੀ ਮੈਂ ਜਿੱਤੀ, ਸਭ ਤੋਂ ਪਹਿਲਾਂ ਮੈਂ ਆਪਣੀ ਮਾਂ ਨਾਲ ਗੱਲ ਕੀਤੀ। ਫਿਰ ਕੁਝ ਦੋਸਤਾਂ ਤੇ ਮੇਰੀ ਟੀਮ ਨਾਲ ਗੱਲ ਹੋਈ, ਉਨ੍ਹਾਂ ਦੀ ਸਭ ਦੀ ਮਿਹਨਤ ਕਾਰਨ ਅੱਜ ਮੈਂ ਇਥੇ ਤੱਕ ਪਹੁੰਚ ਸਕੀ ਹਾਂ। ਮੈਂ ਬਸ ਹੁਣ ਇਸ ਤਾਜ ਨੂੰ ਆਪਣੇ ਦੇਸ਼ ਥਾਈਲੈਂਡ ਲੈ ਕੇ ਜਾਣ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੀ ਹਾਂ। ਜਿਸ ਪਲ ਮੈਂ ਤਾਜ ਪਹਿਨਿਆ, ਉਸ ਸਮੇਂ ਮੇਰੀਆਂ ਅੱਖਾਂ ਸਾਹਮਣੇ ਸਿਰਫ਼ ਮੇਰਾ ਪਰਿਵਾਰ, ਮੇਰੇ ਲੋਕ ਤੇ ਮੇਰੀ ਟੀਮ ਸੀ। ਮੇਰੇ ਲਈ ਉਹ ਪਲ ਸ਼ਬਦਾਂ ’ਚ ਕਹਿ ਸਕਣਾ ਆਸਾਨ ਨਹੀਂ ਹੈ।
ਪ੍ਰ. ਓਪਲ ਫਾਰ ਹਰ ਲਈ ਤੁਸੀਂ ਕੀ ਕਹਿਣਾ ਚਾਹੋਗੇ?
ਮੈਂ ਜਦੋਂ 16 ਸਾਲ ਦੀ ਸੀ, ਉਦੋਂ ਮੈਂ ਛਾਤੀ ਦੇ ਕੈਂਸਰ ਲਈ ਮੁਹਿੰਮ ਸ਼ੁਰੂ ਕੀਤੀ ਸੀ, ਜਿਸ ਦਾ ਨਾਂ ਓਪਲ ਫਾਰ ਹਰ ਸੀ। ਉਸ ਸਮੇਂ ਛਾਤੀ ’ਚ ਗੰਢ ਹੋਈ ਸੀ ਅਤੇ ਸਰਜਰੀ ਕਰਵਾ ਕੇ ਉਹ ਗੰਢ ਕਢਵਾਈ ਸੀ। ਉਦੋਂ ਤੋਂ ਔਰਤਾਂ ’ਚ ਛਾਤੀ ਦੇ ਕੈਂਸਰ ਅਤੇ ਉਸ ਨਾਲ ਜੁੜੀਆਂ ਸਾਵਧਾਨੀਆਂ ਨੂੰ ਲੈ ਕੇ ਜਾਗਰੂਕਤਾ ਫੈਲਾਉਣ ਦੀ ਸੋਚੀ। ਇਸੇ ਸੋਚ ਨਾਲ ‘ਓਪਲ ਫਾਰ ਹਰ’ ਨਾਂ ਦੀ ਪਹਿਲ ਦੀ ਸ਼ੁਰੂਆਤ ਕੀਤੀ, ਜੋ ਥਾਈਲੈਂਡ ’ਚ ਔਰਤਾਂ ਦੀ ਸਿਹਤ ਨੂੰ ਲੈ ਕੇ ਇਕ ਪ੍ਰਭਾਵਸ਼ਾਲੀ ਸਮਾਜਿਕ ਅੰਦੋਲਨ ਬਣ ਚੁੱਕਿਆ ਹੈ।
ਪ੍ਰ. ਬਾਲੀਵੁੱਡ ’ਚ ਤੁਸੀਂ ਕਿਸ ਹੀਰੋ-ਹੀਰੋਇਨ ਨੂੰ ਜਾਣਦੇ ਹੋ ਤੇ ਕੀ ਭਵਿੱਖ ’ਚ ਤੁਸੀਂ ਕੰਮ ਕਰਨਾ ਚਾਹੋਗੇ?
ਹਾਂ, ਬਿਲਕੁਲ ਮੈਨੂੰ ਮੌਕਾ ਮਿਲਿਆ ਤਾਂ ਮੈਂ ਬਾਲੀਵੁੱਡ ’ਚ ਜ਼ਰੂਰ ਕੰਮ ਕਰਾਂਗੀ। ਮੈਂ ਸਿਰਫ਼ ਆਲੀਆ ਭੱਟ ਨੂੰ ਜਾਣਦੀ ਹਾਂ। ਮੈਂ ਆਲੀਆ ਦੀ ਫਿਲਮ ‘ਗੰਗੂਬਾਈ’ ਦੇਖੀ ਹੈ। ਇਹ ਫਿਲਮ ਥਾਈਲੈਂਡ ’ਚ ਕਾਫ਼ੀ ਪ੍ਰਸਿੱਧ ਹੈ।
ਪ੍ਰ. ਤੁਹਾਨੂੰ ਕਿਹੜੀਆਂ ਚੀਜ਼ਾਂ ਦਾ ਸ਼ੌਕ ਹੈ?
ਮੈੈਨੂੰ ਓਕੇਲੇਲ (ਇਕ ਤਰ੍ਹਾਂ ਦਾ ਸੰਗੀਤਕ ਸਾਜ਼) ਵਜਾਉਣਾ ਪਸੰਦ ਹੈ। ਪਾਲਤੂ ਜਾਨਵਰ ਪਾਲਣ ਦਾ ਕਾਫ਼ੀ ਸ਼ੌਂਕ ਹੈ। ਮੇਰੇ ਕੋਲ ਪੰਜ ਕੁੱਤੇ ਅਤੇ 16 ਬਿੱਲੀਆਂ ਹਨ। ਇਸ ਤੋਂ ਇਲਾਵਾ ਸਮਾਜਿਕ ਕੰਮ ਕਰਨ ’ਚ ਵੀ ਰੁਚੀ ਹੈ।
ਪ੍ਰ. ਤੁਸੀਂ ਆਪਣੇ ਵਰਗੀਆਂ ਜਵਾਨ ਕੁੜੀਆਂ ਨੂੰ ਕੀ ਸੁਨੇਹਾ ਦੇਵੋਗੇ, ਜੋ ਜੀਵਨ ’ਚ ਕੁਝ ਕਰਨਾ ਚਾਹੁੰਦੀਆਂ ਹਨ?
ਭਾਰਤ ਤੇ ਦੁਨੀਆ ਭਰ ਦੀਆਂ ਸਾਰੀਆਂ ਕੁੜੀਆਂ ਲਈ ਮੇਰਾ ਇਕ ਖ਼ਾਸ ਸੰਦੇਸ਼ ਹੈ, ਜੋ ਉਨ੍ਹਾਂ ਦੀ ਸਿਹਤ ਤੇ ਛਾਤੀ ਦੇ ਕੈਂਸਰ ਬਾਰੇ ਜਾਗਰੂਕਤਾ ਲਈ ਹੈ। ਇਸ ਦੇ ਨਾਲ ਹੀ ਮੈਂ ਸਾਰਿਆਂ ਨੂੰ ਇਹ ਕਹਿਣਾ ਚਾਹੁੰਦੀ ਹਾਂ ਕਿ ਖ਼ੁਦ ’ਤੇ ਭਰੋਸਾ ਰੱਖਣਾ ਸਭ ਤੋਂ ਜ਼ਰੂਰੀ ਹੈ। ਆਪਣੇ ਸੁਪਨਿਆਂ ਨੂੰ ਪਛਾਣੋ ਤੇ ਉਨ੍ਹਾਂ ਨੂੰ ਪੂਰਾ ਕਰਨ ਲਈ ਪੂਰੇ ਦਿਲ ਤੋਂ ਮਿਹਨਤ ਕਰੋ। ਮੈਨੂੰ ਲੱਗਦਾ ਹੈ ਕਿ ਔਰਤ ਹਰ ਚੁਣੌਤੀ ਨੂੰ ਪਾਰ ਕਰ ਸਕਦੀ ਹੈ ਅਤੇ ਅਸੰਭਵ ਨੂੰ ਵੀ ਸੰਭਵ ਬਣਾ ਸਕਦੀ ਹੈ।
ਵੱਡੀ ਖਬਰ; ਮਹਿਮਾਨ ਬਣ ਘਰ ਆਏ ਨੌਜਵਾਨ ਨੇ ਵਰ੍ਹਾਇਆ ਕਹਿਰ ! 17 ਸਾਲਾ ਸੋਸ਼ਲ ਮੀਡੀਆ ਸਟਾਰ ਨੂੰ ਮਾਰ'ਤੀ ਗੋਲ਼ੀ
NEXT STORY 
