ਨਵੀਂ ਦਿੱਲੀ : ਭਾਰਤੀ ਸਮਾਰਟਫੋਨ ਬਾਜ਼ਾਰ ਲਈ ਸਾਲ 2026 ਦੀ ਪਹਿਲੀ ਤਿਮਾਹੀ ਚੁਣੌਤੀਪੂਰਨ ਰਹੀ ਹੈ। ਆਈਡੀਸੀ (IDC) ਦੀ ਇੱਕ ਨਵੀਂ ਰਿਪੋਰਟ ਅਨੁਸਾਰ, ਦੇਸ਼ ਵਿੱਚ ਸਮਾਰਟਫੋਨ ਸ਼ਿਪਮੈਂਟ ਵਿੱਚ 4.1 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਕਮਜ਼ੋਰ ਗਾਹਕ ਮੰਗ ਅਤੇ ਵਧਦੀਆਂ ਕੀਮਤਾਂ ਨੂੰ ਇਸ ਸੁਸਤੀ ਦਾ ਮੁੱਖ ਕਾਰਨ ਮੰਨਿਆ ਜਾ ਰਿਹਾ ਹੈ।
ਰਿਪੋਰਟ ਮੁਤਾਬਕ ਸਾਲ ਦੀ ਪਹਿਲੀ ਤਿਮਾਹੀ ਦੌਰਾਨ ਭਾਰਤ ਵਿੱਚ ਕਰੀਬ 3.1 ਕਰੋੜ ਸਮਾਰਟਫੋਨ ਸ਼ਿਪ ਕੀਤੇ ਗਏ। ਤਿਉਹਾਰਾਂ ਦੇ ਸੀਜ਼ਨ ਤੋਂ ਬਾਅਦ ਬਾਜ਼ਾਰ ਵਿੱਚ ਗਾਹਕਾਂ ਦੀ ਖਿੱਚ ਘੱਟ ਰਹੀ ਹੈ। ਇਸ ਤੋਂ ਇਲਾਵਾ, ਮੈਮੋਰੀ ਅਤੇ ਸਟੋਰੇਜ ਪੁਰਜ਼ਿਆਂ ਦੀ ਵਧਦੀ ਲਾਗਤ ਅਤੇ ਏਆਈ (AI) ਅਧਾਰਤ ਤਕਨੀਕਾਂ ਕਾਰਨ ਸਮਾਰਟਫੋਨਾਂ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋਇਆ ਹੈ, ਜਿਸ ਨੇ ਵਿਕਰੀ ਦੀ ਰਫ਼ਤਾਰ ਨੂੰ ਮੱਠਾ ਕਰ ਦਿੱਤਾ ਹੈ।
ਮਹਿੰਗੇ ਫੋਨ ਖਰੀਦ ਰਹੇ ਹਨ ਭਾਰਤੀ
ਦਿਲਚਸਪ ਗੱਲ ਇਹ ਹੈ ਕਿ ਭਾਵੇਂ ਵਿਕਰੀ ਦੀ ਕੁੱਲ ਗਿਣਤੀ ਘਟੀ ਹੈ, ਪਰ ਬਾਜ਼ਾਰ ਦੀ ਕੁੱਲ ਕੀਮਤ (Value) ਵਿੱਚ 5.8 ਫੀਸਦੀ ਦਾ ਵਾਧਾ ਹੋਇਆ ਹੈ। ਇਸ ਦਾ ਮਤਲਬ ਹੈ ਕਿ ਭਾਰਤੀ ਲੋਕ ਹੁਣ ਸਸਤੇ ਬਜਟ ਫੋਨਾਂ ਦੀ ਬਜਾਏ ਮਹਿੰਗੇ ਅਤੇ ਪ੍ਰੀਮੀਅਮ ਸਮਾਰਟਫੋਨ ਖਰੀਦਣ 'ਤੇ ਜ਼ਿਆਦਾ ਜ਼ੋਰ ਦੇ ਰਹੇ ਹਨ। ਔਸਤ ਸਮਾਰਟਫੋਨ ਦੀ ਕੀਮਤ 10.4 ਫੀਸਦੀ ਵਧ ਕੇ 302 ਡਾਲਰ (ਕਰੀਬ 29,000 ਰੁਪਏ) ਤੱਕ ਪਹੁੰਚ ਗਈ ਹੈ।
ਵੀਵੋ ਨੰਬਰ 1, ਐਪਲ ਪੰਜਵੇਂ ਸਥਾਨ 'ਤੇ
ਸਮਾਰਟਫੋਨ ਬ੍ਰਾਂਡਾਂ ਦੀ ਦੌੜ ਵਿੱਚ ਹੇਠ ਲਿਖੇ ਅੰਕੜੇ ਸਾਹਮਣੇ ਆਏ ਹਨ:
ਵੀਵੋ (Vivo): 19.6 ਫੀਸਦੀ ਹਿੱਸੇਦਾਰੀ ਨਾਲ ਪਹਿਲੇ ਸਥਾਨ 'ਤੇ।
ਸੈਮਸੰਗ (Samsung): 17.1 ਫੀਸਦੀ ਨਾਲ ਦੂਜੇ ਨੰਬਰ 'ਤੇ।
ਓਪੋ (Oppo): 15.3 ਫੀਸਦੀ ਮਾਰਕੀਟ ਸ਼ੇਅਰ ਨਾਲ ਤੀਜਾ ਸਥਾਨ।
ਸ਼ਾਓਮੀ ਤੇ ਪੋਕੋ: 12.2 ਫੀਸਦੀ ਹਿੱਸੇਦਾਰੀ ਨਾਲ ਚੌਥੇ ਸਥਾਨ 'ਤੇ।
ਐਪਲ (Apple): 9.4 ਫੀਸਦੀ ਮਾਰਕੀਟ ਸ਼ੇਅਰ ਨਾਲ ਪੰਜਵੇਂ ਸਥਾਨ 'ਤੇ ਪਹੁੰਚ ਗਿਆ ਹੈ।
ਕੰਪਨੀਆਂ ਹੁਣ ਵਧਦੀ ਨਿਰਮਾਣ ਲਾਗਤ ਕਾਰਨ ਬਜਟ ਫੋਨਾਂ ਦੀ ਬਜਾਏ ਮਿਡ-ਪ੍ਰੀਮੀਅਮ ਅਤੇ ਪ੍ਰੀਮੀਅਮ ਸੈਗਮੈਂਟ 'ਤੇ ਜ਼ਿਆਦਾ ਧਿਆਨ ਕੇਂਦਰਿਤ ਕਰ ਰਹੀਆਂ ਹਨ।
Uber ਡਰਾਈਵਰਾਂ ਨੂੰ EV ਅਪਣਾਉਣ ਦੀ ਸਲਾਹ, ਕੇਂਦਰੀ ਮੰਤਰੀ ਨੇ ਦਿੱਤਾ ਵੱਡਾ ਬਿਆਨ
NEXT STORY 
