ਬੈਂਗਲੁਰੂ : ਬੈਂਗਲੁਰੂ ਦੇ ਕੇਮਪੇਗੌੜਾ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਸਥਿਤ ਮਸ਼ਹੂਰ 'ਰਾਮੇਸ਼ਵਰਮ ਕੈਫੇ' ਤੋਂ ਇਕ ਹੈਰਾਨ ਕਰਨ ਵਾਲੀ ਵੀਡੀਓ ਸਾਹਮਣੇ ਆਈ ਹੈ, ਜਿੱਥੇ ਇਕ ਔਰਤ ਨੂੰ ਡੋਸੇ ਦੇ ਨਾਲ ਚਟਨੀ ਨਾ ਮਿਲਣ ਕਾਰਨ ਕਾਫੀ ਹੰਗਾਮਾ ਹੋਇਆ। ਔਰਤ ਦਾ ਦੋਸ਼ ਹੈ ਕਿ ਲਗਭਗ 600 ਰੁਪਏ ਦਾ ਬਿੱਲ ਚੁਕਾਉਣ ਦੇ ਬਾਵਜੂਦ ਕੈਫੇ ਕਰਮਚਾਰੀਆਂ ਨੇ ਉਸ ਨੂੰ ਚਟਨੀ ਦੇਣ ਤੋਂ ਮਨ੍ਹਾ ਕਰ ਦਿੱਤਾ।
ਕੀ ਹੈ ਪੂਰਾ ਮਾਮਲਾ?
ਜਾਣਕਾਰੀ ਅਨੁਸਾਰ, ਔਰਤ ਨੇ 376 ਰੁਪਏ ਦਾ 'ਘਿਓ ਪੁੜੀ ਸਾਦਾ ਡੋਸਾ' ਅਤੇ 195 ਰੁਪਏ ਦੀ ਚਾਹ ਆਰਡਰ ਕੀਤੀ ਸੀ, ਜਿਸ ਦਾ ਜੀ.ਐੱਸ.ਟੀ. (GST) ਸਮੇਤ ਕੁੱਲ ਬਿੱਲ ਕਰੀਬ 600 ਰੁਪਏ ਬਣਿਆ ਸੀ। ਜਦੋਂ ਉਸ ਨੂੰ ਡੋਸਾ ਪਰੋਸਿਆ ਗਿਆ ਤਾਂ ਉਸ ਦੇ ਨਾਲ ਸਿਰਫ਼ ਸਾਂਭਰ ਹੀ ਦਿੱਤਾ ਗਿਆ। ਜਦੋਂ ਉਸ ਨੇ ਚਟਨੀ ਦੀ ਮੰਗ ਕੀਤੀ ਤਾਂ ਕਰਮਚਾਰੀਆਂ ਨੇ ਇਹ ਕਹਿ ਕੇ ਇਨਕਾਰ ਕਰ ਦਿੱਤਾ ਕਿ ਚਟਨੀ ਇਸ ਆਰਡਰ ਵਿੱਚ ਸ਼ਾਮਲ ਨਹੀਂ ਹੈ।
ਇਸ ਗੱਲ ਨੂੰ ਲੈ ਕੇ ਔਰਤ ਅਤੇ ਕੈਫੇ ਸਟਾਫ ਵਿਚਾਲੇ ਲਗਭਗ 45 ਮਿੰਟ ਤੱਕ ਤਿੱਖੀ ਬਹਿਸ ਹੁੰਦੀ ਰਹੀ। ਔਰਤ ਦਾ ਤਰਕ ਸੀ ਕਿ ਜੇਕਰ ਉਹ ਇੰਨਾ ਮਹਿੰਗਾ ਖਾਣਾ ਖਰੀਦ ਰਹੀ ਹੈ, ਤਾਂ ਡੋਸੇ ਦੇ ਨਾਲ ਚਟਨੀ ਮਿਲਣਾ ਸੁਭਾਵਿਕ ਹੈ। ਔਰਤ ਨੇ ਦਾਅਵਾ ਕੀਤਾ ਕਿ ਜਦੋਂ ਉਸ ਨੇ ਇਸ ਘਟਨਾ ਦੀ ਵੀਡੀਓ ਰਿਕਾਰਡ ਕਰਨੀ ਸ਼ੁਰੂ ਕੀਤੀ, ਤਾਂ ਕਰਮਚਾਰੀਆਂ ਨੇ ਉਸ 'ਤੇ ਵੀਡੀਓ ਹਟਾਉਣ ਦਾ ਦਬਾਅ ਵੀ ਪਾਇਆ।
ਅੰਤ ਵਿੱਚ, ਮੈਨੇਜਰ ਦੇ ਦਖ਼ਲ ਤੋਂ ਬਾਅਦ ਔਰਤ ਨੂੰ ਚਟਨੀ ਦਿੱਤੀ ਗਈ। ਇਸ ਪੂਰੀ ਘਟਨਾ ਦੀ ਵੀਡੀਓ ਹੁਣ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ, ਜਿਸ 'ਤੇ ਲੋਕ ਤਰ੍ਹਾਂ-ਤਰ੍ਹਾਂ ਦੀਆਂ ਪ੍ਰਤੀਕਿਰਿਆਵਾਂ ਦੇ ਰਹੇ ਹਨ। ਬਹੁਤ ਸਾਰੇ ਯੂਜ਼ਰਸ ਹਵਾਈ ਅੱਡਿਆਂ 'ਤੇ ਖਾਣੇ ਦੀਆਂ ਅਸਮਾਨ ਨੂੰ ਛੂਹ ਰਹੀਆਂ ਕੀਮਤਾਂ ਅਤੇ ਦਿੱਤੀਆਂ ਜਾਣ ਵਾਲੀਆਂ ਸੇਵਾਵਾਂ ਦੇ ਘਟੀਆ ਮਿਆਰ 'ਤੇ ਸਵਾਲ ਚੁੱਕ ਰਹੇ ਹਨ।
ਔਰਤਾਂ ਦੇ ਰਾਖਵੇਂਕਰਨ ਲਈ ਕੋਈ ਕਸਰ ਨਹੀਂ ਛੱਡਾਂਗਾ : ਮੋਦੀ
NEXT STORY 
