ਗੁਰਦਾਸਪੁਰ - ਪੰਜਾਬ ਐਗਰੀਕਲਚਰ ਯੂਨੀਵਰਸਿਟੀ ਲੁਧਿਆਣਾ ਦੇ ਰਿਜਨਲ ਸੈਂਟਰ ਗੁਰਦਾਸਪੁਰ 'ਚ ਕਾਲਜ ਆਫ਼ ਐਗਰੀਕਲਚਰ ਸਿੱਖਿਆ ਦੀ ਇਮਾਰਤ ਅਤੇ ਹੋਰ ਸਹੂਲਤਾਂ ਲਈ 22 ਮਾਰਚ 2011 ਨੂੰ ਉਸ ਸਮੇਂ ਦੇ ਖੇਤੀਬਾੜੀ ਮੰਤਰੀ ਸੁੱਚਾ ਸਿੰਘ ਲੰਗਾਹ ਵੱਲੋਂ ਰੱਖਿਆ ਨੀਂਹ ਪੱਥਰ ਹੁਣ ਇਕ ਮਜ਼ਾਕ ਬਣ ਕੇ ਰਹਿ ਗਿਆ ਹੈ ਕਿਉਂਕਿ 6 ਸਾਲ ਤੋਂ ਵੱਧ ਸਮਾਂ ਬੀਤ ਜਾਣ ਦੇ ਬਾਵਜੂਦ ਅੱਜ ਤੱਕ ਇਸ ਕਾਲਜ ਦੀ ਇਮਾਰਤ ਲਈ ਇਕ ਇੱਟ ਵੀ ਨਹੀਂ ਲਾਈ ਗਈ ਜਦਕਿ ਕਾਲਜ ਹੁਣ ਇਸ ਰਿਜਨਲ ਸੈਂਟਰ ਦੀ ਇਕ ਪੁਰਾਣੀ ਇਮਾਰਤ 'ਚ ਹੀ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਇਸ ਕਾਲਜ 'ਚ ਸਿੱਖਿਆ ਗ੍ਰਹਿਣ ਕਰਨ ਵਾਲੇ ਲੜਕੇ-ਲੜਕੀਆਂ ਲਈ ਕੋਈ ਪ੍ਰਬੰਧ ਨਾ ਹੋਣ ਕਾਰਨ ਮਹਿਲਾ ਕਿਸਾਨਾਂ ਲਈ ਬਣੇ ਹੋਸਟਲ 'ਚ ਇਹ ਲੜਕੀਆਂ ਦਾ ਹੋਸਟਲ ਸ਼ੁਰੂ ਕੀਤਾ ਗਿਆ ਹੈ।
ਕੀ ਹੈ ਮਾਮਲਾ
ਜਾਣਕਾਰੀ ਅਨੁਸਾਰ ਪੰਜਾਬ ਸਰਕਾਰ ਨੇ ਐਗਰੀਕਲਚਰ ਯੂਨੀਵਰਸਿਟੀ ਦੇ ਗੁਰਦਾਸਪੁਰ ਸਥਿਤ ਰਿਜਨਲ ਸੈਂਟਰ 'ਚ ਬੀ. ਐੱਸ. ਸੀ. ਐਗਰੀਕਲਚਰ ਕੋਰਸ ਦੀ ਸ਼ੁਰੂਆਤ ਕਰਨ ਦੀ ਯੋਜਨਾ ਇਹ ਸੋਚ ਕੇ ਬਣਾਈ ਸੀ ਕਿ ਇਲਾਕੇ ਦੇ ਨੌਜਵਾਨਾਂ ਨੂੰ ਇਸ ਸਿੱਖਿਆ ਦੀ ਪ੍ਰਾਪਤੀ ਲਈ ਆਸਾਨੀ ਹੋਵੇ। ਉਦੋਂ ਇਸ ਕਾਲਜ ਸਬੰਧੀ ਅਤੇ ਕਾਲਜ ਲਈ ਬਣਨ ਵਾਲੀ ਸੁੰਦਰ ਇਮਾਰਤ, ਹੋਸਟਲ, ਖੇਡ ਮੈਦਾਨ, ਆਧੁਨਿਕ ਲੈਬ ਸਮੇਤ ਹੋਰ ਸਹੂਲਤਾਂ ਮੁਹੱਈਆ ਕਰਵਾਉਣ ਦੀ ਚਰਚਾ ਵੀ ਹੋਈ ਸੀ ਪਰ ਅੱਜ 6 ਸਾਲ ਬੀਤ ਜਾਣ ਦੇ ਬਾਵਜੂਦ ਇਸ ਕਾਲਜ ਲਈ ਇਕ ਇੱਟ ਵੀ ਨਹੀਂ ਲਾਈ ਗਈ। ਕਾਲਜ ਦੇ ਨਿਰਮਾਣ ਸਬੰਧੀ ਲੱਗਾ ਨੀਂਹ ਪੱਥਰ ਮਜ਼ਾਕ ਬਣਿਆ ਹੋਇਆ ਹੈ। ਬੀ. ਐੱਸ. ਸੀ. ਐਗਰੀਕਲਚਰ ਕੋਰਸ ਸਬੰਧੀ ਇਸ ਰਿਜਨਲ ਸੈਂਟਰ 'ਚ ਕਲਾਸਾਂ ਸ਼ੁਰੂ ਹੋ ਚੁੱਕੀਆਂ ਹਨ। ਇਸ ਸਮੇਂ 100 ਲੜਕੇ-ਲੜਕੀਆਂ ਇਸ ਵਿਸ਼ੇ 'ਚ ਸਿੱਖਿਆ ਪ੍ਰਾਪਤ ਕਰ ਰਹੀਆਂ ਹਨ।
ਕੀ ਕਹਿੰਦੇ ਹਨ ਅਧਿਕਾਰੀ
ਇਸ ਸਬੰਧੀ ਜਦੋਂ ਰਿਜਨਲ ਕੈਂਪਸ ਦੇ ਅਧਿਕਾਰੀਆਂ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਨੇ ਜੋ ਗੱਲ ਦੱਸੀ, ਉਹ ਬਹੁਤ ਹੈਰਾਨ ਕਰਨ ਵਾਲੀ ਸੀ। ਉਸ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਉਦੋਂ ਜਲਦਬਾਜ਼ੀ 'ਚ ਅਤੇ ਬਿਨਾਂ ਕਿਸੇ ਯੋਜਨਾ ਦੇ ਇਹ ਨੀਂਹ ਪੱਥਰ ਰੱਖਿਆ ਗਿਆ ਸੀ। ਉਨ੍ਹਾਂ ਦੱਸਿਆ ਕਿ ਮਾਰਚ 2011 ਨੂੰ ਇਸ ਕਾਲਜ ਨਿਰਮਾਣ ਸਬੰਧੀ ਨੀਂਹ ਪੱਥਰ ਰੱਖਿਆ ਗਿਆ ਸੀ। ਉਦੋਂ ਇਸ ਕਾਲਜ ਵਿਚ ਸਾਰੀਆਂ ਸਹੂਲਤਾਂ ਮੁਹੱਈਆ ਕਰਵਾਉਣ ਲਈ ਕੁੱਲ 44 ਕਰੋੜ ਲਾਗਤ ਆਉਣ ਦਾ ਅਨੁਮਾਨ ਲਾਇਆ ਗਿਆ ਸੀ। ਇਸ 44 ਕਰੋੜ ਰੁਪਏ ਦੀ ਰਾਸ਼ੀ ਨਾਲ ਸੁੰਦਰ ਇਮਾਰਤ, ਹੋਸਟਲ, ਖੇਡ ਮੈਦਾਨ, ਲੈਬ, ਪ੍ਰੋਫੈਸਰਾਂ ਦੀ ਰਿਹਾਇਸ਼ ਲਈ ਕੁਆਰਟਰ ਆਦਿ ਬਣਾਉਣ ਦੀ ਯੋਜਨਾ ਸੀ। ਜਦੋਂ ਸਰਕਾਰ ਕੋਲ ਇਸ ਦਾ ਬਿਓਰਾ ਭੇਜਿਆ ਗਿਆ ਤਾਂ ਸਪੱਸ਼ਟ ਕਰ ਦਿੱਤਾ ਕਿ ਸਰਕਾਰ ਵੱਡੀ ਰਾਸ਼ੀ ਖਰਚ ਨਹੀਂ ਕਰ ਸਕਦੀ, ਜਿਸ ਕਾਰਨ ਇਹ ਕਾਲਜ ਬਣਾਉਣ ਦੀ ਯੋਜਨਾ ਠੱਪ ਹੋ ਗਈ। ਉਨ੍ਹਾਂ ਦੱਸਿਆ ਕਿ ਸਾਡੇ ਕੋਲ ਵਿਦਿਆਰਥੀਆਂ ਲਈ ਅਜੇ ਕੋਈ ਹੋਸਟਲ ਦਾ ਪ੍ਰਬੰਧ ਨਹੀਂ ਸੀ, ਇਸ ਲਈ ਅਸੀਂ ਜੋ ਕਿਸਾਨ ਮਹਿਲਾਵਾਂ ਲਈ ਹੋਸਟਲ ਇਮਾਰਤ ਹੈ, ਉਸ ਨੂੰ ਲੜਕੀਆਂ ਦੇ ਹੋਸਟਲ ਦੇ ਰੂਪ 'ਚ ਤਬਦੀਲ ਕਰ ਦਿੱਤਾ ਹੈ। ਇਸ ਸਮੇਂ ਲੜਕੀਆਂ ਦੀ ਗਿਣਤੀ ਵੀ ਜ਼ਿਆਦਾ ਹੋ ਗਈ ਹੈ। ਇਸ ਲਈ ਜ਼ਿਆਦਾਤਰ ਲੜਕੀਆਂ ਨੂੰ ਪੇਇੰਗ ਗੈਸਟ ਦੇ ਰੂਪ 'ਚ ਰਹਿਣਾ ਪੈ ਰਿਹਾ ਹੈ।
ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਤੇ ਹਸਪਤਾਲ ਦੇ ਬੱਚਾ ਵਿਭਾਗ ਦੇ ਆਈ. ਸੀ. ਯੂ. ਵਿਚ ਲੱਗੀ ਅੱਗ
NEXT STORY 
