ਰਾਹਿਲ ਨੋਰਾ ਚੋਪੜਾ
ਸਾਬਕਾ ਮੁੱਖ ਮੰਤਰੀ ਅਤੇ ਜਾਟ ਨੇਤਾ ਭੁਪਿੰਦਰ ਸਿੰਘ ਹੁੱਡਾ ਅਤੇ ਸੂਬਾ ਕਾਂਗਰਸ ਪ੍ਰਧਾਨ ਤੇ ਦਲਿਤ ਨੇਤਾ ਅਸ਼ੋਕ ਤੰਵਰ ਵਿਚਾਲੇ ਜਾਰੀ ਲੜਾਈ ਨੂੰ ਲੈ ਕੇ ਸ਼ਸ਼ੋਪੰਜ ਐਤਵਾਰ ਨੂੰ ਰੋਹਤਕ ’ਚ ਹੁੱਡਾ ਦੀ ਪਰਿਵਰਤਨ ਮਹਾਰੈਲੀ ਤੋਂ ਬਾਅਦ ਸ਼ਾਇਦ ਖਤਮ ਹੋ ਗਈ। ਹੁਣ ਇਹ ਅਫਵਾਹ ਹੈ ਕਿ ਸ਼ਨੀਵਾਰ ਨੂੰ ਹੁੱਡਾ ਨੇ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨਾਲ ਦਿੱਲੀ ਵਿਚ ਮੁਲਾਕਾਤ ਕੀਤੀ ਪਰ ਹੁੱਡਾ ਦੇ ਇਕ ਨਜ਼ਦੀਕੀ ਨੇ ਇਸ ਮੁਲਾਕਾਤ ਤੋਂ ਨਾਂਹ ਕਰਦਿਆਂ ਕਿਹਾ ਕਿ ਹੁੱਡਾ ਹੁਣ ਇਸ ਗੱਲ ’ਤੇ ਫੈਸਲਾ ਲੈਣਗੇ ਕਿ ਉਨ੍ਹਾਂ ਨੇ ਨਵੀਂ ਪਾਰਟੀ ਲਾਂਚ ਕਰਨੀ ਹੈ ਜਾਂ ਰਾਕਾਂਪਾ ’ਚ ਜਾਣਾ ਹੈ। ਹੁੱਡਾ ਦੇ ਸਮਰਥਕਾਂ ਨਾਲ ਸਾਬਕਾ ਮੁੱਖ ਮੰਤਰੀ ਨੂੰ ਕਾਂਗਰਸ ਛੱਡ ਕੇ ਨਵੀਂ ਪਾਰਟੀ ਬਣਾਉਣੀ ਚਾਹੀਦੀ ਹੈ ਪਰ ਹੁੱਡਾ ਨੇ ਕਿਹਾ ਸੀ ਕਿ ਉਹ ਇਸ ਬਾਰੇ ਰੈਲੀ ਦੌਰਾਨ ਗੱਲ ਕਰਨਗੇ। ਅਸ਼ੋਕ ਤੰਵਰ ਨਾਲ ਝਗੜੇ ਤੋਂ ਬਾਅਦ ਪਾਰਟੀ ਛੱਡ ਚੁੱਕੇ ਸਾਬਕਾ ਵਿਧਾਇਕ ਸੰਤ ਕੁਮਾਰ, ਜੋ ਹੁੱਡਾ ਦੇ ਕੱਟੜ ਸਮਰਥਕ ਹਨ, ਦਾ ਕਹਿਣਾ ਹੈ ਕਿ ਅਸੀਂ ਰਾਕਾਂਪਾ ਵਿਚ ਜਾ ਸਕਦੇ ਹਾਂ ਅਤੇ ਇਸ ਗੱਲ ਦੀਆਂ ਬਹੁਤ ਘੱਟ ਸੰਭਾਵਨਾਵਾਂ ਹਨ ਕਿ ਅਸੀਂ ਕਾਂਗਰਸ ’ਚ ਰਹੀਏ। ਅਸ਼ੋਕ ਤੰਵਰ ਦੇ ਨਾਲ ਮੱਤਭੇਦ ਤੋਂ ਬਾਅਦ ਵਿਧਾਇਕ ਅਹੁਦਾ ਛੱਡਣ ਵਾਲੇ ਜਯ ਤੀਰਥ ਦਹੀਆ ਨੇ ਹੁੱਡਾ ਅਤੇ ਉਨ੍ਹਾਂ ਦੇ ਸਮਰਥਕਾਂ ਨੂੰ ਅਣਡਿੱਠ ਕਰਨ ਲਈ ਗੁਲਾਮ ਨਬੀ ਆਜ਼ਾਦ ’ਤੇ ਦੋਸ਼ ਲਾਇਆ ਹੈ, ਜੋ ਹਰਿਆਣਾ ਦੇ ਇੰਚਾਰਜ ਹਨ। ਇਸ ਲਈ ਹੁਣ ਸਾਰੇ ਵਰਕਰ ਹੁੱਡਾ ’ਤੇ ਨਵੀਂ ਪਾਰਟੀ ਬਣਾਉਣ ਦਾ ਦਬਾਅ ਪਾ ਰਹੇ ਹਨ। ਹਾਲਾਂਕਿ ਰੈਲੀ ’ਚ ਬਹੁਤ ਸਾਰੇ ਪੋਸਟਰਾਂ ’ਚ ਸੋਨੀਆ ਗਾਂਧੀ, ਰਾਹੁਲ ਗਾਂਧੀ ਅਤੇ ਗੁਲਾਮ ਨਬੀ ਆਜ਼ਾਦ ਨੂੰ ਪ੍ਰਮੁੱਖਤਾ ਨਾਲ ਦਿਖਾਇਆ ਗਿਆ ਸੀ। ਇਹ ਵੀ ਚਰਚਾ ਹੈ ਕਿ ਜੇਕਰ ਭੁਪਿੰਦਰ ਸਿੰਘ ਹੁੱਡਾ ਪਾਰਟੀ ਛੱਡਦੇ ਹਨ ਤਾਂ ਵਰਿੰਦਰ ਸਿੰਘ ਅਤੇ ਰਾਓ ਇੰਦਰਜੀਤ ਸਿੰਘ ਕਾਂਗਰਸ ਵਿਚ ਵਾਪਿਸ ਆ ਸਕਦੇ ਹਨ।
ਪੱਛਮੀ ਬੰਗਾਲ ’ਚ ਟੀ. ਐੱਮ. ਸੀ. ਬਨਾਮ ਭਾਜਪਾ
ਹੁਣ ਟੀ. ਐੱਮ. ਸੀ. ਅਤੇ ਭਾਜਪਾ ਦੀ ਲੜਾਈ ਦਾ ਰੁਖ਼ ਦੁਰਗਾ ਪੂਜਾ ਕਮੇਟੀਆਂ ਵੱਲ ਮੁੜ ਗਿਆ ਹੈ। ਜ਼ਿਆਦਾਤਰ ਦੁਰਗਾ ਪੂਜਾ ਕਮੇਟੀਆਂ ਦਾ ਸੰਚਾਲਨ ਟੀ. ਐੱਮ. ਸੀ. ਦੇ ਮੈਂਬਰਾਂ ਅਤੇ ਨੇਤਾਵਾਂ ਵਲੋਂ ਕੀਤਾ ਜਾਂਦਾ ਹੈ। ਆਮਦਨ ਕਰ ਵਿਭਾਗ ਨੇ ਇਨ੍ਹਾਂ ਕਮੇਟੀਆਂ ਨੂੰ ਨੋਟਿਸ ਜਾਰੀ ਕਰ ਕੇ ਕਿਹਾ ਹੈ ਕਿ ਉਹ ਵਿਭਾਗ ਨੂੰ ਆਪਣੇ ਖਾਤਿਆਂ ਬਾਰੇ ਤੁਰੰਤ ਜਾਣਕਾਰੀ ਦੇਣ। ਇਸ ਤੋਂ ਬਾਅਦ ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਕਿਹਾ, ‘‘ਆਮਦਨ ਕਰ ਵਿਭਾਗ ਨੇ ਦੁਰਗਾ ਪੂਜਾ ਆਯੋਜਿਤ ਕਰਨ ਵਾਲੀਆਂ ਕਈ ਕਮੇਟੀਆਂ ਨੂੰ ਨੋਟਿਸ ਜਾਰੀ ਕਰ ਕੇ ਕਰ ਅਦਾ ਕਰਨ ਲਈ ਕਿਹਾ ਹੈ। ਸਾਨੂੰ ਆਪਣੇ ਸਾਰੇ ਰਾਸ਼ਟਰੀ ਤਿਉਹਾਰਾਂ ’ਤੇ ਮਾਣ ਹੈ।’’ ਟੀ. ਐੱਮ. ਸੀ. ਨੇ ਦੋਸ਼ ਲਾਇਆ ਕਿ ਭਾਜਪਾ ਪੈਸੇ ਦੇ ਖਰਚ ਦੇ ਮਾਮਲੇ ਵਿਚ ਉਨ੍ਹਾਂ ਨੂੰ ਡਰਾ-ਧਮਕਾ ਕੇ ਕਮੇਟੀਆਂ ’ਤੇ ਕੰਟਰੋਲ ਕਰਨਾ ਚਾਹੁੰਦੀ ਹੈ। ਭਾਜਪਾ ਨੇਤਾ ਰਾਹੁਲ ਸਿਨ੍ਹਾ ਦਾ ਦਾਅਵਾ ਹੈ ਕਿ ਟੀ. ਐੱਮ. ਸੀ. ਚਿੱਟਫੰਡ ਘਪਲੇ ਤੋਂ ਇਕੱਠਾ ਕੀਤਾ ਗਿਆ ਪੈਸਾ ਇਨ੍ਹਾਂ ਪੂਜਾ ਕਮੇਟੀਆਂ ਨੂੰ ਵੰਡ ਰਹੀ ਹੈ, ਜਦਕਿ ਟੀ. ਐੱਮ. ਸੀ. ਜਨਰਲ ਸਕੱਤਰ ਪਾਰਥ ਚੈਟਰਜੀ ਦਾ ਕਹਿਣਾ ਹੈ ਕਿ ਪੂਜਾ ਕਮੇਟੀਆਂ ਲਈ ਪੈਸਾ ਆਮ ਆਦਮੀ ਅਤੇ ਛੋਟੇ ਕਾਰੋਬਾਰੀਆਂ ਤੋਂ ਇਕੱਠਾ ਕੀਤਾ ਗਿਆ ਹੈ ਅਤੇ ਇਹ ਨਿੱਜੀ ਪੂਜਾ ਨਹੀਂ ਹੈ, ਜਿਸ ਦੇ ਲਈ ਆਮਦਨ ਕਰ ਵਿਭਾਗ ਨੋਟਿਸ ਜਾਰੀ ਕਰ ਰਿਹਾ ਹੈ। ਇਸ ਦੌਰਾਨ ਕੇਂਦਰੀ ਪ੍ਰਤੱਖ ਕਰ ਬੋਰਡ (ਸੀ. ਬੀ. ਡੀ. ਟੀ.) ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਸਾਰੀਆਂ ਖ਼ਬਰਾਂ ਗਲਤ ਹਨ ਅਤੇ ਦੁਰਗਾ ਪੂਜਾ ਕਮੇਟੀਆਂ ਨੂੰ ਕੋਈ ਨੋਟਿਸ ਜਾਰੀ ਨਹੀਂ ਕੀਤੇ ਗਏ।
ਕਾਂਗਰਸ ’ਚ ਪੁਰਾਣੇ ਘਾਗਾਂ ਦਾ ਦਬਦਬਾ
ਰਾਹੁਲ ਗਾਂਧੀ ਵਲੋਂ ਆਪਣਾ ਅਸਤੀਫਾ ਵਾਪਿਸ ਲੈਣ ਤੋਂ ਸਾਫ ਇਨਕਾਰ ਕਰਨ ਤੋਂ ਬਾਅਦ ਪਾਰਟੀ ਦੇ ਪੁਰਾਣੇ ਘਾਗਾਂ ਨੇ ਕਾਂਗਰਸ ਦਾ ਅੰਤ੍ਰਿਮ ਪ੍ਰਧਾਨ ਚੁਣਨ ਦੀ ਜੁਗਤ ਲਾ ਲਈ। ਪਾਰਟੀ ਦੇ ਸੀਨੀਅਰ ਨੇਤਾਵਾਂ ਅਹਿਮਦ ਪਟੇਲ ਅਤੇ ਗੁਲਾਮ ਨਬੀ ਆਜ਼ਾਦ ਨੂੰ ਇਹ ਸੰਦੇਸ਼ ਮਿਲਿਆ ਕਿ ਪਰਿਵਾਰ ਦਾ ਕੋਈ ਬਦਲ ਨਹੀਂ ਹੈ ਕਿਉਂਕਿ ਇਸ ਨਾਲ ਪਾਰਟੀ ਟੁੱਟ ਜਾਵੇਗੀ। ਹਾਲਾਂਕਿ ਰਾਹੁਲ ਗਾਂਧੀ ਨੇ ਵਿਸ਼ੇਸ਼ ਤੌਰ ’ਤੇ ਕਿਹਾ ਸੀ ਕਿ ਉਨ੍ਹਾਂ ਦੀ ਜਗ੍ਹਾ ਪਰਿਵਾਰ ਦਾ ਕੋਈ ਵੀ ਮੈਂਬਰ ਪਾਰਟੀ ਪ੍ਰਧਾਨ ਨਹੀਂ ਬਣੇਗਾ ਪਰ ਕਾਂਗਰਸ ਪਾਰਟੀ ਦੇ ਹਿੱਤ ਲਈ ਪ੍ਰਿਯੰਕਾ ਗਾਂਧੀ ਨੇ ਰਾਹੁਲ ਨੂੰ ਮਨਾ ਲਿਆ। ਇਸ ਤੋਂ ਪਹਿਲਾਂ ਮੁਕੁਲ ਵਾਸਨਿਕ ਅਤੇ ਮਲਿਕਾਰਜੁਨ ਖੜਗੇ ਦੇ ਨਾਂ ਸਾਹਮਣੇ ਆਏ ਸਨ ਪਰ ਕਿਸੇ ਵੀ ਮੈਂਬਰ ਨੇ ਉਨ੍ਹਾਂ ਦਾ ਪ੍ਰਸਤਾਵ ਨਹੀਂ ਕੀਤਾ ਸੀ। ਹਾਲਾਂਕਿ ਜਯੋਤਿਰਾਦਿੱਤਿਆ ਸਿੰਧੀਆ ਅਤੇ ਸਚਿਨ ਪਾਇਲਟ ਦੇ ਨਾਂ ਮੂੰਹ ਜ਼ੁਬਾਨੀ ਸੁਝਾਏ ਗਏ ਸਨ ਪਰ ਕਾਂਗਰਸ ਵਰਕਿੰਗ ਕਮੇਟੀ ’ਚ ਸਾਰੇ ਮੈਂਬਰਾਂ ਨੇ ਸੋਨੀਆ ਗਾਂਧੀ ਦਾ ਸਮਰਥਨ ਕੀਤਾ।
ਹਰਿਆਣਾ ਦੀ ਲੜਾਈ
ਹਰਿਆਣਾ ’ਚ ਐਤਵਾਰ ਦਾ ਦਿਨ ਕਾਫੀ ਸਿਆਸੀ ਗਹਿਮਾ-ਗਹਿਮੀ ਵਾਲਾ ਰਿਹਾ। ਇਸ ਦਿਨ ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟੜ ਨੇ 2100 ਕਿਲੋਮੀਟਰ ਲੰਮੀ ਸੜਕ ਯਾਤਰਾ (ਰੱਥ ਯਾਤਰਾ) ਸ਼ੁਰੂ ਕੀਤੀ ਅਤੇ ਸਾਬਕਾ ਮੁੱਖ ਮੰਤਰੀ ਭੁਪਿੰਦਰ ਸਿੰਘ ਹੁੱਡਾ ਨੇ ਵੀ ਰੈਲੀ ਦਾ ਆਯੋਜਨ ਕੀਤਾ। ਖੱਟੜ ਨੇ ਆਪਣੀ ਯਾਤਰਾ ਦਾ ਨਾਂ ‘ਆਸ਼ੀਰਵਾਦ ਯਾਤਰਾ’ ਰੱਖਿਆ, ਜਦਕਿ ਹੁੱਡਾ ਨੇ ਆਪਣੀ ਰੈਲੀ ਨੂੰ ‘ਪਰਿਵਰਤਨ ਮਹਾਰੈਲੀ’ ਦਾ ਨਾਂ ਦਿੱਤਾ। ਭਾਜਪਾ ਦੇ ਪ੍ਰਦੇਸ਼ ਪ੍ਰਧਾਨ ਸੁਭਾਸ਼ ਬਰਾਲਾ ਅਨੁਸਾਰ ਮੁੱਖ ਮੰਤਰੀ ਦੀ ਯਾਤਰਾ 5 ਪੜਾਵਾਂ ਵਿਚ ਆਯੋਜਿਤ ਹੋਵੇਗੀ ਅਤੇ ਹਰੇਕ ਪੜਾਅ 3 ਦਿਨਾਂ ਦਾ ਹੋਵੇਗਾ। ਇਹ ਯਾਤਰਾ ਕਾਲਕਾ ਤੋਂ ਸ਼ੁਰੂ ਹੋਈ, ਜੋ 8 ਸਤੰਬਰ ਨੂੰ ਰੋਹਤਕ ’ਚ ਖਤਮ ਹੋਵੇਗੀ। ਮੁੱਖ ਮੰਤਰੀ ਨੇ ਇਹ ਯਾਤਰਾ ਰੱਖਿਆ ਮੰਤਰੀ ਅਤੇ ਹੋਰ ਕੇਂਦਰੀ ਮੰਤਰੀਆਂ ਦੀ ਹਾਜ਼ਰੀ ’ਚ ਕਾਲੀ ਮੰਦਰ ਤੋਂ ਆਸ਼ੀਰਵਾਦ ਲੈ ਕੇ ਕਾਲਕਾ ਮੰਡੀ ਤੋਂ ਸ਼ੁਰੂ ਕੀਤੀ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 8 ਸਤੰਬਰ ਨੂੰ ਰੈਲੀ ਨੂੰ ਸੰਬੋਧਨ ਕਰ ਸਕਦੇ ਹਨ। ਹਰਿਆਣਾ ’ਚ ਅਕਤੂਬਰ ਵਿਚ ਚੋਣਾਂ ਹੋਣੀਆਂ ਹਨ, ਜਿਸ ਦੇ ਲਈ ਭਾਜਪਾ ਆਪਣੀਆਂ ਸੀਟਾਂ ਵਧਾਉਣਾ ਚਾਹੁੰਦੀ ਹੈ, ਜਦਕਿ ਕਾਂਗਰਸ ਆਪਣਾ ਗੁਆਚਿਆ ਹੋਇਆ ਜਨ-ਆਧਾਰ ਵਾਪਿਸ ਹਾਸਿਲ ਕਰਨ ਲਈ ਸੰਘਰਸ਼ਸ਼ੀਲ ਹੈ। ਹੁਣ ਦੇਖਣਾ ਇਹ ਹੈ ਕਿ ਕੀ ਹੁੱਡਾ (ਜਾਟ) ਕਾਂਗਰਸ ਨਾਲ ਜਾਂਦੇ ਹਨ ਜਾਂ ਅਪ੍ਰਤੱਖ ਤੌਰ ’ਤੇ ਭਾਜਪਾ ਦਾ ਸਮਰਥਨ ਕਰਦੇ ਹਨ?
ਭਾਰਤ ਨੇ ਅੰਦਰੂਨੀ ਸੰਘਰਸ਼ਾਂ ’ਚ ਗੁਆਏ ਜ਼ਿਆਦਾ ਜਵਾਨ
NEXT STORY 
