ਸਪੈਸ਼ਲ ਨਾਰਕੋਟਿਕਸ ਡਰੱਗਜ਼ ਐਂਡ ਸਾਈਕੋਟ੍ਰਾਪਿਕ ਸਬਸਟੈਂਸ ਐਕਟ ਦੇ ਤਹਿਤ ਅਦਾਲਤ ਨੇ ਆਈ. ਪੀ. ਐੱਸ. ਅਧਿਕਾਰੀ ਅਤੇ ਸਾਬਕਾ ਡੀ. ਆਈ. ਜੀ. ਸਾਜੀ ਮੋਹਨ ਨੂੰ 15 ਸਾਲ ਕੈਦ ਦੀ ਸਜ਼ਾ ਸੁਣਵਾਈ ਹੈ। ਇਹ ਸਜ਼ਾ ਉਸ ਨੂੰ 2009 'ਚ ਨਾਜਾਇਜ਼ ਤੌਰ 'ਤੇ 37 ਕਿਲੋ ਹੈਰੋਇਨ ਰੱਖਣ ਲਈ ਸੁਣਾਈ ਗਈ।
1995 ਬੈਚ ਦੇ ਆਈ. ਪੀ. ਐੱਸ. ਅਧਿਕਾਰੀ ਨੂੰ ਵਿਸ਼ੇਸ਼ ਜੱਜ ਐੱਮ. ਐੱਸ. ਮੁੰਗਲੇ ਨੇ ਇਹ ਕਹਿੰਦਿਆਂ ਦੋਸ਼ੀ ਕਰਾਰ ਦਿੱਤਾ ਕਿ ਉਹ ਬਹੁਤ ਪੜ੍ਹਿਆ-ਲਿਖਿਆ ਇਕ ਆਈ. ਪੀ. ਐੱਸ. ਅਧਿਕਾਰੀ ਸੀ। ਉਹ ਨਾਰਕੋਟਿਕਸ ਕੰਟਰੋਲ ਬਿਊਰੋ, ਚੰਡੀਗੜ੍ਹ ਦਾ ਜ਼ੋਨਲ ਡਾਇਰੈਕਟਰ ਸੀ ਅਤੇ ਖ਼ੁਦ ਡਰੱਗਜ਼ ਦੀ ਨਾਜਾਇਜ਼ ਸਮੱਗਲਿੰਗ ਵਿਚ ਸ਼ਾਮਿਲ ਸੀ।
ਅਦਾਲਤ ਨੇ ਸਾਜੀ ਦੇ ਬਾਡੀਗਾਰਡ ਰਾਜੇਸ਼ ਕੁਮਾਰ ਕਟਾਰੀਆ ਨੂੰ ਵੀ ਹੈਰੋਇਨ ਰੱਖਣ ਦੇ ਦੋਸ਼ 'ਚ 10 ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ। ਇਸ ਕੇਸ 'ਚ ਤੀਜਾ ਦੋਸ਼ੀ ਵਿੱਕੀ ਓਬਰਾਏ ਸੀ। ਗ੍ਰਿਫਤਾਰੀ ਤੋਂ ਕੁਝ ਮਹੀਨਿਆਂ ਬਾਅਦ ਉਹ ਏ. ਟੀ. ਐੱਸ. ਦਾ ਅਪਰੂਵਰ ਬਣ ਗਿਆ ਸੀ, ਇਸ ਲਈ ਕੋਰਟ ਨੇ ਉਸ ਨੂੰ ਬਰੀ ਕਰ ਦਿੱਤਾ।
ਡਰੱਗਜ਼ ਦੇ ਮਾਮਲੇ 'ਚ ਪਿਛਲੇ ਦਿਨੀਂ ਸਾਜੀ ਮੋਹਨ ਨੂੰ ਇਹ ਦੂਜੀ ਸਜ਼ਾ ਦਿੱਤੀ ਗਈ। ਇਸ ਤੋਂ ਪਹਿਲਾਂ 2013 'ਚ ਚੰਡੀਗੜ੍ਹ ਦੀ ਇਕ ਅਦਾਲਤ ਨੇ ਉਸ ਨੂੰ ਡਰੱਗਜ਼ ਵੇਚਣ ਲਈ 13 ਸਾਲ ਦੀ ਸਖ਼ਤ ਕੈਦ ਦੀ ਸਜ਼ਾ ਸੁਣਾਈ ਸੀ। ਇਸ ਤੋਂ ਇਲਾਵਾ ਉਸ ਨੂੰ ਭ੍ਰਿਸ਼ਟਾਚਾਰ ਦੇ ਇਕ ਮਾਮਲੇ ਵਿਚ 5 ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ। ਮੂਲ ਤੌਰ 'ਤੇ ਕੇਰਲ ਦਾ ਰਹਿਣ ਵਾਲਾ ਸਾਜੀ ਮੋਹਨ ਜੰਮੂ-ਕਸ਼ਮੀਰ ਕੇਡਰ ਦਾ ਆਈ. ਪੀ. ਐੱਸ. ਅਧਿਕਾਰੀ ਸੀ। ਬਾਅਦ ਵਿਚ ਉਸ ਦੀ ਨਿਯੁਕਤੀ ਚੰਡੀਗੜ੍ਹ ਵਿਚ ਐਂਟੀ ਨਾਰਕੋਟਿਕਸ ਕੰਟਰੋਲ ਬਿਊਰੋ 'ਚ ਜ਼ੋਨਲ ਡਾਇਰੈਕਟਰ ਵਜੋਂ ਹੋਈ ਸੀ ਅਤੇ ਜਿਸ ਸਮੇਂ ਉਸ ਦੀ ਗ੍ਰਿਫਤਾਰੀ ਹੋਈ, ਉਹ ਈ. ਡੀ. ਵਿਚ ਤਾਇਨਾਤ ਸੀ।
ਸਜ਼ਾ ਤੋਂ ਇਲਾਵਾ ਜੁਰਮਾਨਾ
ਦੋਸ਼ੀ ਵਿਰੁੱਧ ਮੁੱਖ ਗਵਾਹ ਸ਼ਹਿਰ ਦਾ ਇਕ ਕਾਰੋਬਾਰੀ ਵਿੱਕੀ ਓਬਰਾਏ (68) ਬਣਿਆ। ਵਿੱਕੀ ਵੀ ਇਸ ਕੇਸ 'ਚ ਸਹਿ-ਦੋਸ਼ੀ ਸੀ। ਸਾਜੀ ਮੋਹਨ ਅਤੇ ਕਟਾਰੀਆ ਵਿਰੁੱਧ ਓਬਰਾਏ ਦੇ ਬਿਆਨ ਨੂੰ ਸਵੀਕਾਰ ਕਰਦਿਆਂ ਅਦਾਲਤ ਨੇ ਉਸ ਨੂੰ ਬਰੀ ਕਰ ਦਿੱਤਾ। ਅਦਾਲਤ ਨੇ ਮੋਹਨ ਅਤੇ ਕਟਾਰੀਆ ਨੂੰ ਕੈਦ ਦੇ ਨਾਲ ਹੀ ਜੁਰਮਾਨਾ ਵੀ ਲਾਇਆ। ਇਸ ਦੇ ਤਹਿਤ ਸਾਜੀ ਮੋਹਨ ਨੂੰ 1.5 ਲੱਖ ਅਤੇ ਰਾਜੇਸ਼ ਕੁਮਾਰ ਨੂੰ 1 ਲੱਖ ਰੁਪਏ ਦਾ ਜੁਰਮਾਨਾ ਲਾਇਆ ਗਿਆ।
25 ਕਿਲੋ ਹੋਰ ਹੈਰੋਇਨ ਮਿਲੀ
24 ਜਨਵਰੀ 2009 ਨੂੰ ਸਾਜੀ ਮੋਹਨ ਨੂੰ 12 ਕਿਲੋ ਹੈਰੋਇਨ ਦੇ 12 ਪੈਕੇਟ ਰੱਖਣ ਦੇ ਦੋਸ਼ 'ਚ ਗ੍ਰਿਫਤਾਰ ਕੀਤਾ ਗਿਆ ਸੀ। ਜਾਂਚ ਦੌਰਾਨ ਉਸ ਕੋਲੋਂ 25 ਕਿੱਲੋ ਹੋਰ ਹੈਰੋਇਨ ਫੜੀ। ਸਾਜੀ ਦੀ ਗ੍ਰਿਫਤਾਰੀ ਤੋਂ ਇਕ ਹਫਤਾ ਪਹਿਲਾਂ ਵਿੱਕੀ ਅਤੇ ਰਾਜੇਸ਼ ਨੂੰ ਪੁਲਸ ਨੇ ਓਸ਼ੀਵਾੜਾ ਤੋਂ ਫੜਿਆ ਸੀ। ਦੋਹਾਂ ਕੋਲੋਂ 1.85 ਕਿੱਲੋ ਹੈਰੋਇਨ ਬਰਾਮਦ ਕੀਤੀ ਸੀ। ਦੋਹਾਂ ਦੀ ਭੂਮਿਕਾ ਦੀ ਜਾਂਚ ਦੌਰਾਨ ਸਾਜੀ ਮੋਹਨ ਦਾ ਨਾਂ ਸਾਹਮਣੇ ਆਇਆ ਸੀ।
ਅਦਾਲਤ ਨੇ ਸਾਜੀ ਮੋਹਨ ਦੀ ਪਿਛਲੀ ਸਜ਼ਾ ਦਾ ਸੰਦਰਭ ਦਿੱਤਾ ਅਤੇ ਐੱਨ. ਡੀ. ਪੀ. ਐੱਸ. ਐਕਟ ਦੇ ਤਹਿਤ ਉਸ ਨੂੰ 15 ਸਾਲ ਦੀ ਵਧੀ ਹੋਈ ਸਜ਼ਾ ਸੁਣਾਈ। ਮੋਹਨ ਅਤੇ ਕਟਾਰੀਆ ਜਿਥੇ ਜੇਲ 'ਚ ਬੰਦ ਹਨ, ਉਥੇ ਹੀ ਵਿੱਕੀ ਨੂੰ ਸਿਹਤ ਦੇ ਆਧਾਰ 'ਤੇ ਹਾਈਕੋਰਟ ਨੇ ਜ਼ਮਾਨਤ ਦੇ ਦਿੱਤੀ ਸੀ। ਵਿਸ਼ੇਸ਼ ਪਬਲਿਕ ਪ੍ਰਾਸੀਕਿਊਟਰ ਅਵਧੂਤ ਚਿਮਾਲਕਰ ਨੇ ਕਿਹਾ ਕਿ ਦੋਸ਼ੀ ਨੂੰ ਵੱਧ ਤੋਂ ਵੱਧ ਸਜ਼ਾ ਮਿਲਣੀ ਸਹੀ ਹੈ ਕਿਉਂਕਿ ਉਹ ਕਾਨੂੰਨ ਲਾਗੂ ਕਰਨ ਵਾਲੀ ਏਜੰਸੀ ਦਾ ਹਿੱਸਾ ਹੋਣ ਦੇ ਬਾਵਜੂਦ ਡਰੱਗਜ਼ ਵੇਚਣ ਵਰਗੀਆਂ ਸਰਗਰਮੀਆਂ ਵਿਚ ਸ਼ਾਮਿਲ ਸੀ।
ਪਰਿਵਾਰ ਬਰਬਾਦ ਹੋ ਗਿਆ
ਅਦਾਲਤ ਨੇ ਸਾਜੀ ਮੋਹਨ ਨੂੰ ਸਜ਼ਾ ਸੁਣਾਉਣ ਤੋਂ ਪਹਿਲਾਂ ਪੁੱਛਿਆ ਕਿ ਉਸ ਨੇ ਕੁਝ ਕਹਿਣਾ ਹੈ, ਤਾਂ ਉਸ ਨੇ ਕਿਹਾ, ''ਮੇਰੀ ਮਾਂ ਦੀ ਮੌਤ ਹੋ ਚੁੱਕੀ ਹੈ। ਮੇਰੇ ਪਿਤਾ ਬਹੁਤ ਬੀਮਾਰ ਰਹਿੰਦੇ ਹਨ। ਉਨ੍ਹਾਂ ਨੂੰ ਕੁਝ ਯਾਦ ਨਹੀਂ ਰਹਿੰਦਾ। ਮੇਰਾ ਪਰਿਵਾਰ ਬਰਬਾਦ ਹੋ ਗਿਆ ਹੈ। ਮਨੁੱਖੀ ਆਧਾਰ 'ਤੇ ਮੈਨੂੰ ਘੱਟ ਤੋਂ ਘੱਟ ਸਜ਼ਾ ਦਿੱਤੀ ਜਾਵੇ।'' (ਮੁੰ. ਮਿ.)
ਸ਼ੱਕ-ਰਹਿਤ ਅਤੇ ਸਥਿਰ ਬੁੱਧੀ ਵਾਲੀ ਸ਼ਖਸੀਅਤ ਸਨ ਅਰੁਣ ਜੇਤਲੀ
NEXT STORY