ਸਪੋਰਟਸ ਡੈਸਕ : ਵੈਨਕੂਵਰ ਚੈਂਪੀਅਨਜ਼ ਲੀਗ ਮੈਚ ਦੌਰਾਨ ਵਿਨੀਸੀਅਸ ਜੂਨੀਅਰ ਖਿਲਾਫ ਕੀਤੀ ਗਈ ਕਥਿਤ ਨਸਲੀ ਟਿੱਪਣੀ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਕੌਮਾਂਤਰੀ ਫੁੱਟਬਾਲ ਸੰਘ ਬੋਰਡ (ਆਈ. ਐੱਫ. ਏ. ਬੀ.) ਨੇ ਇਕ ਨਵੇਂ ਨਿਯਮ ਨੂੰ ਮਨਜ਼ੂਰੀ ਦਿੱਤੀ ਹੈ, ਜਿਸ ਨਾਲ ਖਿਡਾਰੀਆਂ ਨੂੰ ਦੂਜੇ ਖਿਡਾਰੀ ਨਾਲ ਮੌਖਿਕ ਬਹਿਸ ਕਰਦੇ ਸਮੇਂ ਮੂੰਹ ਢੱਕਣ ’ਤੇ ਲਾਲ ਕਾਰਡ ਨਾਲ ਸਜ਼ਾ ਦਿੱਤੀ ਜਾਵੇਗੀ।
ਬ੍ਰਿਟਿਸ਼ ਕੋਲੰਬੀਆ ਦੇ ਵੈਨਕੂਵਰ ’ਚ ਮੰਗਲਵਾਰ ਨੂੰ ਹੋਈ ਮੀਟਿੰਗ ’ਚ ਆਈ. ਐੱਫ. ਏ. ਬੀ. ਨੇ ਸਰਵਸੰਮਤੀ ਨਾਲ ਇਸ ਨਿਯਮ ਨੂੰ ਮਨਜ਼ੂਰੀ ਦਿੱਤੀ। ਇਹ ਨਿਯਮ 11 ਜੂਨ ਤੋਂ ਸ਼ੁਰੂ ਹੋਣ ਵਾਲੇ ਵਿਸ਼ਵ ਕੱਪ ਫੁੱਟਬਾਲ ’ਚ ਲਾਗੂ ਹੋਵੇਗਾ। ਵਿਸ਼ਵ ਫੁੱਟਬਾਲ ਦੀ ਸਰਵੋਤਮ ਸੰਸਥਾ ਫੀਫਾ ਨੇ ਇਸ ਨਿਯਮ ਦਾ ਪ੍ਰਸਤਾਵ ਤਦ ਰੱਖਿਆ ਸੀ ਜਦੋਂ ਰੀਅਲ ਮੈਡ੍ਰਿਡ ਦੇ ਵਿਨੀਸੀਅਸ ਜੂਨੀਅਰ ਨੇ ਫਰਵਰੀ ’ਚ ਚੈਂਪੀਅਨਜ਼ ਲੀਗ ਮੈਚ ਦੌਰਾਨ ਬੇਨਫਿਕਾ ਦੇ ਜਿਆਨਲੁਕਾ ਪ੍ਰੇਸਟੀਆਨੀ ’ਤੇ ਮੂੰਹ ਢੱਕ ਕੇ ਨਸਲੀ ਟਿੱਪਣੀ ਕਰਨ ਦਾ ਦੋਸ਼ ਲਾਇਆ ਸੀ। ਯੂਰਪੀ ਫੁੱਟਬਾਲ ਦੀ ਸਰਵੋਤਮ ਸੰਸਥਾ ਯੂ. ਈ. ਐੱਫ. ਏ. ਨੇ ਪਿਛਲੇ ਹਫਤੇ ਪ੍ਰੇਸਟੀਆਨੀ ’ਤੇ 6 ਮੈਚਾਂ ਦੀ ਪਾਬੰਦੀ ਲਾ ਦਿੱਤੀ ਸੀ। ਜੇਕਰ ਪ੍ਰੇਸਟੀਆਨੀ ਨੂੰ ਅਰਜਨਟੀਨਾ ਦੀ ਵਿਸ਼ਵ ਕੱਪ ਟੀਮ ’ਚ ਚੁਣਿਆ ਜਾਂਦਾ ਹੈ ਤਾਂ ਉਸ ਨੂੰ ਪਹਿਲੇ 2 ਮੈਚਾਂ ਤੋਂ ਬਾਹਰ ਰਹਿਣਾ ਪੈ ਸਕਦਾ ਹੈ। ਇਸ ਪਾਬੰਦੀ ਦੇ ਖਿਲਾਫ ਹਾਲਾਂਕਿ ਅਪੀਲ ਕੀਤੀ ਜਾ ਸਕਦੀ ਹੈ। ਆਈ. ਐੱਫ. ਏ. ਬੀ. ਨੇ ਬਿਆਨ ’ਚ ਕਿਹਾ, ‘‘ਕਿਸੇ ਵਿਰੋਧੀ ਖਿਡਾਰੀ ਦੇ ਖਿਲਾਫ ਬਹਿਸ ਦੌਰਾਨ ਮੂੰਹ ਢੱਕਣ ਵਾਲੇ ਕਿਸੇ ਵੀ ਖਿਡਾਰੀ ਨੂੰ ਲਾਲ ਕਾਰਡ ਨਾਲ ਸਜ਼ਾ ਦਿੱਤੀ ਜਾ ਸਕਦੀ ਹੈ।’’
ਕੌਮਾਂਤਰੀ ਫੁੱਟਬਾਲ ਦੇ ਨਿਯਮ ਤੈਅ ਕਰਨ ਵਾਲੀ ਸੰਸਥਾ ਨੇ ਇਹ ਵੀ ਐਲਾਨ ਕੀਤਾ ਕਿ ਰੈਫਰੀ ਦੇ ਫੈਸਲੇ ਦੇ ਵਿਰੋਧ ’ਚ ਮੈਦਾਨ ਛੱਡਣ ਵਾਲੇ ਕਿਸੇ ਵੀ ਖਿਡਾਰੀ ਨੂੰ ਲਾਲ ਕਾਰਡ ਦਿਖਾਇਆ ਜਾ ਸਕਦਾ ਹੈ। ਇਹ ਨਿਯਮ ਉਨ੍ਹਾਂ ਟੀਮ ਅਧਿਕਾਰੀਆਂ ’ਤੇ ਵੀ ਲਾਗੂ ਹੋਵੇਗਾ ਜਿਹੜੇ ਖਿਡਾਰੀਆਂ ਨੂੰ ਮੈਦਾਨ ਛੱਡਣ ਲਈ ਕਹਿੰਦੇ ਹਨ।
ਆਈ. ਐੱਫ. ਏ. ਬੀ. ਨੇ ਕਿਹਾ ਕਿ ਇਨ੍ਹਾਂ ਸੋਧਾਂ ਬਾਰੇ ਅਮਰੀਕਾ, ਕੈਨੇਡਾ ਤੇ ਮੈਕਸੀਕੋ ’ਚ ਹੋਣ ਵਾਲੇ ਵਿਸ਼ਵ ਕੱਪ ’ਚ ਹਿੱਸਾ ਲੈਣ ਵਾਲੀਆਂ ਸਾਰੀਆਂ 48 ਟੀਮਾਂ ਨੂੰ ਦੱਸ ਦਿੱਤਾ ਜਾਵੇਗਾ। ਇਸ ਦੇ ਨਾਲ ਹੀ ਫੀਫਾ ਨੇ ਵਿਸ਼ਵ ਕੱਪ ਦੇ ਯੈਲੋ ਕਾਰਡ ਸਬੰਧੀ ਨਿਯਮਾਂ ’ਚ ਬਦਲਾਅ ਕੀਤਾ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਮਹੱਤਵਪੂਰਨ ਮੈਚਾਂ ਲਈ ਘੱਟ ਖਿਡਾਰੀਆਂ ਨੂੰ ਮੁਅੱਤਲ ਕੀਤਾ ਜਾਵੇ। ਨਵੇਂ ਨਿਯਮ ਅਨੁਸਾਰ ਵਿਸ਼ਵ ਕੱਪ ਦੌਰਾਨ ਕਿਸੇ ਖਿਡਾਰੀ ਨੂੰ ਮਿਲਿਆ ਯੈਲੋ ਕਾਰਡ ਦੋ ਵਾਰ ਉਸ ਦੇ ਰਿਕਾਰਡ ਤੋਂ ਹਟਾ ਦਿੱਤਾ ਜਾਵੇਗਾ।
ਫੀਫਾ ਨੇ ਇਕ ਬਿਆਨ ’ਚ ਕਿਹਾ, ‘‘ਫੀਫਾ ਕੌਂਸਲ ਨੇ ਫੀਫਾ ਵਿਸ਼ਵ ਕੱਪ 2026 ਦੇ ਨਿਯਮਾਂ ’ਚ ਇਕ ਸੋਧ ਕੀਤੀ ਹੈ, ਜਿਸ ਅਨੁਸਾਰ ਕਿਸੇ ਖਿਡਾਰੀ ਨੂੰ ਗਰੁੱਪ ਪੜਾਅ ’ਚ ਮਿਲਿਆ ਇਕ ਯੈਲੋ ਕਾਰਡ ਨਾਕਆਊਟ ਪੜਾਅ ’ਚ ਮਾਨਤਾ ਪ੍ਰਾਪਤ ਨਹੀਂ ਹੋਵੇਗਾ। ਇਸੇ ਤਰ੍ਹਾਂ ਕੁਆਰਟਰ ਫਾਈਨਲ ’ਚ ਮਿਲਿਆ ਇਕ ਯੈਲੋ ਕਾਰਡ ਅਗਲੇ ਮੈਚਾਂ ਲਈ ਮਾਨਤਾ ਪ੍ਰਾਪਤ ਨਹੀਂ ਹੋਵੇਗਾ।’’
ਵਿਸ਼ਵ ਕੱਪ ’ਚ ਇਸ ਤੋਂ ਪਹਿਲਾਂ ਜੇਕਰ ਕਿਸੇ ਖਿਡਾਰੀ ਨੂੰ ਦੋ ਵੱਖ-ਵੱਖ ਮੈਚਾਂ ’ਚ ਯੈਲੋ ਕਾਰਡ ਦਿਖਾਇਆ ਜਾਂਦਾ ਸੀ ਤਾਂ ਉਸ ਨੂੰ ਇਕ ਮੈਚ ਦੀ ਪਾਬੰਦੀ ਝੱਲਣੀ ਪੈਂਦੀ ਸੀ ਪਰ ਪਿਛਲੇ ਟੂਰਨਾਮੈਂਟਾਂ ਦੇ ਕੁਆਰਟਰ ਫਾਈਨਲ ਪੜਾਅ ਤੋਂ ਬਾਅਦ ਇਕ ਯੈਲੋ ਕਾਰਡ ਨੂੰ ਰੱਦ ਕਰ ਦਿੱਤਾ ਜਾਂਦਾ ਸੀ। ਇਸ ਨਾਲ ਇਹ ਯਕੀਨੀ ਹੋ ਗਿਆ ਕਿ ਸੈਮੀਫਾਈਨਲ ’ਚ ਯੈਲੋ ਕਾਰਡ ਮਿਲਣ ਦੇ ਕਾਰਨ ਕਿਸੇ ਵੀ ਖਿਡਾਰੀ ਨੂੰ ਫਾਈਨਲ ਤੋਂ ਬਾਹਰ ਨਹੀਂ ਹੋਣਾ ਪਵੇਗਾ।
ਨੋਟ - ਇਸ ਖ਼ਬਰ ਬਾਰੇ ਕੁਮੈਂਟ ਬਾਕਸ ਵਿਚ ਦਿਓ ਆਪਣੀ ਰਾਏ।
ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt
ਜੋਡਾਰ ਨੇ ਸਿਨਰ ਦੇ ਨਾਲ ਮੈਡ੍ਰਿਡ ਦਾ ਬਲਾਕਬਸਟਰ ਮੁਕਾਬਲਾ ਕੀਤਾ ਤੈਅ
NEXT STORY 
