ਸਪੋਰਟਸ ਡੈਸਕ — ਭਾਰਤੀ ਪਹਿਲਵਾਨ ਨਿਸ਼ਾ ਦਹੀਆ ਆਪਣੇ ਸੱਜੇ ਹੱਥ 'ਚ ਸੱਟ ਕਾਰਨ ਆਪਣੀ ਸ਼ੁਰੂਆਤੀ ਬੜ੍ਹਤ ਨੂੰ ਬਰਕਰਾਰ ਨਹੀਂ ਰੱਖ ਸਕੀ ਅਤੇ ਸੋਮਵਾਰ ਨੂੰ ਮਹਿਲਾਵਾਂ ਦੇ 68 ਕਿਲੋ ਵਰਗ ਕੁਸ਼ਤੀ ਮੁਕਾਬਲੇ ਦੇ ਕੁਆਰਟਰ ਫਾਈਨਲ 'ਚ ਉੱਤਰੀ ਕੋਰੀਆ ਦੀ ਪਾਕ ਸੋਲ ਗਮ ਤੋਂ ਹਾਰ ਗਈ। ਸੋਲ ਗਮ ਨੇ ਨਿਸ਼ਾ ਨੂੰ 10-8 ਨਾਲ ਹਰਾਇਆ।
ਏਸ਼ਿਆਈ ਚੈਂਪੀਅਨਸ਼ਿਪ ਦੀ ਚਾਂਦੀ ਤਗ਼ਮਾ ਜੇਤੂ ਪਹਿਲਵਾਨ ਨਿਸ਼ਾ ਨੇ ਪਹਿਲੇ ਕੁਝ ਸਕਿੰਟਾਂ ਵਿੱਚ ਹੀ ਉੱਤਰੀ ਕੋਰੀਆਈ ਪਹਿਲਵਾਨ ਖ਼ਿਲਾਫ਼ 4-0 ਦੀ ਬੜ੍ਹਤ ਬਣਾ ਲਈ। ਇਸ ਤੋਂ ਬਾਅਦ ਉਸ ਨੇ ਤਿੰਨ ਮਿੰਟ ਦੇ ਸ਼ੁਰੂਆਤੀ ਸਮੇਂ 'ਚ ਰੱਖਿਆਤਮਕ ਰਵੱਈਆ ਅਪਣਾਉਂਦੇ ਹੋਏ ਉੱਤਰੀ ਕੋਰੀਆਈ ਪਹਿਲਵਾਨ ਨੂੰ ਕੋਈ ਮੌਕਾ ਨਹੀਂ ਦਿੱਤਾ। ਸੋਲ ਗਮ ਨੇ ਦੂਜੇ ਪੀਰੀਅਡ ਦੀ ਸ਼ੁਰੂਆਤ ਹਮਲਾਵਰ ਢੰਗ ਨਾਲ ਕੀਤੀ ਅਤੇ ਇਕ ਅੰਕ ਹਾਸਲ ਕੀਤਾ ਪਰ ਨਿਸ਼ਾ ਨੇ ਰਿੰਗ ਤੋਂ ਆਪਣੀ ਲੀਡ ਨੂੰ 6-1 ਕਰ ਦਿੱਤਾ। ਉਸ ਨੇ ਦੋ ਹੋਰ ਅੰਕ ਲੈ ਕੇ ਆਪਣੀ ਬੜ੍ਹਤ ਮਜ਼ਬੂਤ ਕੀਤੀ ਪਰ ਇਸ ਦੌਰਾਨ ਉਸ ਦਾ ਸੱਜਾ ਹੱਥ ਗੰਭੀਰ ਜ਼ਖ਼ਮੀ ਹੋ ਗਿਆ। ਮੈਚ ਵਿੱਚ ਅਜੇ ਇੱਕ ਮਿੰਟ ਬਾਕੀ ਸੀ ਅਤੇ ਨਿਸ਼ਾ ਦਰਦ ਨਾਲ ਚੀਕਣ ਲੱਗੀ। ਉਸ ਨੇ ਇਲਾਜ ਤੋਂ ਬਾਅਦ ਖੇਡ ਮੁੜ ਸ਼ੁਰੂ ਕਰ ਦਿੱਤੀ ਪਰ ਉੱਤਰੀ ਕੋਰੀਆਈ ਪਹਿਲਵਾਨ ਨੂੰ ਰੋਕਣ ਵਿੱਚ ਕਾਮਯਾਬ ਨਹੀਂ ਹੋ ਸਕੀ। ਉਹ ਨਮ ਅੱਖਾਂ ਨਾਲ ਮੈਟ ਤੋਂ ਹੇਠਾਂ ਉਤਰ ਗਈ।
ਇਸ ਤੋਂ ਪਹਿਲਾਂ ਇਸ 25 ਸਾਲਾ ਪਹਿਲਵਾਨ ਨੇ ਆਖਰੀ 16 ਦੇ ਮੈਚ ਵਿੱਚ ਯੂਕਰੇਨ ਦੀ ਟੈਟੀਆਨਾ ਸੋਵਾ ਖ਼ਿਲਾਫ਼ ਜੇਤੂ ਸ਼ੁਰੂਆਤ ਕੀਤੀ ਸੀ। ਨਿਸ਼ਾ ਨੇ ਯੂਕਰੇਨ ਦੀ ਪਹਿਲਵਾਨ ਨੂੰ 6-4 ਨਾਲ ਹਰਾਇਆ। ਨਿਸ਼ਾ ਸ਼ੁਰੂਆਤ 'ਚ ਟੈਟੀਆਨਾ ਤੋਂ ਪਿੱਛੇ ਰਹੀ ਪਰ 4-4 'ਤੇ ਟਾਈ ਹੋਣ ਤੋਂ ਬਾਅਦ ਉਸ ਨੇ ਆਖਰੀ ਕੁਝ ਸਕਿੰਟਾਂ 'ਚ ਟੈਟੀਆਨਾ ਨੂੰ ਮੈਟ ਤੋਂ ਬਾਹਰ ਕੱਢ ਕੇ ਦੋ ਅੰਕਾਂ ਨਾਲ ਜਿੱਤ ਦਰਜ ਕੀਤੀ।
Paris Olympics : 'ਲਕਸ਼ਯ' ਤੋਂ ਖੁੰਝੇ ਲਕਸ਼ਯ, ਬੈਡਮਿੰਟਨ ਪੁਰਸ਼ ਸਿੰਗਲਜ਼ 'ਚ ਲੀ ਤੋਂ ਮਿਲੀ ਹਾਰ
NEXT STORY 
