ਭਾਰਤ ਵਿੱਚ ਟ੍ਰਾਂਸਪੋਰਟ ਸਿਸਟਮ ਲਗਾਤਾਰ ਬਦਲ ਰਿਹਾ ਹੈ। ਵਧਦੀ ਆਬਾਦੀ, ਟ੍ਰੈਫਿਕ ਦੀਆਂ ਉਲਝਣਾਂ ਅਤੇ ਤੇਜ਼ੀ ਨਾਲ ਵਧ ਰਹੀਆਂ ਡਿਜੀਟਲ ਸੇਵਾਵਾਂ ਨੇ ਸਫ਼ਰ ਕਰਨ ਦੇ ਤਰੀਕਿਆਂ ਨੂੰ ਨਵਾਂ ਰੂਪ ਦਿੱਤਾ ਹੈ। ਪਿਛਲੇ ਕੁਝ ਸਾਲਾਂ ਵਿੱਚ ਐਪ-ਅਧਾਰਿਤ ਟੈਕਸੀ ਸੇਵਾਵਾਂ ਨੇ ਲੋਕਾਂ ਦੇ ਸਫ਼ਰ ਨੂੰ ਆਸਾਨ ਬਣਾਇਆ ਹੈ, ਪਰ ਇਨ੍ਹਾਂ ਦੇ ਨਾਲ ਕਈ ਚੁਣੌਤੀਆਂ ਵੀ ਸਾਹਮਣੇ ਆਈਆਂ ਹਨ। ਇਨ੍ਹਾਂ ਚੁਣੌਤੀਆਂ ਦਾ ਹੱਲ ਲੱਭਣ ਦੀ ਦਿਸ਼ਾ ਵਿੱਚ 'ਭਾਰਤ ਟੈਕਸੀ' (ਸਹਿਕਾਰ ਟੈਕਸੀ ਕੋਆਪਰੇਟਿਵ ਲਿਮਟਿਡ) ਇੱਕ ਨਵੀਂ ਪਹਿਲ ਦੇ ਰੂਪ ਵਿੱਚ ਸਾਹਮਣੇ ਆਈ ਹੈ।
ਭਾਰਤ ਟੈਕਸੀ ਇੱਕ ਸਹਿਕਾਰੀ-ਅਧਾਰਿਤ ਰਾਸ਼ਟਰੀ ਟੈਕਸੀ ਬੁਕਿੰਗ ਸੇਵਾ ਹੈ। ਇਸ ਯੋਜਨਾ ਦੀ ਪਹਿਲ ਮਾਰਚ 2025 ਵਿੱਚ ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਅਮਿਤ ਸ਼ਾਹ ਜੀ ਵੱਲੋਂ ਕੀਤੀ ਗਈ ਸੀ ਅਤੇ ਇਸ ਦਾ ਰਸਮੀ ਉਦਘਾਟਨ 5 ਫਰਵਰੀ 2026 ਨੂੰ ਕੀਤਾ ਗਿਆ। ਇਸ ਪਹਿਲ ਦਾ ਮਕਸਦ ਟੈਕਸੀ ਸੇਵਾ ਦੇ ਖੇਤਰ ਵਿੱਚ ਪਾਰਦਰਸ਼ਤਾ ਵਧਾਉਣਾ, ਡਰਾਈਵਰਾਂ ਨੂੰ ਆਰਥਿਕ ਤੌਰ 'ਤੇ ਮਜ਼ਬੂਤ ਬਣਾਉਣਾ ਅਤੇ ਮੁਸਾਫ਼ਰਾਂ ਨੂੰ ਭਰੋਸੇਮੰਦ ਤੇ ਸਸਤੀ ਸੇਵਾ ਦੇਣਾ ਹੈ। ਇਹ ਪ੍ਰੋਜੈਕਟ ਮਾਨਯੋਗ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜੀ ਦੇ "ਸਹਿਕਾਰ ਤੋਂ ਖੁਸ਼ਹਾਲੀ" ਦੇ ਵਿਚਾਰ ਤੋਂ ਪ੍ਰੇਰਿਤ ਹੈ, ਜਿਸ ਵਿੱਚ ਸਹਿਕਾਰੀ ਸੰਸਥਾਵਾਂ ਰਾਹੀਂ ਆਰਥਿਕ ਵਿਕਾਸ ਅਤੇ ਸਮਾਜਿਕ ਸਸ਼ਕਤੀਕਰਨ ਨੂੰ ਹੁਲਾਰਾ ਦੇਣ ਦੀ ਕਲਪਨਾ ਕੀਤੀ ਗਈ ਹੈ।
ਭਾਰਤ ਦੇ ਟੈਕਸੀ ਸੇਵਾ ਖੇਤਰ ਦੀਆਂ ਚੁਣੌਤੀਆਂ ਭਾਰਤ ਵਿੱਚ ਡਿਜੀਟਲ ਪਲੇਟਫਾਰਮ ਅਧਾਰਿਤ ਟੈਕਸੀ ਸੇਵਾਵਾਂ ਪਿਛਲੇ ਦਹਾਕੇ ਵਿੱਚ ਤੇਜ਼ੀ ਨਾਲ ਫੈਲੀਆਂ ਹਨ। ਵੱਡੇ ਸ਼ਹਿਰਾਂ ਵਿੱਚ ਲੱਖਾਂ ਲੋਕ ਰੋਜ਼ਾਨਾ ਇਨ੍ਹਾਂ ਸੇਵਾਵਾਂ ਦੀ ਵਰਤੋਂ ਕਰਦੇ ਹਨ। ਹਾਲਾਂਕਿ ਇਨ੍ਹਾਂ ਪਲੇਟਫਾਰਮਾਂ ਨੇ ਸਫ਼ਰ ਨੂੰ ਵਧੇਰੇ ਸੁਵਿਧਾਜਨਕ ਬਣਾਇਆ ਹੈ, ਪਰ ਟੈਕਸੀ ਡਰਾਈਵਰਾਂ ਅਤੇ ਮੁਸਾਫ਼ਰਾਂ ਦੋਵਾਂ ਨੂੰ ਕਈ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
ਇਨ੍ਹਾਂ ਵਿੱਚ ਮੁੱਖ ਸਮੱਸਿਆਵਾਂ ਹਨ:
-ਪਲੇਟਫਾਰਮ ਕੰਪਨੀਆਂ ਵੱਲੋਂ ਜ਼ਿਆਦਾ ਕਮਿਸ਼ਨ ਵਸੂਲਣਾ।
-ਸਰਜ ਪ੍ਰਾਈਸਿੰਗ ਕਾਰਨ ਕਿਰਾਏ ਵਿੱਚ ਅਚਾਨਕ ਵਾਧਾ।
-ਡਰਾਈਵਰਾਂ ਦੀ ਕਮਾਈ ਵਿੱਚ ਅਨਿਸ਼ਚਿਤਤਾ।
-ਫੈਸਲੇ ਲੈਣ ਦੀ ਪ੍ਰਕਿਰਿਆ ਵਿੱਚ ਡਰਾਈਵਰਾਂ ਦੀ ਸੀਮਤ ਭਾਗੀਦਾਰੀ।
ਇਨ੍ਹਾਂ ਸਮੱਸਿਆਵਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਸਹਿਕਾਰਤਾ 'ਤੇ ਅਧਾਰਿਤ ਇੱਕ ਨਵੇਂ ਸਿਸਟਮ ਦੀ ਲੋੜ ਮਹਿਸੂਸ ਕੀਤੀ ਗਈ, ਜਿਸ ਨਾਲ ਡਰਾਈਵਰ ਅਤੇ ਗਾਹਕ ਦੋਵਾਂ ਨੂੰ ਵੱਧ ਫਾਇਦਾ ਹੋ ਸਕੇ। ਸਹਿਕਾਰੀ ਮਾਡਲ ਦਾ ਸੰਕਲਪ ਭਾਰਤ ਟੈਕਸੀ ਨੂੰ ਇੱਕ ਬਹੁ-ਰਾਜੀ ਸਹਿਕਾਰੀ ਸੰਸਥਾ ਵਜੋਂ ਸਥਾਪਿਤ ਕੀਤਾ ਗਿਆ ਹੈ। ਇਸ ਦਾ ਮਤਲਬ ਹੈ ਕਿ ਇਸ ਪਲੇਟਫਾਰਮ ਨੂੰ ਕੋਈ ਪ੍ਰਾਈਵੇਟ ਕੰਪਨੀ ਨਹੀਂ ਬਲਕਿ ਇੱਕ ਸਹਿਕਾਰੀ ਢਾਂਚੇ ਰਾਹੀਂ ਚਲਾਇਆ ਜਾਵੇਗਾ। ਇਸ ਮਾਡਲ ਵਿੱਚ ਟੈਕਸੀ ਡਰਾਈਵਰ ਸਿਰਫ਼ ਸੇਵਾ ਦੇਣ ਵਾਲੇ ਹੀ ਨਹੀਂ ਹੋਣਗੇ, ਸਗੋਂ ਉਹ ਇਸ ਸਿਸਟਮ ਦੇ ਸਹਿ-ਮਾਲਕ ਵੀ ਬਣਨਗੇ।
ਇਸ ਪਹਿਲ ਨੂੰ ਭਾਰਤ ਦੀਆਂ ਮੁੱਖ ਸਹਿਕਾਰੀ ਸੰਸਥਾਵਾਂ ਦਾ ਸਮਰਥਨ ਹਾਸਲ ਹੈ, ਜਿਹਨਾਂ ਵਿੱਚ ਅਮੂਲ, ਇਫਕੋ, ਨਬਾਰਡ, ਨਫੇਡ ਅਤੇ ਕ੍ਰਿਭਕੋ ਵਰਗੀਆਂ ਸੰਸਥਾਵਾਂ ਸ਼ਾਮਲ ਹਨ। ਇਨ੍ਹਾਂ ਸੰਸਥਾਵਾਂ ਦੀ ਸ਼ਮੂਲੀਅਤ ਇਸ ਪ੍ਰੋਜੈਕਟ ਨੂੰ ਇੱਕ ਮਜ਼ਬੂਤ ਸਹਿਕਾਰੀ ਅਧਾਰ ਦਿੰਦੀ ਹੈ ਅਤੇ ਇਸਨੂੰ ਦੇਸ਼ ਦੀ ਸਹਿਕਾਰੀ ਪਰੰਪਰਾ ਨਾਲ ਜੋੜਦੀ ਹੈ।
ਡਰਾਈਵਰ ਹੋਣਗੇ ‘ਸਾਰਥੀ’ ਭਾਰਤ ਟੈਕਸੀ ਨਾਲ ਜੁੜੇ ਡਰਾਈਵਰਾਂ ਨੂੰ “ਸਾਰਥੀ” ਕਿਹਾ ਜਾਵੇਗਾ। ਇਸ ਨਾਮ ਦੇ ਪਿੱਛੇ ਇਹ ਵਿਚਾਰ ਹੈ ਕਿ ਡਰਾਈਵਰ ਸਿਰਫ਼ ਗੱਡੀ ਚਲਾਉਣ ਵਾਲਾ ਵਿਅਕਤੀ ਨਹੀਂ, ਸਗੋਂ ਮੁਸਾਫ਼ਰਾਂ ਨੂੰ ਸੁਰੱਖਿਅਤ ਅਤੇ ਭਰੋਸੇਮੰਦ ਸਫ਼ਰ ਕਰਵਾਉਣ ਵਾਲਾ ਮਾਰਗਦਰਸ਼ਕ ਵੀ ਹੈ। ਸਾਰਥੀਆਂ ਨੂੰ ਕਈ ਤਰ੍ਹਾਂ ਦੇ ਲਾਭ ਦਿੱਤੇ ਜਾਣਗੇ, ਜਿਵੇਂ-
-ਸਹਿਕਾਰੀ ਮੈਂਬਰਸ਼ਿਪ ਰਾਹੀਂ ਮਾਲਕੀ ਦਾ ਹੱਕ।
-ਕਮਿਸ਼ਨ-ਫ੍ਰੀ ਕਮਾਈ ਦਾ ਮਾਡਲ।
-ਸਹਿਕਾਰੀ ਕਰਜ਼ੇ ਅਤੇ ਬੀਮਾ ਯੋਜਨਾਵਾਂ।
-ਹੁਨਰ ਵਿਕਾਸ ਅਤੇ ਡਿਜੀਟਲ ਟ੍ਰੇਨਿੰਗ।
-ਸਾਲਾਨਾ ਮੁਨਾਫ਼ੇ (Dividend) ਵਿੱਚ ਹਿੱਸੇਦਾਰੀ।
-ਇਸ ਵਿਵਸਥਾ ਨਾਲ ਡਰਾਈਵਰਾਂ ਦੀ ਆਮਦਨ ਵਿੱਚ ਸਥਿਰਤਾ ਆਵੇਗੀ ਅਤੇ ਉਨ੍ਹਾਂ ਨੂੰ ਆਪਣੇ ਕੰਮ 'ਤੇ ਵਧੇਰੇ ਕੰਟਰੋਲ ਵੀ ਮਿਲੇਗਾ।
ਮੁਸਾਫ਼ਰਾਂ ਲਈ ਫਾਇਦੇ
ਭਾਰਤ ਟੈਕਸੀ ਦਾ ਟੀਚਾ ਮੁਸਾਫ਼ਰਾਂ ਨੂੰ ਸੁਰੱਖਿਅਤ, ਸਸਤੀ ਅਤੇ ਭਰੋਸੇਮੰਦ ਟ੍ਰਾਂਸਪੋਰਟ ਸੇਵਾ ਦੇਣਾ ਹੈ। ਮੁਸਾਫ਼ਰਾਂ ਨੂੰ ਸਿਖਲਾਈ ਪ੍ਰਾਪਤ ਅਤੇ ਵੈਰੀਫਾਈ ਕੀਤੇ ਹੋਏ ਡਰਾਈਵਰਾਂ ਨਾਲ ਸਫ਼ਰ ਕਰਨ ਦਾ ਮੌਕਾ ਮਿਲੇਗਾ। ਦਿੱਲੀ ਵਿੱਚ ਇਸ ਸੇਵਾ ਦੇ ਪਾਇਲਟ ਫੇਜ਼ ਦੌਰਾਨ ਹਵਾਈ ਅੱਡਿਆਂ, ਬੱਸ ਅੱਡਿਆਂ ਅਤੇ ਰੇਲਵੇ ਸਟੇਸ਼ਨਾਂ ਵਰਗੀਆਂ ਮੁੱਖ ਥਾਵਾਂ 'ਤੇ ਪ੍ਰੀਪੇਡ ਰਾਈਡ ਬੁਕਿੰਗ ਬੂਥ ਬਣਾਏ ਗਏ ਹਨ। ਇਨ੍ਹਾਂ ਬੂਥਾਂ 'ਤੇ ਮੁਸਾਫ਼ਰਾਂ ਨੂੰ ਤੁਰੰਤ ਬੁਕਿੰਗ ਅਤੇ ਮਦਦ ਮਿਲੇਗੀ। ਇਸ ਤੋਂ ਇਲਾਵਾ ਸੁਰੱਖਿਆ ਲਈ ਨਿਗਰਾਨੀ ਸਿਸਟਮ ਅਤੇ ਐਮਰਜੈਂਸੀ ਸਹਾਇਤਾ ਦੀ ਸਹੂਲਤ ਵੀ ਉਪਲਬਧ ਹੈ।
ਮਹਿਲਾ ਸੁਰੱਖਿਆ ਅਤੇ ਸਸ਼ਕਤੀਕਰਨ
ਮਹਿਲਾ ਮੁਸਾਫ਼ਰਾਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਭਾਰਤ ਟੈਕਸੀ ਨੇ ਇੱਕ ਖਾਸ ਪਹਿਲ ਸ਼ੁਰੂ ਕੀਤੀ ਹੈ, ਜਿਸ ਵਿੱਚ ਔਰਤਾਂ ਨੂੰ ਮਹਿਲਾ ਡਰਾਈਵਰ ਚੁਣਨ ਦਾ ਵਿਕਲਪ ਮਿਲੇਗਾ। ਇਸ ਯੋਜਨਾ ਦੇ ਤਹਿਤ ਮਹਿਲਾ ਡਰਾਈਵਰਾਂ ਨੂੰ ਟ੍ਰੇਨਿੰਗ, ਮਾਲੀ ਮਦਦ ਅਤੇ ਇਲੈਕਟ੍ਰਿਕ ਵਾਹਨਾਂ ਦੀ ਸਹੂਲਤ ਦਿੱਤੀ ਜਾਵੇਗੀ। ਸ਼ੁਰੂਆਤੀ ਪੜਾਅ ਵਿੱਚ ਦਿੱਲੀ ਅਤੇ ਕੁਝ ਹੋਰ ਰਾਜਾਂ ਵਿੱਚ ਮਹਿਲਾ ਡਰਾਈਵਰਾਂ ਨੂੰ ਇਲੈਕਟ੍ਰਿਕ ਸਕੂਟਰ ਦਿੱਤੇ ਜਾ ਰਹੇ ਹਨ। ਭਵਿੱਖ ਵਿੱਚ ਇਸ ਪ੍ਰੋਗਰਾਮ ਨੂੰ ਵਧਾ ਕੇ ਹੋਰ ਮਹਿਲਾ ਡਰਾਈਵਰਾਂ ਨੂੰ ਇਸ ਸੇਵਾ ਨਾਲ ਜੋੜਨ ਦੀ ਯੋਜਨਾ ਹੈ।
ਸਭ ਦੀ ਪਹੁੰਚ ਵਾਲੀ ਟ੍ਰਾਂਸਪੋਰਟ ਵਿਵਸਥਾ
ਭਾਰਤ ਟੈਕਸੀ ਦਾ ਮਕਸਦ ਸਿਰਫ਼ ਵਪਾਰਕ ਸੇਵਾ ਦੇਣਾ ਨਹੀਂ, ਸਗੋਂ ਸਮਾਜ ਦੇ ਸਾਰੇ ਵਰਗਾਂ ਨੂੰ ਸੌਖੀ ਟ੍ਰਾਂਸਪੋਰਟ ਮੁਹੱਈਆ ਕਰਵਾਉਣਾ ਵੀ ਹੈ। ਦਿਵਿਆਂਗ ਮੁਸਾਫ਼ਰਾਂ ਲਈ ਖਾਸ ਤੌਰ 'ਤੇ ਤਿਆਰ ਕੀਤੀਆਂ ਗੱਡੀਆਂ ਹੋਣਗੀਆਂ, ਜਿਨ੍ਹਾਂ ਵਿੱਚ ਰੈਂਪ ਅਤੇ ਹੋਰ ਸਹੂਲਤਾਂ ਹੋਣਗੀਆਂ। ਵਿਦਿਆਰਥੀਆਂ ਅਤੇ ਘੱਟ ਆਮਦਨ ਵਾਲੇ ਮੁਸਾਫ਼ਰਾਂ ਲਈ ਰਿਆਇਤੀ ਕਿਰਾਏ ਦਾ ਪ੍ਰਬੰਧ ਵੀ ਕੀਤਾ ਜਾਵੇਗਾ।
ਲੱਖਾਂ ਸਫ਼ਰਾਂ ਨਾਲ ਵਧਦਾ ਭਾਰਤ ਟੈਕਸੀ ਨੈੱਟਵਰਕ
ਮੌਜੂਦਾ ਸਮੇਂ ਵਿੱਚ ਭਾਰਤ ਟੈਕਸੀ ਪਲੇਟਫਾਰਮ ਨਾਲ ਲਗਭਗ 4 ਲੱਖ ਡਰਾਈਵਰ (ਸਾਰਥੀ) ਜੁੜ ਚੁੱਕੇ ਹਨ, ਜੋ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਇਸ ਸੇਵਾ ਨੂੰ ਅੱਗੇ ਵਧਾ ਰਹੇ ਹਨ। ਇਹ ਗਿਣਤੀ ਦਰਸਾਉਂਦੀ ਹੈ ਕਿ ਸਹਿਕਾਰੀ ਮਾਡਲ ਪ੍ਰਤੀ ਡਰਾਈਵਰਾਂ ਦਾ ਭਰੋਸਾ ਲਗਾਤਾਰ ਵਧ ਰਿਹਾ ਹੈ। ਇਸ ਦੇ ਨਾਲ ਹੀ ਹੁਣ ਤੱਕ 23.06 ਲੱਖ ਤੋਂ ਵੱਧ ਮੁਸਾਫ਼ਰ ਇਸ ਪਲੇਟਫਾਰਮ ਰਾਹੀਂ ਜੁੜ ਚੁੱਕੇ ਹਨ। ਇਸ ਤੋਂ ਸਾਫ਼ ਹੈ ਕਿ ਭਾਰਤ ਟੈਕਸੀ ਹੌਲੀ-ਹੌਲੀ ਟ੍ਰਾਂਸਪੋਰਟ ਵਿੱਚ ਇੱਕ ਭਰੋਸੇਮੰਦ ਵਿਕਲਪ ਵਜੋਂ ਉੱਭਰ ਰਹੀ ਹੈ।
ਭਵਿੱਖ ਦੀਆਂ ਸੰਭਾਵਨਾਵਾਂ
ਭਾਰਤ ਟੈਕਸੀ ਦੀ ਸ਼ੁਰੂਆਤ ਦਿੱਲੀ ਵਿੱਚ ਪਾਇਲਟ ਪ੍ਰੋਜੈਕਟ ਵਜੋਂ ਕੀਤੀ ਗਈ ਹੈ। ਆਉਣ ਵਾਲੇ ਸਮੇਂ ਵਿੱਚ ਇਸ ਨੂੰ ਦੇਸ਼ ਦੇ ਹੋਰ ਮਹਾਂਨਗਰਾਂ ਅਤੇ ਰਾਜਾਂ ਵਿੱਚ ਵਧਾਉਣ ਦੀ ਯੋਜਨਾ ਹੈ। ਇਸ ਪਹਿਲ ਦਾ ਟੀਚਾ ਲੱਖਾਂ ਡਰਾਈਵਰਾਂ ਨੂੰ ਸਹਿਕਾਰੀ ਢਾਂਚੇ ਨਾਲ ਜੋੜਨਾ ਅਤੇ ਸ਼ਹਿਰੀ ਟ੍ਰਾਂਸਪੋਰਟ ਨੂੰ ਵਧੇਰੇ ਪਾਰਦਰਸ਼ੀ ਅਤੇ ਸਥਿਰ ਬਣਾਉਣਾ ਹੈ।
ਸਿੱਟਾ
ਭਾਰਤ ਟੈਕਸੀ ਭਾਰਤ ਦੇ ਸ਼ਹਿਰੀ ਟ੍ਰਾਂਸਪੋਰਟ ਖੇਤਰ ਵਿੱਚ ਇੱਕ ਨਵੀਂ ਦਿਸ਼ਾ ਨੂੰ ਦਰਸਾਉਂਦੀ ਹੈ। ਇਹ ਸਹਿਕਾਰੀ ਕਦਰਾਂ-ਕੀਮਤਾਂ ਅਤੇ ਆਧੁਨਿਕ ਤਕਨੀਕ ਦੇ ਸੁਮੇਲ ਨਾਲ ਇੱਕ ਅਜਿਹਾ ਮਾਡਲ ਪੇਸ਼ ਕਰਦੀ ਹੈ ਜਿਸ ਵਿੱਚ ਡਰਾਈਵਰ, ਮੁਸਾਫ਼ਰ ਅਤੇ ਸਮਾਜ, ਤਿੰਨਾਂ ਨੂੰ ਫਾਇਦਾ ਹੋ ਸਕਦਾ ਹੈ। ਜੇਕਰ ਇਹ ਪਹਿਲ ਪੂਰੇ ਦੇਸ਼ ਵਿੱਚ ਸਫਲਤਾਪੂਰਵਕ ਲਾਗੂ ਹੁੰਦੀ ਹੈ, ਤਾਂ ਇਹ ਨਾ ਸਿਰਫ਼ ਟੈਕਸੀ ਉਦਯੋਗ ਦੇ ਢਾਂਚੇ ਨੂੰ ਬਦਲ ਸਕਦੀ ਹੈ ਬਲਕਿ ਸਹਿਕਾਰਤਾ ਅਧਾਰਿਤ ਆਰਥਿਕ ਮਾਡਲ ਨੂੰ ਵੀ ਮਜ਼ਬੂਤ ਬਣਾ ਸਕਦੀ ਹੈ।
-ਡਾ. ਆਸ਼ੀਸ਼ ਕੁਮਾਰ ਭੂਟਾਨੀ
ਸਕੱਤਰ (ਸਹਿਕਾਰਤਾ)
ਅਮਰੀਕਾ ਈਰਾਨ ਵਿਰੁੱਧ ਆਪਣੀ ਜੰਗ ਦੀ ਸਭ ਤੋਂ ਵੱਡੀ ‘ਤ੍ਰਾਸਦੀ’ ਨੂੰ ਸਮਝਣ ’ਚ ਖੁੰਝ ਗਿਆ
NEXT STORY 
