ਸਾਮਰਾਜੀਆਂ ਦੇ ਸਰਗਨੇ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀਆਂ ਧੱਕੇਸ਼ਾਹੀ ’ਤੇ ਆਧਾਰਿਤ ਅਮਾਨਵੀ ਤੇ ਅਸਮਾਜਿਕ ਕਾਰਵਾਈਆਂ ਸਿਖਰਾਂ ਛੂਹ ਗਈਆਂ ਹਨ। ਅਮਰੀਕੀ ਸਾਮਰਾਜ ਦੀ ਸ਼ਹਿ ’ਤੇ ਇਜ਼ਰਾਈਲ ਵਲੋਂ ਗਾਜ਼ਾ ’ਚ ਕੀਤੀ ਗਈ ਫ਼ਲਸਤੀਨੀਆਂ ਦੀ ਬਰਬਰਤਾ ਭਰਪੂਰ ਨਸਲਕੁਸ਼ੀ ਦੇ ਅੱਲ੍ਹੇ ਜ਼ਖ਼ਮ ਅਜੇ ਤਾਈਂ ਵੀ ਰਿਸ ਰਹੇ ਹਨ। ਹੁਣ ਅਮਰੀਕਨ ਫੌਜਾਂ ਨੇ ਧੱਕੇਸ਼ਾਹੀ ਦੀਆਂ ਸਾਰੀਆਂ ਹੱਦਾਂ ਪਾਰ ਕਰਦਿਆਂ ਰਾਤ ਦੇ ਹਨੇਰੇ ’ਚ ਡਕੈਂਤਾਂ ਵਾਂਗ ਘੁੱਗ ਵੱਸਦੇ ਪ੍ਰਭੂਸੱਤਾ ਸੰਪੰਨ ਤੇ ਆਜ਼ਾਦ ਦੇਸ਼ ਵੈਨੇਜ਼ੁਏਲਾ ’ਤੇ ਚੜ੍ਹਾਈ ਕੀਤੀ ਹੈ। ਇਹੋ ਨਹੀਂ ਅਮਰੀਕੀ ਫੌਜ ਤੇ ਪੁਲਸ ਨੇ ਵੈਨੇਜ਼ੁਏਲਾ ਦੇ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਤੇ ਉਸਦੀ ਧਰਮਪਤਨੀ ਨੂੰ ਬੈੱਡਰੂਮ ’ਚੋਂ ਅਪਰਾਧੀਆਂ ਦੀ ਤਰ੍ਹਾਂ ਘੜੀਸ ਕੇ ਬਾਹਰ ਕੱਢਣ ਤੇ ਅਗਵਾ ਕਰ ਕੇ ਅਮਰੀਕਾ ਲਿਆਉਣ ਪਿਛੋਂ ਉੱਥੋਂ ਦੀਆਂ ਸੜਕਾਂ ’ਤੇ ਬੇਇਜ਼ਤ ਕਰ ਕੇ ਘੁੰਮਾਉਣ ਦੀ ਸਿਰੇ ਦੀ ਹਿਮਾਕਤ ਵੀ ਕੀਤੀ ਹੈ।
ਅਜਿਹਾ ਕਰ ਕੇ ਅਮਰੀਕਾ ਨੇ ਸੰਸਾਰ ਦੇ ਸਾਰੇ ਸਥਾਪਤ ਨਿਯਮ-ਕਾਨੂੰਨਾਂ, ਯੂ. ਐੱਨ. ਓ. ਵੱਲੋਂ ਤੈਅ ਕੀਤੀਆਂ ਸਹਿਹੋਂਦ ਦੀਆਂ ਸ਼ਰਤਾਂ ਤੇ ਅਮਨ-ਅਮਾਨ ਨਾਲ ਘੁੱਗ ਵੱਸਦੇ ਸੰਸਾਰ ਦੇ ਹਰ ਦੇਸ਼ ਦੀ ਪ੍ਰਭੂਸੱਤਾ ਤੇ ਆਜ਼ਾਦੀ ਦਾ ਸਨਮਾਨ ਕਰਨ ਦੀਆਂ ਕਦਰਾਂ-ਕੀਮਤਾਂ ਨੂੰ ਛਿੱਕੇ ਟੰਗਿਆ ਹੈ। ਉੱਪਰੋਂ ਟਰੰਪ ਵਲੋਂ ਬੜੇ ਘੁਮੰਡੀ ਭਰੇ ਢੰਗ ਨਾਲ ਦਿੱਤਾ ਬਿਆਨ ਕਿ ‘ਵੈਨੇਜ਼ੁਏਲਾ ਹੁਣ ਉਸੇ ਦੇ ਹੁਕਮਾਂ ਅਨੁਸਾਰ ਚੱਲੇਗਾ ਤੇ ਉਥੋਂ ਦੇ ਤੇਲ ਦੀ ਮਾਲਕੀ ਅਮਰੀਕਾ ਦੀ ਹੋਵੇਗੀ’, ਦਰਸਾਉਂਦਾ ਹੈ ਕਿ ਸਾਮਰਾਜ ਅਜੋਕੇ ਸਮੇਂ ਕਿੰਨਾ ਨਿਰੰਕੁਸ਼, ਲਾਲਚੀ ਤੇ ਜ਼ਾਲਮ ਬਣ ਗਿਆ ਹੈ। ਟਰੰਪ ਵੱਲੋਂ ਡੈਨਮਾਰਕ ਦੇ ਅਟੁੱਟ ਅੰਗ ਗ੍ਰੀਨਲੈਂਡ, ਈਰਾਨ, ਕਿਊਬਾ, ਕੋਲੰਬੀਆ ਤੇ ਮੈਕਸੀਕੋ ਆਦਿ ਦੇਸ਼ਾਂ ਨੂੰ ਆਪਣਾ ਅਗਲਾ ਨਿਸ਼ਾਨਾ ਐਲਾਨਣਾ ਸਿੱਧ ਕਰਦਾ ਹੈ ਕਿ ਸੱਤਾ ਦੇ ਨਸ਼ੇ ’ਚ ਚੂਰ ਮਦਮਸਤ ਹਾਥੀ ਵਾਂਗ ਬੇਕਾਬੂ ਹੋਏ ਸਾਮਰਾਜੀ ਧਾੜਵੀ ਆਪਣੇ ਹਿੱਤ ਪੂਰਨ ਲਈ ਕਿਸ ਹੱਦ ਤੱਕ ਵਹਿਸ਼ੀ ਬਣ ਸਕਦੇ ਹਨ। ਭਾਵੇਂ ਇਸ ਮਨਮਾਨੀ ਦਾ ਨਤੀਜਾ ਤੀਸਰਾ ਵਿਸ਼ਵ ਯੁੱਧ ਹੋ ਸਕਦਾ ਹੈ।
ਸਾਮਰਾਜੀਏ, ਆਪਣੀਆਂ ਇਨ੍ਹਾਂ ਆਪਹੁਦਰੀਆਂ ਨੂੰ ਹੱਕੀ ਸਿੱਧ ਕਰਨ ਲਈ ਅਕਸਰ ਆਪਣੇ ਹਮਲੇ ਦਾ ਸ਼ਿਕਾਰ ਬਣੇ ਦੇਸ਼ਾਂ ਅੰਦਰ ਤਾਨਾਸ਼ਾਹੀ ਨਿਜ਼ਾਮ ਹੋਣ, ਨਸ਼ਿਆਂ ਦਾ ਕਾਰੋਬਾਰ ਚੱਲਦਾ ਹੋਣ ਜਾਂ ਮਾਰੂ ਜੰਗੀ ਹਥਿਆਰਾਂ ਦੇ ਭੰਡਾਰ ਰੱਖਣ ਵਰਗੇ ਝੂਠੇ ਇਲਜ਼ਾਮਾਂ ਦਾ ਸਹਾਰਾ ਲੈਂਦੇ ਹਨ। ਹੁਣ ਵੀ ਟਰੰਪ ਨੇ ਵੈਨੇਜ਼ੁਏਲਾ ਦੇ ਸਦਰ ਦੇ ਸਿਰ ਨਸ਼ਾ ਕਾਰੋਬਾਰੀ ਹੋਣ ਦਾ ਦੋਸ਼ ਮੜ੍ਹਿਆ ਹੈ। ਜਦ ਕਿ ਹਕੀਕਤ ’ਚ ਅਜਿਹਾ ਕੁਝ ਨਾ ਪਹਿਲਾਂ ਹੁੰਦਾ ਸੀ ਤੇ ਨਾ ਹੀ ਹੁਣ ਐਸੀ ਕੋਈ ਗੱਲ ਹੈ। ਸੱਚ ਤਾਂ ਇਹ ਹੈ ਕਿ ਦੁਨੀਆ ਦੇ ਸਭ ਤੋਂ ਵੱਡੇ ਤਾਨਾਸ਼ਾਹ, ਅਮਰੀਕੀ ਸਾਮਰਾਜ ਕੋਲ ਅਤਿਅੰਤ ਖਤਰਨਾਕ ਤੇ ਮਾਰੂ ਜੰਗੀ ਹਥਿਆਰਾਂ ਦਾ ਅਮੁੱਕ ਖਜ਼ਾਨਾ ਹੈ। ਟਰੰਪ ਦੇ ਕਰੂਰ ਤਾਨਾਸ਼ਾਹ ਹੋਣ ਦਾ ਸਭ ਤੋਂ ਵੱਡਾ ਪ੍ਰਮਾਣ, ਉਸ ਦੀਆਂ ਜਮਹੂਰੀਅਤ ਵਿਰੋਧੀ ਨੀਤੀਆਂ ਖਿਲਾਫ਼ ਲੱਖਾਂ ਅਮਰੀਕੀਆਂ ਵਲੋਂ ‘ਨੋ ਕਿੰਗ’ ਦੇ ਨਾਅਰੇ ਬੁਲੰਦ ਕਰਦਿਆਂ ਸੜਕਾਂ ’ਤੇ ਉਤਰਨ ਤੋਂ ਬਾਖੂਬੀ ਮਿਲ ਗਿਆ ਹੈ। ਅਜਿਹਾ ਹਮਲਾਵਰ ਦੇਸ਼, ਕਿਸੇ ਦੂਜੇ ਦੇਸ਼ ਬਾਰੇ ਗੈਰ ਜਮਹੂਰੀ ਤੇ ਖਤਰਨਾਕ ਮੁਲਕ ਹੋਣ ਦਾ ਫਤਵਾ ਕਿਸ ਮੂੰਹ ਨਾਲ ਜਾਰੀ ਕਰ ਸਕਦਾ ਹੈ? ਇਹ ਗੱਲ ਠੀਕ ਹੈ ਕਿ ਕਈ ਦੇਸ਼ਾਂ, ਖਾਸ ਕਰ ਕੇ ਧਰਮ ਅਾਧਾਰਤ ਰਾਜ ਪ੍ਰਬੰਧ ਵਾਲੇ ਮੁਲਕਾਂ ਅੰਦਰ ਗੈਰ-ਜਮਹੂਰੀ ਨਿਜ਼ਾਮ ਮੌਜੂਦ ਹਨ। ਪ੍ਰੰਤੂ ਅਜਿਹੇ ਤਾਨਾਸ਼ਾਹ ਸ਼ਾਸਕਾਂ ਵਿਰੁੱਧ ਅੰਦੋਲਨ ਕਰ ਕੇ ਜਮਹੂਰੀਅਤ ਬਹਾਲ ਕਰਨੀ, ਮੂਲ ਰੂਪ ’ਚ ਉਥੋਂ ਦੇ ਲੋਕਾਂ ਦੀ ਜ਼ਿੰਮੇਵਾਰੀ ਹੈ। ਇਨ੍ਹਾਂ ਦੇਸ਼ਾਂ ’ਚ ਲੋਕਰਾਜ ਦੀ ਬਹਾਲੀ ਦਾ ਜਿੰਮਾ ਅਤਿਅੰਤ ਘਟੀਆ ਦਰਜੇ ਦੇ ਸਨਕੀ, ਸੱਤਾ ਦੇ ਨਸ਼ੇ ’ਚ ਪਾਗਲਪਨ ਦੀ ਹੱਦ ਤੱਕ ਹੰਕਾਰੀ ਹੋ ਚੁੱਕੇ ਟਰੰਪ ਜਿਹੇ ਵਿਅਕਤੀ ਨੂੰ ਕਤਈ ਨਹੀਂ ਦਿੱਤਾ ਜਾ ਸਕਦਾ। ਜੋ ਸੱਤਾ ਦੇ ਨਸ਼ੇ ’ਚ ਪਾਗਲਾਂ ਦੀ ਹੱਦ ਤਕ ਘੁਮੰਡੀ ਹੋ ਗਿਆ ਹੈ।
ਉਂਝ, ਆਪਣੇ ਦੇਸ਼ ਦੇ ਹਿੱਤ ਪੂਰਨ ’ਤੇ ਵਿਸ਼ਵ ਦੇ ਸਾਰੇ ਦੇਸ਼ਾਂ, ਖਾਸ ਕਰ ਕੇ ਸੰਸਾਰਕ ਦੱਖਣ ਦੇ ਮਾਨਵੀ ਤੇ ਕੁਦਰਤੀ ਵਸੀਲਿਆਂ ਦੀ ਬੇਰਹਿਮ ਲੁੱਟ-ਖਸੁੱਟ ਜਾਰੀ ਰੱਖਣ ਲਈ, ਅਮਰੀਕੀ ਸਾਮਰਾਜ ਨੇ ਉਨ੍ਹਾਂ ਦੇਸ਼ਾਂ ਨਾਲ ਪੱਕੀ ਯਾਰੀ ਗੰਢੀ ਹੋਈ ਹੈ, ਜਿੱਥੇ ਤਾਨਾਸ਼ਾਹੀ ਢਾਂਚੇ ਕਾਇਮ ਹਨ ਤੇ ਜਿੱਥੋਂ ਦੇ ਲੋਕ ਹਰ ਕਿਸਮ ਦੇ ਮਾਨਵੀ ਹੱਕ-ਹਕੂਕ ਅਤੇ ਸਿਆਸੀ-ਆਰਥਿਕ ਆਜ਼ਾਦੀਆਂ ਤੋਂ ਮਹਿਰੂਮ ਹਨ। ਸਾਊਦੀ ਅਰਬ, ਪਾਕਿਸਤਾਨ, ਕਤਰ ਆਦਿ ਦੇਸ਼ ਇਸ ਵਰਤਾਰੇ ਦੀ ਉਘੜਵੀਂ ਮਿਸਾਲ ਹਨ।
ਟਰੰਪ, ਭਾਰਤ ਪ੍ਰਤੀ ਆਪਣਾ ਦੁਸ਼ਮਣੀ ਭਰਿਆ ਤੇ ਈਰਖਾਲੂ ਵਤੀਰਾ ਜ਼ਾਹਿਰ ਕਰਨ ਦਾ ਵੀ ਕੋਈ ਮੌਕਾ ਨਹੀਂ ਖੁੰਝਦਾ। ਭਾਰਤੀ ਵਸਤਾਂ ’ਤੇ 500 ਗੁਣਾ ਟੈਰਿਫ ਲਾਉਣ ਦੀਆਂ ਧਮਕੀਆਂ ਦੇਣਾ ਤੇ ਗੈਰ-ਕਾਨੂੰਨੀ ਢੰਗ ਨਾਲ ਅਮਰੀਕਾ ਗਏ ਭਾਰਤੀਆਂ ਨੂੰ ਹੱਥਕੜੀਆਂ-ਬੇੜੀਆਂ ’ਚ ਨੂੜ ਕੇ ਵਾਪਸ ਭੇਜਣਾ ਇਸ ਅਦਾਵਤ ਦੀ ਸਭ ਤੋਂ ਭੱਦੀ ਤੇ ਉਘੜਵੀਂ ਮਿਸਾਲ ਹੈ। ਟਰੰਪ, ਇਕ ਪਾਸੇ ਪ੍ਰਧਾਨ ਮੰਤਰੀ ਮੋਦੀ ਨੂੰ ਆਪਣਾ ‘ਮਿੱਤਰ ਤੇ ਭਲਾ ਆਦਮੀ’ ਦੱਸੀ ਜਾ ਰਿਹਾ ਹੈ ਤੇ ਦੂਜੇ ਪਾਸੇ ਭਾਰਤ ਦੀ ਬਰਬਾਦੀ ਦੇ ਮਨਸੂਬੇ ਵੀ ਅਮਲ ’ਚ ਲਿਆਈ ਜਾ ਰਿਹਾ ਹੈ। ਇਉਂ ਹੀ ਸਾਮਰਾਜੀ ਧੜੇ ਦੇ ਮਜ਼ਬੂਤ ਮੁਤਬਾਦਲ ਵਜੋਂ ਤਕੜੀ ਆਰਥਿਕ ਸ਼ਕਤੀ ਬਣ ਕੇ ਨਿੱਤਰੇ ‘ਬ੍ਰਿਕਸ’ ਦੇ ਭਾਈਵਾਲ ਦੇਸ਼ਾਂ ਪ੍ਰਤੀ ਆਪਣੀ ਦੁਸ਼ਮਣੀ ਵੀ ਉਹ ਪਹਿਲਾਂ ਹੀ ਜੱਗ ਜ਼ਾਹਿਰ ਕਰ ਚੁੱਕਾ ਹੈ।
ਹੁਣ ਇਹ ਗੱਲ ਹੋਰ ਵਧੇਰੇ ਸਪੱਸ਼ਟ ਹੋ ਗਈ ਹੈ ਕਿ ਕਿਸੇ ਵੀ ਦੇਸ਼, ਖਾਸ ਕਰ ਕੇ ਪੱਛੜੇ ਤੇ ਉਨਤੀਸ਼ੀਲ ਦੇਸ਼ਾਂ ਨੂੰ ਅਮਰੀਕਾ ਨਾਲ ਕਿਸੇ ਕਿਸਮ ਦੇ ਸਬੰਧ ਸਥਾਪਤ ਕਰਦੇ ਹੋਏ ਪੂਰੀ ਚੌਕਸੀ ਤੋਂ ਕੰਮ ਲੈਣਾ ਹੋਵੇਗਾ ਤੇ ਆਪੋ-ਆਪਣੇ ਦੇਸ਼ਾਂ ਦੇ ਹਿੱਤਾਂ ਨੂੰ ਬਰਾਬਰਤਾ ਦੇ ਅਸੂਲਾਂ ਦੇ ਅਾਧਾਰ ’ਤੇ ਪਹਿਲ ਦੇਣੀ ਹੋਵੇਗੀ। ਸਾਮਰਾਜ ਆਪਣੇ ਮੂਲ ਸੁਭਾਅ ਪੱਖੋਂ ਹੀ ਪੂੰਜੀਵਾਦ ਦੀ ਸਿਰੇ ਦੀ ਬੇਕਿਰਕ ਤੇ ਖੁਦਗਰਜ਼ੀ ਭਰੀ, ਅੰਨ੍ਹੀ ਲੁੱਟ-ਖਸੁੱਟ ਦੀ ਅਵਸਥਾ ਦਾ ਨਾਂ ਹੈ। ‘ਨਾਟੋ’ ਦੇ ਮੈਂਬਰ ਦੇਸ਼ਾਂ ਪ੍ਰਤੀ ਟਰੰਪ ਪ੍ਰਸ਼ਾਸਨ ਵੱਲੋਂ ਦਿਖਾਏ ਜਾ ਰਹੇ ਹੰਕਾਰੀ ‘ਤੇਵਰ’ ਇਸ ਦਾ ਸਪੱਸ਼ਟ ਸਬੂਤ ਹਨ। ਸਾਰੇ ‘ਨਾਟੋ’ ਦੇਸ਼ਾਂ ’ਤੇ ਆਪੋ-ਆਪਣੇ ਰੱਖਿਆ ਬਜਟ ’ਚ 5% ਦਾ ਵਾਧਾ ਕਰਨ ਲਈ ਦਬਾਅ ਪਾਉਣਾ ਤੇ ਅਜਿਹਾ ਨਾ ਕਰਨ ’ਤੇ ਉਨ੍ਹਾਂ ਦੀ ਸੁਰੱਖਿਆ ਦੀ ਗਾਰੰਟੀ ਪ੍ਰਤੀ ਬਣਦੀ ਜ਼ਿੰਮੇਵਾਰੀ ਨੂੰ ‘ਠੁੱਠ’ ਦਿਖਾਉਣਾ, ਇਹ ਦਰਸਾਉਂਦਾ ਹੈ ਕਿ ਧੜਵੈਲ ਅਮਰੀਕਾ ਦੀ ‘ਯਾਰੀ’ ਹੁਣ ਕਿਸੇ ਲਈ ਵੀ ਗੰਭੀਰ ਖਤਰਿਆਂ ਤੋਂ ਖਾਲੀ ਨਹੀਂ ਰਹੀ।
ਨਾ ਕੇਵਲ ਸਾਮਰਾਜ ਵਿਰੋਧੀ ਮੁਲਕਾਂ ਬਲਕਿ ਨਾਟੋ ਦੇ ਭਾਈਵਾਲ ਦੇਸ਼ਾਂ ਵਿਚਕਾਰ ਵਧ ਰਹੀ ਰਾਜਸੀ ਇਕਸੁਰਤਾ, ਆਰਥਿਕ ਸਾਂਝ ਤੇ ਰੱਖਿਆ ਖੇਤਰ ਦਾ ਤਾਲਮੇਲ ਟਰੰਪ ਦੀ ਪਸਾਰਵਾਦੀ ਧੌਂਸ ਮੂਹਰੇ ਵੱਡੀ ਰੋਕ ਬਣ ਸਕਦਾ ਹੈ। ਇਹ, ਭਾਰਤ ਸਮੇਤ ਸਾਰੇ ਉਨਤੀਸ਼ੀਲ ਦੇਸ਼ਾਂ ਲਈ ਬਰਾਬਰੀ ਦੇ ਅਸੂਲਾਂ ਦੇ ਆਧਾਰ ’ਤੇ ਆਰਥਿਕ ਤੇ ਰੱਖਿਆ ਖੇਤਰ ’ਚ ਮਜ਼ਬੂਤ ਸਾਂਝ ਕਾਇਮ ਕਰਨ ਤੇ ਸਵੈ ਨਿਰਭਰ ਆਰਥਿਕ ਵਿਕਾਸ ਦਾ ਰਾਹ ਚੁੁਣਨ ਦਾ ਇਕ ਸੁਨਹਿਰੀ ਮੌਕਾ ਹੈ, ਜਿਸ ਦਾ ਪੂਰਾ-ਪੂਰਾ ਲਾਹਾ ਲਿਆ ਜਾਣਾ ਚਾਹੀਦਾ ਹੈ। ਭਾਰਤ ਨੂੰ, ਆਪਣੇ ਹਿੱਤਾਂ ਦੀ ਰਾਖੀ ਦੀ ਡਾਢੀ ਲੋੜ ਦੇ ਸਨਮੁੱਖ ਗੁਆਂਢੀ ਦੇਸ਼ਾਂ ਨਾਲ ਬਿਹਤਰ ਸਬੰਧ ਕਾਇਮ ਕਰਨ ਲਈ ਪਹਿਲਕਦਮੀ ਲੈਣ ਦੀ ਲੋੜ ਹੈ। ਇੰਜ ਕਰ ਕੇ ਹੀ ਇਸ ਖਿੱਤੇ ਦੇ ਹਾਲਾਤ ਤਣਾਅਪੂਰਨ ਬਣਾਉਣ ਲਈ ਕੀਤੀ ਜਾਣ ਵਾਲੀ ਸਾਮਰਾਜ ਦੀ ਹਰ ਕਿਸਮ ਦੀ ਦਖ਼ਲਅੰਦਾਜ਼ੀ ਰੋਕੀ ਜਾ ਸਕਦੀ ਹੈ। ਭਾਰਤ ਨੂੰ ਆਪਣੇ ਸਵੈ ਨਿਰਭਰ ਵਿਕਾਸ ਅਤੇ ਪ੍ਰਭੂ ਸੰਪੰਨਤਾ ਤੇ ਸੁਤੰਤਰਤਾ ਦੀ ਰਾਖੀ ਤੇ ਮਜ਼ਬੂਤੀ ਲਈ ਗੁਣ-ਦੋਸ਼ਾਂ ਦੇ ਆਧਾਰ ’ਤੇ ਮਿੱਤਰ ਚੁਣਨ ਦੇ ਨਾਲ ਹੀ ਸਪੱਸ਼ਟਤਾ ਨਾਲ ਸਾਮਰਾਜ ਵਿਰੋਧੀ ਪੈਂਤੜੇ ਮੱਲਣੇ ਚਾਹੀਦੇ ਹਨ।
ਮੰਗਤ ਰਾਮ ਪਾਸਲਾ
‘ਦੇਸ਼ ’ਚ ਵਧ ਰਿਹਾ ਭ੍ਰਿਸ਼ਟਾਚਾਰ’ ਰੋਕਣ ਲਈ ਸਖਤੀ ਦੀ ਲੋੜ!
NEXT STORY 
