ਕੁਝ ਸਾਲ ਪਹਿਲਾਂ ਤੱਕ ਨਸ਼ਿਆਂ ਦੀ ਸਮੱਗਲਿੰਗ ਅਤੇ ਹੋਰ ਸਮਾਜ ਵਿਰੋਧੀ ਸਰਗਰਮੀਆਂ ’ਚ ਸ਼ਮੂਲੀਅਤ ਮਰਦਾਂ ਤੱਕ ਹੀ ਸੀਮਤ ਸੀ ਪਰ ਹੁਣ ਫੜੇ ਜਾਣ ਦੇ ਡਰੋਂ ਮਰਦਾਂ ਨੇ ਆਪਣੇ ਪਰਿਵਾਰ ਦੀਆਂ ਔਰਤਾਂ ਦੇ ਨਾਲ ਹੋਰ ਲੋੜਵੰਦ ਔਰਤਾਂ ਨੂੰ ਵੀ ਇਸ ’ਚ ਸ਼ਾਮਲ ਕਰਨਾ ਸ਼ੁਰੂ ਕਰ ਦਿੱਤਾ ਹੈ, ਕਿਉਂਕਿ ਆਮ ਤੌਰ ’ਤੇ ਔਰਤਾਂ ’ਤੇ ਪੁਲਸ ਸ਼ੱਕ ਨਹੀਂ ਕਰਦੀ। ਨਸ਼ੇ ਦੇ ਧੰਦੇ ’ਚ ਔਰਤਾਂ ਦੀ ਹਿੱਸੇਦਾਰੀ ਲਗਾਤਾਰ ਵਧ ਰਹੀ ਹੈ ਜਿਸ ਦੀਅਾਂ ਪਿਛਲੇ 3 ਮਹੀਨਿਆਂ ਦੀਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
* 29 ਜਨਵਰੀ, 2026 ਨੂੰ ‘ਸਾਂਬਾ’ (ਜੰਮੂ-ਕਸ਼ਮੀਰ) ਦੇ ‘ਵਿਜੇਪੁਰ’ ਇਲਾਕੇ ’ਚ ਪੁਲਸ ਨੇ 127 ਗ੍ਰਾਮ ਹੈਰੋਇਨ ਤੇ 60,000 ਰੁਪਏ ਨਕਦ ਦੇ ਨਾਲ ‘ਇਕਰਾ’ ਨਾਂ ਦੀ ਇਕ ਔਰਤ ਤੋਂ ਇਲਾਵਾ ‘ਫਰਦੀਨ’ ਅਤੇ ‘ਉਸਮਾਨ’ ਨੂੰ ਗ੍ਰਿਫਤਾਰ ਕੀਤਾ।
* 31 ਜਨਵਰੀ ਨੂੰ ‘ਬਾੜੀ ਬ੍ਰਾਹਮਣਾ’ (ਜੰਮੂ-ਕਸ਼ਮੀਰ) ਪੁਲਸ ਨੇ ‘ਸਰਲਾ ਦੇਵੀ’ ਨਾਂ ਦੀ ਔਰਤ ਨੂੰ 13.20 ਗ੍ਰਾਮ ਹੈਰੋਇਨ ਦੇ ਨਾਲ ਗ੍ਰਿਫਤਾਰ ਕੀਤਾ।
* 12 ਫਰਵਰੀ ਨੂੰ ‘ਭੋਪਾਲ’ (ਮੱਧ ਪ੍ਰਦੇਸ਼) ’ਚ ਪੁਲਸ ਨੇ 5 ਸਾਲਾਂ ਤੋਂ ਫਰਾਰ ਇਕ ਔਰਤ ਨਸ਼ਾ ਸਮੱਗਲਰ ਨੂੰ ਗ੍ਰਿਫਤਾਰ ਕਰ ਕੇ ਉਸ ਦੇ ਕੋਲੋਂ 5.91 ਗ੍ਰਾਮ ਨਸ਼ੀਲਾ ਪਦਾਰਥ ਐੱਮ. ਡੀ. ਐੱਮ. ਏ. ਬਰਾਮਦ ਕੀਤਾ।
* 15 ਫਰਵਰੀ ਨੂੰ ‘ਸਿਰਮੌਰ’ (ਹਿਮਾਚਲ ਪ੍ਰਦੇਸ਼) ’ਚ ‘ਸਿੰਘਪੁਰਾ’ ਦੀ ਪੁਲਸ ਨੇ 835 ਗ੍ਰਾਮ ਚਰਸ ਦੇ ਨਾਲ 3 ਔਰਤਾਂ ‘ਸ਼ਾਨੂੰ ਰਾਏ’, ‘ਬਬੀਤਾ’ ਤੇ ‘ਆਸ਼ੀਆ ਪਰਵੀਨ’ (ਸਾਰੀਆਂ ਨਿਵਾਸੀ ਜ਼ਿਲਾ ਦੇਹਰਾਦੂਨ, ਉੱਤਰਾਖੰਡ) ਨੂੰ ਗ੍ਰਿਫਤਾਰ ਕੀਤਾ।
* 20 ਮਾਰਚ ਨੂੰ ‘ਨਰਵਾਨਾ’ (ਹਰਿਆਣਾ) ਪੁਲਸ ਦੀ ਸੀ. ਆਈ. ਏ. ਟੀਮ ਨੇ ਨਸ਼ਾ ਸਮੱਗਲਿੰਗ ਗਿਰੋਹ ਦਾ ਪਰਦਾਫਾਸ਼ ਕਰ ਕੇ ‘ਮੁੰਨੀ’ ਨਾਂ ਦੀ ਔਰਤ ਅਤੇ ਉਸ ਦੇ ਬੇਟੇ ‘ਸਮੀਰ’ ਨੂੰ 260 ਗ੍ਰਾਮ ਹੈਰੋਇਨ ਤੇ 4 ਕਿਲੋ ਗਾਂਜਾ ਸਮੇਤ ਕਾਬੂ ਕੀਤਾ।
* 3 ਅਪ੍ਰੈਲ ਨੂੰ ‘ਜਗਰਾਓਂ’ (ਪੰਜਾਬ) ਦੇ ਥਾਣਾ ‘ਸਿੱਧਵਾਂ ਬੇਟ’ ਦੀ ਪੁਲਸ ਨੇ ਇਕ ਔਰਤ ਨਸ਼ਾ ਸਮੱਗਲਰ ਨੂੰ 9 ਗ੍ਰਾਮ ਹੈਰੋਇਨ ਦੇ ਨਾਲ ਗ੍ਰਿਫਤਾਰ ਕੀਤਾ। ਉਸ ’ਤੇ ਪਹਿਲਾਂ ਵੀ ਨਸ਼ਾ ਸਮੱਗਲਿੰਗ ਦਾ ਮਾਮਲਾ ਦਰਜ ਸੀ।
* 5 ਅਪ੍ਰੈਲ ਨੂੰ ‘ਫਾਜ਼ਿਲਕਾ’ (ਪੰਜਾਬ) ਦੇ ਸਦਰ ਥਾਣੇ ਦੀ ਪੁਲਸ ਨੇ ਪਿੰਡ ‘ਸਲੇਮ ਸ਼ਾਹ’ ’ਚ ਗਸ਼ਤ ਦੌਰਾਨ ‘ਕ੍ਰਿਸ਼ਨਾ ਰਾਣੀ’ ਨਾਂ ਦੀ ਔਰਤ ਨੂੰ ਗ੍ਰਿਫਤਾਰ ਕਰ ਕੇ ਉਸ ਦੇ ਕੋਲੋਂ 12 ਗ੍ਰਾਮ ਹੈਰੋਇਨ ਬਰਾਮਦ ਕੀਤੀ।
* 11 ਅਪ੍ਰੈਲ ਨੂੰ ਦਿੱਲੀ ’ਚ ਨਸ਼ਾ ਸਮੱਗਲਿੰਗ ਕਰਨ ਵਾਲੇ ਗਿਰੋਹ ਨਾਲ ਜੁੜੀਆਂ 3 ਔਰਤ ਸਮੱਗਲਰਾਂ ਦਾਰੋ ਦੇਵੀ, ਆਰਤੀ ਤੇ ਸੁਧਾ ਨੂੰ 23 ਕਿਲੋ ਗਾਂਜਾ, 252.15 ਗ੍ਰਾਮ ਸੋਨਾ, 28 ਗ੍ਰਾਮ ਸਮੈਕ ਅਤੇ 2,90,230 ਰੁਪਏ ਨਕਦ ਦੇ ਨਾਲ ਗ੍ਰਿਫਤਾਰ ਕੀਤਾ ਗਿਆ।
* 13 ਅਪ੍ਰੈਲ ਨੂੰ ‘ਬਰਨਾਲਾ’ (ਪੰਜਾਬ) ਦੀ ‘ਕਪਾਹ ਮੰਡੀ’ ’ਚ ਇਕ ਔਰਤ ਨੂੰ 48 ਬੋਤਲਾਂ ਨਾਜਾਇਜ਼ ਦੇਸੀ ਸ਼ਰਾਬ ਦੇ ਨਾਲ ਗ੍ਰਿਫਤਾਰ ਕੀਤਾ ਗਿਆ।
* 14 ਅਪ੍ਰੈਲ ਨੂੰ ‘ਸ਼ਿਮਲਾ’ (ਹਿਮਾਚਲ ਪ੍ਰਦੇਸ਼) ਦੀ ਪੁਲਸ ਨੇ ‘ਲਕਸ਼ਮੀ’ ਨਾਂ ਦੀ ਔਰਤ ਨਸ਼ਾ ਸਮੱਗਲਰ ਨੂੰ ਗ੍ਰਿਫਤਾਰ ਕਰ ਕੇ ਉਸ ਦੇ ਕੋਲੋਂ 2.04 ਕਿਲੋ ਅਫੀਮ ਬਰਾਮਦ ਕੀਤੀ।
* 14 ਅਪ੍ਰੈਲ ਨੂੰ ਹੀ ‘ਨਵੀਂ ਦਿੱਲੀ’ ਦੀ ਪੁਲਸ ਨੇ ਨਸ਼ੇ ਦੇ ਕਾਰੋਬਾਰ ਨਾਲ ਜੁੜੇ ਅਨੇਕਾਂ ਮਾਮਲਿਆਂ ’ਚ ਸ਼ਾਮਲ ‘ਹਸੀਨਾ ਖਾਤੂਨ’ ਉਰਫ ‘ਬਾਜੀ’ ਨਾਂ ਦੀ ਔਰਤ ਨੂੰ ਗ੍ਰਿਫਤਾਰ ਕੀਤਾ। ਸਥਾਨਕ ਡਰੱਗਜ਼ ਨੈੱਟਵਰਕ ਦੇ ਨਾਲ ਉਸ ਦੇ ਸੰਪਰਕ ਤੋੜਨ ਲਈ ਉਸ ਨੂੰ ‘ਚੇਨਈ’ ਜੇਲ ’ਚ ਤਬਦੀਲ ਕਰਨ ਦਾ ਫੈਸਲਾ ਕੀਤਾ ਗਿਆ।
* 17 ਅਪ੍ਰੈਲ ਨੂੰ ਹੀ ‘ਲੁਧਿਆਣਾ’ (ਪੰਜਾਬ) ’ਚ ਇਕ ਔਰਤ ਨੂੰ ਅੱਧਾ ਕਿਲੋ ਗਾਂਜੇ ਦੇ ਨਾਲ ਗ੍ਰਿਫਤਾਰ ਕੀਤਾ ਗਿਆ।
* 23 ਅਪ੍ਰੈਲ ਨੂੰ ‘ਜੰਮੂ’ ਦੇ ‘ਰਾਜੀਵ ਨਗਰ’ ’ਚ 2 ਨਸ਼ਾ ਸਮੱਗਲਰ ਔਰਤਾਂ ‘ਮੋਨਿਕਾ’ ਅਤੇ ‘ਭੱਲੋ’ ਦੇ 3 ਮਕਾਨਾਂ ਨੂੰ ਢਾਹ ਦਿੱਤਾ ਗਿਆ।
* 23 ਅਪ੍ਰੈਲ ਨੂੰ ਹੀ ‘ਗੁੜਗਾਓਂ’ (ਹਰਿਆਣਾ) ’ਚ ਪੁਲਸ ਨੇ ਨਸ਼ੇ ਦਾ ਕਾਰੋਬਾਰ ਕਰਨ ਵਾਲੀਆਂ 2 ਔਰਤਾਂ ‘ਅਨੀਤਾ’ ਤੇ ‘ਸੁਨੀਤਾ’ ਦੁਆਰਾ ਕਬਜ਼ਾਈਅਾਂ ਹੋਈਆਂ ਝੁੱਗੀਆਂ ਨੂੰ ਢਾਹ ਦਿੱਤਾ। ਇਨ੍ਹਾਂ ਝੁੱਗੀਆਂ ’ਚ ਉਹ ਨਸ਼ਾ ਵੇਚਿਆ ਕਰਦੀਆਂ ਸਨ।
* ਅਤੇ ਹੁਣ 25 ਅਪ੍ਰੈਲ ਨੂੰ ‘ਗੁਹਾਟੀ’ (ਅਾਸਾਮ) ਦੇ ‘ਅਮੀਮ ਪਿੰਡ’ ’ਚ ਪੁਲਸ ਨੇ ‘ਚੂਰਾਚਾਂਦਪੁਰ’ (ਮਣੀਪੁਰ) ਦੀਆਂ 5 ਔਰਤਾਂ ਨੂੰ 7 ਕਰੋੜ ਰੁਪਏ ਦੀ ਹੈਰੋਇਨ ਦੇ ਨਾਲ ਗ੍ਰਿਫਤਾਰ ਕੀਤਾ। ਇਹ ਨਸ਼ਾ ‘ਲੋਅਰ ਅਾਸਾਮ’ ’ਚ ਵੇਚਿਆ ਜਾਣਾ ਸੀ।
ਕਿਉਂਕਿ ਔਰਤਾਂ ਦਾ ਨਾਜਾਇਜ਼ ਸਰਗਰਮੀਆਂ ’ਚ ਸ਼ਾਮਲ ਹੋਣਾ ਮੁੱਖ ਤੌਰ ’ਤੇ ਆਰਥਿਕ ਮਜਬੂਰੀਆਂ ਦਾ ਨਤੀਜਾ ਹੈ, ਇਸ ਲਈ ਜਿੱਥੇ ਇਸ ਬੁਰਾਈ ਨੂੰ ਰੋਕਣ ਲਈ ਪੁਲਸ ਨੂੰ ਵਧੇਰੇ ਮੁਸਤੈਦੀ ਵਰਤਣੀ ਹੋਵੇਗੀ, ਉਥੇ ਹੀ ਲੋੜਵੰਦ ਔਰਤਾਂ ਲਈ ਰੋਜ਼ਗਾਰ ਦੇ ਆਸਾਨ ਬਦਲ ਪੈਦਾ ਕਰਨ ਦੀ ਵੀ ਲੋੜ ਹੈ ਤਾਂ ਜੋ ਉਹ ਆਮਦਨ ਵਧਾਉਣ ਦੀ ਮਜਬੂਰੀ ਕਾਰਨ ਨਾਜਾਇਜ਼ ਸਰਗਰਮੀਆਂ ’ਚ ਸ਼ਾਮਲ ਨਾ ਹੋਣ।
—ਵਿਜੇ ਕੁਮਾਰ
ਸਾਧਾਰਨ ਤੋਂ ਘੱਟ ਮਾਨਸੂਨ ਪਰ ਘਬਰਾਉਣ ਦੀ ਗੱਲ ਨਹੀਂ
NEXT STORY 
