ਭਾਰਤੀ ਸੰਸਕ੍ਰਿਤੀ ’ਚ ਅਧਿਆਪਕ-ਅਧਿਆਪਕਾਵਾਂ ਨੂੰ ਮਾਤਾ-ਪਿਤਾ ਤੋਂ ਬਾਅਦ ਸਰਵਉੱਚ ਦਰਜਾ ਦਿੱਤਾ ਗਿਆ ਹੈ ਅਤੇ ਵਿਦਿਆਰਥੀ-ਵਿਦਿਆਰਥਣਾਂ ਤੋਂ ਉਮੀਦ ਕੀਤੀ ਜਾਂਦੀ ਹੈ ਕਿ ਉਹ ਆਪਣੇ ਅਧਿਆਪਕ-ਅਧਿਆਪਕਾਵਾਂ ਦਾ ਮਾਪਿਆਂ ਵਾਂਗ ਅਤੇ ਮਿੱਤਰਾਂ ਦਾ ਭਰਾਵਾਂ ਵਾਂਗ ਹੀ ਸਤਿਕਾਰ ਕਰਨਗੇ ਪਰ ਅੱਜ ਦੇ ਬਦਲੇ ਹੋਏ ਦੌਰ ’ਚ ਵਿਦਿਆਰਥੀ-ਵਿਦਿਆਰਥਣਾਂ ਨੇ ਆਪਣੇ ਅਧਿਆਪਕ-ਅਧਿਆਪਕਾਵਾਂ ਅਤੇ ਮਿੱਤਰਾਂ ਤੱਕ ’ਤੇ ਹਮਲੇ ਸ਼ੁਰੂ ਕਰ ਦਿੱਤੇ ਹਨ, ਜਿਨ੍ਹਾਂ ਦੀਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
*13 ਦਸੰਬਰ, 2024 ਨੂੰ ‘ਬਹਿਰਾਈਚ’ (ਉੱਤਰ ਪ੍ਰਦੇਸ਼) ਵਿਚ ‘ਨਵਯੁਗ ਇੰਟਰ ਕਾਲਜ’ ਦੇ ਅਧਿਆਪਕ ‘ਰਾਜੇਂਦਰ ਵਰਮਾ’ ਵੱਲੋਂ ਇਕ ਵਿਦਿਆਰਥੀ ਕੋਲੋਂ ਮੋਬਾਈਲ ਲੈ ਲੈਣ ਕਾਰਨ ਨਾਰਾਜ਼ ਵਿਦਿਆਰਥੀ ਨੇ ਚਾਕੂ ਨਾਲ ਹਮਲਾ ਕਰ ਕੇ ਉਨ੍ਹਾਂ ਨੂੰ ਗੰਭੀਰ ਰੂਪ ’ਚ ਜ਼ਖ਼ਮੀ ਕਰ ਦਿੱਤਾ।
*18 ਅਗਸਤ, 2025 ਨੂੰ ‘ਗਾਜ਼ੀਪੁਰ’ (ਉੱਤਰ ਪ੍ਰਦੇਸ਼) ਵਿਖੇ ਇਕ ਪ੍ਰਾਈਵੇਟ ਸਕੂਲ ’ਚ 10ਵੀਂ ਜਮਾਤ ਦੇ ਇਕ ਵਿਦਿਆਰਥੀ ‘ਆਦਿਤਿਆ ਵਰਮਾ’ ਨਾਲ ਹੋਏ ਬੋਲ-ਬੁਲਾਰੇ ਨੂੰ ਲੈ ਕੇ 9ਵੀਂ ਜਮਾਤ ਦੇ ਇਕ ਵਿਦਿਆਰਥੀ ਨੇ ਮੈਟਲ ਦੀ ਪਾਣੀ ਵਾਲੀ ਬੋਤਲ ਵਿਚ ਲੁਕੋ ਕੇ ਲਿਆਂਦੇ ਚਾਕੂ ਨਾਲ ‘ਆਦਿਤਿਆ ਵਰਮਾ’ ’ਤੇ ਤਾਬੜਤੋੜ ਹਮਲਾ ਕਰ ਕੇ ਉਸ ਨੂੰ ਮਾਰ ਦਿੱਤਾ।
*21 ਅਗਸਤ, 2025 ਨੂੰ ‘ਊਧਮ ਸਿੰਘ ਨਗਰ’ (ਉੱਤਰਾਖੰਡ) ਜ਼ਿਲੇ ਦੇ ‘ਕਾਸ਼ੀਪੁਰ’ ’ਚ ਇਕ ਪ੍ਰਾਈਵੇਟ ਸਕੂਲ ਦੇ 9ਵੀਂ ਜਮਾਤ ਦੇ ਵਿਦਿਆਰਥੀ ਨੇ ਆਪਣੇ ਅਧਿਆਪਕ ਨੂੰ ਜਮਾਤ ਦੇ ਅੰਦਰ ਹੀ ਦੇਸੀ ਤਮੰਚੇ ਨਾਲ ਗੋਲੀ ਮਾਰ ਕੇ ਜ਼ਖ਼ਮੀ ਕਰ ਦਿੱਤਾ।
*10 ਅਕਤੂਬਰ, 2025 ਨੂੰ ‘ਔਰੰਗਾਬਾਦ’ (ਬਿਹਾਰ) ਜ਼ਿਲੇ ਦੇ ‘ਭਖਰੂਆਂ’ ਪਿੰਡ ’ਚ ਸਥਿਤ ਸੀਨੀਅਰ ਸੈਕੰਡਰੀ ਸਕੂਲ ’ਚ ਗਣਿਤ ਦੇ ਅਧਿਆਪਕ ‘ਸੁਦਾਮਾ ਕੁਮਾਰ’ ਵੱਲੋਂ ਅਨੁਸ਼ਾਸਨਹੀਣਤਾ ਕਾਰਨ ਝਿੜਕਣ ਅਤੇ ਚਿਤਾਵਨੀ ਦੇਣ ਤੋਂ ਨਾਰਾਜ਼ ਇਕ ਨਾਬਾਲਗ ਵਿਦਿਆਰਥੀ ਨੇ ਅਧਿਆਪਕ ’ਤੇ ਚਾਕੂ ਨਾਲ ਵਾਰ ਕਰ ਕੇ ਉਨ੍ਹਾਂ ਨੂੰ ਗੰਭੀਰ ਰੂਪ ’ਚ ਜ਼ਖ਼ਮੀ ਕਰ ਦਿੱਤਾ। ਵਾਰ ਇੰਨਾ ਡੂੰਘਾ ਸੀ ਕਿ ਅਧਿਆਪਕ ਦੀ ਗਰਦਨ ’ਤੇ 10 ਟਾਂਕੇ ਲਾਉਣੇ ਪਏ।
*2 ਦਸੰਬਰ, 2025 ਨੂੰ ‘ਮੁਰਾਦਾਬਾਦ’ (ਉੱਤਰ ਪ੍ਰਦੇਸ਼) ਦੇ ‘ਜੀ. ਜੀ. ਹਿੰਦੂ ਇੰਟਰ ਕਾਲਜ’ ’ਚ ਆਪਣੇ ਅਧਿਆਪਕ ‘ਅਰੁਣ ਕੁਮਾਰ ਤਿਆਗੀ’ ਦੀ ਝਿੜਕ ਤੋਂ ਨਾਰਾਜ਼ 10ਵੀਂ ਜਮਾਤ ਦੇ ਇਕ ਵਿਦਿਆਰਥੀ ਨੇ ਉਨ੍ਹਾਂ ’ਤੇ ਉਸ ਸਮੇਂ ਹਮਲਾ ਕਰ ਦਿੱਤਾ ਜਦੋਂ ਉਹ ਸਕੂਲ ਦੇ ਅੰਦਰ ਦਾਖ਼ਲ ਹੋ ਰਹੇ ਸਨ। ਹਮਲੇ ਦੇ ਸਿੱਟੇ ਵਜੋਂ ਅਧਿਆਪਕ ਦੀ ਕਮਰ ’ਤੇ ਆਈਆਂ ਗੰਭੀਰ ਸੱਟਾਂ ਕਾਰਨ ਉਨ੍ਹਾਂ ਨੂੰ ਹਸਪਤਾਲ ਦਾਖ਼ਲ ਕਰਵਾਉਣਾ ਪਿਆ।
*5 ਫਰਵਰੀ, 2026 ਨੂੰ ‘ਮੈਨਪੁਰੀ’ (ਉੱਤਰ ਪ੍ਰਦੇਸ਼) ’ਚ ਆਪਣੀ ਸਾਬਕਾ ਅਧਿਆਪਕਾ ਦੇ ਇਕ ਪਾਸੜ ਪਿਆਰ ਵਿਚ ‘ਪਾਗਲ’ 12ਵੀਂ ਜਮਾਤ ਦੇ 16 ਸਾਲਾ ਵਿਦਿਆਰਥੀ ਵਿਰੁੱਧ ਉਸ ਨੂੰ ਰਸਤੇ ’ਚ ਘੇਰ ਕੇ ਜ਼ਬਰਦਸਤੀ ਚੁੰਮਣ, ਤੇਜ਼ਧਾਰ ਹਥਿਆਰ ਨਾਲ ਹਮਲਾ ਕਰ ਕੇ ਉਸਦੇ ਬੁੱਲ੍ਹ ਕੱਟ ਦੇਣ ਅਤੇ ਕੁੱਟਮਾਰ ਕਰਨ ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ ਗਿਆ।
ਵਰਣਨਯੋਗ ਹੈ ਕਿ ਉਕਤ ਵਿਦਿਆਰਥੀ ਪਹਿਲਾਂ ਵੀ ਸਕੂਲ ’ਚ ਇਸ ਅਧਿਆਪਕਾ ਨਾਲ ਛੇੜਛਾੜ ਕਰਦਾ ਸੀ ਅਤੇ ਉਸ ਨੂੰ ਤੰਗ ਕਰਦਾ ਰਹਿੰਦਾ ਸੀ। ਜਿਸਦੀ ਸ਼ਿਕਾਇਤ ਅਧਿਆਪਕਾ ਨੇ ਉਸਦੇ ਪਰਿਵਾਰ ਨੂੰ ਕੀਤੀ ਸੀ। ਅੰਤ ਵਿਚ ਅਧਿਆਪਕਾ ਨੇ ਤੰਗ ਆ ਕੇ ਉਸ ਸਕੂਲ ਦੀ ਨੌਕਰੀ ਛੱਡ ਕੇ ਦੂਜੇ ਸਕੂਲ ’ਚ ਨੌਕਰੀ ਸ਼ੁਰੂ ਕਰ ਦਿੱਤੀ ਸੀ ਪਰ ਇੱਥੇ ਵੀ ਵਿਦਿਆਰਥੀ ਨੇ ਉਸਦਾ ਪਿੱਛਾ ਨਹੀਂ ਛੱਡਿਆ। ਵਾਰਦਾਤ ਪਿੱਛੋਂ ਵਿਦਿਆਰਥੀ ਫਰਾਰ ਹੈ।
*8 ਫਰਵਰੀ ਨੂੰ ‘ਲੁਧਿਆਣਾ’ ’ਚ ਇਕ ਟਿਊਸ਼ਨ ਟੀਚਰ ਨੇ 9ਵੀਂ ਜਮਾਤ ਦੇ ਇਕ ਵਿਦਿਆਰਥੀ, ਉਸਦੇ ਪਰਿਵਾਰਕ ਮੈਂਬਰਾਂ ਅਤੇ ਉਸ ਦੇ ਇਕ ਦੋਸਤ ਵਿਰੁੱਧ ਉਸ ਦੇ ਘਰ ’ਚ ਦਾਖਲ ਹੋ ਕੇ ਉਸ ’ਤੇ ਹਮਲਾ ਕਰਨ ਅਤੇ ਗਾਲੀ-ਗਲੋਚ ਕਰਨ ਦੇ ਦੋਸ਼ ਹੇਠ ਪੁਲਸ ਕੋਲ ਸ਼ਿਕਾਇਤ ਦਰਜ ਕਰਵਾਈ।
ਅਧਿਆਪਕਾ ਦਾ ‘ਦੋਸ਼’ ਸੀ ਕਿ ਉਸਨੇ ਟਿਊਸ਼ਨ ’ਤੇ ਲਗਾਤਾਰ ਨਾ ਆਉਣ ਕਾਰਨ ਵਿਦਿਆਰਥੀ ਨੂੰ ਝਿੜਕਿਆ ਸੀ। ਸ਼ਿਕਾਇਤ ਵਿਚ ਕਿਹਾ ਗਿਆ ਹੈ ਕਿ ਜਦੋਂ ਅਧਿਆਪਕਾ ਦੇ ਪਤੀ ਤੇ ਭੈਣ ਨੇ ਵਿਦਿਆਰਥੀ, ਉਸ ਦੇ ਘਰ ਵਾਲਿਆਂ ਅਤੇ ਦੋਸਤਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਨੇ ਉਨ੍ਹਾਂ ਦੋਹਾਂ ਨੂੰ ਵੀ ਕੁੱਟ ਸੁੱਟਿਆ।
* ਅਤੇ ਹੁਣ 9 ਫਰਵਰੀ ਨੂੰ ‘ਤਰਨਤਾਰਨ’ (ਪੰਜਾਬ) ਦੇ ਪਿੰਡ ’ਚ ਸਥਿਤ ਇਕ ਕਾਲਜ ਦੇ ਵਿਦਿਆਰਥੀ ਨੇ ਇਕਤਰਫ਼ਾ ਪਿਆਰ ਕਰਨ ਕਾਰਨ ਆਪਣੀ ਸਹਿਪਾਠਣ ਦੀ ਗੋਲੀ ਮਾਰ ਕੇ ਹੱਤਿਆ ਕਰਨ ਤੋਂ ਬਾਅਦ ਖ਼ੁਦ ਨੂੰ ਵੀ ਗੋਲੀ ਮਾਰ ਲਈ ਜਿਸ ਕਾਰਨ ਉਹ ਗੰਭੀਰ ਰੂਪ ’ਚ ਜ਼ਖਮੀ ਹੋ ਗਿਆ।
ਵਿਦਿਆਰਥੀਆਂ ਦਾ ਇਸ ਤਰ੍ਹਾਂ ਦਾ ਆਚਰਣ ਉਨ੍ਹਾਂ ਦੇ ਮਾਤਾ-ਪਿਤਾ ਵੱਲੋਂ ਉਨ੍ਹਾਂ ’ਚ ਚੰਗੇ ਸੰਸਕਾਰ ਨਾ ਭਰਨ ਅਤੇ ਆਪਣੇ ਬੱਚਿਆਂ ਦੀਆਂ ਸਰਗਰਮੀਆਂ ’ਤੇ ਨਜ਼ਰ ਨਾ ਰੱਖਣ ਦਾ ਹੀ ਨਤੀਜਾ ਹੈ। ਇਸ ਲਈ ਮਾਪਿਆਂ ਵੱਲੋਂ ਬਚਪਨ ਤੋਂ ਹੀ ਬੱਚਿਆਂ ਨੂੰ ਆਪਣੇ ਤੋਂ ਵੱਡਿਆਂ ਦਾ ਸਤਿਕਾਰ ਕਰਨ ਅਤੇ ਸੰਸਕਾਰੀ ਬਣਨ ਦੀ ਸਿੱਖਿਆ ਦੇਣ ਦੀ ਲੋੜ ਹੈ, ਕਿਉਂਕਿ ਬੱਚਿਆਂ ਦੀ ਪਹਿਲੀ ਪਾਠਸ਼ਾਲਾ ਤਾਂ ਘਰ ਨੂੰ ਹੀ ਮੰਨਿਆ ਜਾਂਦਾ ਹੈ।
- ਵਿਜੇ ਕੁਮਾਰ
ਕੇਂਦਰੀ ਬਜਟ ਡੂੰਘੀਆਂ ਚੁਣੌਤੀਆਂ ਨੂੰ ਨਜ਼ਰਅੰਦਾਜ਼ ਕਰਦਾ ਹੈ
NEXT STORY 
