ਦੇਸ਼ ’ਚ ਔਰਤਾਂ ਦੇ ਵਿਰੁੱਧ ਅਪਰਾਧਾਂ ਦੀ ਇਕ ਹਨੇਰੀ ਜਿਹੀ ਆਈ ਹੋਈ ਹੈ ਅਤੇ ਨਾਬਾਲਗ ਬੱਚੀਆਂ ਵੀ ਵਾਸਨਾ ਦੇ ਭੁੱਖੇ ਦਰਿੰਦਿਆਂ ਦੇ ਅੱਤਿਆਚਾਰ ਦਾ ਸ਼ਿਕਾਰ ਹੋਣ ਦੇ ਸਿੱਟੇ ਵਜੋਂ ਗਰਭਵਤੀ ਹੋ ਕੇ ਬੱਚਿਆਂ ਨੂੰ ਜਨਮ ਦੇ ਰਹੀਆਂ ਹਨ ਜਿਸ ਨਾਲ ਉਨ੍ਹਾਂ ਦਾ ਜੀਵਨ ਨਸ਼ਟ ਹੋ ਰਿਹਾ ਹੈ। ਇਸ ਦੀਆਂ ਇਸੇ ਸਾਲ ਦੇ 3 ਮਹੀਨਿਆਂ ’ਚ ਸਾਹਮਣੇ ਆਈਆਂ ਘਟਨਾਵਾਂ ਹੇਠਾਂ ਦਰਜ ਹਨ :
* 31 ਜਨਵਰੀ, 2026 ਨੂੰ ‘ਬਾਲਾਘਾਟ’ (ਮੱਧ ਪ੍ਰਦੇਸ਼) ਦੇ ਸਰਕਾਰੀ ‘ਕਸਤੂਰਬਾ ਗਾਂਧੀ ਬਾਲਿਕਾ ਹੋਸਟਲ’ ’ਚ ਰਹਿਣ ਵਾਲੀ 13 ਸਾਲਾ ਵਿਦਿਆਰਥਣ ਨੇ ਜ਼ਿਲਾ ਹਸਪਤਾਲ ’ਚ ਇਕ ਬੱਚੀ ਨੂੰ ਜਨਮ ਦਿੱਤਾ।
* 11 ਫਰਵਰੀ ਨੂੰ ਪੁਣੇ (ਮਹਾਰਾਸ਼ਟਰ) ’ਚ ਜਬਰ-ਜ਼ਨਾਹ ਦੀ ਸ਼ਿਕਾਰ ਇਕ 15 ਸਾਲਾ ਲੜਕੀ ਨੇ ਆਪਣੇ ਘਰ ’ਚ ਹੀ ਇਕ ਬੱਚੀ ਨੂੰ ਜਨਮ ਦਿੱਤਾ। ਪੁਲਸ ਨੇ ਇਸ ਸਿਲਸਿਲੇ ’ਚ ਇਕ 24 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਜਿਸ ਨੇ ਪਿਆਰ ਦਾ ਝਾਂਸਾ ਦੇ ਕੇ ਉਸ ਨੂੰ ਆਪਣੇ ਜਾਲ ’ਚ ਫਸਾਇਆ ਅਤੇ ਵਾਰ-ਵਾਰ ਉਸ ਨਾਲ ਜਬਰ-ਜ਼ਨਾਹ ਕੀਤਾ ਜਿਸ ਨਾਲ ਉਹ ਗਰਭਵਤੀ ਹੋ ਗਈ।
* 19 ਫਰਵਰੀ ਨੂੰ ‘ਹਾਪੁੜ’ (ਉੱਤਰ ਪ੍ਰਦੇਸ਼) ’ਚ ਇਕ ਮੌਲਾਨਾ ਵੱਲੋਂ ਡਰਾ-ਧਮਕਾ ਕੇ ਆਪਣੀ ਹਵਸ ਦਾ ਸ਼ਿਕਾਰ ਬਣਾਈ ਗਈ ਉਸ ਦੇ ਗੁਆਂਢ ’ਚ ਰਹਿਣ ਵਾਲੀ 14 ਸਾਲਾ ਬੱਚੀ ਨੇ ਘਰ ’ਚ ਹੀ ਇਕ ਬੱਚੀ ਨੂੰ ਜਨਮ ਦਿੱਤਾ।
* 27 ਫਰਵਰੀ ਨੂੰ ‘ਰੁਦਰਪ੍ਰਯਾਗ’ (ਉੱਤਰਾਖੰਡ) ਜ਼ਿਲੇ ’ਚ ਨੌਵੀਂ ਜਮਾਤ ’ਚ ਪੜ੍ਹਨ ਵਾਲੀ ਇਕ ਨਾਬਾਲਗ ਵਿਦਿਆਰਥਣ ਨੇ ਬੱਚੇ ਨੂੰ ਜਨਮ ਦਿੱਤਾ, ਜਿਸ ਨਾਲ ਪੂਰੇ ਖੇਤਰ ’ਚ ਹਲਚਲ ਮਚ ਗਈ।
* 28 ਫਰਵਰੀ, 2026 ਨੂੰ ‘ਧਾਰ’ (ਮੱਧ ਪ੍ਰਦੇਸ਼) ’ਚ ‘ਪੀਥਮਪੁਰ’ ਦੇ ਇਕ ਸਕੂਲ ’ਚ 10ਵੀਂ ਦੀ ਬੋਰਡ ਪ੍ਰੀਖਿਆ ਦੇਣ ਆਈ 17 ਸਾਲਾ ਵਿਦਿਆਰਥਣ ਨੇ ਸਕੂਲ ਦੇ ਪਖਾਨੇ ’ਚ ਬੱਚੀ ਨੂੰ ਜਨਮ ਦਿੱਤਾ। ਵਿਦਿਆਰਥਣ 8 ਮਹੀਨੇ ਦੀ ਗਰਭਵਤੀ ਸੀ ਅਤੇ ਪਰਿਵਾਰ ਨੂੰ ਇਸ ਦੀ ਜਾਣਕਾਰੀ ਤੱਕ ਨਹੀਂ ਸੀ।
* 21 ਮਾਰਚ ਨੂੰ ਚਰਖੀ ਦਾਦਰੀ (ਹਰਿਆਣਾ) ’ਚ ਇਕ 16 ਸਾਲਾ ਨਾਬਾਲਗਾ ਨੂੰ ਕਮਰ ’ਚ ਦਰਦ ਦੀ ਸ਼ਿਕਾਇਤ ਹੋਣ ’ਤੇ ਜਦੋਂ ਮਾਤ੍ਰ ਅਤੇ ਸ਼ਿਸ਼ੂ ਹਸਪਤਾਲ ’ਚ ਪਰਿਵਾਰਕ ਮੈਂਬਰਾਂ ਨੇ ਭਰਤੀ ਕਰਵਾਇਆ ਤਾਂ ਜਾਂਚ ਦੌਰਾਨ ਡਾਕਟਰਾਂ ਨੇ ਉਸ ਨੂੰ ਗਰਭਵਤੀ ਪਾਇਆ ਅਤੇ ਕੁਝ ਹੀ ਦੇਰ ’ਚ ਉਸ ਨੇ ਇਕ ਬੱਚੇ ਨੂੰ ਜਨਮ ਦੇ ਦਿੱਤਾ ਜਿਸ ਦੀ ਹਾਲਤ ਗੰਭੀਰ ਹੋਣ ਕਰ ਕੇ ਉਸ ਨੂੰ ਪੀ. ਜੀ. ਆਈ. ਰੈਫਰ ਕਰ ਦਿੱਤਾ ਗਿਆ।
* 15 ਅਪ੍ਰੈਲ ਨੂੰ ‘ਪਿਥੌਰਾਗੜ੍ਹ’ (ਉੱਤਰਾਖੰਡ) ਦੇ ਜ਼ਿਲਾ ਹਸਪਤਾਲ ’ਚ ਆਪਣੇ ਹੀ ਪਿਤਾ ਵੱਲੋਂ ਜਬਰ-ਜ਼ਨਾਹ ਦੇ ਸਿੱਟੇ ਵਜੋਂ ਗਰਭਵਤੀ ਹੋਈ ਇਕ 14 ਸਾਲਾ ਨਾਬਾਲਗਾ ਨੇ ਸਰਜਰੀ ਜ਼ਰੀਏ ਬੇਟੇ ਨੂੰ ਜਨਮ ਦਿੱਤਾ। ਪੁਲਸ ਨੇ ਇਸ ਮਾਮਲੇ ’ਚ ਨਾਬਾਲਗਾ ਦੇ ਪਿਤਾ ਵਿਰੁੱਧ ਪੋਕਸੋ ਐਕਟ ਤਹਿਤ ਕੇਸ ਦਰਜ ਕੀਤਾ ਹੈ।
* 15 ਅਪ੍ਰੈਲ ਨੂੰ ਹੀ ‘ਕੰਧਮਾਲ’ (ਓਡਿਸ਼ਾ) ਦੇ ਇਕ ਰਿਹਾਇਸ਼ੀ ਸਕੂਲ ’ਚ ਰਹਿਣ ਵਾਲੀ ਨਾਬਾਲਗ ਵਿਦਿਆਰਥਣ ਦੇ ਬੱਚੇ ਨੂੰ ਜਨਮ ਦੇਣ ਦੀ ਖ਼ਬਰ ਸਾਹਮਣੇ ਆਈ, ਜਿਸ ਨਾਲ ਪ੍ਰਸ਼ਾਸਨ ਅਤੇ ਸਕੂਲ ਪ੍ਰਬੰਧਨ ਦੀ ਨਿਗਰਾਨੀ ’ਤੇ ਸਵਾਲ ਉੱਠੇ ਹਨ।
* 21 ਅਪ੍ਰੈਲ ਨੂੰ ‘ਪੀਲੀਭੀਤ’ (ਉੱਤਰ ਪ੍ਰਦੇਸ਼) ’ਚ 13 ਸਾਲਾ ਇਕ ਨਾਬਾਲਗਾ ਨੇ ਹਸਪਤਾਲ ਦੇ ਪਖਾਨੇ ’ਚ ਬੱਚੀ ਨੂੰ ਜਨਮ ਦਿੱਤਾ। ਇਸ ਮਾਮਲੇ ’ਚ ਇਕ 19 ਸਾਲਾ ਨੌਜਵਾਨ ਵਿਰੁੱਧ ਐੱਫ. ਆਈ. ਆਰ. ਦਰਜ ਕੀਤੀ ਗਈ ਹੈ।
* ਅਤੇ ਹੁਣ 23 ਅਪ੍ਰੈਲ ਨੂੰ ‘ਨਵਾਂਸ਼ਹਿਰ’ (ਪੰਜਾਬ) ’ਚ ਆਪਣੀ ਨਾਬਾਲਗ ਬੇਟੀ ਨਾਲ ਕਈ ਵਾਰ ਸਰੀਰਕ ਸਬੰਧ ਬਣਾ ਕੇ ਉਸ ਨੂੰ ਗਰਭਵਤੀ ਕਰ ਦੇਣ ਦੇ ਦੋਸ਼ ’ਚ ਇਕ ਵਿਅਕਤੀ ਨੂੰ ਪੁਲਸ ਨੇ ਗ੍ਰਿਫਤਾਰ ਕੀਤਾ ਹੈ। ਪੇਟ ’ਚ ਹਲਕਾ-ਹਲਕਾ ਦਰਦ ਰਹਿਣ ਕਰ ਕੇ ਜਦੋਂ ਉਹ ਹਸਪਤਾਲ ਗਈ ਤਾਂ ਡਾਕਟਰਾਂ ਨੇ ਸਕੈਨਿੰਗ ਕਰਨ ’ਤੇ ਉਸ ਨੂੰ 28 ਹਫਤਿਆਂ ਦੀ ਗਰਭਵਤੀ ਪਾਇਆ।
ਜਬਰ-ਜ਼ਨਾਹ ਦੀਆਂ ਸ਼ਿਕਾਰ ਨਾਬਾਲਗ ਬੱਚੀਆਂ ਵੱਲੋਂ ਬੱਚਿਆਂ ਨੂੰ ਜਨਮ ਦੇਣਾ ਸਮਾਜ ’ਤੇ ਇਕ ਘਿਨਾਉਣਾ ਧੱਬਾ ਹੈ। ਉਪਰੋਕਤ ਘਟਨਾਵਾਂ ਦਰਸਾਉਂਦੀਆਂ ਹਨ ਕਿ ਉੱਚ ਨੈਤਿਕ ਕਦਰਾਂ-ਕੀਮਤਾਂ ਦਾ ਦਾਅਵਾ ਕਰਨ ਵਾਲੇ ਕੁਝ ਦਰਿੰਦੇ ਇਸ ਹੱਦ ਤੱਕ ਡਿੱਗ ਚੁੱਕੇ ਹਨ ਕਿ ਉਨ੍ਹਾਂ ਨੂੰ ਆਪਣੀਆਂ ਮਾਸੂਮ ਬੱਚੀਆਂ ਦੇ ਜੀਵਨ ਤੱਕ ਦੀ ਵੀ ਪਰਵਾਹ ਨਹੀਂ।
ਇਕ ਪਾਸੇ ਅਸੀਂ ਆਪਣੀ ਪ੍ਰਾਚੀਨ ਸੰਸਕ੍ਰਿਤੀ ਅਤੇ ਉੱਚ ਨੈਤਿਕ ਆਦਰਸ਼ਾਂ ਆਦਿ ਦੀ ਗੱਲ ਕਰਦੇ ਹਾਂ ਅਤੇ ਵਿਸ਼ਵ ਗੁਰੂ ਹੋਣ ਦਾ ਦਾਅਵਾ ਤੱਕ ਕਰਦੇ ਹਾਂ, ਪਰ ਜਦੋਂ ਵਿਸ਼ਵ ’ਚ ਭਾਰਤ ’ਚ ਹੋ ਰਹੀ ਨੈਤਿਕਤਾ ਤੋਂ ਡਿੱਗੀਆਂ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਜਾਣਗੀਆਂ ਤਾਂ ਉੱਥੋਂ ਦੇ ਲੋਕਾਂ ਦੇ ਮਨ ’ਚ ਭਾਰਤ ਬਾਰੇ ਕੀ ਧਾਰਨਾ ਬਣੇਗੀ।
ਬੱਚੀਆਂ ਨੂੰ ਦਿੱਤਾ ਜਾਣ ਵਾਲਾ ਇਹ ਇਕ ਅਜਿਹਾ ਜ਼ਖ਼ਮ ਹੈ ਜੋ ਉਨ੍ਹਾਂ ਦੇ ਜੀਵਨ ਭਰ ਨਹੀਂ ਭਰ ਸਕਦਾ। ਇਸ ਲਈ ਆਪਣੇ ਕਾਰਿਆਂ ਨਾਲ ਬੱਚੀਆਂ ਦੀ ਜ਼ਿੰਦਗੀ ਨਰਕ ਬਣਾਉਣ ਵਾਲੇ ਦਰਿੰਦਿਆਂ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾ ਦੇਣ ਦੀ ਲੋੜ ਹੈ ਤਾਂ ਕਿ ਇਸ ਬੁਰਾਈ ’ਤੇ ਰੋਕ ਲੱਗ ਸਕੇ।
—ਵਿਜੇ ਕੁਮਾਰ
ਮੌਜੂਦਾ ਚੋਣਾਂ ਤੋਂ ਬਾਅਦ ਹੋਵੇਗਾ ਕਾਂਗਰਸ ’ਚ ਜਥੇਬੰਦਕ ਫੇਰਬਦਲ !
NEXT STORY 
