ਆਪ੍ਰੇਸ਼ਨ ਸਿੰਧੂਰ ਨੂੰ ਇਕ ਸਾਲ ਪੂਰਾ ਹੋ ਚੁੱਕਾ ਹੈ। ਜਿਸ ਆਪ੍ਰੇਸ਼ਨ ਨੇ ਅੱਤਵਾਦ ਦੇ ਨੈੱਟਵਰਕ ਨੂੰ ਕਰਾਰਾ ਜਵਾਬ ਦਿੱਤਾ, ਉਸ ਨੇ ਇਕ ਗੱਲ ਬਿਲਕੁਲ ਸਾਫ਼ ਕਰ ਦਿੱਤੀ ਕਿ ਅੱਜ ਉੱਤਰ ਪ੍ਰਦੇਸ਼ ਭਾਰਤ ਦੀ ਰੱਖਿਆ ਨਿਰਮਾਣ ਕ੍ਰਾਂਤੀ ਦਾ ਸਭ ਤੋਂ ਵੱਡਾ ਕੇਂਦਰ ਬਣ ਚੁੱਕਾ ਹੈ। ਦੇਸ਼ ਅੱਜ ਸਾਡੀ ਸੈਨਾ ਦੀ ਬਹਾਦਰੀ ਦਾ ਜਸ਼ਨ ਮਨਾ ਰਿਹਾ ਹੈ, ਪਰ ਉਨ੍ਹਾਂ ਫੈਕਟਰੀਆਂ, ਮਿਜ਼ਾਈਲ ਯੂਨਿਟਾਂ ਅਤੇ ਡਿਫੈਂਸ ਕਾਰੀਡੋਰ ਨੂੰ ਵੀ ਪਛਾਣ ਮਿਲਣੀ ਚਾਹੀਦੀ ਹੈ ਜੋ ਉੱਤਰ ਪ੍ਰਦੇਸ਼ ਦੀ ਧਰਤੀ ’ਤੇ ਤੇਜ਼ੀ ਨਾਲ ਖੜ੍ਹੇ ਹੋ ਰਹੇ ਹਨ।
ਇਹ ਸਿਰਫ਼ ਉਦਯੋਗਾਂ ਦਾ ਵਿਕਾਸ ਨਹੀਂ, ਸਗੋਂ ਆਤਮਨਿਰਭਰ ਭਾਰਤ ਦੀ ਸਭ ਤੋਂ ਵੱਡੀ ਸਫ਼ਲਤਾ ਦੀ ਕਹਾਣੀ ਹੈ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਦੀ ਡਬਲ ਇੰਜਣ ਸਰਕਾਰ ਨੇ ਇਸ ਸੁਪਨੇ ਨੂੰ ਜ਼ਮੀਨ ’ਤੇ ਉਤਾਰਨ ਦਾ ਕੰਮ ਕੀਤਾ ਹੈ। ਪੀ. ਐੱਮ. ਮੋਦੀ ਨੇ ਡਿਫੈਂਸ ਕਾਰੀਡੋਰ ਦਾ ਵਿਜ਼ਨ ਦਿੱਤਾ, ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਲਗਾਤਾਰ ਸਹਿਯੋਗ ਦਿੱਤਾ ਅਤੇ ਯੋਗੀ ਆਦਿੱਤਿਆਨਾਥ ਨੇ ਉਸ ਨੂੰ ਤੇਜ਼ੀ ਨਾਲ ਲਾਗੂ ਕੀਤਾ।
ਅੱਜ ਉੱਤਰ ਪ੍ਰਦੇਸ਼ ਡਿਫੈਂਸ ਇੰਡਸਟਰੀਅਲ ਕਾਰੀਡੋਰ ਦੇ ਛੇ ਵੱਡੇ ਕੇਂਦਰ-ਆਗਰਾ, ਅਲੀਗੜ੍ਹ, ਲਖਨਊ, ਕਾਨਪੁਰ, ਝਾਂਸੀ ਅਤੇ ਚਿਤਰਕੂਟ-ਦੇਸ਼ ਦੀ ਰੱਖਿਆ ਤਾਕਤ ਨੂੰ ਨਵੀਂ ਉਚਾਈ ਦੇ ਰਹੇ ਹਨ। ਇੱਥੇ 35,000 ਕਰੋੜ ਤੋਂ ਵੱਧ ਦੇ ਨਿਵੇਸ਼ ’ਤੇ ਤੇਜ਼ੀ ਨਾਲ ਕੰਮ ਚੱਲ ਰਿਹਾ ਹੈ। ਜਨਵਰੀ 2026 ਤੱਕ 12,000 ਕਰੋੜ ਤੋਂ ਵੱਧ ਦੇ ਪ੍ਰਾਜੈਕਟ ਸ਼ੁਰੂ ਹੋ ਚੁੱਕੇ ਸਨ। ਰਾਜ ਸਰਕਾਰ ਨੇ ਵੱਡੀ ਜ਼ਮੀਨ ਉਪਲਬਧ ਕਰਵਾਈ ਹੈ ਅਤੇ ਰੱਖਿਆ ਖੇਤਰ ’ਚ ਨਿਵੇਸ਼ ਲਈ ਵਿਸ਼ੇਸ਼ ਸਹੂਲਤਾਂ ਵੀ ਦਿੱਤੀਆਂ ਹਨ।
ਹੁਣ ਉੱਤਰ ਪ੍ਰਦੇਸ਼ ਸਿਰਫ਼ ਫੈਕਟਰੀਆਂ ਨਹੀਂ ਬਣਾ ਰਿਹਾ, ਸਗੋਂ ਜੰਗ ’ਚ ਕੰਮ ਆਉਣ ਵਾਲੇ ਆਧੁਨਿਕ ਹਥਿਆਰ ਤਿਆਰ ਕਰ ਰਿਹਾ ਹੈ।
ਲਖਨਊ ਅੱਜ ਬ੍ਰਹਮੋਸ ਮਿਜ਼ਾਈਲ ਅਤੇ ਭਾਰੀ ਰੱਖਿਆ ਉਪਕਰਨਾਂ ਦਾ ਵੱਡਾ ਕੇਂਦਰ ਬਣ ਚੁੱਕਾ ਹੈ। ਇੱਥੇ ਬਣੀਆਂ ਬ੍ਰਹਮੋਸ ਮਿਜ਼ਾਈਲਾਂ ਨੇ ‘ਆਪ੍ਰੇਸ਼ਨ ਸਿੰਧੂਰ’ ’ਚ ਆਪਣੀ ਤਾਕਤ ਦਿਖਾਈ। ਅਲੀਗੜ੍ਹ ਛੋਟੇ ਹਥਿਆਰ, ਡਰੋਨ, ਇਲੈਕਟ੍ਰਾਨਿਕ ਵਾਰਫੇਅਰ ਅਤੇ ਰੱਖਿਆ ਉਪਕਰਨਾਂ ਦਾ ਵੱਡਾ ਹੱਬ ਬਣ ਰਿਹਾ ਹੈ। ਕਾਨਪੁਰ ਗੋਲਾ-ਬਾਰੂਦ, ਮਿਜ਼ਾਈਲ, ਬੁਲੇਟਪਰੂਫ ਜੈਕੇਟ ਅਤੇ ਰੱਖਿਆ ਸਮੱਗਰੀ ਦੇ ਨਿਰਮਾਣ ’ਚ ਤੇਜ਼ੀ ਨਾਲ ਅੱਗੇ ਵਧ ਰਿਹਾ ਹੈ। ਉੱਥੇ ਹੀ ਆਗਰਾ ਅਤੇ ਚਿਤਰਕੂਟ ਨੂੰ ਐਰੋਸਪੇਸ ਅਤੇ ਪ੍ਰੀਸੀਜ਼ਨ ਇੰਜੀਨੀਅਰਿੰਗ ਲਈ ਵਿਕਸਿਤ ਕੀਤਾ ਜਾ ਰਿਹਾ ਹੈ।
ਅੱਜ ਉੱਤਰ ਪ੍ਰਦੇਸ਼ ’ਚ ਆਰਟਿਲਰੀ ਸ਼ੈੱਲ, ਡਰੋਨ, ਬੁਲੇਟਪਰੂਫ ਜੈਕੇਟ ਅਤੇ ਐਡਵਾਂਸ ਕਮਿਊਨੀਕੇਸ਼ਨ ਸਿਸਟਮ ਬਣਾਏ ਜਾ ਰਹੇ ਹਨ। ਆਪ੍ਰੇਸ਼ਨ ਸਿੰਧੂਰ ’ਚ ਇਸਤੇਮਾਲ ਹੋਏ ਕਈ ਡਰੋਨ ਅਤੇ ਹੋਰ ਸਿਸਟਮ ਇਸੇ ਕਾਰੀਡੋਰ ਤੋਂ ਆਏ ਸਨ, ਜਿਨ੍ਹਾਂ ਨੇ ਸੈਨਾ ਨੂੰ ਰੀਅਲ ਟਾਈਮ ਜਾਣਕਾਰੀ ਅਤੇ ਆਪ੍ਰੇਸ਼ਨ ’ਚ ਮਦਦ ਦਿੱਤੀ।
ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਇਸ ਡਿਫੈਂਸ ਕਾਰੀਡੋਰ ਨੂੰ ਸਿਰਫ਼ ਮੈਨੂਫੈਕਚਰਿੰਗ ਤੱਕ ਸੀਮਤ ਨਹੀਂ ਰੱਖਣਾ ਚਾਹੁੰਦੇ। ਉਨ੍ਹਾਂ ਦਾ ਟੀਚਾ ਇਸ ਨੂੰ ‘ਨਾਲੇਜ ਕਾਰੀਡੋਰ’ ਬਣਾਉਣਾ ਹੈ, ਜਿੱਥੇ ਖੋਜ ਅਤੇ ਤਕਨਾਲੋਜੀ ਵੀ ਨਾਲ-ਨਾਲ ਅੱਗੇ ਵਧੇ। ਇਸੇ ਦਿਸ਼ਾ ’ਚ Indian Institute of Technology Kanpur ਦੇ ਨਾਲ ਮਿਲ ਕੇ ਡਰੋਨ ਟੈਕਨਾਲੋਜੀ ਲਈ ‘ਸੈਂਟਰ ਆਫ ਐਕਸੀਲੈਂਸ’ ਬਣਾਇਆ ਜਾ ਰਿਹਾ ਹੈ।
ਉੱਤਰ ਪ੍ਰਦੇਸ਼ ਕੋਲ ਦੇਸ਼ ਦੀ 56 ਫੀਸਦੀ ਕੁਸ਼ਲ ਕਾਰਜਸ਼ਕਤੀ ਅਤੇ ਲਗਭਗ 96 ਲੱਖ ਐੱਮ. ਐੱਸ. ਐੱਮ. ਈਜ਼ ਦਾ ਵਿਸ਼ਾਲ ਨੈੱਟਵਰਕ ਹੈ, ਜੋ ਇਸ ਨੂੰ ਰੱਖਿਆ ਨਿਰਮਾਣ ਲਈ ਸਭ ਤੋਂ ਮਜ਼ਬੂਤ ਰਾਜ ਬਣਾਉਂਦਾ ਹੈ। ਰਾਜ ’ਚ 21,000 ਤੋਂ ਵੱਧ ਸਟਾਰਟਅੱਪਸ ਵੀ ਸ਼ੁਰੂ ਹੋਏ ਹਨ, ਜੋ ਏ. ਆਈ., ਰੋਬੋਟਿਕਸ, ਡਰੋਨ, ਸੈਮੀਕੰਡਕਟਰ ਅਤੇ ਡੇਟਾ ਸੈਂਟਰ ਵਰਗੇ ਖੇਤਰਾਂ ’ਚ ਕੰਮ ਕਰ ਰਹੇ ਹਨ। ਇਨ੍ਹਾਂ ’ਚੋਂ ਕਈ ਹੁਣ ਰੱਖਿਆ ਖੇਤਰ ਨਾਲ ਵੀ ਜੁੜ ਰਹੇ ਹਨ।
ਇਸ ਪੂਰੀ ਸਫ਼ਲਤਾ ਦੀ ਸਭ ਤੋਂ ਵੱਡੀ ਤਾਕਤ ਡਬਲ ਇੰਜਣ ਸਰਕਾਰ ਦਾ ਤਾਲਮੇਲ ਰਹੀ ਹੈ। ਪ੍ਰਧਾਨ ਮੰਤਰੀ ਮੋਦੀ ਨੇ ਵਿਜ਼ਨ ਦਿੱਤਾ, ਰਾਜਨਾਥ ਸਿੰਘ ਨੇ ਕੇਂਦਰ ਤੋਂ ਮਜ਼ਬੂਤ ਸਹਿਯੋਗ ਦਿੱਤਾ ਅਤੇ ਯੋਗੀ ਆਦਿੱਤਿਆਨਾਥ ਨੇ ਜ਼ਮੀਨ ’ਤੇ ਉਸ ਨੂੰ ਹਕੀਕਤ ਬਣਾ ਦਿੱਤਾ।
ਆਪ੍ਰੇਸ਼ਨ ਸਿੰਧੂਰ ਦੀ ਪਹਿਲੀ ਵਰ੍ਹੇਗੰਢ ’ਤੇ ਅੱਜ ਦੇਸ਼ ਨੂੰ ਇਹ ਸਮਝਣਾ ਚਾਹੀਦਾ ਹੈ ਕਿ ਲਖਨਊ ਦੀਆਂ ਬ੍ਰਹਮੋਸ ਮਿਜ਼ਾਈਲਾਂ, ਅਲੀਗੜ੍ਹ ਦੇ ਡਰੋਨ, ਕਾਨਪੁਰ ਦਾ ਗੋਲਾ-ਬਾਰੂਦ ਅਤੇ ਉੱਤਰ ਪ੍ਰਦੇਸ਼ ’ਚ ਬਣੇ ਹੋਰ ਰੱਖਿਆ ਉਪਕਰਨ ਦਰਾਮਦ ਨਹੀਂ ਕੀਤੇ ਗਏ ਸਨ। ਇਹ ਭਾਰਤ ’ਚ ਬਣੇ ਸਨ ਅਤੇ ਵੱਡੀ ਗਿਣਤੀ ’ਚ ਉੱਤਰ ਪ੍ਰਦੇਸ਼ ’ਚ ਬਣੇ ਸਨ। ਇਹੀ ਆਤਮਨਿਰਭਰ ਭਾਰਤ ਦੀ ਅਸਲੀ ਤਸਵੀਰ ਹੈ।
ਅੱਜ ਉੱਤਰ ਪ੍ਰਦੇਸ਼ ਸਿਰਫ਼ ਦੇਸ਼ ਦੀ ਰੱਖਿਆ ਯਾਤਰਾ ’ਚ ਹਿੱਸਾ ਨਹੀਂ ਲੈ ਰਿਹਾ, ਸਗੋਂ ਉਸ ਦੀ ਅਗਵਾਈ ਕਰ ਰਿਹਾ ਹੈ। ਆਉਣ ਵਾਲੇ ਸਮੇਂ ’ਚ ਇਹ ਰਾਜ ਸਿਰਫ਼ ਭਾਰਤ ਦੀਆਂ ਜ਼ਰੂਰਤਾਂ ਪੂਰੀਆਂ ਨਹੀਂ ਕਰੇਗਾ, ਸਗੋਂ ਦੁਨੀਆ ਦੇ ਮਿੱਤਰ ਦੇਸ਼ਾਂ ਨੂੰ ਰੱਖਿਆ ਉਪਕਰਨ ਬਰਾਮਦ ਕਰਨ ਵਾਲਾ ਵੱਡਾ ਕੇਂਦਰ ਵੀ ਬਣੇਗਾ।
ਚੁਣੌਤੀਆਂ ਅਜੇ ਵੀ ਹਨ, ਪਰ ਦਿਸ਼ਾ ਸਾਫ਼ ਹੈ ਅਤੇ ਰਫ਼ਤਾਰ ਮਜ਼ਬੂਤ। ਆਪ੍ਰੇਸ਼ਨ ਸਿੰਧੂਰ ਦੇ ਇਕ ਸਾਲ ਬਾਅਦ ਅੱਜ ਉੱਤਰ ਪ੍ਰਦੇਸ਼ ਆਤਮਨਿਰਭਰ ਅਤੇ ਸ਼ਕਤੀਸ਼ਾਲੀ ਭਾਰਤ ਦੀ ਸਭ ਤੋਂ ਮਜ਼ਬੂਤ ਰੱਖਿਆ ਸ਼ਕਤੀ ਬਣ ਕੇ ਖੜ੍ਹਾ ਹੈ। ਭਾਰਤ ਦੇ ਰੱਖਿਆ ਨਿਰਮਾਣ ਦਾ ਭਵਿੱਖ ਹੁਣ ਉੱਤਰ ਪ੍ਰਦੇਸ਼ ਦੀ ਧਰਤੀ ਤੋਂ ਉੱਭਰ ਰਿਹਾ ਹੈ।
ਸ਼ਹਿਜ਼ਾਦ ਪੂਨਾਵਾਲਾ (ਰਾਸ਼ਟਰੀ ਬੁਲਾਰਾ, ਭਾਜਪਾ)
'ਭਾਰਤ ਦੇ ਪ੍ਰਾਈਵੇਟ ਅਤੇ ਸਰਕਾਰੀ ਸਕੂਲਾਂ ’ਚ’ ਸਿੱਖਿਆ ਦੀ ਸਥਿਤੀ ਇਕੋ ਜਿਹੀ!
NEXT STORY 
