ਜਲੰਧਰ, (ਖੁਰਾਣਾ)- ਮੇਅਰ ਜਗਦੀਸ਼ ਰਾਜਾ ਨੇ ਅੱਜ ਨਾਜਾਇਜ਼ ਬਿਲਡਿੰਗਾਂ ਸਬੰਧੀ ਲੋਕਲ ਬਾਡੀਜ਼ ਮੰਤਰੀ ਨਵਜੋਤ ਸਿੱਧੂ ਨੂੰ ਅੱਧੀ-ਅਧੂਰੀ ਰਿਪੋਰਟ ਸੌਂਪ ਦਿੱਤੀ ਹੈ ਪਰ ਨਵਜੋਤ ਸਿੱਧੂ ਨੇ ਮੇਅਰ ਤੋਂ ਇਕ ਹਫਤੇ ਦੇ ਅੰਦਰ-ਅੰਦਰ ਸਾਰੀਆਂ ਬਿਲਡਿੰਗਾਂ ਦੀ ਕੰਪਾਊਂਡੇਬਲ ਵਾਇਲੇਸ਼ਨ ਦੀ ਡਿਟੇਲ ਮੰਗੀ ਹੈ, ਜਿਸ ਨਾਲ ਸ਼ਹਿਰ ਦਾ ਮਾਹੌਲ ਇਕ ਵਾਰ ਫਿਰ ਤੋਂ ਗਰਮਾ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਸ਼ਹਿਰ ਦੀਅਾਂ 35 ਬਿਲਡਿੰਗਾਂ ਨੂੰ ਖੁਦ ਚੈੱਕ ਕਰਨ ਤੋਂ ਬਾਅਦ ਨਵਜੋਤ ਸਿੱਧੂ ਨੇ ਮੇਅਰ ਨੂੰ 93 ਬਿਲਡਿੰਗਾਂ ਦੀ ਇਕ ਸੂਚੀ ਸੌਂਪੀ ਸੀ ਅਤੇ ਆਪਣੇ ਪੱਧਰ ’ਤੇ ਜਾਂਚ ਕਰ ਕੇ 15 ਦਿਨਾਂ ਵਿਚ ਰਿਪੋਰਟ ਮੰਗੀ ਸੀ। ਸਿੱਧੂ ਦੇ ਐਕਸ਼ਨ ਤੋਂ ਬਾਅਦ ਅਚਾਨਕ ਸਟੇਟ ਵਿਜੀਲੈਂਸ ਬਿਊਰੋ ਨੇ ਜਲੰਧਰ ਦੀਆਂ 120 ਦੇ ਕਰੀਬ ਨਾਜਾਇਜ਼ ਬਿਲਡਿੰਗਾਂ ਦੀ ਪੈਮਾਇਸ਼ ਸ਼ੁਰੂ ਕਰ ਦਿੱਤੀ, ਜਿਸ ਨਾਲ ਸ਼ਹਿਰ ਵਿਚ ਖਲਬਲੀ ਮਚ ਗਈ।
ਮੇਅਰ ਵੱਲੋਂ 20 ਦਿਨਾਂ ਦੇ ਅੰਦਰ ਕੁਲ 34 ਬਿਲਡਿੰਗਾਂ ਦੀ ਸੂਚੀ ਹੀ ਤਿਆਰ ਹੋ ਸਕੀ, ਜਿਸ ਨੂੰ ਅੱਜ ਮੇਅਰ ਨੇ ਚੰਡੀਗੜ੍ਹ ’ਚ ਨਵਜੋਤ ਸਿੰਘ ਸਿੱਧੂ ਨੂੰ ਸੌਂਪ ਦਿੱਤਾ। ਸਿੱਧੂ ਨੇ ਸਾਰੀਆਂ 93 ਬਿਲਡਿੰਗਾਂ ਦੀ ਕੰਪਾਊਂਡੇਬਲ ਅਤੇ ਨਾਨ ਕੰਪਾਊਂਡੇਬਲ ਵਾਇਲੇਸ਼ਨ ਦਾ ਪੂਰਾ ਵੇਰਵਾ ਮੰਗਿਆ ਹੈ ਅਤੇ ਮੇਅਰ ਨੂੰ ਇਕ ਹਫਤੇ ’ਚ ਮੁਹੱਈਆ ਕਰਵਾਉਣ ਲਈ ਕਿਹਾ ਹੈ। ਸੂਚੀ ’ਚ ਇਹ ਜ਼ਿਕਰ ਵੀ ਹੋਣਾ ਚਾਹੀਦਾ ਹੈ ਕਿ ਜਿਨ੍ਹਾਂ ਬਿਲਡਿੰਗਾਂ ਨੂੰ ਕੰਪਾਊਂਡ ਕੀਤਾ ਜਾਵੇਗਾ, ਉਨ੍ਹਾਂ ਤੋਂ ਨਿਗਮ ਨੂੰ ਕਿੰਨੀ ਆਮਦਨ ਹੋਵੇਗੀ। ਮੇਅਰ ਤੇ ਸਿੱਧੂ ਦੀ ਅੱਜ ਹੋਈ ਮੁਲਾਕਾਤ ਤੋਂ ਲੱਗਦਾ ਹੈ ਕਿ ਪੰਜਾਬ ਸਰਕਾਰ ਨਿਗਮ ਦੀ ਆਮਦਨ ਵਧਾਉਣ ਲਈ ਜਲਦ ਹੀ ਵਨ ਟਾਈਮ ਸੇਟਲਮੈਂਟ ਪਾਲਿਸੀ ਜਾਰੀ ਕਰ ਸਕਦੀ ਹੈ। ਇਸ ਪਾਲਿਸੀ ਦੇ ਤਹਿਤ ਜਿਨ੍ਹਾਂ ਬਿਲਡਿੰਗਾਂ ਨੂੰ ਕੰਪਾਊਂਡ ਕੀਤਾ ਜਾਵੇਗਾ ਉਹ ਤਾਂ ਬਾਅਦ ਦੀ ਗੱਲ ਹੈ ਪਰ ਮੌਜੂਦਾ ਨਿਯਮਾਂ ਅਨੁਸਾਰ ਵੀ ਕਈ ਬਿਲਡਿੰਗਾਂ ਨੂੰ ਕੰਪਾਊਂਡ ਕਰ ਕੇ ਨਿਗਮ ਕਰੋੜਾਂ ਰੁਪਏ ਕਮਾ ਸਕਦਾ ਹੈ। ਨਵਜੋਤ ਸਿੱਧੂ ਨੇ ਇਸਦੇ ਲਈ ਰਸਤੇ ਖੋਲ੍ਹ ਦਿੱਤੇ ਹਨ।
ਨਾਨ ਕੰਪਾਊਂਡੇਬਲ ਵਾਇਲੇਸ਼ਨ ’ਤੇ ਜ਼ਰੂਰ ਹੋਵੇਗੀ ਕਾਰਵਾਈ
ਨਵਜੋਤ ਸਿੱਧੂ ਅਤੇ ਵਿਜੀਲੈਂਸ ਦੀ ਜਾਣਕਾਰੀ ਵਿਚ ਆਈਆਂ 120 ਬਿਲਡਿੰਗਾਂ ਦੀ ਗੱਲ ਕਰੀਏ ਤਾਂ ਉਨ੍ਹਾਂ ਵਿਚੋਂ ਜ਼ਿਆਦਾਤਰ ਬਿਲਡਿੰਗਾਂ ਨਾਜਾਇਜ਼ ਹਨ। ਕਈ ਬਿਲਡਿੰਗਾਂ ਅਜਿਹੀਆਂ ਹਨ ਜਿਨ੍ਹਾਂ ਨੂੰ ਨਿਗਮ ਕਪਾਊਂਡ ਕਰ ਚੁੱਕਾ ਹੈ ਪਰ ਫਿਰ ਵੀ ਬਿਲਡਿੰਗ ਮਾਲਕਾਂ ਨੇ ਨਿਯਮਾਂ ਦੀਆਂ ਧੱਜੀਆਂ ਉਡਾਉਂਦਿਆਂ ਮੁੜ ਨਾਜਾਇਜ਼ ਉਸਾਰੀਆਂ ਕਰ ਲਈਆਂ ਹਨ। 14 ਜੂਨ ਨੂੰ ਨਵਜੋਤ ਸਿੱਧੂ ਦੇ ਦੌਰੇ ਤੋਂ ਬਾਅਦ ਸ਼ਹਿਰ ਦੀਆਂ ਕਈ ਨਾਜਾਇਜ਼ ਬਿਲਡਿੰਗਾਂ ’ਤੇ ਡਿੱਚ ਚੱਲ ਚੁੱਕੀ ਹੈ ਅਤੇ ਕਈ ਪ੍ਰਾਪਰਟੀਆਂ ਨੂੰ ਸੀਲ ਕਰ ਦਿੱਤਾ ਗਿਆ ਹੈ।
ਅਜਿਹੇ ਵਿਚ ਸੂਚੀ ਵਿਚ ਸ਼ਾਮਲ ਉਨ੍ਹਾਂ ਬਿਲਡਿੰਗਾਂ ਜਿਨ੍ਹਾਂ ਨੇ ਨਾਨ ਕੰਪਾਊਂਡੇਬਲ ਵਾਇਲੇਸ਼ਨ ਕੀਤੀ ਹੋਈ ਹੈ, ਉਨ੍ਹਾਂ ’ਤੇ ਸਰਕਾਰ ਆਉਣ ਵਾਲੇ ਦਿਨਾਂ ਵਿਚ ਸਖਤ ਕਾਰਵਾਈ ਕਰ ਸਕਦੀ ਹੈ। ਇਹ ਕਾਰਵਾਈ ਡੈਮੋਲੇਸ਼ਨ ਅਤੇ ਸੀਲਿੰਗ ਦੇ ਰੂਪ ਵਿਚ ਹੋ ਸਕਦੀ ਹੈ। ਇਸ ਸੰਭਾਵਨਾ ਨੂੰ ਵੇਖਦਿਆਂ ਕਈ ਬਿਲਡਿੰਗ ਮਾਲਕਾਂ ਨੇ ਆਪੋ-ਆਪਣੇ ਕੰਪਲੈਕਸਾਂ ਨੂੰ ਠੀਕ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।
ਸੀ. ਐੱਮ. ਨਾਲ ਮੀਟਿੰਗ ਅਜੇ ਤੈਅ ਨਹੀਂ :
ਸੰਸਦ ਮੈਂਬਰ, ਵਿਧਾਇਕਾਂ ਤੇ ਮੇਅਰ ਨੇ ਨਾਜਾਇਜ਼ ਬਿਲਡਿੰਗਾਂ ਦੇ ਮਾਮਲੇ ਵਿਚ ਮੁੱਖ ਮੰਤਰੀ ਨਾਲ ਬੈਠਕ ਕਰਨ ਦਾ ਜੋ ਪਲਾਨ ਬਣਾਇਆ ਸੀ ਉਹ ਸਿਰੇ ਚੜ੍ਹਦਾ ਨਜ਼ਰ ਨਹੀਂ ਆ ਰਿਹਾ ਕਿਉਂਕਿ ਬੈਠਕ ਦਾ ਸਮਾਂ ਹੀ ਫਾਈਨਲ ਨਹੀਂ ਹੋ ਸਕਿਆ। ਮੰਗਲਵਾਰ ਨੂੰ ਮੀਟਿੰਗ ਹੋਣ ਦੀ ਸੰਭਾਵਨਾ ਹੈ ਪਰ ਸਮਾਂ ਅਜੇ ਤੈਅ ਨਹੀਂ ਹੋਇਆ।
ਨਸ਼ੇ ਦੀ ਓਵਰਡੋਜ਼ ਨਾਲ ਨੌਜਵਾਨ ਦੀ ਮੌਤ, ਚਲਾਨ ਦਰਜ
NEXT STORY