ਦੇਸ਼ ਦੇ ਵਧੇਰੇ ਸਰਕਾਰੀ ਖੇਤਰ ਦੇ ਅਦਾਰੇ ਲਗਾਤਾਰ ਭਾਰੀ ਘਾਟੇ 'ਚ ਚੱਲ ਰਹੇ ਹਨ। ਇਨ੍ਹਾਂ 'ਚੋਂ ਇਕ ਦੂਰਸੰਚਾਰ ਕੰਪਨੀ ਬੀ. ਐੱਸ. ਐੱਨ. ਐੱਲ. ਵੀ ਵਰ੍ਹਿਆਂ ਤੋਂ ਭਾਰਤ ਦੀ 'ਏਅਰ ਇੰਡੀਆ' ਵਾਂਗ ਲਗਾਤਾਰ ਘਾਟੇ 'ਚ ਡੁੱਬਦੀ ਚਲੀ ਜਾ ਰਹੀ ਹੈ।
ਇਸ ਨੂੰ ਦੇਖਦੇ ਹੋਏ ਬੀ. ਐੱਸ. ਐੱਨ. ਐੱਲ. ਦੀ ਮੈਨੇਜਮੈਂਟ ਨੇ ਸਰਕਾਰ ਨੂੰ ਭੇਜੇ ਇਕ ਹੰਗਾਮੀ ਸੰਦੇਸ਼ (ਐੱਸ. ਓ. ਐੱਸ.) ਵਿਚ ਆਪਣੀ ਸਰਗਰਮੀ ਜਾਰੀ ਰੱਖਣ 'ਚ ਆਪਣੀ ਅਸਮਰੱਥਾ ਪ੍ਰਗਟਾਈ ਹੈ। ਕੰਪਨੀ 'ਤੇ ਅਜੇ ਲੱਗਭਗ 13000 ਕਰੋੜ ਰੁਪਏ ਦੀ ਦੇਣਦਾਰੀ ਹੈ, ਜਿਸ ਕਾਰਣ ਬੀ. ਐੱਸ. ਐੱਨ. ਐੱਲ. ਦਾ ਕਾਰੋਬਾਰ ਡਾਵਾਂਡੋਲ ਹੋ ਰਿਹਾ ਹੈ।
ਹਾਲਤ ਇੰਨੀ ਖਰਾਬ ਹੋ ਗਈ ਹੈ ਕਿ ਕੰਪਨੀ ਨੇ ਪੈਸਿਆਂ ਦੀ ਘਾਟ ਕਾਰਣ ਜੂਨ ਦੀ ਲੱਗਭਗ 850 ਕਰੋੜ ਰੁਪਏ ਤਨਖਾਹ ਦੇ ਸਕਣ ਵਿਚ ਵੀ ਆਪਣੀ ਅਸਮਰੱਥਾ ਪ੍ਰਗਟਾਈ ਹੈ।
ਬੀ. ਐੱਸ. ਐੱਨ. ਐੱਲ. ਦੇ ਬੈਂਕਿੰਗ ਡਵੀਜ਼ਨ ਦੇ ਸੀਨੀਅਰ ਜਨਰਲ ਮੈਨੇਜਰ ਨੇ ਮੰਤਰਾਲਾ ਦੇ ਸੰਯੁਕਤ ਸਕੱਤਰ ਨੂੰ ਲਿਖੇ ਪੱਤਰ 'ਚ ਕਿਹਾ ਹੈ ਕਿ ਮਾਸਿਕ ਆਮਦਨ ਅਤੇ ਖਰਚ 'ਚ ਫਰਕ ਕਾਰਣ ਹੁਣ ਕੰਪਨੀ ਦਾ ਸੰਚਾਲਨ ਜਾਰੀ ਰੱਖਣਾ ਅਤੇ ਬਿਨਾਂ ਢੁੱਕਵਾਂ ਧਨ ਮਿਲੇ ਇਸ ਦੇ ਲਈ ਆਪਣੀਆਂ ਸਰਗਰਮੀਆਂ ਜਾਰੀ ਰੱਖਣੀਆਂ ਸੰਭਵ ਹੋਣਗੀਆਂ।
ਕੰਪਨੀ ਲੱਗਭਗ ਇਕ ਦਹਾਕੇ ਤੋਂ ਘਾਟੇ ਵਿਚ ਚੱਲ ਰਹੀ ਹੈ ਪਰ ਇਸ ਦੇ ਬਾਵਜੂਦ ਜੇਕਰ ਇਸ 'ਤੇ ਅਜੇ ਤਕ ਤਾਲਾ ਨਹੀਂ ਲੱਗਾ ਹੈ ਤਾਂ ਇਸ ਦਾ ਇਕੋ-ਇਕ ਕਾਰਣ ਇਹ ਹੈ ਕਿ ਇਹ ਇਕ ਸਰਕਾਰੀ ਕੰਪਨੀ ਹੈ।
ਮੋਟੇ ਤੌਰ 'ਤੇ ਕੰਪਨੀ ਦੇ ਘਾਟੇ ਵਿਚ ਜਾਣ ਦਾ ਇਕ ਕਾਰਣ ਤਾਂ ਇਸ ਨੂੰ ਹੋਰ ਪ੍ਰਾਈਵੇਟ ਦੂਰਸੰਚਾਰ ਕੰਪਨੀਆਂ ਤੋਂ ਮਿਲ ਰਹੀ ਸਖਤ ਚੁਣੌਤੀ ਹੈ। ਉਧਰ ਦੂਜਾ ਕਾਰਣ ਇਸ ਦੇ ਸਟਾਫ ਵਲੋਂ ਆਪਣੇ ਗਾਹਕਾਂ ਨੂੰ ਤਸੱਲੀਬਖਸ਼ ਸੇਵਾ ਮੁਹੱਈਆ ਨਾ ਕਰਨਾ ਵੀ ਹੈ, ਜਿਸ ਤੋਂ ਅਸੰਤੁਸ਼ਟ ਗਾਹਕ ਇਸ ਵਲੋਂ ਮੂੰਹ ਫੇਰਦੇ ਜਾ ਰਹੇ ਹਨ।
ਇਸ ਲਈ ਜੇਕਰ ਬੀ. ਐੱਸ. ਐੱਨ. ਐੱਲ. ਮੈਨੇਜਮੈਂਟ ਆਪਣੇ ਕਰਮਚਾਰੀਆਂ ਦੀ ਜੁਆਬਦੇਹੀ ਤੈਅ ਕਰ ਕੇ ਗਾਹਕਾਂ ਦੀ ਸੰਤੁਸ਼ਟੀ ਨੂੰ ਯਕੀਨੀ ਬਣਾ ਸਕੇ ਤਾਂ ਸ਼ਾਇਦ ਇਸ ਦੀ ਬੇੜੀ ਡੁੱਬਣ ਤੋਂ ਬਚ ਜਾਵੇ।
— ਵਿਜੇ ਕੁਮਾਰ
ਜਦੋਂ ਦੇਸ਼ ਵਿਚ 'ਵੀ. ਆਈ. ਪੀ.' ਹੀ ਲੁੱਟੇ ਜਾਣ ਲੱਗਣ ਤਾਂ ਫਿਰ ਆਮ ਲੋਕ 'ਕਿਸ ਖੇਤ ਦੀ ਮੂਲੀ ਹਨ'
NEXT STORY