ਨਸ਼ਿਆਂ ਅਤੇ ਨਾਜਾਇਜ਼ ਹਥਿਆਰਾਂ ਦੇ ਸਮੱਗਲਰਾਂ ਵਿਰੁੱਧ ਸਰਕਾਰ ਵੱਲੋਂ ਚਲਾਈਆਂ ਜਾ ਰਹੀਆਂ ਮੁਹਿੰਮਾਂ ਦੇ ਬਾਵਜੂਦ ਸੁਰੱਖਿਆ ਬਲਾਂ ਨਾਲ ਜੁੜੇ ਵੱਖ-ਵੱਖ ਸੂਬਿਆਂ ਦੇ ਕੁਝ ਕੁ ਕਰਮਚਾਰੀਆਂ ਦੀ ਨਸ਼ਿਆਂ ਅਤੇ ਨਾਜਾਇਜ਼ ਹਥਿਆਰਾਂ ਦੇ ਵਪਾਰ ਦੇ ਇਲਾਵਾ ਹੋਰਨਾਂ ਅਪਰਾਧਾਂ ’ਚ ਵੀ ਸ਼ਮੂਲੀਅਤ ਅਕਸਰ ਸਾਹਮਣੇ ਆਉਂਦੀ ਰਹਿੰਦੀ ਹੈ :
* 3 ਮਾਰਚ ਨੂੰ ਰਾਸ਼ਟਰੀ ਜਾਂਚ ਏਜੰਸੀ (ਐੱਨ.ਆਈ.ਏ) ਨੇ ਜੰਮੂ-ਕਸ਼ਮੀਰ ਦੇ ਹੰਦਵਾੜਾ ਤੋਂ ਬੀ.ਐੱਸ.ਐੱਫ. ਦੇ ਇਕ ਏ.ਐੱਸ.ਆਈ. ਰਮੇਸ਼ ਕੁਮਾਰ ਨੂੰ ਲਸ਼ਕਰ-ਏ-ਤੋਏਬਾ ਅਤੇ ਹਿਜ਼ਬੁਲ ਮੁਜਾਹਿਦੀਨ ਨਾਲ ਜੁੜੇ ਸਰਹੱਦ ਪਾਰ ਦੇ ਨਸ਼ਾ ਸਮੱਗਲਰਾਂ ਦੀ ਕਥਿਤ ਤੌਰ ’ਤੇ ਸਹਾਇਤਾ ਕਰਨ ਦੇ ਦੋਸ਼ ’ਚ ਫੜਿਆ।
* 15 ਮਾਰਚ ਨੂੰ ਉੱਤਰੀ 24 ਪਰਗਨਾ (ਬੰਗਾਲ) ਪੁਲਸ ਨੇ ਹੈਰੋਇਨ ਸਪਲਾਈ ਕਰਨ ਵਾਲੇ ਨਸ਼ਾ ਸਮੱਗਲਰਾਂ ਦੇ ਗਿਰੋਹ ’ਚ ਸ਼ਾਮਲ 2 ਕਾਂਸਟੇਬਲਾਂ ਨੂੰ ਗ੍ਰਿਫਤਾਰ ਕੀਤਾ।
* 1 ਜੂਨ ਨੂੰ ਆਸਾਮ ਪੁਲਸ ਦੇ ‘ਬਾਰਡਰ ਵਿੰਗ’ ’ਚ ਤਾਇਨਾਤ ਡੀ. ਐੱਸ. ਪੀ. ਜਤਿਨ ਚੰਦਰ ਦਾਸ ਨੂੰ ਨਸ਼ਾ ਸਮੱਗਲਰਾਂ ਦੇ ਨਾਲ ਸਬੰਧਾਂ ਦੇ ਦੋਸ਼ ’ਚ ਫੜਿਆ।
* 18 ਜੂਨ ਨੂੰ ਉੱਤਰਾਖੰਡ ਦੇ ਚੰਪਾਵਤ ਜ਼ਿਲੇ ’ਚ ਤਾਇਨਾਤ ਦੋ ਸਿਪਾਹੀਆਂ ਸਮੇਤ 4 ਵਿਅਕਤੀਆਂ ਨੂੰ ਊਧਮ ਸਿੰਘ ਨਗਰ ਦੀ ਪੁਲਸ ਨੇ 8 ਕਿਲੋ ਚਰਸ ਦੇ ਨਾਲ ਫੜਿਆ।
* 9 ਜੁਲਾਈ ਨੂੰ ਬਿਹਾਰ ਦੇ ਅਰਵਲ ਸ਼ਹਿਰ ’ਚ ਪੁਲਸ ਨੇ ਬੀ. ਐੱਸ. ਐੱਫ. ਦੇ ਇਕ ਜਵਾਨ ਨੂੰ ਭਾਰੀ ਮਾਤਰਾ ’ਚ ਹਥਿਆਰ ਅਤੇ ਗੋਲਾ-ਬਾਰੂਦ ਲਿਜਾਣ ਦੇ ਦੋਸ਼ ’ਚ ਫੜਿਆ ਹੈ।
* 11 ਜੁਲਾਈ ਨੂੰ ਸਾਂਬਾ ਸੈਕਟਰ ਤੋਂ 9 ਐੱਮ.ਐੱਮ. ਪਿਸਟਲ ਅਤੇ 2 ਮੈਗਜ਼ੀਨ ਅਤੇ 80 ਕਾਰਤੂਸਾਂ ਦੇ ਨਾਲ ਬੀ. ਐੱਸ. ਐੱਫ. ਦਾ ਜਵਾਨ ਸੁਮਿਤ ਕੁਮਾਰ ਫੜਿਆ ਗਿਆ। ਫਿਰ 13 ਜੁਲਾਈ ਨੂੰ ਉਸ ਦੇ ਕਬਜ਼ੇ ’ਚੋਂ 32 ਲੱਖ ਰੁਪਏ ਦੀ ਨਕਦੀ ਬਰਾਮਦ ਕੀਤੀ ਗਈ। ਜਾਂਚ ’ਚ ਪਤਾ ਲੱਗਾ ਕਿ ਦੋਸ਼ੀ ਪਾਕਿਸਤਾਨ ’ਚ ਬੈਠੇ ਸਮੱਗਲਰਾਂ ਦੇ ਸੰਪਰਕ ’ਚ ਸੀ।
* 20 ਜੁਲਾਈ ਨੂੰ ਉਪਰੋਕਤ ਕੇਸ ਦੇ ਸਬੰਧ ’ਚ ਹੀ ਫੌਜ ਦੇ ਇਕ ਜਵਾਨ ਅਤੇ ਉਸ ਦੇ 3 ਸਾਥੀਆਂ ਨੂੰ ਬਰੇਲੀ ਤੋਂ ਗ੍ਰਿਫਤਾਰ ਕੀਤਾ ਗਿਆ।
* 5 ਅਗਸਤ ਨੂੰ ਤਰਨਤਾਰਨ ਦੇ ਨੇੜੇ ਥਾਣਾ ਕੱਚਾ-ਪੱਕਾ ਦੀ ਪੁਲਸ ਨੇ 15 ਪੰਜਾਬ, 7 ਆਰ.ਆਰ. ਬਟਾਲੀਅਨ ਸ਼੍ਰੀਨਗਰ ’ਚ ਬਤੌਰ ਕਾਂਸਟੇਬਲ ਤਾਇਨਾਤ ਇਕ ਫੌਜੀ ਅਤੇ ਉਸ ਦੇ ਸਾਥੀ ਨੂੰ 2900 ਨਸ਼ੀਲੀਆਂ ਗੋਲੀਆਂ, ਇਕ ਪਿਸਤੌਲ, 5 ਕਾਰਤੂਸਾਂ ਅਤੇ ਇਕ ਸਕਾਰਪੀਓ ਗੱਡੀ ਸਮੇਤ ਗ੍ਰਿਫਤਾਰ ਕੀਤਾ, ਜੋ ਆਪਣੀ ਗੱਡੀ ’ਤੇ ਪੰਜਾਬ ਪੁਲਸ ਦਾ ਸਟਿਕਰ ਲਗਾ ਕੇ ਨਸ਼ੀਲੀਆਂ ਗੋਲੀਆਂ ਸਪਲਾਈ ਕਰਦਾ ਸੀ।
* 6 ਅਗਸਤ ਨੂੰ ਲੁਧਿਆਣਾ ਦੇ ਥਾਣਾ ਡਾਬਾ ’ਚ ਤਾਇਨਾਤ ਪੰਜਾਬ ਪੁਲਸ ਦੇ ਥਾਣੇਦਾਰ ਰਾਜਿੰਦਰ ਸਿੰਘ ਨੂੰ 2 ਸਾਥੀਆਂ ਦਲਜੀਤ ਕੌਰ ਬਬਲੀ ਅਤੇ ਪਵਨਜੀਤ ਸਿੰਘ ਸਮੇਤ ਲਗਭਗ 25 ਲੱਖ ਰੁਪਏ ਮੁੱਲ ਦੇ ਸਾਢੇ 3 ਕੁਇੰਟਲ ਚੂਰਾ-ਪੋਸਤ ਦੇ ਨਾਲ ਗ੍ਰਿਫਤਾਰ ਕੀਤਾ ਗਿਆ। ਪਿਛਲੇ ਢਾਈ ਸਾਲਾਂ ’ਚ ਲੁਧਿਆਣਾ ਕਮਿਸ਼ਨਰੇਟ ਦੇ ਅਧੀਨ ਤਾਇਨਾਤ 9 ਪੁਲਸ ਮੁਲਾਜ਼ਮ ਨਸ਼ੇ ਦੇ ਧੰਦੇ ’ਚ ਸ਼ਾਮਲ ਪਾਏ ਗਏ ਹਨ।
* 10 ਅਗਸਤ ਨੂੰ ਬਿਜਨੌਰ ’ਚ ਮਾਲਨ ਨਦੀ ਦੇ ਕੰਢੇ ਮੁਕਾਬਲੇ ਦੇ ਬਾਅਦ ਪੁਲਸ ਨੇ ਸੋਨਾ ਲੁੱਟਣ ਵਾਲੇ ਗਿਰੋਹ ਦੇ ਸਰਗਨਾ ਐੱਨ. ਐੱਸ. ਜੀ. ਦੇ ਬਰਖਾਸਤ ਕਮਾਂਡੋ ਰਣਜੀਤ ਅਤੇ ਇਕ ਹੋਰ ਬਦਮਾਸ਼ ਨੂੰ ਗ੍ਰਿਫਤਾਰ ਕਰ ਕੇ ਉਨ੍ਹਾਂ ਦੇ ਕਬਜ਼ੇ ’ਚੋਂ 2 ਪਿਸਤੌਲਾਂ ਅਤੇ 1 ਮੋਟਰਸਾਈਕਲਾਂ ਦੇ ਇਲਾਵਾ 303 ਗ੍ਰਾਮ ਸੋਨਾ ਬਰਾਮਦ ਕੀਤਾ।
ਇੱਥੇ ਇਹ ਗੱਲ ਵੀ ਵਰਨਣਯੋਗ ਹੈ ਕਿ ਆਮ ਤੌਰ ’ਤੇ ਸਾਡੇ ਅਧਿਕਾਰੀ ਨਸ਼ੇ ਦੀ ਸਮੱਗਲਿੰਗ ਦੇ ਲਈ ਪਾਕਿਸਤਾਨ ਦੇ ਸਿਰ ’ਤੇ ਭਾਂਡਾ ਭੰਨ੍ਹ ਦਿੰਦੇ ਹਨ ਪਰ ਇਸ ਤੱਥ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਕਿ ਜੇਕਰ ਸੁਰੱਖਿਆ ਬਲਾਂ ਨਾਲ ਜੁੜੇ ਭਾਰਤੀ ਅਧਿਕਾਰੀ ਇਸ ’ਚ ਸ਼ਾਮਲ ਨਾ ਹੋਣ ਤਾਂ ਪਾਕਿਤਾਨ ਤੋਂ ਨਸ਼ਿਆਂ ਦੀ ਸਮੱਗਲਿੰਗ ਹੋ ਹੀ ਨਹੀਂ ਸਕਦੀ।
ਇਹੀ ਕਾਰਨ ਹੈ ਕਿ ਜਦੋਂ ਕਦੀ ਵੀ ਭਾਰਤ ਸਰਕਾਰ ਨੇ ਪਾਕਿਸਤਾਨ ਦੀ ਸਰਕਾਰ ਦੇ ਨਾਲ ਇਹ ਮਾਮਲਾ ਉਠਾਇਆ ਤਾਂ ਉਨ੍ਹਾਂ ਨੇ ਸਾਨੂੰ ਸਾਡੀਆਂ ਕਮਜ਼ੋਰੀਆਂ ਦੱਸ ਕੇ ਭਾਂਡਾ ਸਾਡੇ ਸਿਰ ’ਤੇ ਹੀ ਭੰਨ੍ਹ ਦਿੱਤਾ।
28 ਮਾਰਚ, 2010 ਨੂੰ ਵਾਹਘਾ ’ਚ ਪਾਕਿ ਰੇਂਜਰਸ ਦੇ ਮਹਾ-ਨਿਰਦੇਸ਼ਕ ਮੁਹੰਮਦ ਯਾਕੂਬ ਦੇ ਸਾਹਮਣੇ ਬੀ. ਐੱਸ. ਐੱਫ ਦੇ ਐਡੀਸ਼ਨਲ ਡਾਇਰੈਕਟਰ ਪੀ. ਪੀ. ਐੱਸ ਸਿੱਧੂ ਨੇ ਜਦੋਂ ਇਹ ਮਾਮਲਾ ਉਠਾਇਆ ਤਾਂ ਉਨ੍ਹਾਂ ਨੇ ਸਾਡੇ ਮੂੰਹ ’ਤੇ ‘ਚਪੇੜ’ ਮਾਰਦੇ ਹੋਏ ਕਿਹਾ ਸੀ :
‘‘ਪਾਕਿਸਤਾਨ ਵੱਲੋਂ ਭਾਰਤੀ ਸਰਹੱਦ ’ਚ ਘੁਸਪੈਠ ਦੀ ਕੋਈ ਕੋਸ਼ਿਸ਼ ਨਹੀਂ ਹੋਈ ਹੈ। ਭਾਰਤ ਵੱਲੋਂ ਸਰਹੱਦ ’ਤੇ ਕੰਡਿਆਲੀ ਵਾੜ ਹੈ। ਥਾਂ-ਥਾਂ ’ਤੇ ਗੇਟ ਬਣਾਏ ਗਏ ਹਨ ਅਤੇ ਸਮੱਗਲਰਾਂ ’ਤੇ ਨਜ਼ਰ ਰੱਖਣ ਦੇ ਲਈ ਫਲੱਡ ਲਾਈਟਸ ਲੱਗੀਆਂ ਹਨ। ਭਾਰਤੀ ਸਰਹੱਦ ’ਤੇ ਚੌਕਸੀ ਅਤੇ ਗਸ਼ਤ ਦੀ ਵਿਵਸਥਾ ਹੈ, ਫਿਰ ਵੀ ਜੇਕਰ ਸਰਹੱਦ ’ਤੇ ਸਮੱਗਲਿੰਗ ਹੁੰਦੀ ਹੈ ਤਾਂ ਇਸ ਬਾਰੇ ਭਾਰਤੀ ਅਧਿਕਾਰੀਆਂ ਨੂੰ ਹੀ ਸੋਚਣ ਦੀ ਲੋੜ ਹੈ।’’
ਉਪਰੋਕਤ ਘਟਨਾਵਾਂ ਤੋਂ ਸਪੱਸ਼ਟ ਹੈ ਕਿ ਸਾਡੇ ਸੁਰੱਖਿਆ ਬਲਾਂ ਦੇ ਅੰਦਰ ਵੀ ਕੁਝ ਕਾਲੀਆਂ ਭੇਡਾਂ ਮੌਜੂਦ ਹਨ, ਜੋ ਇਹ ਦਰਸਾਉਂਦੀਆਂ ਹਨ ਕਿ ਫੌਜ ਦੇ ਨਾਲ-ਨਾਲ ਪੁਲਸ ਬਲਾਂ ਦੀ ਜ਼ਿਆਦਾ ਨਿਗਰਾਨੀ, ਚੌਕਸੀ ਅਤੇ ਬੜੀ ਡੂੰਘਾਈ ਪੂਰਵਕ ਤਲਾਸ਼ੀ ਦਾ ਸਿਲਸਿਲਾ ਵਧਾਉਣ ਅਤੇ ਦੋਸ਼ੀਆਂ ’ਤੇ ਸਖਤ ਕਾਰਵਾਈ ਕਰਨ ਦੀ ਲੋੜ ਹੈ, ਤਦ ਹੀ ਨਸ਼ਿਆਂ ਦੀ ਲਾਹਨਤ ਤੋਂ ਮੁਕਤੀ ਪਾਈ ਜਾ ਸਕੇਗੀ ਕਿਉਂਕਿ ਇਨ੍ਹਾਂ ਨੂੰ ਕੁਝ ਉੱਚ ਅਧਿਕਾਰੀਆਂ ਦਾ ਸਮਰਥਨ ਵੀ ਪ੍ਰਾਪਤ ਹੋ ਸਕਦਾ ਹੈ।
-ਵਿਜੇ ਕੁਮਾਰ
ਜ਼ਹਿਰੀਲੀ ਸ਼ਰਾਬ ਦੇ ਵਪਾਰੀਆਂ ਨੂੰ ਉਮਰ ਕੈਦ ਜਾਂ ਮੌਤ ਦੀ ਸਜ਼ਾ ਮੱਧ ਪ੍ਰਦੇਸ਼ ਸਰਕਾਰ ਦਾ ਸਹੀ ਫੈਸਲਾ
NEXT STORY 
