ਨੇਪਾਲ ਦਾ ਚੋਣ ਨਤੀਜਾ ਸਿਰਫ ਇਕ ਨਿੱਕੇ ਜਿਹੇ ਦੇਸ਼ ਦਾ ਨਤੀਜਾ ਨਹੀਂ ਹੈ। ਇਹ ਦੁਨੀਆ ਦੇ ਉਨ੍ਹਾਂ ਤਮਾਮ ਦੇਸ਼ਾਂ ਦੇ ਸ਼ਾਸਕਾਂ ਨੂੰ ਇਕ ਸਬਕ ਹੈ ਜੋ ਰਾਸ਼ਟਰ ਨੂੰ ਆਪਣੀ ਜਾਗੀਰ ਸਮਝ ਕੇ ਸ਼ਾਸਨ ਚਲਾਉਣ ਦੀ ਭੁੱਲ ਕਰ ਰਹੇ ਹਨ। ਭਾਰਤ ਦੇ ਗੁਆਂਢੀ ਇਸ ਨਿੱਕੇ ਜਿਹੇ ਰਾਸ਼ਟਰ ਦਾ ਚੋਣ ਨਤੀਜਾ ਯੁਵਾ ਸ਼ਕਤੀ ਦੇ ਬਦਲਾਅ ਦੀ ਦ੍ਰਿੜ੍ਹ ਇੱਛਾ ਸ਼ਕਤੀ ਦਾ ਨਤੀਜਾ ਹੈ, ਜਿੱਥੇ ਉਨ੍ਹਾਂ ’ਚ ਹਿਜਰਤ, ਬੇਰੋਜ਼ਗਾਰੀ, ਭ੍ਰਿਸ਼ਟਾਚਾਰ ਅਤੇ ਪ੍ਰਭਾਵਸ਼ਾਲੀ ਲੋਕਾਂ ਦੇ ਬੱਚਿਆਂ ਤੱਕ ਹੀ ਸੀਮਤ ਸੁੱਖ ਅਤੇ ਅੱਯਾਸ਼ੀਪੂਰਨ ਜੀਵਨਸ਼ੈਲੀ ਖ਼ਿਲਾਫ਼ ਅੱਗ ਧੁੱਖ ਰਹੀ ਸੀ। ਦੇਖਿਆ ਜਾਵੇ ਤਾਂ ਚੋਣ ਲਹਿਰ ਇਸ ਨੂੰ ਹੀ ਕਹਿੰਦੇ ਹਨ ਜਿੱਥੇ ਕਿਸੇ ਦੇ ਪੱਖ ’ਚ ਹਮਦਰਦੀ ਦੀ ਜਗ੍ਹਾ ਬਦਲੇ ਦੀ ਅੱਗ ਸੀ, ਜਿਸ ਦੀਆਂ ਲਪਟਾਂ ’ਚ ਨੇਪਾਲ ਦੀਆਂ ਇਕ ਤੋਂ ਇਕ ਪੁਰਾਣੀਆਂ ਪਾਰਟੀਆਂ ਸੜ ਕੇ ਸੁਆਹ ਹੋ ਗਈਆਂ। ਇੱਥੇ ਨੇਪਾਲੀ ਕਾਂਗਰਸ ਵੀ ਭਸਮ ਹੋਈ ਤਾਂ ਕਮਿਊਨਿਸਟ ਪਾਰਟੀਆਂ ਵੀ ਸੁਆਹ ਹੋ ਗਈਆਂ। ਨੇਪਾਲ ਤੋਂ ਕਮਿਊਨਿਸਟ ਪਾਰਟੀਆਂ ਦਾ ਖ਼ਾਤਮਾ ਭਾਰਤ ਲਈ ਚੰਗਾ ਸੰਕੇਤ ਮੰਨਿਆ ਜਾ ਰਿਹਾ ਹੈ।
ਚੋਣ ਆਰੰਭਤਾ ਦੇ ਕੁਝ ਦਿਨ ਬਾਅਦ ਸੱਤਾ ’ਚ ਆ ਰਹੀ ਰਾਸ਼ਟਰੀ ਸੁਤੰਤਰ ਪਾਰਟੀ ਨੂੰ ਸ਼ਹਿਰੀ ਪ੍ਰਭਾਵ ਵਾਲੀ ਪਾਰਟੀ ਕਹਿ ਕੇ ਇਸ ਦੇ ਸੀਮਤ ਖੇਤਰਾਂ ਤੱਕ ਸਿਮਟਣ ਦਾ ਕਿਆਸ ਲਗਾਇਆ ਜਾ ਰਿਹਾ ਸੀ ਅਤੇ ਚਾਰ ਵਾਰ ਦੇ ਪ੍ਰਧਾਨ ਮੰਤਰੀ ਓਲੀ ਨੂੰ ਧੂੜ ਚਟਾਉਂਦੇ ਹੋਏ ਇਤਿਹਾਸਕ ਵੋਟਾਂ ਦੇ ਫਰਕ ਨਾਲ ਜਿੱਤੇ ਕਾਠਮੰਡੂ ਦੇ ਸਾਬਕਾ ਮੇਅਰ ਅਤੇ ਰਾਸ਼ਟਰੀ ਸੁਤੰਤਰ ਪਾਰਟੀ ਦੇ ਪ੍ਰਧਾਨ ਮੰਤਰੀ ਦਾ ਚਿਹਰਾ ਰਹੇ ਬਾਲੇਨ ਸ਼ਾਹ ਨੂੰ ਸਖਤ ਮੁਕਾਬਲੇ ’ਚ ਫਸਿਆ ਦੱਸਿਆ ਜਾ ਰਿਹਾ ਸੀ। ਰਾਜਨੀਤਕ ਵਿਸ਼ਲੇਸ਼ਕਾਂ ਦੇ ਸਾਰੇ ਦੇ ਸਾਰੇ ਅਨੁਮਾਨ ਧਰੇ ਦੇ ਧਰੇ ਰਹਿ ਗਏ।
ਚੋਣ ਨਤੀਜਿਆਂ ’ਚ ਹਰ ਖੇਤਰ ’ਚ ਰਾਸ਼ਟਰੀ ਸੁਤੰਤਰ ਪਾਰਟੀ ਨੂੰ ਮਿਲ ਰਹੀ ਸ਼ਾਨਦਾਰ ਬੜ੍ਹਤ ਨਾਲ ਇਹ ਸਾਫ਼ ਹੋ ਗਿਆ ਹੈ ਕਿ ਰਾਜਸ਼ਾਹੀ ਖ਼ਤਮ ਹੋਣ ਤੋਂ ਬਾਅਦ ਨੇਪਾਲ ਨੂੰ ਪਹਿਲੀ ਵਾਰ ਮੁਕੰਮਲ ਬਹੁਮਤ ਦੀ ਸਰਕਾਰ ਨਸੀਬ ਹੋਣ ਜਾ ਰਹੀ ਹੈ। ਇਸ ਚੋਣ ਨਤੀਜੇ ਤੋਂ ਸਭ ਤੋਂ ਵੱਧ ਖੁਸ਼ ਨੇਪਾਲ ਦੇ ਉਹ 70 ਫੀਸਦੀ ਯੁਵਾ ਹਨ ਜਿਨ੍ਹਾਂ ਨੇ ਇਤਿਹਾਸਕ ਬਦਲਾਅ ਦੀ ਇਬਾਰਤ ਲਿਖੀ। ਸਰਕਾਰ ਬਾਲੇਨ ਸ਼ਾਹ ਦੀ ਅਗਵਾਈ ’ਚ ਬਣਨੀ ਤੈਅ ਹੈ। ਪਾਰਟੀ ਪ੍ਰਧਾਨ ਰਵੀ ਲਾਮੀਛਾਨੇ ਨੇ ਬਾਲੇਨ ਸ਼ਾਹ ਨੂੰ ਪਾਰਟੀ ’ਚ ਸ਼ਾਮਲ ਹੁੰਦੇ ਹੀ ਪ੍ਰਧਾਨ ਮੰਤਰੀ ਦਾ ਚਿਹਰਾ ਐਲਾਨ ਦਿੱਤਾ ਸੀ। ਨੇਪਾਲ ਦੀ ਰਾਜਨੀਤੀ ’ਚ ਪੱਤਰਕਾਰ ਤੋਂ ਰਾਜਨੇਤਾ ਬਣੇ ਰਵੀ ਲਾਮੀਛਾਨੇ ਦੀ ਇਸ ਚੋਣ ਬਿਸਾਤ ਦੀ ਤਾਰੀਫ਼ ਹਰ ਪਾਸੇ ਹੋ ਰਹੀ ਹੈ। ਨਵੀਂ ਸਰਕਾਰ ’ਚ ਰਵੀ ਲਾਮੀਛਾਨੇ ਗ੍ਰਹਿ ਮੰਤਰੀ ਹੋਣਗੇ, ਇਹ ਵੀ ਤੈਅ ਹੈ। ਸਰਕਾਰ ਗਠਨ ਤੋਂ ਪਹਿਲਾਂ ਉਨ੍ਹਾਂ ਨੇ ਰਾਜਨੀਤਕ ਦਲਾਂ ਤੋਂ 40 ਸਾਲ ਦਾ ਹਿਸਾਬ ਲੈਣ ਦਾ ਬਿਆਨ ਦੇ ਕੇ ਪੁਰਾਣੇ ਰਾਜਨੀਤਕ ਦਲਾਂ ’ਚ ਖਲਬਲੀ ਮਚਾ ਦਿੱਤੀ ਹੈ। ਉਨ੍ਹਾਂ ਦਾ ਇਹ ਬਿਆਨ ਭ੍ਰਿਸ਼ਟਾਚਾਰ ਦੇ ਵਿਰੁੱਧ ਖੁੱਲ੍ਹੀ ਜੰਗ ਦੇ ਐਲਾਨ ਦੇ ਰੂਪ ’ਚ ਦੇਖਿਆ ਜਾ ਰਿਹਾ ਹੈ।
ਦੱਸ ਦੇਈਏ ਕਿ ਨੇਪਾਲੀ ਕਾਂਗਰਸ ਹੋਵੇ ਜਾਂ ਏਮਾਲੇ, ਘੁੰਮ ਫਿਰ ਕੇ ਸਰਕਾਰ ਇਨ੍ਹਾਂ ਦੀ ਅਗਵਾਈ ’ਚ ਬਣਦੀ ਰਹੀ ਹੈ। ਦੇਖਿਆ ਜਾਵੇ ਤਾਂ 2008 ਤੋਂ ਬਾਅਦ ਨੇਪਾਲ ’ਚ ਸਰਕਾਰ-ਸਰਕਾਰ ਦੀ ਖੇਡ ਅਜਿਹੀ ਚੱਲੀ ਕਿ ਇਹ ਜਨਤਾ ਦੀ ਤਾਕਤ ਨੂੰ ਹੀ ਭੁੱਲ ਗਏ। ਇਹ ਲੋਕ ਸਿਰਫ ਆਪਣੇ ਅਤੇ ਆਪਣੇ ਪਰਿਵਾਰ ਦੇ ਵਿਕਾਸ ਤੱਕ ਹੀ ਸੀਮਤ ਰਹੇ। ਏਮਾਲੇ ਅਤੇ ਨੇਪਾਲੀ ਕਾਂਗਰਸ ਦੇ ਇਕ ਤੋਂ ਇਕ ਵੱਡੇ ਨੇਤਾਵਾਂ ਦੇ ਹੱਥ ਭ੍ਰਿਸ਼ਟਾਚਾਰ ਨਾਲ ਲਿਬੜੇ ਹੋਏ ਹਨ। ਜਿਵੇਂ ਕਿ ਰਵੀ ਲਾਮੀਛਾਨੇ ਨੇ ਕਿਹਾ, ਜੇਕਰ ਉਹ ਇਸ ’ਤੇ ਅਮਲ ਕਰ ਗਏ ਤਾਂ ਯਕੀਨ ਮੰਨੋ, ਏਮਾਲੇ ਅਤੇ ਨੇਪਾਲੀ ਕਾਂਗਰਸ ਦੇ ਬਹੁਤ ਸਾਰੇ ਵੱਡੇ ਨੇਤਾ ਸਲਾਖਾਂ ਦੇ ਪਿੱਛੇ ਹੋਣਗੇ। ਮੁਮਕਿਨ ਹੈ ਕਿ ਭ੍ਰਿਸ਼ਟਾਚਾਰ ਦੇ ਵਿਰੁੱਧ ਇਸ ਮੁਹਿੰਮ ’ਚ ਇਸ ਵਾਰ ਨੇਪਾਲੀ ਕਾਂਗਰਸ ਦੇ ਸੀਨੀਅਰ ਨੇਤਾ ਅਤੇ ਸਾਬਕਾ ਪੀ. ਐੱਮ. ਸ਼ੇਰ ਬਹਾਦਰ ਦੇਊਬਾ ਅਤੇ ਉਨ੍ਹਾਂ ਦੀ ਪਤਨੀ ਆਰਜ਼ੂ ਰਾਣਾ ਵੀ ਨਾ ਬਚ ਸਕਣ। ਇਨ੍ਹਾਂ ਦੋਵਾਂ ’ਤੇ ਵੀ ਭ੍ਰਿਸ਼ਟਾਚਾਰ ਦੇ ਗੰਭੀਰ ਦੋਸ਼ ਹਨ।
ਓਲੀ ਸਰਕਾਰ ’ਚ ਬਹੁਤ ਘੱਟ ਦਿਨਾਂ ਤੱਕ ਗ੍ਰਹਿ ਮੰਤਰੀ ਰਹੇ ਰਵੀ ਲਾਮੀਛਾਨੇ ਦੀ ਦਿੱਖ ਇਕ ਸਖ਼ਤ ਗ੍ਰਹਿ ਮੰਤਰੀ ਦੀ ਉੱਭਰ ਕੇ ਜਨਤਾ ਦੇ ਸਾਹਮਣੇ ਆਈ ਸੀ। ਉਨ੍ਹਾਂ ਨੇ ਇਕ ਤੋਂ ਇਕ ਰਾਜਨੀਤਕ ਭ੍ਰਿਸ਼ਟਾਚਾਰ ਨੂੰ ਉਜਾਗਰ ਕਰ ਕੇ ਜਨਤਾ ’ਚ ਆਪਣੀ ਦਿੱਖ ਇਮਾਨਦਾਰ ਨੇਤਾ ਦੀ ਬਣਾ ਲਈ ਸੀ। ਅਮਰੀਕੀ ਪਿਛੋਕੜ ਦੇ ਰਵੀ ਲਾਮੀਛਾਨੇ ਦਾ ਰੁਖ਼ ਭਾਰਤ ਪ੍ਰਤੀ ਕਿਹੋ ਜਿਹਾ ਹੁੰਦਾ ਹੈ, ਇਹ ਦੇਖਣਾ ਦਿਲਚਸਪ ਹੋਵੇਗਾ। ਹਾਲਾਂਕਿ ਪਾਰਟੀ ਦੇ ਸੀਨੀਅਰ ਨੇਤਾ ਅਮਰੇਸ਼ ਸਿੰਘ ਨੇ ਚੋਣ ਨਤੀਜੇ ’ਚ ਪਾਰਟੀ ਦੀ ਬੜ੍ਹਤ ਦੇ ਵਿਚਾਲੇ ਕਾਠਮੰਡੂ ’ਚ ਮੀਡੀਆ ਦੇ ਸਵਾਲਾਂ ਦੇ ਜਵਾਬ ’ਚ ਸਾਫ਼ ਕਿਹਾ ਕਿ ਭਾਰਤ ਨਾਲ ਮਧੁਰ ਸਬੰਧਾਂ ਨੂੰ ਲੈ ਕੇ ਕੋਈ ਭੁਲੇਖਾ ਨਹੀਂ ਹੈ। ਉਸ ਨੂੰ ਨਾਲ ਲੈ ਕੇ ਨੇਪਾਲ ਨੂੰ ਅੱਗੇ ਵਧਾਵਾਂਗੇ।
ਪਰ ਬਾਲੇਨ ਸ਼ਾਹ ਜੋ ਹਨ ਤਾਂ ਚੀਨ ਦੇ ਵਿਰੁੱਧ ਪਰ ਭਾਰਤ ਪ੍ਰਤੀ ਉਨ੍ਹਾਂ ਦੇ ਰੁਖ਼ ਨੂੰ ਲੈ ਕੇ ਚਰਚਾਵਾਂ ਦਾ ਬਾਜ਼ਾਰ ਗਰਮ ਹੈ ਕਿਉਂਕਿ ਬਤੌਰ ਮੇਅਰ ਉਨ੍ਹਾਂ ਦਾ ਆਪਣੇ ਕਮਰੇ ’ਚ ‘ਗ੍ਰੇਟਰ ਨੇਪਾਲ’ ਦਾ ਲਗਾਇਆ ਨਕਸ਼ਾ ਭਾਰਤ ਨੂੰ ਖਟਕਦਾ ਰਿਹਾ ਕਿਉਂਕਿ ਇਸ ਨਕਸ਼ੇ ’ਚ ਭਾਰਤ ਦੇ ਕਈ ਇਲਾਕਿਆਂ ਨੂੰ ਨੇਪਾਲੀ ਭੂ-ਖੇਤਰ ਦਰਸਾਇਆ ਗਿਆ ਹੈ। ਖ਼ੈਰ ਉਦੋਂ ਉਹ ਮੇਅਰ ਸਨ, ਹੁਣ ਉਹ ਇਕ ਅਜਿਹੇ ਰਾਸ਼ਟਰ ਦੇ ਪ੍ਰਧਾਨ ਮੰਤਰੀ ਹੋਣ ਜਾ ਰਹੇ ਹਨ ਜਿਸ ਦਾ ਸਬੰਧ ਭਾਰਤ ਨਾਲ ਸਿਰਫ ਖ਼ਾਨਾਪੂਰਤੀ ਜਿਹਾ ਨਹੀਂ ਹੈ, ਦੋਵਾਂ ਦੇ ਵਿਚਾਲੇ ਰੋਟੀ-ਬੇਟੀ ਦਾ ਸਦੀਆਂ ਪੁਰਾਣਾ ਰਿਸ਼ਤਾ ਹੈ ਹੀ, ਦੋਵੇਂ ਦੇਸ਼ ਭੂਗੋਲਿਕ, ਰੀਤੀ-ਰਿਵਾਜ ਅਤੇ ਸੱਭਿਆਚਾਰਕ ਸੱਭਿਅਤਾ ਦੇ ਦ੍ਰਿਸ਼ਟੀਕੋਣ ਤੋਂ ਵੀ ਇਕ-ਦੂਜੇ ਨਾਲ ਜੁੜੇ ਹਨ। ਭਾਰਤ-ਨੇਪਾਲ ਦੇ ਸਬੰਧਾਂ ਨੂੰ ਨਜ਼ਦੀਕ ਤੋਂ ਜਾਣਨ ਵਾਲਿਆਂ ਵੱਲੋਂ ਦੋਵਾਂ ਦੇਸ਼ਾਂ ਦੇ ਵਿਚਾਲੇ ਦਹਾਕਿਆਂ ਪੁਰਾਣੀਆਂ ਸੰਧੀਆਂ ਅਤੇ ਸਮਝੌਤੇ ਦੀ ਸਮੀਖਿਆ ਦੀ ਸ਼ੰਕਾ ਜਤਾਈ ਜਾ ਰਹੀ ਹੈ। ਫਿਲਹਾਲ ਨੇਪਾਲ ਦੀ ਸੰਭਾਵਿਤ ਬਾਲੇਨ ਸਰਕਾਰ ਇਸ ਨੂੰ ਲੈ ਕੇ ਸ਼ਾਇਦ ਹੀ ਕੋਈ ਜਲਦਬਾਜ਼ੀ ਦਿਖਾਏ। ਮੰਨਿਆ ਕਿ ਉਹ ਰਾਜਨੀਤੀ ਦੇ ਮਝੇ ਹੋਏ ਖਿਡਾਰੀ ਨਾ ਹੋਣ ਪਰ ਇਕ ਉੱਚ ਸਿੱਖਿਅਤ ਸ਼ਖਸੀਅਤ ਤਾਂ ਹਨ ਹੀ। ਬੇਸ਼ੱਕ ਉਹ ਨੇਪਾਲ ਦੇ ਹੁਣ ਤੱਕ ਦੇ ਇਤਿਹਾਸ ’ਚ ਸਭ ਤੋਂ ਘੱਟ ਉਮਰ (35 ਸਾਲ) ਦੇ ਪ੍ਰਧਾਨ ਮੰਤਰੀ ਹੋਣ ਜਾ ਰਹੇ ਹਨ ਪਰ ਇਹ ਉਨ੍ਹਾਂ ਦੇ ਸਰਕਾਰ ਚਲਾਉਣ ’ਚ ਅੱਗੇ ਆਏ, ਅਜਿਹੀ ਸੋਚ ਠੀਕ ਨਹੀਂ ਹੈ।
ਬਾਲੇਨ ਸ਼ਾਹ ਤੋਂ ਨੇਪਾਲ ਦੇ ਨੌਜਵਾਨਾਂ ਅਤੇ ਔਰਤਾਂ ਨੂੰ ਕਾਫੀ ਉਮੀਦਾਂ ਹਨ। ਉਹ ‘ਜੈਨ ਜੀ’ ਅੰਦੋਲਨ ਦਾ ਪ੍ਰਮੁੱਖ ਚਿਹਰਾ ਸਨ। ਅੱਜ ਉਨ੍ਹਾਂ ਦੀ ਇਸ ਗੱਲ ਨੂੰ ਲੈ ਕੇ ਸ਼ਲਾਘਾ ਹੋ ਰਹੀ ਹੈ ਕਿ ਜੋ ਸ਼ਖਸ ਨੇਪਾਲ ਦੀਆਂ ਦੁਸ਼ਵਾਰੀਆਂ ਨੂੰ ਮਹਿਸੂਸ ਕਰ ਕੇ ਸਰਕਾਰ ਉਖਾੜਨ ਦਾ ਮਾਦਾ ਰੱਖਦਾ ਹੋਵੇ, ਉਸ ਦੇ ਸਰਕਾਰ ਚਲਾਉਣ ’ਚ ਕਿਸੇ ਸ਼ੱਕ ਦੀ ਗੁੰਜਾਇਸ਼ ਨਹੀਂ ਹੈ।
ਅਜਿਹੇ ਚੋਣ ਨਤੀਜੇ ਦੀ ਆਸ ਵਿਰੋਧੀ ਦਲਾਂ ਨੂੰ ਨਹੀਂ ਸੀ। ਪੁਰਾਣੀ ਕੋਈ ਵੀ ਪਾਰਟੀ ਵਿਰੋਧੀ ਦੇ ਲਾਇਕ ਵੀ ਸੀਟਾਂ ਜਿੱਤਣ ਦੀ ਸਥਿਤੀ ’ਚ ਨਹੀਂ ਆ ਪਾਈ। ਇਸੇ ਚੋਣ ’ਚ ਨੇਪਾਲੀ ਕਾਂਗਰਸ ਦੇ ਨਵ-ਨਿਯੁਕਤ ਪ੍ਰਧਾਨ ਗਗਨ ਥਾਪਾ ਦੀ ਵੀ ਪ੍ਰੀਖਿਆ ਹੋ ਗਈ। ਸਭ ਤੋਂ ਬੁਰੇ ਦੌਰ ’ਚ ਨੇਪਾਲੀ ਕਾਂਗਰਸ ਆ ਖੜ੍ਹੀ ਹੋਈ। ਦੁਰਗਤੀ ਦੀ ਗੱਲ ਕਰੀਏ ਤਾਂ ਇਸ ਚੋਣ ’ਚ ਕੋਈ ਅਜਿਹੀ ਪਾਰਟੀ ਨਹੀਂ ਬਚੀ ਜੋ ਬਾਲੇਨ ਸ਼ਾਹ ਅਤੇ ਰਵੀ ਲਾਮੀਛਾਨੇ ਦੀ ਸੁਨਾਮੀ ’ਚ ਨਾ ਰੁੜ੍ਹੀ ਹੋਵੇ।
ਬਾਲੇਨ ਸ਼ਾਹ ਦੀ ਅਗਵਾਈ ’ਚ ਬਣਨ ਜਾ ਰਹੀ ਨੇਪਾਲ ਦੀ ਪੂਰਨ ਬਹੁਮਤ ਦੀ ਸਰਕਾਰ ਦੇ ਕੰਮਕਾਜ ਦੇ ਤਰੀਕਿਆਂ ’ਤੇ ਦੁਨੀਆ ਦੀ ਨਜ਼ਰ ਰਹਿਣਾ ਸੁਭਾਵਿਕ ਹੈ। ਇਸ ਪਾਰਟੀ ਦੇ ਦੋ ਪ੍ਰਮੁੱਖ ਚਿਹਰੇ ਬਾਲੇਨ ਸ਼ਾਹ ਅਤੇ ਰਵੀ ਲਾਮੀਛਾਨੇ ਦਾ ਕੋਈ ਲੰਬਾ ਰਾਜਨੀਤਕ ਪਿਛੋਕੜ ਨਹੀਂ ਹੈ। ਬਾਲੇਨ ਸ਼ਾਹ ਇੰਜੀਨੀਅਰ ਅਤੇ ਰੈਪਰ ਰਹੇ ਹਨ ਜਦਕਿ ਰਵੀ ਲਾਮੀਛਾਨੇ ਦੀ ਪਛਾਣ ਇਕ ਪੱਤਰਕਾਰ ਦੀ ਰਹੀ ਹੈ। 2022 ਦੀ ਚੋਣ ’ਚ ਉਨ੍ਹਾਂ ਨੇ ਰਾਸ਼ਟਰੀ ਸੁਤੰਤਰ ਪਾਰਟੀ ਦਾ ਗਠਨ ਕੀਤਾ, ਚੋਣ ਲੜੇ ਅਤੇ 20 ਸੀਟਾਂ ’ਤੇ ਧਮਾਕੇਦਾਰ ਜਿੱਤ ਦਰਜ ਕੀਤੀ। ਬਾਲੇਨ ਸ਼ਾਹ ਕਾਠਮੰਡੂ ਦੇ ਨੌਜਵਾਨਾਂ ’ਚ ਖਾਸੇ ਲੋਕਪ੍ਰਿਯ ਸਨ, ਆਜ਼ਾਦ ਮੇਅਰ ਦੀ ਚੋਣ ਲੜੇ ਅਤੇ ਕਾਠਮੰਡੂ ਦੇ ਮੇਅਰ ਬਣ ਗਏ। ਇਕ ਮੇਅਰ ਤੋਂ ਨੇਪਾਲ ਦਾ ਪ੍ਰਧਾਨ ਮੰਤਰੀ ਬਣਨ ਜਾ ਰਹੇ ਬਾਲੇਨ ਸ਼ਾਹ ਦਾ ਜਨਮ ਇਕ ਸਾਧਾਰਨ ਅਧਿਆਪਕ ਪਰਿਵਾਰ ’ਚ ਹੋਇਆ ਸੀ। ਪੜ੍ਹਾਈ ਇਸ ਪੱਧਰ ਦੀ ਸੀ ਕਿ ਉਹ ਦੋ-ਚਾਰ ਲੱਖ ਰੁਪਏ ਮਹੀਨੇ ਦੀ ਨੌਕਰੀ ਕਰ ਕੇ ਚੰਗਾ ਜੀਵਨ ਬਿਤਾ ਸਕਦੇ ਸਨ ਪਰ ਉਨ੍ਹਾਂ ਨੂੰ ਸਨਕ ਸੀ ਸੰਪੂਰਨ ਨੇਪਾਲ ਦੀ ਜੀਵਨਸ਼ੈਲੀ ਸੁਧਾਰਨ ਦੀ। ਨੇਪਾਲੀ ਜਨਤਾ ਨੇ ਉਨ੍ਹਾਂ ਨੂੰ ਇਹ ਮੌਕਾ ਦੇ ਦਿੱਤਾ ਹੈ। ਹੁਣ ਨੇਪਾਲ ਨੂੰ ਤਰੱਕੀ ਵੱਲ ਲੈ ਜਾਣ ਦੀ ਜ਼ਿੰਮੇਵਾਰੀ ਉਨ੍ਹਾਂ ਦੀ ਹੈ।
—ਯਸ਼ੋਦਾ ਸ਼੍ਰੀਵਾਸਤਵ
‘ਦੁਨੀਆ ਦੇ ਪੁਲਸਿਮੈਨ’ ਸਾਹਮਣੇ ਝੁਕਿਆ ਭਾਰਤ
NEXT STORY 
