‘ਪੰਜਾਬ ਦੇ ਜੰਮਿਆਂ ਨੂੰ ਨਿੱਤ ਮੁਹਿੰਮਾਂ’ ਵਾਲੀ ਅਖਾਣ ਸਾਡੇ ਅਮੀਰ ਵਿਰਸੇ ਤੇ ਤਜਰਬਿਆਂ ’ਚੋਂ ਜਨਮੀ ਹੈ। ਆਜ਼ਾਦੀ ਸੰਗਰਾਮ ’ਚ ਪਾਏ ਗਏ ਯੋਗਦਾਨ ਤੇ ਆਜ਼ਾਦੀ ਪ੍ਰਾਪਤੀ ਤੋਂ ਪਿੱਛੋਂ ਲੋਕਾਂ ਨੂੰ ਦਰਪੇਸ਼ ਮੁਸ਼ਕਲਾਂ ਦੇ ਹੱਲ ਲਈ ਲੜੇ ਗਏ ਮਾਣਮੱਤੇ ਘੋਲ ਇਸ ਤੱਥ ਦੀ ਗਵਾਹੀ ਭਰਦੇ ਹਨ ਪ੍ਰੰਤੂ ਅੱਜ ਪੰਜਾਬ ਚੌਤਰਫਾ ਗੰਭੀਰ ਸੰਕਟ ’ਚ ਘਿਰਿਆ ਹੋਇਆ ਹੈ। ਪੰਜਾਬ ਦੀ ਜਿਸ ਜਵਾਨੀ ’ਤੇ ਸਾਰਾ ਦੇਸ਼ ਕਦੇ ਮਾਣ ਕਰਿਆ ਕਰਦਾ ਸੀ, ਉਹੀ ਅੱਜ ਬੇਰੁਜ਼ਗਾਰੀ ਕਰਕੇ ਗੈਂਗਸਟਰਵਾਦ, ਨਸ਼ਾਖੋਰੀ ਆਦਿ ਅਰਾਜਕ ਰੁਝਾਨਾਂ ਦਾ ਸ਼ਿਕਾਰ ਬਣੀ ਹੋਈ ਹੈ।
ਪੰਜਾਂ ਪਾਣੀਆਂ ਦੀ ਧਰਤੀ, ਪਾਣੀ ਦੇ ‘ਮਹਾ ਅਕਾਲ’ ਵਾਲੇ ਹਾਲਾਤ ਦੀਆਂ ਬਰੂਹਾਂ ’ਤੇ ਆਣ ਖੜ੍ਹੀ ਹੈ। ਹਰੇ ਇਨਕਲਾਬ ਸਦਕਾ ਸਿਖਰ ’ਤੇ ਪੁੱਜੀ ਖੇਤੀਬਾੜੀ ਦੀ ਪੈਦਾਵਾਰ ਹੁਣ ਖੜੋਤ ’ਚ ਹੈ ਜਾਂ ਗਿਰਾਵਟ ਵੱਲ ਨੂੰ ਜਾ ਰਹੀ ਹੈ। ਰਸਾਇਣਕ ਖਾਦਾਂ, ਕੀੜੇਮਾਰ ਦਵਾਈਆਂ, ਸੋਧੇ ਬੀਜਾਂ ਆਦਿ ਦੀ ਦੁਰਵਰਤੋਂ ਨਾਲ ਧਰਤੀ ਬੰਜਰ ਬਣਦੀ ਜਾ ਰਹੀ ਹੈ। ਖਨਨ ਤੇ ਰੇਤ ਮਾਫੀਆ ਨੇ ਪੰਜਾਬ ਦੇ ਵਾਤਾਵਰਣ ਦੀ ਤਬਾਹੀ ਕਰ ਦਿੱਤੀ ਹੈ।
ਇਹ ਅਣਸੁਖਾਵੇਂ ਹਾਲਾਤ ਪੈਦਾ ਹੋਣੋਂ ਰੋਕੇ ਜਾ ਸਕਦੇ ਸਨ ਜਾਂ ਸਮੱਸਿਆ ਨਾਲ ਹੁਣ ਵੀ ਸਫਲਤਾਪੂਰਵਕ ਨਜਿੱਠਿਆ ਜਾ ਸਕਦਾ ਹੈ ਪਰ ਸ਼ਰਤ ਇਹ ਹੈ ਕਿ ਪ੍ਰਾਂਤ ਦੀ ਰਾਜਸੀ ਅਗਵਾਈ ਐਸੇ ਲੋਕਾਂ ਦੇ ਹੱਥ ਹੋਣੀ ਚਾਹੀਦੀ ਹੈ ਜੋ ਸਿੱਖ ਗੁਰੂ ਸਾਹਿਬਾਨ ਵਲੋਂ ਰਚੀ ਮਾਨਵੀ ਬਾਣੀ, ਭਗਤੀ ਲਹਿਰ ਦੇ ਮਹਾਨ ਰਹਿਬਰਾਂ ਦੀਆਂ ਤਰਕਵਾਦੀ ਸਿੱਖਿਆਵਾਂ, ਗ਼ਦਰੀ ਸੂਰਬੀਰਾਂ ਤੇ ਸ਼ਹੀਦ-ਏ-ਆਜ਼ਮ ਸ. ਭਗਤ ਸਿੰਘ ਤੇ ਉਸਦੇ ਸਾਥੀਆਂ ਦੇ ਇਨਕਲਾਬੀ ਵਿਚਾਰਧਾਰਾ ਨੂੰ ਪ੍ਰਣਾਈ ਹੋਈ ਹੋਵੇ। ਉਹ ਜੋ ਨਿੱਜ ਦੀ ਥਾਂ ਸਮਾਜਿਕ ਹਿੱਤਾਂ ਨੂੰ ਪਹਿਲ ਦਿੰਦੇ ਹੋਣ। ਅਫਸੋਸ, ਸਾਡਾ ਮਾਣਮੱਤਾ ਪੰਜਾਬ ਅਜਿਹੀ ਅਗਵਾਈ ਤੋਂ ਸਪੱਸ਼ਟ ਵਾਂਝਾ ਦਿਸ ਰਿਹਾ ਹੈ!
ਅੰਧਵਿਸ਼ਵਾਸ ਤੇ ਖੁਦਪ੍ਰਸਤੀ ਫੈਲਾਅ ਰਹੇ ਡੇਰਿਆਂ ਦੀ ਭਰਮਾਰ ਹੈ। ਬਹੁਤੇ ਅਕਾਲੀ ਧੜੇ ਧਰਮਨਿਰਪੱਖਤਾ, ਲੋਕਰਾਜ, ਸੰਘਾਤਮਕ ਢਾਂਚੇ ਦੀ ਰਾਖੀ ਦੇ ਫਰਜ਼ ਅਤੇ ਸਭ ਤੋਂ ਵੱਧ ਮਨੁੱਖ ਹੱਥੋਂ ਮਨੁੱਖ ਦੀ ਲੁੱਟ ਦੇ ਖਾਤਮੇ ਦਾ ਸੁਨਹਿਰੀ ਅਸੂਲ ਤਿਆਗ ਕੇ ਦੇਸ਼ ਦੀ ਹਾਕਮ ਪਾਰਟੀ, ਭਾਜਪਾ ਨਾਲ ਰਾਜਸੀ ਸਾਂਝਾਂ ਪਾਉਣਾ ਚਾਹੁੰਦੇ ਹਨ। ਕਾਂਗਰਸ ਪਾਰਟੀ, ਜਿਸਦੀ ਆਜ਼ਾਦੀ ਅੰਦੋਲਨ ’ਚ ਮੁੱਖ ਭੂਮਿਕਾ ਰਹੀ ਹੈ, ਭਾਜਪਾ ਵਿਰੋਧੀ ਦਲਾਂ ’ਚੋਂ ਅੱਜ ਵੀ ਵੱਡੇ ਜਨ-ਆਧਾਰ ਵਾਲੀ ਪਾਰਟੀ ਹੈ, ਪਰ ਪਾਟੋ-ਧਾੜ ’ਚ ਬੁਰੀ ਤਰ੍ਹਾਂ ਫਸੀ ਹੋਈ ਹੈ।
ਭਾਜਪਾ, ਕੇਂਦਰੀ ਸੱਤਾ ’ਤੇ ਕਾਬਜ਼ ਹੋਣ ਦਾ ਲਾਹਾ ਲੈ ਕੇ ‘ਸਾਮ-ਦਾਮ-ਦੰਡ-ਭੇਦ’ ਦੀ ਨੀਤੀ ਦੇ ਸਹਾਰੇ ਪੰਜਾਬ ਦੀ ਸੱਤਾ ’ਤੇ ਕਾਬਜ਼ ਹੋਣ ਦਾ ਯਤਨ ਕਰ ਰਹੀ ਹੈ। ਹਿੰਦੂ ਵਸੋਂ ਦੇ ਇਕ ਹਿੱਸੇ ’ਚ ਇਸ ਦਾ ਜਨ-ਆਧਾਰ ਪਹਿਲਾਂ ਤੋਂ ਹੀ ਕਾਇਮ ਹੈ। ਇਹ ਕਈ ਕਿਸਮ ਦੇ ਲਾਲਚ ਤੇ ਭੁਚਲਾਵੇ ਦੇ ਕੇ ਦਲਿਤ ਸਮਾਜ ’ਚ ਵੀ ਆਪਣੀ ਜਗ੍ਹਾ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਧਾਰਮਿਕ ਡੇਰਿਆਂ ਤੇ ਸਰਕਾਰੀ ਏਜੰਸੀਆਂ ਦੀ ਵਰਤੋਂ ਤੇ ਦੂਸਰੇ ਦਲਾਂ ’ਚੋਂ ਸਿਧਾਂਤ ਹੀਣੇ ਸਵਾਰਥੀ ਤੱਤਾਂ ਨੂੰ ਭਾਜਪਾ ’ਚ ਸ਼ਾਮਲ ਕਰਕੇ ਭਾਜਪਾ ਆਗੂ ਪੰਜਾਬ ਦੀ ਪ੍ਰਮੁੱਖ ਰਾਜਸੀ ਧਿਰ ਬਣਨ ਦੀ ਆਸ ਲਾਈ ਬੈਠੇ ਹਨ।
ਪਿਛਲੀਆਂ ਵਿਧਾਨ ਸਭਾ ਚੋਣਾਂ ’ਚ ‘ਮੁਤਬਾਦਲ’ ਮੁਹੱਈਆ ਕਰਵਾਉਣ ਦੇ ਨਾਂ ’ਤੇ ਸੱਤਾ ’ਚ ਆਈ ਭਗਵੰਤ ਮਾਨ ਦੀ ‘ਆਪ’ ਸਰਕਾਰ ਪ੍ਰਤੀ ਲੋਕਾਂ ਦਾ ਮੋਹ ਭੰਗ ਹੋ ਰਿਹਾ ਹੈ। ਮੁੱਖ ਮੰਤਰੀ ਵਲੋਂ ਵੋਟਾਂ ਹਾਸਲ ਕਰਨ ਲਈ ਲੋਕਾਂ ਨੂੰ 200 ਗ੍ਰਾਮ ਹਲਦੀ ਤੇ ਇਕ ਲੂਣ ਦੀ ਥੈਲੀ ਮੁਫ਼ਤ ਦੇਣ ਵਰਗੇ ਘਟੀਆ ਸ਼ੋਸ਼ੇ ਛੱਡੇ ਜਾ ਰਹੇ ਹਨ। ਲੋਕਾਂ ਨੂੰ ਮਿਆਰੀ ਸਿੱਖਿਆ ਤੇ ਸਿਹਤ ਸਹੂਲਤਾਂ ਪ੍ਰਦਾਨ ਕਰਨ ਤੇ ਭਿਸ਼ਟਾਚਾਰ ਦਾ ਖਾਤਮਾ ਕਰਕੇ ਸੁਚੱਜਾ ਸ਼ਾਸਨ ਦੇਣ ਵਾਲੀ ‘ਕੱਟੜ ਇਮਾਨਦਾਰ’ ਪਾਰਟੀ ਹੋਣ ਦੇ ਦਾਅਵੇ ਹੁਣ ਲੋਕਾਂ ਦੇ ਸੰਘਾਂ ’ਚੋਂ ਥੱਲੇ ਨਹੀਂ ਉਤਰ ਰਹੇ। ‘ਨਸ਼ਿਆਂ ਵਿਰੁੱਧ ਸਮਾਂਬੱਧ ਯੁੱਧ’ ਛੇੜਨ ਤੋਂ ਪਿੱਛੋਂ ਨਸ਼ਿਆਂ ਦੀ ਵਧੇਰੇ ਵਰਤੋਂ ਨਾਲ ਹੋ ਰਹੀਆਂ ਮੌਤਾਂ ਤੇ ਨਸ਼ਾ ਸਮੱਗਲਰਾਂ ਦੇ ਕਾਰੋਬਾਰ ’ਚ ਭਾਰੀ ਵਾਧਾ ਹੋਇਆ ਹੈ।
ਸਰਕਾਰ ਤੇ ਪ੍ਰਸ਼ਾਸਕੀ ਮਸ਼ੀਨਰੀ ਦੀਆਂ ‘ਬੁਲਡੋਜ਼ਰ’ ਕਾਰਵਾਈਆਂ ਤੇ ਝੂਠੇ ਪੁਲਸ ਮੁਕਾਬਲਿਆਂ ਨਾਲ ਹਾਲਾਤ ‘ਜੰਗਲ ਰਾਜ’ ਵਰਗੇ ਬਣ ਗਏ ਹਨ। ਗੈਂਗਸਟਰਾਂ ਦੀਆਂ ਸਫ਼ਾਂ ’ਚ ਤੇਜ਼ੀ ਨਾਲ ਵਾਧਾ ਹੋ ਰਿਹਾ ਹੈ। ਇਹ ਸਮਾਂ ਤੇ ਸਥਾਨ ਦਾ ਅਗਾਊਂ ਐਲਾਨ ਕਰਕੇ ਕਿਸੇ ਨੂੰ ਸ਼ਰੇਆਮ ਗੋਲੀਆਂ ਮਾਰ ਦਿੰਦੇ ਹਨ। ਭ੍ਰਿਸ਼ਟਾਚਾਰ ਦੀ ਸਥਿਤੀ ਇਹ ਹੈ ਕਿ ਸ਼ਾਇਦ ਹੀ ਕੋਈ ਵਜ਼ੀਰ, ਵਿਧਾਇਕ ਜਾਂ ‘ਆਪ’ ਨੇਤਾ ਐਸਾ ਹੋਵੇ, ਜਿਸ ਨੇ ‘ਆਪ’ ਦੇ ਕਾਰਜਕਾਲ ਦੌਰਾਨ ਭ੍ਰਿਸ਼ਟਾਚਾਰ ਦੀ ਗੰਗਾ ’ਚ ਡੁਬਕੀ ਨਾ ਲਾਈ ਹੋਵੇ। ਇਨ੍ਹਾਂ ਲੋਕਾਂ ਦੀਆਂ ਜਾਇਦਾਦਾਂ ਤੇ ਬੈਂਕ ਖਾਤਿਆਂ ’ਚ ਪਿਛਲੇ 4 ਸਾਲਾਂ ’ਚ ਹੋਏ ਵਾਧੇ ਦੀ ਨਿਰਪੱਖ ਜਾਂਚ ਕੀਤੇ ਜਾਣ ਨਾਲ ‘ਕੱਟੜ ਇਮਾਨਦਾਰ’ ਪਾਰਟੀ ਦੇ ਸਾਰੇ ਭੇਤ ਖੁੱਲ੍ਹ ਸਕਦੇ ਹਨ!
ਪੰਜਾਬ ਅੰਦਰ ਖੱਬੀਆਂ, ਜਮਹੂਰੀ, ਧਰਮਨਿਰਪੱਖ ਰਾਜਸੀ ਧਿਰਾਂ ਦੀ ਅੱਜ ਵੀ ਭਾਰੀ ਮੌਜੂਦਗੀ ਹੈ। ਇਨ੍ਹਾਂ ਨੂੰ ਇਕਜੁੱਟ ਕਰਕੇ ਇਕ ਲੋਕ-ਪੱਖੀ ਰਾਜਨੀਤਕ ਧਿਰ ਖੜ੍ਹੀ ਕੀਤੀ ਜਾ ਸਕਦੀ ਹੈ। ਇਸ ਰਾਜਸੀ ਮੁਤਬਾਦਲ ਦਾ ਮੂਲ ਆਧਾਰ ਪੰਜਾਬ ਦੀਆਂ ਦੇਸ਼ ਭਗਤੀ ਤੇ ਪੀੜਤ ਲੋਕਾਂ ਖਾਤਰ ਆਪਾ ਕੁਰਬਾਨ ਕਰਨ ਦੀਆਂ ਪ੍ਰੰਪਰਾਵਾਂ, ਸਿੱਖ ਗੁਰੂ ਸਾਹਿਬਾਨ ਦੇ ਮਾਨਵੀ ਫਲਸਫੇ ਦੀ ਸੇਧ, ਭਗਤੀ ਲਹਿਰ ਦੇ ਮਹਾਪੁਰਸ਼ਾਂ ਦੀਆਂ ਸੁੱਘੜ ਸਿੱਖਿਆਵਾਂ ਤੇ ਸਾਰੀਆਂ ਔਕੜਾਂ, ਸਾਜਿਸ਼ਾਂ, ਵੱਖੋ-ਵੱਖ ਰੰਗਾਂ ਦੇ ਫਿਰਕੂ ਤੱਤਾਂ ਦਾ ਰਾਜਸੀ-ਵਿਚਾਰਧਾਰਕ ਮੁਹਾਜ਼ ’ਤੇ ਟਾਕਰਾ ਕਰਨ ਦੀ ਸਮਰੱਥਾ ਹੋਵੇਗਾ।
-ਮੰਗਤ ਰਾਮ ਪਾਸਲਾ
ਭ੍ਰਿਸ਼ਟਾਚਾਰ ਨਾਲ ਵਰਦੀ ਨੂੰ ਦਾਗਦਾਰ ਕਰਦੇ ਪੁਲਸ ਦੇ ਕੁਝ ਅਧਿਕਾਰੀ!
NEXT STORY 
