ਤਮਿਲਨਾਡੂ ’ਚ ਦ੍ਰਵਿੜ ਮੁਨੇਤਰ ਕੜਗਮ-ਕਾਂਗਰਸ ਗੱਠਜੋੜ ਦੇ ਅੰਦਰ ਚੱਲ ਰਹੀ ਅਣਬਣ ’ਤੇ ਕਾਂਗਰਸ ਹਾਈਕਮਾਂਡ ਨੇ ਪੂਰੀ ਤਰ੍ਹਾਂ ਸਿੱਧਾ ਕੰਟਰੋਲ ਕਰ ਲਿਆ ਹੈ। ਹਾਲਾਂਕਿ 22 ਫਰਵਰੀ ਤੋਂ ਰਸਮੀ ਗੱਲਬਾਤ ਸ਼ੁਰੂ ਹੋਣ ਵਾਲੀ ਹੈ ਪਰ ਕਾਂਗਰਸ ਨੇਤਾਵਾਂ ਦੇ ਜਨਤਕ ਬਿਆਨਾਂ ਤੋਂ ਪਹਿਲਾਂ ਹੀ ਇਸ ਗੱਲ ’ਤੇ ਬਹਿਸ ਸ਼ੁਰੂ ਹੋ ਗਈ ਹੈ ਕਿ ਇਹ ਅਣਬਣ ਅਸਲੀ ਹੈ ਜਾਂ ਸੋਚੀ-ਸਮਝੀ ਮੁੱਲ-ਭਾਅ ਦੀ ਰਣਨੀਤੀ। ਇਸ ਦੀ ਸ਼ੁਰੂਆਤੀ ਚਿਣਗ ਕਾਂਗਰਸ ਦੀਆਂ ਸੀਟਾਂ ਦੇ ਵੱਡੇ ਹਿੱਸੇ ਅਤੇ ਗੱਠਜੋੜ ਦੇ ਸੱਤਾ ’ਚ ਪਰਤਣ ’ਤੇ ਸ਼ਾਸਨ ’ਚ ਜ਼ਿਆਦਾ ਤੈਅ ਭੂਮਿਕਾ ਦੀ ਮੰਗ ਲੱਗਦੀ ਹੈ। ਸੰਸਦ ਮੈਂਬਰ ਮਣਿਕਮ ਟੈਗੋਰ ਅਤੇ ਰਣਨੀਤੀਕਾਰ ਪ੍ਰਵੀਨ ਚੱਕਰਵਰਤੀ ਵਰਗੇ ਕਾਂਗਰਸ ਨੇਤਾਵਾਂ ਦੇ ਬੜਬੋਲੇ ਬਿਆਨਾਂ ਨਾਲ ਇਹ ਮੁੱਦਾ ਹੋਰ ਵਧ ਗਿਆ ਹੈ, ਜਿਨ੍ਹਾਂ ਨੇ ਐਕਟਰ-ਪਾਲੀਟੀਸ਼ੀਅਨ ਵਿਜੇ ਦੀ ਪਾਰਟੀ, ਤਮਿਲਗਾ ਵੇਤਰੀ ਕੜਗਮ ਨਾਲ ਜੁੜਨ ਦੀ ਸੰਭਾਵਨਾ ਸਮੇਤ ਦੂਜੇ ਰਾਜਨੀਤਕ ਗੱਠਜੋੜਾਂ ਬਾਰੇ ਜਨਤਕ ਤੌਰ ’ਤੇ ਇਸ਼ਾਰਾ ਕੀਤਾ ਹੈ ਪਰ ਹਾਲ ਹੀ ’ਚ ਸੀਨੀਅਰ ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਨੇ ਕਿਹਾ ਕਿ ਉਨ੍ਹਾਂ ਨੇ ਕਨੀਮੋਝੀ ਦੇ ਜ਼ਰੀਏ ਦ੍ਰਮੁਕ ਲੀਡਰਸ਼ਿਪ ਨੂੰ ਸਾਫ਼-ਸਾਫ਼ ਦੱਸ ਦਿੱਤਾ ਹੈ ਕਿ ਉਨ੍ਹਾਂ ਦੀ ਪਾਰਟੀ ਅਜਿਹੀ ਕਿਸੇ ਵੀ ਰਣਨੀਤੀ ’ਤੇ ਜ਼ੋਰ ਨਹੀਂ ਦੇਵੇਗੀ ਜਿਸ ਨਾਲ ਗੱਠਜੋੜ ’ਚ ਤਣਾਅ ਪੈਦਾ ਹੋਵੇ, ਜਿਸ ’ਚ ਪਾਵਰ-ਸ਼ੇਅਰਿੰਗ ’ਤੇ ਗੱਲਬਾਤ ਵੀ ਸ਼ਾਮਲ ਹੈ।
ਕਿਹਾ ਜਾ ਰਿਹਾ ਹੈ ਕਿ ਉਨ੍ਹਾਂ ਨੇ ਚੋਣਾਂ ਤੋਂ ਪਹਿਲਾਂ ਕੋਈ ਦੂਜਾ ਗੱਠਜੋੜ ਚੁਣਨ ਜਾਂ ਵਿਜੇ ਦੀ ਤਮਿਲਗਾ ਵੇਤਰੀ ਕੜਗਮ (ਟੀ. ਵੀ. ਕੇ.) ਨਾਲ ਜਾਣ ਦੇ ਕਿਸੇ ਵੀ ਬਦਲ ਤੋਂ ਮਨ੍ਹਾ ਕਰ ਦਿੱਤਾ ਹੈ। ਹਾਲਾਂਕਿ, ਸੂਤਰਾਂ ਦਾ ਕਹਿਣਾ ਹੈ ਕਿ ਦ੍ਰਮੁਕ ਨੇ ਇਕ ਅਸਿੱਧਾ ਅਲਟੀਮੇਟਮ ਦਿੱਤਾ ਹੈ ਕਿ ਕਾਂਗਰਸ ਗੱਠਜੋੜ ’ਚ ਰਹਿ ਸਕਦੀ ਹੈ ਪਰ ਸਰਕਾਰ ’ਚ ਹਿੱਸੇਦਾਰੀ ਦੇ ਬਿਨਾਂ ਅਤੇ ਜੇਕਰ ਇਸ ਨਾਲ ਪਾਵਰ-ਸ਼ੇਅਰਿੰਗ ’ਤੇ ਕੋਈ ਜ਼ੋਰ ਪੈਂਦਾ ਹੈ, ਤਾਂ ਉਹ ਛੱਡਣ ਲਈ ਆਜ਼ਾਦ ਹਨ। ਅਜਿਹੇ ਵੀ ਸੁਝਾਅ ਹਨ ਕਿ ਦ੍ਰਮੁਕ ਨੇ ਗੱਠਜੋੜ ਨੂੰ ਆਸਾਨੀ ਨਾਲ ਜਾਰੀ ਰੱਖਣ ਲਈ ਪ੍ਰਵੀਨ ਚੱਕਰਵਰਤੀ ਅਤੇ ਮਣਿਕਮ ਟੈਗੋਰ ਵਰਗੇ ਨੇਤਾਵਾਂ ਦੇ ਖਿਲਾਫ਼ ਕਾਰਵਾਈ ਦੀ ਮੰਗ ਕੀਤੀ ਹੈ। ਬਿਆਨਬਾਜ਼ੀ ਦੇ ਬਾਵਜੂਦ, ਦੋਵੇਂ ਪਾਰਟੀਆਂ ਭਾਜਪਾ ਵਿਰੋਧੀ ਏਕਤਾ ਨੂੰ ਇਕ ਜੋੜਨ ਵਾਲੀ ਤਾਕਤ ਦੇ ਤੌਰ ’ਤੇ ਜ਼ੋਰ ਦੇ ਰਹੀਆਂ ਹਨ।
ਕਰਨਾਟਕ ’ਚ ਨਹੀਂ ਰੁਕ ਰਹੀ ਸੱਤਾ ਲਈ ਖਿੱਚੋਤਾਣ
ਕਰਨਾਟਕ ’ਚ ਸੱਤਾਧਾਰੀ ਕਾਂਗਰਸ ਦੇ ਅੰਦਰ ਸੱਤਾ ਦੀ ਖਿੱਚੋਤਾਣ ਰੁਕਣ ਦਾ ਨਾਂ ਨਹੀਂ ਲੈ ਰਹੀ, ਅਜਿਹੇ ’ਚ ਉਪ ਮੁੱਖ ਮੰਤਰੀ ਡੀ. ਕੇ. ਸ਼ਿਵਕੁਮਾਰ ਨੇ ਕਿਹਾ ਕਿ ਲੀਡਰਸ਼ਿਪ ’ਚ ਬਦਲਾਅ ਦਾ ਫੈਸਲਾ ਪਹਿਲਾਂ ਹੀ ਹੋ ਚੁੱਕਾ ਹੈ ਅਤੇ ਮੁੱਖ ਮੰਤਰੀ ਸਿੱਧਾਰਮਈਆ ਸਹੀ ਸਮੇਂ ’ਤੇ ਇਸ ਦਾ ਐਲਾਨ ਕਰਨਗੇ। ਸ਼ਿਵਕੁਮਾਰ ਨੇ ਸੋਸ਼ਲ ਵੈੱਲਫੇਅਰ ਮਿਨਿਸਟਰ ਡਾ. ਐੱਚ. ਸੀ. ਮਹਾਦੇਵੱਪਾ ਦੇ ਬਿਆਨ ’ਤੇ ਪ੍ਰਤੀਕਿਰਿਆ ਦਿੱਤੀ ਸੀ, ਜਿਨ੍ਹਾਂ ਨੇ ਕਿਹਾ ਸੀ ਕਿ ਕਰਨਾਟਕ ’ਚ ਪਾਵਰ-ਸ਼ੇਅਰਿੰਗ ’ਤੇ ਕੋਈ ਚਰਚਾ ਨਹੀਂ ਹੋ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਕਰਨਾਟਕ ’ਚ ਲੀਡਰਸ਼ਿਪ ਮਜ਼ਬੂਤ ਹੈ ਅਤੇ ਇਸ ’ਚ ਬਦਲਾਅ ਦੀ ਸੰਭਾਵਨਾ ਤੋਂ ਇਨਕਾਰ ਕੀਤਾ। ਹਾਲਾਂਕਿ, ਸ਼ਿਵਕੁਮਾਰ ਨੇ ਕਿਹਾ ਕਿ ਉਹ ਮਹਾਦੇਵੱਪਾ ਜਾਂ ਦੂਜੇ ਨੇਤਾਵਾਂ ’ਤੇ ਕੋਈ ਪ੍ਰਤੀਕਿਰਿਆ ਨਹੀਂ ਦੇਣਗੇ।
ਇਸ ਦੌਰਾਨ ਮੁੱਖ ਮੰਤਰੀ ਸਿੱਧਾਰਮਈਆ ਦੇ ਵਫ਼ਾਦਾਰ ਕਹੇ ਜਾਣ ਵਾਲੇ 22 ਕਾਂਗਰਸੀ ਵਿਧਾਇਕ ਆਪਣੇ ਖਰਚੇ ’ਤੇ ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਦੇ ਪ੍ਰਾਈਵੇਟ ਟੂਰ ’ਤੇ ਜਾਣ ਲਈ ਇਕੱਠੇ ਆਏ ਹਨ, ਜਦਕਿ ਵਿਧਾਇਕਾਂ ਦਾ ਦੂਜਾ ਬੈਚ ਵੀ ਉਨ੍ਹਾਂ ਨਾਲ ਜਾਣ ਲਈ ਤਿਆਰ ਹੈ। ਇਸ ਕਦਮ ਨੂੰ ਵੱਡੇ ਪੱਧਰ ’ਤੇ ਸਿੱਧਾਰਮਈਆ ਦੀ ਇਹ ਸੰਕੇਤ ਦੇਣ ਦੀ ਕੋਸ਼ਿਸ਼ ਦੇ ਤੌਰ ’ਤੇ ਦੇਖਿਆ ਜਾ ਰਿਹਾ ਹੈ ਕਿ ਉਨ੍ਹਾਂ ਕੋਲ ਕਾਂਗਰਸ ਵਿਧਾਇਕਾਂ ਦੇ ਬਹੁਮਤ ਦਾ ਸਮਰਥਨ ਹੈ। ਸ਼ਿਵਕੁਮਾਰ ‘ਟੌਪ ਪੋਸਟ’ ਲਈ ਫੋਕਸ ’ਚ ਬਣੇ ਰਹਿਣਾ ਚਾਹੁੰਦੇ ਹਨ, ਜਦਕਿ ਕਾਂਗਰਸ ਹਾਈਕਮਾਂਡ ਨੇ ਕੇਰਲ, ਤਮਿਲਨਾਡੂ, ਪੱਛਮੀ ਬੰਗਾਲ, ਅਸਾਮ ਅਤੇ ਪੁਡੂਚੇਰੀ ’ਚ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਖਤਮ ਹੋਣ ਤੱਕ ‘ਵੇਟ ਐਂਡ ਵਾਚ’ ਪਹੁੰਚ ਦਾ ਸੰਕੇਤ ਦਿੱਤਾ ਹੈ।
ਪ੍ਰਿਯੰਕਾ ਗਾਂਧੀ ਦਾ ਅਸਾਮ ਦੌਰਾ
ਅਸਾਮ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ, ਕਾਂਗਰਸ ਨੇਤਾ ਪ੍ਰਿਯੰਕਾ ਗਾਂਧੀ ਵਾਡਰਾ ਨੇ ਗੁਹਾਟੀ ’ਚ ਭਾਜਪਾ ਦੀ ਅਗਵਾਈ ਵਾਲੀ ਰਾਜ ਸਰਕਾਰ ਦੇ ਖਿਲਾਫ਼ 20 ਪੁਆਇੰਟ ਚਾਰਜਸ਼ੀਟ ਜਾਰੀ ਕੀਤੀ ਹੈ ਅਤੇ ਪ੍ਰਸ਼ਾਸਨ ’ਤੇ ਭ੍ਰਿਸ਼ਟਾਚਾਰ ’ਚ ਸ਼ਾਮਲ ਹੋਣ ਅਤੇ ਘੱਟਗਿਣਤੀਆਂ ’ਚ ਡਰ ਪੈਦਾ ਕਰਨ ਲਈ ਆਪਣੀ ਮਸ਼ੀਨਰੀ ਦੀ ਵਰਤੋਂ ਕਰਨ ਦਾ ਦੋਸ਼ ਲਗਾਇਆ ਹੈ। ਉਨ੍ਹਾਂ ਦੇ ਦੌਰੇ ਦਾ ਮੁੱਖ ਕਾਰਨ 2026 ਦੀਆਂ ਵਿਧਾਨ ਸਭਾ ਚੋਣਾਂ ਦੀਆਂ ਤਿਆਰੀਆਂ ’ਚ ਤੇਜ਼ੀ ਲਿਆਉਣਾ ਹੈ, ਖਾਸ ਕਰ ਕੇ ਉਮੀਦਵਾਰਾਂ ਦੀ ਚੋਣ ਨਾਲ ਜੁੜੀ ਪ੍ਰਕਿਰਿਆ ਅਤੇ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਲਈ ਟਿਕਟ ਚਾਹੁਣ ਵਾਲਿਆਂ ਨਾਲ ਗੱਲਬਾਤ ਕਰਨਾ। ਹਾਲਾਂਕਿ, ਉਨ੍ਹਾਂ ਦਾ ਦੌਰਾ ਅਜਿਹੇ ਸਮੇਂ ’ਚ ਹੋ ਰਿਹਾ ਹੈ, ਜਦੋਂ ਅਸਾਮ ਕਾਂਗਰਸ ਗੰਭੀਰ ਅੰਦਰੂਨੀ ਮਸਲਿਆਂ ਨਾਲ ਜੂਝ ਰਹੀ ਹੈ।
ਉਨ੍ਹਾਂ ਦੇ ਆਉਣ ਤੋਂ ਕੁਝ ਦਿਨ ਪਹਿਲਾਂ ਹੀ, ਏ. ਪੀ. ਸੀ. ਸੀ. ਦੇ ਸਾਬਕਾ ਚੀਫ ਭੂਪੇਨ ਕੁਮਾਰ ਬੋਰਾ ਨੇ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ, ਜਿਸ ’ਚ ਉਨ੍ਹਾਂ ਨੇ ਕਥਿਤ ਤੌਰ ’ਤੇ ਗੌਰਵ ਗੋਗੋਈ ਉੱਤੇ ਮਨਮਾਨੀ ਕਰਨ ਦਾ ਦੋਸ਼ ਲਗਾਇਆ ਅਤੇ ਕਿਹਾ ਕਿ ਨਿੱਜੀ ਇੱਛਾਵਾਂ ਸੰਭਾਵਿਤ ਗੱਠਜੋੜਾਂ ਨੂੰ ਨੁਕਸਾਨ ਪਹੁੰਚਾ ਰਹੀਆਂ ਹਨ। ਅਜਿਹੀਆਂ ਵੀ ਖ਼ਬਰਾਂ ਸਨ ਕਿ ਬੋਰਾ ਭਾਜਪਾ ’ਚ ਸ਼ਾਮਲ ਹੋ ਸਕਦੇ ਹਨ। ਪ੍ਰਿਯੰਕਾ ਪ੍ਰਾਰਥਨਾ ਲਈ ਕਾਮਾਖਿਆ ਮੰਦਰ ਵੀ ਗਈ ਅਤੇ ਇਕ ਨਾਗਾ ਸਾਧੂ ਨਾਲ ਮਿਲੀ, ਜਿਨ੍ਹਾਂ ਨੂੰ ਦੇਖਣ ਵਾਲਿਆਂ ਨੇ ਅਘੋਰੀ ਬਾਬਾ ਦੱਸਿਆ, ਜਿਨ੍ਹਾਂ ਨੇ ਇਕ ਫੋਟੋ ਖਿਚਵਾਉਣ ਦੀ ਬੇਨਤੀ ਕੀਤੀ। ਇਕ ਵੀਡੀਓ, ਜੋ ਹੁਣ ਵਾਇਰਲ ਹੋ ਰਿਹਾ ਹੈ, ਉਸ ’ਚ ਬਾਬਾ ਗਾਂਧੀ ਦੇ ਸਿਰ ’ਤੇ ਹੱਥ ਰੱਖਦੇ ਹੋਏ ਅਤੇ ਫਿਰ ਕਹਿੰਦੇ ਹੋਏ ਦਿਸ ਰਹੇ ਹਨ, “ਸਾਡੀ ਬੇਟੀ ਪ੍ਰਧਾਨ ਮੰਤਰੀ ਬਣੇਗੀ।”
ਮਾਇਆਵਤੀ ਚੋਣਾਂ ਲਈ ਸਰਗਰਮ ਹੋਈ 2027 ਦੀਆਂ ਉੱਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ਨੂੰ ਧਿਆਨ ’ਚ ਰੱਖਦੇ ਹੋਏ, ਬਹੁਜਨ ਸਮਾਜ ਪਾਰਟੀ (ਬਸਪਾ) ਪ੍ਰਧਾਨ ਮਾਇਆਵਤੀ ਨੇ ਪਾਰਟੀ ਸੰਗਠਨ ਨੂੰ ਮਜ਼ਬੂਤ ਕਰਨ ਦੀ ਰਣਨੀਤੀ ਦੇ ਤਹਿਤ ਆਪਣੀ ਚੋਣ ਟੀਮ ’ਚ ਵੱਡੇ ਬਦਲਾਅ ਦਾ ਐਲਾਨ ਕੀਤਾ ਹੈ। ਇਕ ਖਾਸ ਕਦਮ ’ਚ, ਉਨ੍ਹਾਂ ਦੇ ਭਤੀਜੇ ਆਕਾਸ਼ ਆਨੰਦ ਦੇ ਸਹੁਰੇ ਅਸ਼ੋਕ ਸਿਧਾਰਥ ਨੂੰ ਇਕ ਵਾਰ ਫਿਰ ਇਕ ਅਹਿਮ ਭੂਮਿਕਾ ਦਿੱਤੀ ਗਈ ਹੈ, ਜਿਸ ’ਚ ਉਹ ਦਿੱਲੀ, ਗੁਜਰਾਤ, ਛੱਤੀਸਗੜ੍ਹ ਅਤੇ ਕੇਰਲ ਜਿਹੇ 4 ਰਾਜਾਂ ’ਚ ਪਾਰਟੀ ਦੀ ਗ੍ਰੋਥ ਦਾ ਧਿਆਨ ਰੱਖਣਗੇ। ਉੱਥੇ ਹੀ, ਨੌਸ਼ਾਦ ਅਲੀ ਨੂੰ ਉੱਤਰ ਪ੍ਰਦੇਸ਼ ਦੇ 4 ਸਭ ਤੋਂ ਅਹਿਮ ਰਾਜਨੀਤਕ ਰੂਪ ’ਚ ਅਹਿਮ ਡਵੀਜ਼ਨਾਂ ਜਿਵੇਂ ਕਾਨਪੁਰ, ਲਖਨਊ, ਆਗਰਾ ਅਤੇ ਮੇਰਠ ਦਾ ਚੀਫ ਇੰਚਾਰਜ ਬਣਾਇਆ ਗਿਆ ਹੈ। ਇਨ੍ਹਾਂ ਇਲਾਕਿਆਂ ਨੂੰ ਰਾਜ ਦੀ ਰਾਜਨੀਤਕ ਦਿਸ਼ਾ ਤੈਅ ਕਰਨ ’ਚ ਅਹਿਮ ਮੰਨਿਆ ਜਾਂਦਾ ਹੈ। ਨੌਸ਼ਾਦ ਅਲੀ ਨੂੰ ਇਨ੍ਹਾਂ ਇਲਾਕਿਆਂ ’ਚ ਕੇਡਰ ’ਚ ਜੋਸ਼ ਭਰਨ ਅਤੇ ਦਲਿਤ-ਮੁਸਲਿਮ ਗਠਜੋੜ ਨੂੰ ਫਿਰ ਤੋਂ ਬਣਾਉਣ ਦਾ ਕੰਮ ਸੌਂਪਿਆ ਗਿਆ ਹੈ। ਬਸਪਾ ਦਲਿਤਾਂ, ਪੱਛੜੀਆਂ ਸ਼੍ਰੇਣੀਆਂ ਅਤੇ ਘੱਟਗਿਣਤੀ ਭਾਈਚਾਰਿਆਂ ਵਿਚਾਲੇ ਆਪਣੇ ਰਵਾਇਤੀ ਸਮਰਥਨ ਅਾਧਾਰ ਨੂੰ ਮਜ਼ਬੂਤ ਕਰਨ ਦੇ ਨਾਲ-ਨਾਲ ਦੂਜੇ ਸਮਾਜਿਕ ਗਰੁੱਪਾਂ ਤੱਕ ਆਪਣੀ ਪਹੁੰਚ ਵਧਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ।
–ਰਾਹਿਲ ਨੌਰਾ ਚੋਪੜਾ
ਵਾਤਾਵਰਣ ਅਤੇ ਸਿਹਤ ਦਾ ਨੁਕਸਾਨ ਉਦਯੋਗਿਕ ਅਤੇ ਆਰਥਿਕ ਖੁਸ਼ਹਾਲੀ ਲਈ ਨੁਕਸਾਨਦੇਹ
NEXT STORY 
