ਦੇਸ਼ ’ਚ ਨਕਲੀ ਖੁਰਾਕ ਪਦਾਰਥਾਂ, ਦਵਾਈਆਂ, ਖਾਦਾਂ, ਕੀਟਨਾਸ਼ਕਾਂ, ਕਰੰਸੀ ਆਦਿ ਦੀਆਂ ਗੱਲਾਂ ਤਾਂ ਸੁਣੀਆਂ ਜਾਂਦੀਆਂ ਸਨ ਪਰ ਹੁਣ ਇਹ ਬੀਮਾਰੀ ਨਕਲੀ ਅਧਿਕਾਰੀ ਅਤੇ ਨਕਲੀ ਫੌਜ ਅਧਿਕਾਰੀਆਂ ਤਕ ਪਹੁੰਚ ਗਈ ਹੈ ਜੋ ਫਰਜ਼ੀ ਅਧਿਕਾਰੀਆਂ ਦੀਆਂ ਪਿਛਲੇ 5 ਮਹੀਨਿਆਂ ਦੌਰਾਨ ਗ੍ਰਿਫਤਾਰੀਆਂ ਦੀਆਂ ਹੇਠ ਲਿਖੀਆਂ ਘਟਨਾਵਾਂ ਤੋਂ ਸਪੱਸ਼ਟ ਹੈ:
* 12 ਅਗਸਤ, 2025 ਨੂੰ ‘ਨੋਇਡਾ’ (ਉੱਤਰ ਪ੍ਰਦੇਸ਼) ’ਚ ‘ਇੰਟਰਨੈਸ਼ਨਲ ਪੁਲਸ ਐਂਡ ਕ੍ਰਾਈਮ ਬਿਊਰੋ’ ਦੇ ਨਾਂ ਨਾਲ ਫਰਜ਼ੀ ਪੁਲਸ ਥਾਣਾ ਖੋਲ੍ਹ ਕੇ ਲੋਕਾਂ ਨੂੰ ਠੱਗਣ ਵਾਲੇ ਗਿਰੋਹ ਦਾ ਪਰਦਾਫਾਸ਼ ਕਰ ਕੇ ਪੁਲਸ ਨੇ ਗਿਰੋਹ ਦੇ ਮਾਸਟਰਮਾਈਂਡ ਸਮੇਤ 6 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ।
* 13 ਅਗਸਤ, 2025 ਨੂੰ ‘ਦਿੱਲੀ’ ’ਚ ਖੁਦ ਨੂੰ ਸਬ-ਇੰਸਪੈਕਟਰ ਦੱਸ ਕੇ ਲੋਕਾਂ ਨੂੰ 2 ਸਾਲਾਂ ਤੋਂ ਧੋਖਾ ਦਿੰਦੇ ਆ ਰਹੇ ਇਕ ਠੱਗ ਨੂੰ ਪੁਲਸ ਨੇ ਗ੍ਰਿਫਤਾਰ ਕਰ ਕੇ ਉਸ ਦੇ ਕਬਜ਼ੇ ’ਚੋਂ ਪੁਲਸ ਦਾ ਨਕਲੀ ਆਈ. ਡੀ. ਕਾਰਡ, ਖਿਡੌਣਾ ਪਿਸਤੌਲ, ਹੋਲਸਟਰ ਬੈਰੇਟ ਕੈਪ, ਪੀ ਕੈਪ, 8 ਡੈਬਿਟ ਅਤੇ ਕ੍ਰੈਡਿਟ ਕਾਰਡ, ਵਾਹਨ, ਨੇਮ ਪਲੇਟ ਸਮੇਤ ਸਬ-ਇੰਸਪੈਕਟਰ ਰੈਂਕ ਦੇ ਅਧਿਕਾਰੀ ਦੀ ਵਰਦੀ ਅਤੇ ਹੋਰ ਸਮੱਗਰੀ ਬਰਾਮਦ ਕੀਤੀ।
* 17 ਜਨਵਰੀ, 2026 ਨੂੰ ‘ਖੈਰਥਲ ਤਿਜਾਰਾ’ (ਰਾਜਸਥਾਨ) ਜ਼ਿਲੇ ਦੇ ‘ਭਿਵਾੜੀ’ ਥਾਣਾ ਖੇਤਰ ’ਚ ਪੁਲਸ ਨੇ ‘ਸੌਰਭ ਤੋਮਰ’ ਨਾਂ ਦੇ ਇਕ ਨਕਲੀ ਪੁਲਸ ਅਧਿਕਾਰੀ ਨੂੰ ਗ੍ਰਿਫਤਾਰ ਕੀਤਾ।
ਉਹ 16 ਜਨਵਰੀ, 2026 ਦੀ ਰਾਤ ਉਕਤ ਥਾਣੇ ’ਚ ਆਇਆ ਅਤੇ ਖੁਦ ਨੂੰ ਰਾਜਸਥਾਨ ਕੈਡਰ ਦਾ ਆਈ. ਪੀ. ਐੱਸ. ਅਧਿਕਾਰੀ ਦੱਸ ਕੇ ਥਾਣੇ ਦੇ ਅਧਿਕਾਰੀਅਾਂ ਨੂੰ ਅਾਪਣੇ ਲਈ ਸ਼ਹਿਰ ਦੇ ਇਕ ਵੱਡੇ ਹੋਟਲ ’ਚ ਠਹਿਰਨ ਦਾ ਪ੍ਰਬੰਧ ਕਰਨ ਲਈ ਕਿਹਾ।
ਸ਼ੱਕ ਹੋਣ ’ਤੇ ਜਦੋਂ ਥਾਣੇ ਦੇ ਅਧਿਕਾਰੀਅਾਂ ਨੇ ਉਸ ਦੇ ਦਸਤਾਵੇਜ਼ਾਂ ਦੀ ਜਾਂਚ ਕੀਤੀ ਤਾਂ ਨਕਲੀ ਅਧਿਕਾਰੀ ਦੀ ਪੋਲ ਖੁੱਲ੍ਹ ਗਈ ਅਤੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਪੁਲਸ ਨੇ ਉਸ ਕੋਲੋਂ ਆਈ. ਪੀ. ਐੱਸ. ਅਧਿਕਾਰੀ ਦਾ ਫਰਜ਼ੀ ਆਈ. ਕਾਰਡ ਅਤੇ ਹੋਰ ਦਸਤਾਵੇਜ਼ਾਂ ਤੋਂ ਇਲਾਵਾ ਇਕ ਵਾਇਰਲੈੱਸ ਹੈਂਡਸੈੱਟ ਵੀ ਬਰਾਮਦ ਕੀਤਾ।
* 2 ਫਰਵਰੀ, 2026 ਨੂੰ ‘ਜੀਂਦ’ (ਹਰਿਆਣਾ) ਦੇ ਸੋਸ਼ਲ ਮੀਡੀਆ ’ਤੇ ਖੁਦ ਨੂੰ ਫੌਜ ਦੇ ਅਧਿਕਾਰੀ ਦੱਸ ਕੇ ਇਕ ਵਿਅਕਤੀ ਤੋਂ 3.5 ਲੱਖ ਰੁਪਏ ਠੱਗ ਲੈਣ ਦੇ ਦੋਸ਼ ’ਚ ਸਾਈਬਰ ਕ੍ਰਾਈਮ ਪੁਲਸ ਨੇ 2 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ। ਮੁਲਜ਼ਮਾਂ ਨੇ ਸੋਸ਼ਲ ਮੀਡੀਆ ’ਤੇ ਆਈ. ਡੀ. ਬਣਾਈ ਹੋਈ ਸੀ ਅਤੇ ਲੋਕਾਂ ਨੂੰ ਬਲੈਕਮੇਲ ਕਰ ਕੇ ਉਨ੍ਹਾਂ ਨਾਲ ਲੱਖਾਂ ਰੁਪਏ ਦੀ ਠੱਗੀ ਮਾਰਦੇ ਸਨ।
* 3 ਫਰਵਰੀ, 2026 ਨੂੰ ‘ਛਪਰਾ’ (ਬਿਹਾਰ) ’ਚ ਫਰਜ਼ੀ ਆਈ. ਏ. ਐੱਸ. ਅਧਿਕਾਰੀ ਦਾ ਫਰਜ਼ੀ ਪਛਾਣ ਪੱਤਰ ਲੈ ਕੇ ਜ਼ਿਲਾ ਮੈਜਿਸਟ੍ਰੇਟ ਨੂੰ ਮਿਲਣ ਪਹੁੰਚੇ ਇਕ ਵਿਅਕਤੀ ਨੂੰ ਪੁਲਸ ਨੇ ਗ੍ਰਿਫਤਾਰ ਕੀਤਾ। ਪੁਲਸ ਅਨੁਸਾਰ ਉਹ ਪਹਿਲਾਂ ਵੀ ਖੁਦ ਨੂੰ ਉੱਚ ਅਧਿਕਾਰੀ ਜ਼ਾਹਿਰ ਕਰ ਕੇ ਲੋਕਾਂ ਨੂੰ ਠੱਗ ਚੁੱਕਾ ਸੀ।
* 6 ਫਰਵਰੀ, 2026 ਨੂੰ ‘ਧਾਮਪੁਰ’ (ਉੱਤਰ ਪ੍ਰਦੇਸ਼) ’ਚ ਖੁਦ ਨੂੰ ਇੰਟੈਲੀਜੈਂਸ ਬਿਊਰੋ (ਆਈ. ਬੀ.) ਦਾ ਸੀਨੀਅਰ ਅਧਿਕਾਰੀ ਦੱਸ ਕੇ ਪ੍ਰਸ਼ਾਸਨਿਕ ਅਤੇ ਪੁਲਸ ਅਧਿਕਾਰੀਆਂ ’ਤੇ ਰੋਅਬ ਪਾ ਕੇ ਉਸ ਦਾ ਅਣਉਚਿਤ ਲਾਭ ਉਠਾਉਣ ਵਾਲੇ ‘ਮਨੋਜ ਚੌਹਾਨ’ ਨਾਂ ਦੇ ਠੱਗ ਨੂੰ ‘ਮੇਰਠ’ ਤੋਂ ਆਈ ਸਪੈਸ਼ਲ ਟਾਸਕ ਫੋਰਸ ਦੀ ਟੀਮ ਨੇ ਹਿਰਾਸਤ ’ਚ ਲਿਆ। ਐੱਸ. ਟੀ. ਐੱਫ. ਹੁਣ ਇਸ ਗੱਲ ਦਾ ਪਤਾ ਲਗਾ ਰਹੀ ਹੈ ਕਿ ਲੋਕਾਂ ’ਤੇ ਝੂਠੀ ਧੌਂਸ ਜਮਾ ਕੇ ਉਸ ਨੇ ਹੁਣ ਤਕ ਕਿੰਨੇ ਲੋਕਾਂ ਨੂੰ ਠੱਗਿਆ ਹੈ।
* 8 ਫਰਵਰੀ, 2026 ਨੂੰ ‘ਪਾਨੀਪਤ’ ਵਿਚ ‘ਮੁੱਖ ਮੰਤਰੀ (ਹਰਿਆਣਾ) ਉੱਡਣ ਦਸਤੇ’ ਨੇ ਨਕਲੀ ਸੇਲਸ ਟੈਕਸ ਅਧਿਕਾਰੀ ਬਣ ਕੇ ਟਰਾਂਸਪੋਰਟਰਾਂ ਅਤੇ ਕੋਰੀਅਰ ਕੰਪਨੀ ਵਾਲਿਆਂ ਨੂੰ ਧਮਕਾਉਣ ਅਤੇ ਉਨ੍ਹਾਂ ਤੋਂ ਜਬਰੀ ਵਸੂਲੀ ਕਰਨ ਦੇ ਦੋਸ਼ ’ਚ ਇਕ ਠੱਗ ਨੂੰ ਗ੍ਰਿਫਤਾਰ ਕੀਤਾ। ਪੁੱਛਗਿੱਛ ਦੌਰਾਨ ਉਸ ਨੇ ਇਹ ਕੰਮ ਕਈ ਇੰਸਪੈਕਟਰਾਂ ਦੀ ਮਿਲੀਭੁਗਤ ਨਾਲ ਕਰਨ ਦੀ ਗੱਲ ਮੰਨੀ।
* ਅਤੇ ਹੁਣ 9 ਫਰਵਰੀ ਨੂੰ ਫਰਜ਼ੀ ਇਨਕਮ ਟੈਕਸ ਅਧਿਕਾਰੀ ਬਣ ਕੇ ‘ਸੰਭਲ’ (ਉੱਤਰ ਪ੍ਰਦੇਸ਼) ਜ਼ਿਲੇ ਦੇ ‘ਅਖਤਿਆਰਪੁਰ’ ਪਿੰਡ ਦੇ ਇਕ ਕਿਸਾਨ ਨੂੰ ਕਰੋੜਾਂ ਰੁਪਏ ਦੇ ਕਾਲੇ ਧਨ ਦਾ ਬੋਗਸ ਨੋਟਿਸ ਦੇ ਕੇ ਉਸ ਕੋਲੋਂ 24 ਲੱਖ ਰੁਪਏ ਦੀ ਮੰਗ ਕਰਨ ਦੇ ਦੋਸ਼ ’ਚ ਪੁਲਸ ਨੇ ਐੱਲ. ਐੱਲ. ਬੀ. ਦੇ ਇਕ ਵਿਦਿਆਰਥੀ ਨੂੰ ਗ੍ਰਿਫਤਾਰ ਕੀਤਾ।
ਉਕਤ ਉਦਾਹਰਣਾਂ ਤੋਂ ਸਪੱਸ਼ਟ ਹੈ ਕਿ ਦੇਸ਼ ’ਚ ਸਮਾਜ ਵਿਰੋਧੀ ਤੱਤਾਂ ਵਲੋਂ ਖੁਦ ਨੂੰ ਅਧਿਕਾਰੀ ਦੱਸ ਕੇ ਲੋਕਾਂ ਨੂੰ ਠੱਗਣ ਦੀ ਬੀਮਾਰੀ ਕਿੰਨੀ ਵਧਦੀ ਜਾ ਰਹੀ ਹੈ। ਇਸ ਲਈ ਅਜਿਹੇ ਤੱਤਾਂ ਨੂੰ ਸਖਤ ਤੋਂ ਸਖਤ ਸਜ਼ਾ ਦੇਣ ਦੀ ਲੋੜ ਹੈ, ਤਾਂ ਕਿ ਉਹ ਦੇਸ਼ ਅਤੇ ਸਮਾਜ ਨਾਲ ਧੋਖਾ ਨਾ ਕਰ ਸਕਣ।
–ਵਿਜੇ ਕੁਮਾਰ
ਪੱਛਮੀ ਬੰਗਾਲ ਭਾਜਪਾ ਲਈ ਹੁਣ ਤੱਕ ਦੀ ਸਭ ਤੋਂ ਔਖੀ ਚੋਣ ਪ੍ਰੀਖਿਆ ਕਿਉਂ ਸਾਬਤ ਹੋ ਸਕਦਾ ਹੈ
NEXT STORY 
