ਅੱਜ ਦੀ ਦੁਨੀਆ ਬੇਭਰੋਸਗੀ ਦੇ ਦੌਰ ’ਚੋਂ ਗੁਜ਼ਰ ਰਹੀ ਹੈ। ਯਾਤਰਾ ਕਰਨਾ ਇਕ ਜੋਖ਼ਮ ਬਣ ਗਿਆ ਹੈ। ਸਾਰੀਆਂ ਯੋਜਨਾਵਾਂ ਰੁਕੀਆਂ ਹੋਈਆਂ ਹਨ। ਆਮ ਆਦਮੀ ਨੂੰ ਹਰ ਚੀਜ਼ ਲਈ ਭਾਰੀ ਕੀਮਤ ਚੁਕਾਉਣੀ ਪੈ ਰਹੀ ਹੈ। ਜੰਗ, ਦੇਸ਼ਾਂ ਵਿਚਾਲੇ ਵਧਦਾ ਤਣਾਅ ਅਤੇ ਲਗਾਤਾਰ ਆਉਣ ਵਾਲੀਆਂ ਖ਼ਬਰਾਂ ਨੇ ਕਈ ਸਮਾਜਾਂ ’ਚ ਬੇਚੈਨੀ ਦਾ ਮਾਹੌਲ ਪੈਦਾ ਕਰ ਦਿੱਤਾ ਹੈ। ਇੱਥੋਂ ਤੱਕ ਕਿ ਸੰਘਰਸ਼ ਵਾਲੇ ਖੇਤਰਾਂ ਤੋਂ ਦੂਰ ਰਹਿਣ ਵਾਲੇ ਲੋਕ ਵੀ ਮਹਿਸੂਸ ਕਰਦੇ ਹਨ ਕਿ ਵਿਸ਼ਵ ਪੱਧਰੀ ਵਾਤਾਵਰਣ ਬਦਲ ਗਿਆ ਹੈ। ਜੀਵਨ ਅੱਗੇ ਵਧ ਰਿਹਾ ਹੈ ਪਰ ਕਈ ਮਨਾਂ ’ਚ ਇਕ ਦੱਬੀ ਹੋਈ ਚਿੰਤਾ ਹੈ।
ਅਜਿਹੇ ਹਾਲਾਤ ’ਚ ਲੋਕ ਸਭ ਤੋਂ ਪਹਿਲਾਂ ਜੋ ਚੀਜ਼ ਨੋਟਿਸ ਕਰਦੇ ਹਨ, ਉਹ ਹੈ ਕੀਮਤਾਂ ’ਚ ਵਾਧਾ। ਜਦੋਂ ਦੁਨੀਆ ’ਚ ਕਿਤੇ ਵੀ ਸੰਘਰਸ਼ ਹੁੰਦਾ ਹੈ, ਤਾਂ ਉਸ ਦਾ ਅਸਰ ਈਂਧਨ, ਆਵਾਜਾਈ, ਭੋਜਨ ਅਤੇ ਰੋਜ਼ਾਨਾ ਦੀਆਂ ਵਸਤੂਆਂ ’ਤੇ ਤੁਰੰਤ ਪੈਂਦਾ ਹੈ। ਜੰਗਾਂ ਸਪਲਾਈ ਚੇਨ ਅਤੇ ਵਪਾਰਕ ਮਾਰਗਾਂ ਨੂੰ ਪ੍ਰਭਾਵਿਤ ਕਰਦੀਆਂ ਹਨ। ਈਂਧਨ ਮਹਿੰਗਾ ਹੋ ਜਾਂਦਾ ਹੈ।
ਜਦੋਂ ਈਂਧਨ ਦੀਆਂ ਕੀਮਤਾਂ ਵਧਦੀਆਂ ਹਨ, ਤਾਂ ਲਗਭਗ ਹਰ ਦੂਜੀ ਚੀਜ਼ ਵੀ ਮਹਿੰਗੀ ਹੋ ਜਾਂਦੀ ਹੈ। ਦੁਨੀਆ ਭਰ ਦੇ ਕਈ ਪਰਿਵਾਰ ਇਸ ਬਦਲਾਅ ਨੂੰ ਮਹਿਸੂਸ ਕਰ ਰਹੇ ਹਨ। ਕਰਿਆਨੇ ਦਾ ਸਾਮਾਨ ਮਹਿੰਗਾ ਹੋ ਗਿਆ ਹੈ, ਬਿਜਲੀ ਦੇ ਬਿੱਲ ਵਧ ਰਹੇ ਹਨ ਅਤੇ ਵਿਦੇਸ਼ ਯਾਤਰਾ ਲਈ ਪਹਿਲਾਂ ਦੀ ਤੁਲਨਾ ’ਚ ਵੱਡੇ ਬਜਟ ਦੀ ਲੋੜ ਹੁੰਦੀ ਹੈ। ਅੰਤਰਰਾਸ਼ਟਰੀ ਵਪਾਰ ’ਤੇ ਨਿਰਭਰ ਰਹਿਣ ਵਾਲੇ ਕਾਰੋਬਾਰੀ ਵੀ ਆਪਣੀਆਂ ਯੋਜਨਾਵਾਂ ’ਚ ਬਦਲਾਅ ਕਰ ਰਹੇ ਹਨ ਕਿਉਂਕਿ ਆਵਾਜਾਈ ਅਤੇ ਲੌਜਿਸਟਿਕਸ ਦੀ ਲਾਗਤ ਲਗਾਤਾਰ ਵਧ ਰਹੀ ਹੈ।
ਸੰਘਰਸ਼ ਦੇ ਸਮੇਂ ’ਚ ਹਵਾਈ ਯਾਤਰਾ ਵਿਸ਼ੇਸ਼ ਤੌਰ ’ਤੇ ਮਹਿੰਗੀ ਹੋ ਗਈ ਹੈ। ਏਅਰਲਾਈਨਜ਼ ਕਦੇ-ਕਦੇ ਸੰਵੇਦਨਸ਼ੀਲ ਖੇਤਰਾਂ ਜਾਂ ਹਵਾਈ ਖੇਤਰ ਤੋਂ ਬਚਣ ਲਈ ਆਪਣੇ ਰਸਤੇ ਬਦਲ ਦਿੰਦੀਆਂ ਹਨ। ਲੰਬੇ ਰਸਤਿਆਂ ਦਾ ਮਤਲਬ ਹੈ ਵਧੇਰੇ ਈਂਧਨ ਦੀ ਖਪਤ, ਜਿਸ ਨਾਲ ਟਿਕਟਾਂ ਦੀਆਂ ਕੀਮਤਾਂ ਸਿੱਧੀਆਂ ਵਧ ਜਾਂਦੀਆਂ ਹਨ। ਜਦੋਂ ਦੁਨੀਆ ਅਸਥਿਰ ਮਹਿਸੂਸ ਹੁੰਦੀ ਹੈ, ਤਾਂ ਉਡਾਣਾਂ ਅਤੇ ਕਾਰਗੋ ਲਈ ਬੀਮਾ ਵੀ ਵਧੇਰੇ ਮਹਿੰਗਾ ਹੋ ਸਕਦਾ ਹੈ। ਨਤੀਜੇ ਵਜੋਂ, ਜੋ ਲੋਕ ਕੰਮ ਜਾਂ ਪਰਿਵਾਰਕ ਕਾਰਨਾਂ ਕਰ ਕੇ ਅਕਸਰ ਯਾਤਰਾ ਕਰਦੇ ਹਨ, ਉਹ ਅਕਸਰ ਇਹ ਨੋਟਿਸ ਕਰਦੇ ਹਨ ਕਿ ਉਹੀ ਯਾਤਰਾ ਹੁਣ ਕੁਝ ਸਾਲ ਪਹਿਲਾਂ ਦੀ ਤੁਲਨਾ ’ਚ ਬਹੁਤ ਜ਼ਿਆਦਾ ਮਹਿੰਗੀ ਹੈ। ਨਾਲ ਹੀ, ਯਾਤਰਾ ਹੁਣ ਥੋੜ੍ਹੀ ਵਧੇਰੇ ਅਨਿਸ਼ਚਿਤ ਵੀ ਲੱਗਣ ਲੱਗੀ ਹੈ।
ਮੱਧ ਪੂਰਬ ’ਚ ਹਾਲੀਆ ਤਣਾਅ ਨੇ ਵਿਸ਼ੇਸ਼ ਚਿੰਤਾ ਪੈਦਾ ਕਰ ਦਿੱਤੀ ਹੈ। ਸੰਯੁਕਤ ਅਰਬ ਅਮੀਰਾਤ ਵਰਗੇ ਦੇਸ਼ ਵਪਾਰ, ਸੈਰ-ਸਪਾਟਾ ਅਤੇ ਅੰਤਰਰਾਸ਼ਟਰੀ ਯਾਤਰਾ ਦੇ ਪ੍ਰਮੁੱਖ ਵਿਸ਼ਵ ਪੱਧਰੀ ਕੇਂਦਰ ਬਣ ਗਏ ਹਨ। ਦੁਬਈ ਅਤੇ ਅਾਬੂਧਾਬੀ ਵਰਗੇ ਸ਼ਹਿਰ ਏਸ਼ੀਆ, ਯੂਰਪ ਅਤੇ ਅਫਰੀਕਾ ਦੀਆਂ ਉਡਾਣਾਂ ਨੂੰ ਜੋੜਦੇ ਹਨ। ਹਰ ਮਹੀਨੇ ਲੱਖਾਂ ਯਾਤਰੀ ਇਨ੍ਹਾਂ ਹਵਾਈ ਅੱਡਿਆਂ ਤੋਂ ਗੁਜ਼ਰਦੇ ਹਨ।
ਜਦੋਂ ਵੀ ਖੇਤਰ ’ਚ ਅਸਥਿਰਤਾ ਜਾਂ ਸੰਭਾਵੀ ਸੰਘਰਸ਼ ਦੀ ਚਰਚਾ ਹੁੰਦੀ ਹੈ, ਤਾਂ ਦੁਨੀਆ ਭਰ ਦੇ ਯਾਤਰੀ ਤੁਰੰਤ ਸੁਚੇਤ ਹੋ ਜਾਂਦੇ ਹਨ। ਜੰਗ ਦੀਆਂ ਅਫਵਾਹਾਂ ਵੀ ਉਨ੍ਹਾਂ ਲੋਕਾਂ ਲਈ ਚਿੰਤਾ ਪੈਦਾ ਕਰ ਸਕਦੀਆਂ ਹਨ, ਜਿਨ੍ਹਾਂ ਦੀਆਂ ਕਨੈਕਟਿੰਗ ਉਡਾਣਾਂ ਹਨ ਜਾਂ ਇਸ ਖੇਤਰ ’ਚ ਜਿਨ੍ਹਾਂ ਦੇ ਵਪਾਰਕ ਹਿੱਤ ਹਨ।
ਕਈ ਭਾਰਤੀ ਪਰਿਵਾਰਾਂ ਅਤੇ ਕਾਰੋਬਾਰੀਆਂ ਦੇ ਮੱਧ ਪੂਰਬ ਨਾਲ ਮਜ਼ਬੂਤ ਸਬੰਧ ਹਨ। ਉੱਥੇ ਪੇਸ਼ੇਵਰ ਕੰਮ ਕਰਦੇ ਹਨ, ਕੰਪਨੀਆਂ ਉੱਥੇ ਵਪਾਰ ਕਰਦੀਆਂ ਹਨ ਅਤੇ ਯੂਰਪ ਜਾਂ ਅਮਰੀਕਾ ਜਾਂਦੇ ਸਮੇਂ ਯਾਤਰੀ ਅਕਸਰ ਇਨ੍ਹਾਂ ਹਵਾਈ ਅੱਡਿਆਂ ਤੋਂ ਗੁਜ਼ਰਦੇ ਹਨ। ਇਸ ਕਰੀਬੀ ਸਬੰਧ ਕਾਰਨ, ਉਸ ਖੇਤਰ ਦੇ ਕਿਸੇ ਵੀ ਤਣਾਅ ’ਤੇ ਭਾਰਤ ਵਰਗੇ ਦੇਸ਼ਾਂ ’ਚ ਬਹੁਤ ਬਾਰੀਕੀ ਨਾਲ ਨਜ਼ਰ ਰੱਖੀ ਜਾਂਦੀ ਹੈ।
ਵਪਾਰਕ ਮੀਟਿੰਗਾਂ ਅਜੇ ਵੀ ਹੋ ਰਹੀਆਂ ਹਨ। ਵਿਦਿਆਰਥੀ ਅਜੇ ਵੀ ਪੜ੍ਹਾਈ ਲਈ ਵਿਦੇਸ਼ ਜਾ ਰਹੇ ਹਨ। ਪਰਿਵਾਰ ਦੂਜੇ ਦੇਸ਼ਾਂ ’ਚ ਰਹਿਣ ਵਾਲੇ ਰਿਸ਼ਤੇਦਾਰਾਂ ਨੂੰ ਮਿਲਣਾ ਜਾਰੀ ਰੱਖਦੇ ਹਨ। ਤਣਾਅਪੂਰਨ ਸਮੇਂ ’ਚ ਸੈਰ-ਸਪਾਟਾ ਸੁਸਤ ਹੋ ਸਕਦਾ ਹੈ, ਪਰ ਇਹ ਸ਼ਾਇਦ ਹੀ ਕਦੇ ਪੂਰੀ ਤਰ੍ਹਾਂ ਰੁਕਦਾ ਹੈ। ਮਨੁੱਖੀ ਜੀਵਨ, ਕਾਰੋਬਾਰ ਅਤੇ ਵਿਸ਼ਵ ਪੱਧਰੀ ਸਬੰਧ ਦੁਨੀਆ ਲਈ ਰੁਕਣ ਦੇ ਲਿਹਾਜ਼ ਨਾਲ ਬਹੁਤ ਡੂੰਘੇ ਜੁੜ ਚੁੱਕੇ ਹਨ।
ਅਜਿਹੇ ਸਮੇਂ ’ਚ ਇਕ ਹੋਰ ਵੱਡੀ ਸਮੱਸਿਆ ‘ਫੇਕ ਨਿਊਜ਼’ ਦਾ ਫੈਲਣਾ ਹੈ। ਪਿਛਲੇ ਦਹਾਕਿਆਂ ’ਚ, ਲੋਕ ਜਾਣਕਾਰੀ ਲਈ ਮੁੱਖ ਰੂਪ ’ਚ ਅਖ਼ਬਾਰਾਂ ਅਤੇ ਟੈਲੀਵਿਜ਼ਨ ’ਤੇ ਨਿਰਭਰ ਸਨ। ਅੱਜ, ਸੈਂਕੜੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਰਾਹੀਂ ਖ਼ਬਰਾਂ ਯਾਤਰਾ ਕਰਦੀਆਂ ਹਨ। ਤਣਾਅਪੂਰਨ ਸਥਿਤੀਆਂ ’ਚ, ਅਫਵਾਹਾਂ ਅਤੇ ਝੂਠੀਆਂ ਖ਼ਬਰਾਂ ਬਹੁਤ ਤੇਜ਼ੀ ਨਾਲ ਫੈਲਦੀਆਂ ਹਨ। ਇਕ ਛੋਟੀ ਜਿਹੀ ਸਥਾਨਕ ਘਟਨਾ ਅਚਾਨਕ ਆਨਲਾਈਨ ਇਕ ਵੱਡੇ ਅੰਤਰਰਾਸ਼ਟਰੀ ਸੰਕਟ ਦੇ ਰੂਪ ’ਚ ਦਿਖਾਈ ਦੇ ਸਕਦੀ ਹੈ। ਪੁਰਾਣੇ ਵੀਡੀਓ ਫਿਰ ਤੋਂ ਪ੍ਰਸਾਰਿਤ ਹੋ ਸਕਦੇ ਹਨ, ਜਿਵੇਂ ਕਿ ਉਹ ਅੱਜ ਹੀ ਹੋ ਰਹੇ ਹੋਣ। ਕਦੇ-ਕਦੇ ਲੋਕ ਘਬਰਾਹਟ ਜਾਂ ਭਰਮ ਪੈਦਾ ਕਰਨ ਲਈ ਜਾਣਬੁੱਝ ਕੇ ਗਲਤ ਜਾਣਕਾਰੀ ਫੈਲਾਉਂਦੇ ਹਨ।
ਯਾਤਰੀਆਂ ਅਤੇ ਵਪਾਰਕ ਮਾਲਕਾਂ ਲਈ, ਫੇਕ ਨਿਊਜ਼ ਬੇਲੋੜਾ ਡਰ ਪੈਦਾ ਕਰ ਸਕਦੀ ਹੈ। ਯਾਤਰਾ ਦੀ ਯੋਜਨਾ ਬਣਾ ਰਹੇ ਕਿਸੇ ਵਿਅਕਤੀ ਨੂੰ ਆਪਣੇ ਫ਼ੋਨ ’ਤੇ ਖ਼ਤਰਨਾਕ ਸੁਨੇਹੇ ਮਿਲ ਸਕਦੇ ਹਨ, ਜਿਨ੍ਹਾਂ ’ਚ ਦਾਅਵਾ ਕੀਤਾ ਜਾਂਦਾ ਹੈ ਕਿ ਹਵਾਈ ਅੱਡੇ ਬੰਦ ਹੋ ਰਹੇ ਹਨ ਜਾਂ ਕਿਸੇ ਵਿਸ਼ੇਸ਼ ਖੇਤਰ ’ਚ ਜੰਗ ਸ਼ੁਰੂ ਹੋ ਗਈ ਹੈ। ਅਕਸਰ ਇਹ ਸੁਨੇਹੇ ਪੂਰੀ ਤਰ੍ਹਾਂ ਝੂਠੇ ਨਿਕਲਦੇ ਹਨ।
ਪਰਿਵਾਰ ਯਾਤਰਾ ਕਰ ਰਹੇ ਆਪਣੇ ਰਿਸ਼ਤੇਦਾਰਾਂ ਬਾਰੇ ਚਿੰਤਾ ਕਰਨ ਲੱਗਦੇ ਹਨ। ਵਪਾਰੀ ਯੋਜਨਾ ਬਣਾਉਣ ਤੋਂ ਪਹਿਲਾਂ ਝਿਜਕਦੇ ਹਨ। ਨਿਵੇਸ਼ਕ ਸਾਵਧਾਨ ਹੋ ਜਾਂਦੇ ਹਨ। ਕਦੇ-ਕਦੇ ਪੂਰਾ ਬਾਜ਼ਾਰ ਸੱਚਾਈ ਸਪੱਸ਼ਟ ਹੋਣ ਤੋਂ ਪਹਿਲਾਂ ਹੀ ਅਫਵਾਹਾਂ ’ਤੇ ਪ੍ਰਤੀਕਿਰਿਆ ਦੇ ਦਿੰਦਾ ਹੈ। ਇਹੀ ਕਾਰਨ ਹੈ ਕਿ ਆਧੁਨਿਕ ਸਮੇਂ ’ਚ ਭਰੋਸੇਯੋਗ ਸਰੋਤਾਂ ਦੀ ਜਾਂਚ ਕਰਨਾ ਸਿੱਖਣਾ ਬਹੁਤ ਮਹੱਤਵਪੂਰਨ ਹੋ ਗਿਆ ਹੈ। ਅਧਿਕਾਰਤ ਸਰਕਾਰੀ ਐਲਾਨ, ਭਰੋਸੇਯੋਗ ਖ਼ਬਰ ਸੰਗਠਨ ਅਤੇ ਤਸਦੀਕਸ਼ੁਦਾ ਜਾਣਕਾਰੀ ਹੁਣ ਪਹਿਲਾਂ ਨਾਲੋਂ ਕਿਤੇ ਵੱਧ ਮਹੱਤਵਪੂਰਨ ਹੈ।
ਇਨ੍ਹਾਂ ਸਾਰੀਆਂ ਚੁਣੌਤੀਆਂ ਦੇ ਬਾਵਜੂਦ, ਦੁਨੀਆ ਅੱਗੇ ਵਧਣਾ ਜਾਰੀ ਰੱਖਦੀ ਹੈ। ਹਵਾਈ ਅੱਡਿਆਂ ’ਤੇ ਅਜੇ ਵੀ ਭੀੜ ਰਹਿੰਦੀ ਹੈ। ਅੰਤਰਰਾਸ਼ਟਰੀ ਪ੍ਰਦਰਸ਼ਨੀਆਂ ਅਤੇ ਵਪਾਰਕ ਸੰਮੇਲਨ ਲਗਾਤਾਰ ਆਯੋਜਿਤ ਕੀਤੇ ਜਾ ਰਹੇ ਹਨ। ਕੰਪਨੀਆਂ ਅਜੇ ਵੀ ਨਵੇਂ ਬਾਜ਼ਾਰਾਂ ’ਚ ਵਿਸਥਾਰ ਕਰ ਰਹੀਆਂ ਹਨ। ਵਿਦਿਆਰਥੀ ਅਜੇ ਵੀ ਵਿਦੇਸ਼ੀ ਯੂਨੀਵਰਸਿਟੀਆਂ ’ਚ ਆਪਣੇ ਸੁਪਨਿਆਂ ਦਾ ਪਿੱਛਾ ਕਰ ਰਹੇ ਹਨ। ਅਸਲ ’ਚ, ਮਨੁੱਖੀ ਸੁਭਾਅ ਬਾਰੇ ਇਕ ਦਿਲਚਸਪ ਗੱਲ ਇਹ ਹੈ ਕਿ ਅਨਿਸ਼ਚਿਤ ਕਾਲ ਦੌਰਾਨ ਲੋਕ ਅਕਸਰ ਸਾਧਾਰਨ ਜੀਵਨ ਜਾਰੀ ਰੱਖਣ ਲਈ ਵਧੇਰੇ ਦ੍ਰਿੜ੍ਹ ਹੋ ਜਾਂਦੇ ਹਨ।
ਯਾਤਰਾ ਕਰਨਾ ਅੱਜ ਮਹਿੰਗਾ ਹੋ ਸਕਦਾ ਹੈ ਪਰ ਇਹ ਆਧੁਨਿਕ ਜੀਵਨ ਦਾ ਇਕ ਲਾਜ਼ਮੀ ਹਿੱਸਾ ਵੀ ਬਣ ਗਿਆ ਹੈ। ਕਾਰੋਬਾਰ ਗਲੋਬਲ ਮੀਟਿੰਗਾਂ ’ਤੇ ਨਿਰਭਰ ਹੈ, ਪਰਿਵਾਰ ਮਹਾਦੀਪਾਂ ਵਿਚਾਲੇ ਰਹਿੰਦੇ ਹਨ ਅਤੇ ਸਿੱਖਿਆ ਅਕਸਰ ਵਿਦਿਆਰਥੀਆਂ ਨੂੰ ਘਰ ਤੋਂ ਦੂਰ ਲੈ ਜਾਂਦੀ ਹੈ।
ਟੈਕਨਾਲੋਜੀ ਨੇ ਸੰਚਾਰ ਨੂੰ ਸੌਖਾ ਬਣਾ ਕੇ ਕੁਝ ਜੋਖ਼ਮਾਂ ਨੂੰ ਘੱਟ ਕਰਨ ’ਚ ਮਦਦ ਕੀਤੀ ਹੈ। ਇਕ ਯਾਤਰੀ ਦੁਨੀਆ ’ਚ ਕਿਤੇ ਵੀ ਤੁਰੰਤ ਆਪਣੇ ਪਰਿਵਾਰ ਨਾਲ ਗੱਲ ਕਰ ਸਕਦਾ ਹੈ। ਕਾਰੋਬਾਰ ਰੀਅਲ ਟਾਈਮ ’ਚ ਵਿਸ਼ਵ ਪੱਧਰੀ ਬਾਜ਼ਾਰਾਂ ਦੀ ਨਿਗਰਾਨੀ ਕਰ ਸਕਦੇ ਹਨ। ਜਾਣਕਾਰੀ ਪਹਿਲਾਂ ਦੀ ਤੁਲਨਾ ’ਚ ਵਧੇਰੇ ਤੇਜ਼ੀ ਨਾਲ ਯਾਤਰਾ ਕਰਦੀ ਹੈ। ਨਾਲ ਹੀ, ਆਧੁਨਿਕ ਯਾਤਰੀ ਵਧੇਰੇ ਸੁਚੇਤ ਅਤੇ ਜਾਗਰੂਕ ਹੋ ਗਿਆ ਹੈ। ਲੋਕ ਯਾਤਰਾ ਦੀ ਯੋਜਨਾ ਬਣਾਉਣ ਤੋਂ ਪਹਿਲਾਂ ਯਾਤਰਾ ਬੀਮਾ ਖਰੀਦਦੇ ਹਨ, ਸਰਕਾਰੀ ਸਲਾਹ ਦੀ ਪਾਲਣਾ ਕਰਦੇ ਹਨ ਅਤੇ ਵਿਸ਼ਵ ਪੱਧਰੀ ਘਟਨਾਵਾਂ ਤੋਂ ਅਪਡੇਟ ਰਹਿੰਦੇ ਹਨ।
ਸਾਵਧਾਨੀ ਅਤੇ ਦ੍ਰਿੜ੍ਹ ਸੰਕਲਪ ਵਿਚਾਲੇ ਇਹ ਸੰਤੁਲਨ ਮੌਜੂਦਾ ਪਲ ਨੂੰ ਪਰਿਭਾਸ਼ਿਤ ਕਰਦਾ ਹੈ। ਦੁਨੀਆ ਅਨਿਸ਼ਚਿਤ ਮਹਿਸੂਸ ਕਰ ਸਕਦੀ ਹੈ ਪਰ ਇਸ ਨੇ ਚੱਲਣਾ ਬੰਦ ਨਹੀਂ ਕੀਤਾ। ਲੋਕ ਅਜੇ ਵੀ ਜਹਾਜ਼ਾਂ ’ਤੇ ਸਵਾਰ ਹੁੰਦੇ ਹਨ, ਕਾਰੋਬਾਰ ਸ਼ੁਰੂ ਕਰਦੇ ਹਨ, ਨਵੇਂ ਬਾਜ਼ਾਰਾਂ ’ਚ ਨਿਵੇਸ਼ ਕਰਦੇ ਹਨ ਅਤੇ ਨਵੀਆਂ ਥਾਵਾਂ ਦੀ ਖੋਜ ਕਰਦੇ ਹਨ। ਵਧਦੀ ਲਾਗਤ, ਚਿੰਤਾਜਨਕ ਸੁਰਖੀਆਂ ਅਤੇ ਭਰਮ ਪੈਦਾ ਕਰਨ ਵਾਲੀਆਂ ਅਫਵਾਹਾਂ ਦੇ ਬਾਵਜੂਦ ਜੀਵਨ ਜਾਰੀ ਰਹਿੰਦਾ ਹੈ।
ਇਤਿਹਾਸ ਨੇ ਦਿਖਾਇਆ ਹੈ ਕਿ ਮਨੁੱਖਤਾ ਹਮੇਸ਼ਾ ਅਨਿਸ਼ਚਿਤ ਸਮੇਂ ਤੋਂ ਅੱਗੇ ਵਧੀ ਹੈ। ਜੰਗ ਅਤੇ ਤਣਾਅ ਪਹਿਲਾਂ ਵੀ ਸਾਹਮਣੇ ਆਏ ਹਨ, ਫਿਰ ਵੀ ਕੌਮਾਂਤਰੀ ਸਬੰਧ ਵਧਦੇ ਰਹੇ ਹਨ। ਸ਼ਾਇਦ ਇਸ ਦੌਰ ਦਾ ਸਭ ਤੋਂ ਵੱਡਾ ਸਬਕ ਇਹ ਹੈ ਕਿ ਭਾਵੇਂ ਦੁਨੀਆ ਕਦੇ-ਕਦੇ ਨਾਜ਼ੁਕ ਮਹਿਸੂਸ ਹੋਵੇ ਪਰ ਜੁੜਨ, ਯਾਤਰਾ ਕਰਨ ਅਤੇ ਬਿਹਤਰ ਭਵਿੱਖ ਬਣਾਉਣ ਦੀ ਮਨੁੱਖੀ ਇੱਛਾ ਪ੍ਰਬਲ ਰਹਿੰਦੀ ਹੈ ਅਤੇ ਇਹੀ ਦ੍ਰਿੜ੍ਹ ਸੰਕਲਪ ਦੁਨੀਆ ਨੂੰ ਚਲਾਈ ਰੱਖਦਾ ਹੈ, ਭਾਵੇਂ ਸੁਰਖੀਆਂ ਕੁਝ ਹੋਰ ਹੀ ਇਸ਼ਾਰਾ ਕਰਨ। ਜੰਗ ਰਾਹੀਂ ਪੈਦਾ ਕੀਤੇ ਗਏ ਤਣਾਅ ਨੂੰ ਨਜ਼ਰਅੰਦਾਜ਼ ਕਰਦਿਆਂ ਜੀਵਨ ਅਜੇ ਵੀ ਜਾਰੀ ਹੈ।
—ਦੇਵੀ ਐੱਮ. ਚੇਰੀਅਨ
ਭਾਰਤੀ ਜਨਤਾ ਪਾਰਟੀ ਦਾ ਸਥਾਪਨਾ ਦਿਵਸ : ਇਕ ਅੰਦੋਲਨ ਦੀ ਗਾਥਾ, ਇਕ ਰਾਸ਼ਟਰ ਦਾ ਸੰਕਲਪ
NEXT STORY 
