ਸਿੱਧਰਮਈਆ, ਜੋ ਕਰਨਾਟਕ ਦੇ ਸਭ ਤੋਂ ਲੰਬੇ ਸਮੇਂ ਤੱਕ ਮੁੱਖ ਮੰਤਰੀ ਰਹੇ ਹਨ, ਨੇ ਅਸਤੀਫ਼ਾ ਦੇ ਦਿੱਤਾ ਹੈ ਅਤੇ ਆਪਣੇ ਕੱਟੜ ਵਿਰੋਧੀ ਡੀ. ਕੇ. ਸ਼ਿਵਕੁਮਾਰ ਲਈ ਰਸਤਾ ਸਾਫ਼ ਕਰ ਦਿੱਤਾ ਹੈ। ਹਾਲਾਂਕਿ, ਕਾਂਗਰਸ ਨੂੰ ਇਸਦੇ ਨਤੀਜਿਆਂ ਨੂੰ ਬਹੁਤ ਸਾਵਧਾਨੀ ਨਾਲ ਸੰਭਾਲਣਾ ਪਵੇਗਾ। ਕਾਂਗਰਸ ਹਾਈਕਮਾਂਡ ਨੂੰ ਪਾਰਟੀ ਦੇ ਅੰਦਰ ਸਿੱਧਰਮਈਆ ਦੇ ਵਫ਼ਾਦਾਰਾਂ ਨੂੰ ਵਿਸ਼ਵਾਸ ’ਚ ਲੈਣਾ ਪਵੇਗਾ। ਇਸ ’ਚ ਉਨ੍ਹਾਂ ਨੂੰ ਕੈਬਨਿਟ ’ਚ ਜਗ੍ਹਾ ਦੇਣਾ ਅਤੇ ਸੂਬਾ ਕਾਂਗਰਸ ਇਕਾਈ ’ਚ ਲੀਡਰਸ਼ਿਪ ਦੇ ਅਹੁਦੇ ਪ੍ਰਦਾਨ ਕਰਨਾ ਸ਼ਾਮਲ ਹੋ ਸਕਦਾ ਹੈ। ਸਿੱਧਰਮਈਆ ਇਕ ਜ਼ਮੀਨੀ ਪੱਧਰ ਦੇ ਨੇਤਾ ਹਨ, ਜਿਨ੍ਹਾਂ ਨੂੰ ਮਹੱਤਵਪੂਰਨ ਸਥਾਨਕ ਸਮਰਥਨ ਪ੍ਰਾਪਤ ਹੈ। ਓ. ਬੀ. ਸੀ. ਦੇ ਵਿਚਾਲੇ ਉਨ੍ਹਾਂ ਦੇ ਸਮਰਥਨ ਆਧਾਰ ਨੂੰ ਨਜ਼ਰਅੰਦਾਜ਼ ਕਰਨਾ ਮੁਸ਼ਕਲ ਹੈ।
ਪਿਛਲੇ ਦੋ ਦਹਾਕਿਆਂ ’ਚ, ਕਾਂਗਰਸ ’ਚ ਆਉਣ ਤੋਂ ਬਾਅਦ, ਸਿੱਧਰਮਈਆ ਕਾਂਗਰਸ ਦੇ ‘ਅਹਿੰਦਾ’ ਸਮਾਜਿਕ ਗੱਠਜੋੜ ਦੇ ਨਿਰਮਾਤਾਵਾਂ ’ਚੋਂ ਇਕ ਰਹੇ ਹਨ, ਜਿਸ ਨੇ ਘੱਟਗਿਣਤੀਆਂ, ਪਿਛੜੇ ਵਰਗਾਂ ਅਤੇ ਦਲਿਤਾਂ ਨੂੰ ਇਕਜੁੱਟ ਕੀਤਾ ਅਤੇ ਕਰਨਾਟਕ ’ਚ ਕਾਂਗਰਸ ਦੇ ਚੋਣ ਗਣਿਤ ਨੂੰ ਰੂਪ ਦੇਣ ’ਚ ਸਹਾਇਕ ਰਹੇ ਹਨ।
ਕਾਂਗਰਸ ਹਾਈਕਮਾਂਡ ਨੇ ਉਨ੍ਹਾਂ ਨੂੰ ਰਾਜ ਸਭਾ ਸੀਟ ਦੀ ਪੇਸ਼ਕਸ਼ ਕੀਤੀ ਸੀ ਅਤੇ ਉਨ੍ਹਾਂ ਨੂੰ ਇਕ ਰਾਸ਼ਟਰੀ ਭੂਮਿਕਾ ਦਿੱਤੀ ਸੀ। ਇਹ ਕਦਮ ਇਕ ਤੀਰ ਨਾਲ ਦੋ ਨਿਸ਼ਾਨੇ ਫੁੰਡਣ ਵਰਗਾ ਸੀ। ਪਹਿਲਾ, ਰਾਹੁਲ ਗਾਂਧੀ ਦੀ ਸਮਾਜਿਕ ਨਿਆਂ ਮੁਹਿੰਮ ਨੂੰ ਹੁਲਾਰਾ ਦੇਣ ਲਈ ਸਿੱਧਰਮਈਆ ਵਰਗੇ ਓ. ਬੀ. ਸੀ. ਨੇਤਾ ਨੂੰ ਰਾਸ਼ਟਰੀ ਪੱਧਰ ’ਤੇ ਲਿਆਉਣਾ। ਦੂਜਾ, ਸਿੱਧਰਮਈਆ ਅਤੇ ਸ਼ਿਵਕੁਮਾਰ ਵਿਚਾਲੇ ਟਕਰਾਅ ਨੂੰ ਚਲਾਕੀ ਨਾਲ ਟਾਲਣਾ।
ਪਰ ਸਿੱਧਰਮਈਆ ਨੇ ਇਸ ਪ੍ਰਸਤਾਵ ਨੂੰ ਲੈਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਐਲਾਨ ਕੀਤਾ ਕਿ ਉਹ ਸੂਬੇ ਦੀ ਸਰਗਰਮ ਸਿਆਸਤ ’ਚ ਬਣੇ ਰਹਿਣਗੇ ਅਤੇ ਆਪਣੇ ਆਖਰੀ ਸਾਹ ਤੱਕ ਫਿਰਕੂ ਤਾਕਤਾਂ ਵਿਰੁੱਧ ਲੜਨ ਦੀ ਸਹੁੰ ਖਾਧੀ। 78 ਸਾਲਾ ਸਿੱਧਰਮਈਆ ਹੁਣ ਕਰਨਾਟਕ ਦੇ ਉਨ੍ਹਾਂ ਵਿਸ਼ੇਸ਼ ਨੇਤਾਵਾਂ ਦੇ ਸਮੂਹ ’ਚ ਸ਼ਾਮਲ ਹੋ ਗਏ ਹਨ ਜਿਨ੍ਹਾਂ ਨੇ ਇਕ ਤੋਂ ਵੱਧ ਵਾਰ ਮੁੱਖ ਮੰਤਰੀ ਵਜੋਂ ਸੇਵਾ ਨਿਭਾਈ ਹੈ, ਜਿਨ੍ਹਾਂ ’ਚ ਐੱਸ. ਨਿਜਲਿੰਗੱਪਾ, ਵੀਰੇਂਦਰ ਪਾਟਿਲ, ਡੀ. ਦੇਵਰਾਜ ਉਰਸ, ਰਾਮਕ੍ਰਿਸ਼ਨ ਹੇਗੜੇ, ਐੱਚ. ਡੀ. ਕੁਮਾਰਸਵਾਮੀ ਅਤੇ ਬੀ. ਐੱਸ. ਯੇਦੀਯੁਰੱਪਾ ਸ਼ਾਮਲ ਹਨ। ਨੇੜਲੇ ਭਵਿੱਖ ’ਚ ਭਾਵੇਂ ਕੁਝ ਵੀ ਹੋਵੇ, ਸਿੱਧਰਮਈਆ 2028 ’ਚ ਕਾਂਗਰਸ ਦੀ ਦੁਬਾਰਾ ਚੋਣ ਜਿੱਤਣ ਦੀ ਕੋਸ਼ਿਸ਼ ਦਾ ਇਕ ਮਹੱਤਵਪੂਰਨ ਹਿੱਸਾ ਹੋਣਗੇ।
ਰਾਹੁਲ-ਧਰਮਿੰਦਰ ਪ੍ਰਧਾਨ ਵਿਚਾਲੇ ਜ਼ੁਬਾਨੀ ਜੰਗ : ਸੀ. ਬੀ. ਐੱਸ. ਈ. ਆਨ-ਸਕ੍ਰੀਨ ਮਾਰਕਿੰਗ ਵਿਵਾਦ ਨੂੰ ਲੈ ਕੇ ਰਾਹੁਲ ਗਾਂਧੀ ਅਤੇ ਸਿੱਖਿਆ ਮੰਤਰੀ ਧਰਮਿੰਦਰ ਪ੍ਰਧਾਨ ਵਿਚਾਲੇ ਜ਼ੁਬਾਨੀ ਜੰਗ ਜਾਰੀ ਰਹੀ ਅਤੇ ਇਸ ’ਤੇ ਕੇਂਦਰੀ ਸਿੱਖਿਆ ਮੰਤਰੀ ਧਰਮਿੰਦਰ ਪ੍ਰਧਾਨ ਨੇ ਸੀ. ਬੀ. ਐੱਸ. ਈ. ਪ੍ਰੀਖਿਆ ਅਤੇ ਆਨ-ਸਕ੍ਰੀਨ ਮਾਰਕਿੰਗ ਮੁੱਦੇ ’ਤੇ ਆਪਣੀਆਂ ਟਿੱਪਣੀਆਂ ਨੂੰ ਲੈ ਕੇ ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਨੂੰ ਕਰਾਰਾ ਜਵਾਬ ਦਿੱਤਾ ਹੈ। ਮੰਤਰੀ ਨੇ ਦੋਸ਼ ਲਾਇਆ ਕਿ ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਲਗਾਤਾਰ ਚੋਣ ਹਾਰਾਂ ਕਾਰਨ ਨਿਰਾਸ਼ ਦਿਖਾਈ ਦੇ ਰਹੇ ਹਨ ਅਤੇ ਭਾਰਤ ਦੀ ਵਿਗਿਆਨਕ ਤਰੱਕੀ ਦੇ ਨਾਲ ਖੜ੍ਹੇ ਨਹੀਂ ਹਨ। ਮੰਤਰੀ ਨੇ ਅੱਗੇ ਕਿਹਾ ਕਿ ਸਰਕਾਰ ਇਹ ਯਕੀਨੀ ਬਣਾਉਣ ਲਈ ਵਚਨਬੱਧ ਹੈ ਕਿ ਵਿਦਿਆਰਥੀ ਵਿਵਾਦ ਦੇ ਕਾਰਨ ਵਾਧੂ ਤਣਾਅ ਦਾ ਸਾਹਮਣਾ ਨਾ ਕਰਨ।
ਇਸ ਦੌਰਾਨ, ਲੋਕ ਸਭਾ ’ਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਵੀਰਵਾਰ ਨੂੰ ਸੀ. ਬੀ. ਐੱਸ. ਈ. ਨਤੀਜਿਆਂ ਨੂੰ ਲੈ ਕੇ ਕੇਂਦਰ ਸਰਕਾਰ ’ਤੇ ਦਬਾਅ ਵਧਾਉਂਦੇ ਹੋਏ ਕਿਹਾ ਕਿ ਜੇਕਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਪ੍ਰਵਾਹ ਹੁੰਦੀ, ਤਾਂ ਉਨ੍ਹਾਂ ਨੇ ਲੱਖਾਂ ਵਿਦਿਆਰਥੀਆਂ ਦਾ ਭਵਿੱਖ ਬਰਬਾਦ ਕਰਨ ਲਈ ਸਿੱਖਿਆ ਮੰਤਰੀ ਧਰਮਿੰਦਰ ਪ੍ਰਧਾਨ ਨੂੰ ਬਰਖ਼ਾਸਤ ਕਰ ਦਿੱਤਾ ਹੁੰਦਾ। ਸੀ. ਬੀ. ਐੱਸ. ਈ. ਓ. ਐੱਸ. ਐੱਮ. ਮੁੱਦੇ ’ਤੇ ਆਪਣੇ ਸਵਾਲਾਂ ਨੂੰ ਦੁਹਰਾਉਂਦੇ ਹੋਏ, ਗਾਂਧੀ ਨੇ ਪੁੱਛਿਆ ਕਿ ਸੀ. ਓ. ਈ. ਐੱਮ. ਪੀ. ਟੀ. ਨੂੰ ਠੇਕਾ ਕਿਉਂ ਦਿੱਤਾ ਗਿਆ, ਜਦੋਂ ਕਿ ਇਹ ਕੰਪਨੀ ਪਹਿਲਾਂ ਵੀ ਕਿਸੇ ਹੋਰ ਨਾਂ ਨਾਲ ਵਿਵਾਦਾਂ ’ਚ ਰਹੀ ਸੀ।
ਭਾਜਪਾ ਦੇ ਨਵੇਂ ਸੂਬਾਈ ਪਾਰਟੀ ਮੁਖੀ : ਭਾਜਪਾ ਨੇ ਤਿੰਨ ਰਾਜਾਂ ਦੇ ਨਾਲ-ਨਾਲ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਦਿੱਲੀ ਲਈ ਨਵੇਂ ਸੂਬਾ ਪ੍ਰਧਾਨਾਂ ਦੀ ਨਿਯੁਕਤੀ ਦਾ ਐਲਾਨ ਕੀਤਾ ਹੈ, ਜਿਨ੍ਹਾਂ ’ਚ ਤ੍ਰਿਪੁਰਾ, ਹਰਿਆਣਾ ਅਤੇ ਪੰਜਾਬ ਸ਼ਾਮਲ ਹਨ। ਇਹ ਨਿਯੁਕਤੀਆਂ ਅਜਿਹੇ ਸਮੇਂ ਹੋਈਆਂ ਹਨ ਜਦੋਂ ਭਾਜਪਾ ਵੱਖ-ਵੱਖ ਸਿਆਸੀ ਚੁਣੌਤੀਆਂ ਅਤੇ ਚੋਣ ਸਮੀਕਰਨਾਂ ਵਾਲੇ ਰਾਜਾਂ ’ਚ ਪਾਰਟੀ ਦੇ ਸੂਬਾ ਲੀਡਰਸ਼ਿਪ ਢਾਂਚੇ ਨੂੰ ਮਜ਼ਬੂਤ ਕਰਨ ਅਤੇ ਆਪਣੀ ਸੰਗਠਨਾਤਮਕ ਮਸ਼ੀਨਰੀ ਨੂੰ ਤੇਜ਼ ਕਰਨ ਦੇ ਆਪਣੇ ਯਤਨਾਂ ਨੂੰ ਜਾਰੀ ਰੱਖੇ ਹੋਏ ਹੈ।
ਹਰਸ਼ ਮਲਹੋਤਰਾ ਨੂੰ ਭਾਜਪਾ ਦੀ ਦਿੱਲੀ ਇਕਾਈ ਦਾ ਨਵਾਂ ਪ੍ਰਧਾਨ ਨਿਯੁਕਤ ਕੀਤਾ ਗਿਆ ਹੈ, ਜਦੋਂ ਕਿ ਕੇਵਲ ਸਿੰਘ ਢਿੱਲੋਂ ਪੰਜਾਬ ’ਚ ਪਾਰਟੀ ਦੀ ਅਗਵਾਈ ਕਰਨਗੇ। ਹਰਿਆਣਾ ’ਚ, ਪਾਰਟੀ ਨੇ ਡਾ. ਅਰਚਨਾ ਗੁਪਤਾ ਨੂੰ ਨਵਾਂ ਪ੍ਰਦੇਸ਼ ਪ੍ਰਧਾਨ ਨਿਯੁਕਤ ਕੀਤਾ ਹੈ। ਅਭਿਸ਼ੇਕ ਦੇਬਰੋਏ ਨੂੰ ਭਾਜਪਾ ਦੀ ਤ੍ਰਿਪੁਰਾ ਰਾਜ ਇਕਾਈ ਦਾ ਪ੍ਰਧਾਨ ਨਾਮਜ਼ਦ ਕੀਤਾ ਗਿਆ ਹੈ। ਇਸ ਦੌਰਾਨ, ਦਿੱਲੀ ਭਾਜਪਾ ਲਈ ਇਕ ਮੁੱਖ ਫੋਕਸ ਖੇਤਰ ਬਣੀ ਹੋਈ ਹੈ, ਕਿਉਂਕਿ ਹਾਲੀਆ ਚੋਣ ਮੁਕਾਬਲਿਆਂ ਨੇ ਭਗਵਾ ਪਾਰਟੀ ਅਤੇ ਆਮ ਆਦਮੀ ਪਾਰਟੀ ਵਿਚਾਲੇ ਸਿਆਸੀ ਦੁਸ਼ਮਣੀ ਨੂੰ ਤੇਜ਼ ਕਰ ਦਿੱਤਾ ਹੈ, ਜਦੋਂ ਕਿ ਸਿਆਸੀ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਭਾਜਪਾ ਨੇ ਇਹ ਅਹਿਮ ਫੈਸਲਾ ਪੰਜਾਬ ’ਚ ਇਕ ਸਿੱਖ ਚਿਹਰਾ ਪੇਸ਼ ਕਰਨ ਦੀ ਰਣਨੀਤਕ ਚਾਲ ਦੇ ਹਿੱਸੇ ਵਜੋਂ ਲਿਆ ਹੈ, ਜਿਸ ’ਚ 2027 ਦੀਆਂ ਵਿਧਾਨ ਸਭਾ ਚੋਣਾਂ ’ਤੇ ਜ਼ੋਰ ਦਿੱਤਾ ਗਿਆ ਹੈ।
ਤ੍ਰਿਣਮੂਲ ਕਾਂਗਰਸ ਨੇਤਾਵਾਂ ਦੇ ਅਸਤੀਫੇ : ਪੱਛਮੀ ਬੰਗਾਲ ਵਿਧਾਨ ਸਭਾ ’ਚ ਹਾਲੀਆ ਚੋਣ ਹਾਰ ਨੇ ਤ੍ਰਿਣਮੂਲ ਕਾਂਗਰਸ ’ਚ ਇਕ ‘ਡੋਮਿਨੋ ਪ੍ਰਭਾਵ’ ਪੈਦਾ ਕਰ ਦਿੱਤਾ ਹੈ, ਜਿਸਦੇ ਨਤੀਜੇ ਵਜੋਂ ਨਵੇਂ ਅਸਤੀਫ਼ੇ ਹੋਏ ਹਨ। ਹਾਲੀਆ ਹਾਈ-ਪ੍ਰੋਫਾਈਲ ਅਸਤੀਫ਼ਾ ਸਾਬਕਾ ਰਾਜ ਸਭਾ ਮੈਂਬਰ ਸ਼ਾਂਤਨੂ ਸੇਨ ਦਾ ਹੈ, ਜਿਨ੍ਹਾਂ ਨੇ ਟੀ. ਐੱਮ. ਸੀ. ਦੇ ਰਾਸ਼ਟਰੀ ਬੁਲਾਰੇ ਦੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ।
ਕਈ ਹੋਰ ਟੀ. ਐੱਮ. ਸੀ. ਨੇਤਾਵਾਂ ਨੇ ਵੀ ਪ੍ਰਮੁੱਖ ਸੰਗਠਨਾਤਮਕ ਅਹੁਦਿਆਂ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਲੋਕ ਸਭਾ ਮੈਂਬਰ ਕਾਕੋਲੀ ਘੋਸ਼ ਦਸਤੀਦਾਰ ਨੇ ਆਪਣੇ ਸੰਗਠਨਾਤਮਕ ਅਹੁਦਿਆਂ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ, ਜਦੋਂ ਕਿ ਟੀ. ਐੱਮ. ਸੀ. ਕੌਂਸਲਰ ਅਰੂਪ ਚੱਕਰਵਰਤੀ ਨੇ ਪਾਰਟੀ ਬੁਲਾਰੇ ਦਾ ਅਹੁਦਾ ਛੱਡ ਦਿੱਤਾ ਅਤੇ ਕੋਲਕਾਤਾ ਨਗਰ ਨਿਗਮ ਦੀ ਲੋਕ ਲੇਖਾ ਕਮੇਟੀ ’ਚ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ।
ਰਾਹਿਲ ਨੌਰਾ ਚੋਪੜਾ
ਹਿੰਦੀ ਪੱਤਰਕਾਰੀ : ਨਾ ਕਾਹੂ ਸੇ ਦੋਸਤੀ, ਨਾ ਕਾਹੂ ਸੇ ਬੈਰ
NEXT STORY 
