ਮਹਾਰਾਸ਼ਟਰ ਦੀਆਂ 7 ਰਾਜ ਸਭਾ ਸੀਟਾਂ ਲਈ 16 ਮਾਰਚ ਨੂੰ ਹੋਣ ਵਾਲੀਆਂ ਚੋਣਾਂ ’ਚ ਸੱਤਾਧਾਰੀ ਮਹਾਯੁਤੀ ਗੱਠਜੋੜ 6 ਸੀਟਾਂ ਆਸਾਨੀ ਨਾਲ ਜਿੱਤਣ ਦੀ ਸਥਿਤੀ ’ਚ ਹੈ, ਪਰ ਵਿਰੋਧੀ ਮਹਾਵਿਕਾਸ ਅਘਾੜੀ (ਐੱਮ. ਵੀ. ਏ.) ਦੀ ਸਥਿਤੀ ਵਧੇਰੇ ਨਾਜ਼ੁਕ ਹੈ। 46 ਵਿਧਾਇਕਾਂ ਦੀ ਸਾਂਝੀ ਤਾਕਤ ਦੇ ਨਾਲ, ਇਸ ਗੁੱਟ ਕੋਲ ਇਕ ਸੀਟ ਸੁਰੱਖਿਅਤ ਕਰਨ ਲਈ ਲੋੜੀਂਦੀਆਂ ਵੋਟਾਂ ਹਨ, ਪਰ ਅੰਦਰੂਨੀ ਮੁਕਾਬਲੇਬਾਜ਼ੀ ਇਸ ਆਸਾਨ ਜਿੱਤ ਨੂੰ ਗੁੰਝਲਦਾਰ ਬਣਾਉਣ ਦੀ ਚੁਣੌਤੀ ਦੇ ਰਹੀ ਹੈ।
ਕਾਂਗਰਸ ਅਤੇ ਊਧਵ ਠਾਕਰੇ ਦੀ ਅਗਵਾਈ ਵਾਲੀ ਸ਼ਿਵ ਸੈਨਾ ਦੋਵਾਂ ਨੇ ਇਸ ਰਾਜ ਸਭਾ ਸੀਟ ’ਤੇ ਆਪਣਾ ਦਾਅਵਾ ਠੋਕਿਆ ਹੈ। ਉੱਥੇ ਹੀ, ਸ਼ਰਦ ਪਵਾਰ ਦੀ ਅਗਵਾਈ ਵਾਲੀ ਨੈਸ਼ਨਲਿਸਟ ਕਾਂਗਰਸ ਪਾਰਟੀ (ਐੱਨ. ਸੀ. ਪੀ.) ਨੇ ਵੀ ਉਸ ਇਕਲੌਤੀ ਸੀਟ ਲਈ ਆਪਣੀ ਦਾਅਵੇਦਾਰੀ ਪੇਸ਼ ਕੀਤੀ ਹੈ ਜਿਸ ਲਈ ਗੱਠਜੋੜ ਕੋਲ ਲੋੜੀਂਦੀ ਗਿਣਤੀ ਹੈ। ਹਾਲਾਂਕਿ, ਬਾਰਾਮਤੀ ਤੋਂ ਲੋਕ ਸਭਾ ਮੈਂਬਰ ਸੁਪ੍ਰਿਆ ਸੁਲੇ ਨੇ ਕਿਹਾ ਹੈ ਕਿ ਇਹ ਪਾਰਟੀ ਅਤੇ ਵਰਕਰਾਂ ਦੀ ਇੱਛਾ ਹੈ ਕਿ ਉਹ ਪਵਾਰ ਸਾਹਿਬ ਨੂੰ ਰਾਜ ਸਭਾ ’ਚ ਦੇਖਣ। ਹੁਣ ਸਭ ਦੀਆਂ ਨਜ਼ਰਾਂ ਐੱਮ. ਵੀ. ਏ. ਦੇ ਮੁੱਖ ਸੂਤਰਧਾਰ ਸ਼ਰਦ ਪਵਾਰ ’ਤੇ ਟਿਕੀਆਂ ਹੋਈਆਂ ਹਨ।
ਅਟਕਲਾਂ ਤੇਜ਼ ਹਨ ਕਿ ਸ਼ਿੰਦੇ ਦੀ ਸ਼ਿਵ ਸੈਨਾ, ਸ਼ਿਵ ਸੈਨਾ (ਯੂ. ਬੀ. ਟੀ.) ਨੂੰ ਰਣਨੀਤਿਕ ਤੌਰ ’ਤੇ ਨਿਸ਼ਾਨਾ ਬਣਾਉਣ ਲਈ ਇਕ ਵਾਧੂ ਉਮੀਦਵਾਰ ਮੈਦਾਨ ’ਚ ਉਤਾਰ ਸਕਦੀ ਹੈ।
ਜੇਕਰ ਐੱਮ. ਵੀ. ਏ. ਇਕ ਸਾਂਝੇ ਉਮੀਦਵਾਰ ਦੇ ਪਿੱਛੇ ਇਕਜੁੱਟ ਮੋਰਚਾ ਪੇਸ਼ ਕਰਨ ’ਚ ਅਸਫਲ ਰਹਿੰਦਾ ਹੈ, ਤਾਂ ਸੱਤਾਧਾਰੀ ਗੱਠਜੋੜ ‘ਕ੍ਰਾਸ-ਵੋਟਿੰਗ’ ਕਰਾਉਣ ਦੀ ਕੋਸ਼ਿਸ਼ ਕਰ ਸਕਦਾ ਹੈ, ਜਿਸ ਨਾਲ ਅਾਪੋਜ਼ੀਸ਼ਨ ਦੀ ਇਕੋ-ਇਕ ਜਿੱਤਣ ਯੋਗ ਸੀਟ ਵੀ ਖੋਹੀ ਜਾ ਸਕਦੀ ਹੈ। ਐੱਮ. ਵੀ. ਏ. ਲਈ ਚੁਣੌਤੀ ਹੁਣ ਸਿਰਫ ਅੰਕੜਿਆਂ ਦੀ ਨਹੀਂ, ਸਗੋਂ ਇਕਜੁੱਟਤਾ ਦੀ ਹੈ। ਉੱਥੇ ਹੀ ਮਹਾਯੁਤੀ ਲਈ, ਇਹ ਆਪਣੇ ਦਬਦਬੇ ਨੂੰ ‘ਕਲੀਨ ਸਵੀਪ’ ’ਚ ਬਦਲਣ ਦਾ ਮਾਮਲਾ ਹੈ।
ਉੱਤਰ ਪ੍ਰਦੇਸ਼ : ‘ਪੀ. ਡੀ. ਏ.’ ਬਨਾਮ ਮਾਇਆਵਤੀ ਦੀ ਚਿਤਾਵਨੀ
2027 ’ਚ ਹੋਣ ਵਾਲੀਆਂ ਉੱਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਸਪਾ, ਬਸਪਾ ਅਤੇ ਭਾਜਪਾ ਨੇ ਆਪਣੀਆਂ ਤਿਆਰੀਆਂ ਕਾਫ਼ੀ ਪਹਿਲਾਂ ਤੋਂ ਤੇਜ਼ ਕਰ ਦਿੱਤੀਆਂ ਹਨ। ਸਮਾਜਵਾਦੀ ਪਾਰਟੀ ਦੇ ਪ੍ਰਧਾਨ ਅਖਿਲੇਸ਼ ਯਾਦਵ ਨੇ ਪਿਛੜਿਆਂ, ਦਲਿਤਾਂ ਅਤੇ ਘੱਟਗਿਣਤੀਆਂ ਨੂੰ ਇਕਜੁੱਟ ਕਰਨ ਲਈ ‘ਪੀ. ਡੀ. ਏ.’ (ਪਿਛੜਾ, ਦਲਿਤ, ਘੱਟਗਿਣਤੀ) ਦਾ ਨਾਅਰਾ ਦਿੱਤਾ ਹੈ।
ਉਨ੍ਹਾਂ ਨੇ ਆਪਣੀ ਪਾਰਟੀ ਦੇ ਨੇਤਾਵਾਂ ਨੂੰ 15 ਮਾਰਚ ਨੂੰ ਕਾਂਸ਼ੀ ਰਾਮ ਦੀ ਜਯੰਤੀ ਨੂੰ ਪੂਰੇ ਉੱਤਰ ਪ੍ਰਦੇਸ਼ ਦੇ ਸਾਰੇ ਜ਼ਿਲਾ ਹੈੱਡਕੁਆਰਟਰਾਂ ’ਤੇ ‘ਬਹੁਜਨ ਸਮਾਜ ਦਿਵਸ ਜਾਂ ਪੀ. ਡੀ. ਏ. ਦਿਵਸ’ ਵਜੋਂ ਮਨਾਉਣ ਦਾ ਨਿਰਦੇਸ਼ ਦਿੱਤਾ ਹੈ। ਹੁਣ ਬਹੁਜਨ ਸਮਾਜ ਪਾਰਟੀ (ਬਸਪਾ) ਸੁਪਰੀਮੋ ਮਾਇਆਵਤੀ ਨੇ ਕਾਂਸ਼ੀ ਰਾਮ ਜਯੰਤੀ ਨੂੰ ‘ਪੀ. ਡੀ. ਏ. ਦਿਵਸ’ ਵਜੋਂ ਮਨਾਉਣ ਦੇ ਐਲਾਨ ’ਤੇ ਸਮਾਜਵਾਦੀ ਪਾਰਟੀ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਕਦਮ ਪੂਰੀ ਤਰ੍ਹਾਂ ਇਕ ‘ਸਿਆਸੀ ਡਰਾਮਾ’ ਹੈ ਅਤੇ ਉਨ੍ਹਾਂ ਨੇ ਪਾਰਟੀ ’ਤੇ ਵੋਟਾਂ ਲਈ ਦਲਿਤਾਂ, ਪਿਛੜਿਆਂ ਅਤੇ ਘੱਟਗਿਣਤੀਆਂ ਨੂੰ ਗੁੰਮਰਾਹ ਕਰਨ ਦਾ ਦੋਸ਼ ਲਾਇਆ।
ਮਾਇਆਵਤੀ ਨੇ ਬਸਪਾ ਸਮਰਥਕਾਂ ਨੂੰ ਚੌਕਸ ਰਹਿਣ ਦੀ ਚਿਤਾਵਨੀ ਦਿੱਤੀ ਅਤੇ ਕਿਹਾ ਕਿ ਸਪਾ ਦੇ ਕੰਮਾਂ ਨੇ ਇਤਿਹਾਸਕ ਤੌਰ ’ਤੇ ਬਹੁਜਨ ਸਮਾਜ ਦੇ ਹਿੱਤਾਂ ਨੂੰ ਨੁਕਸਾਨ ਪਹੁੰਚਾਇਆ ਹੈ ਅਤੇ ਸਪਾ ਸਰਕਾਰਾਂ ਦੌਰਾਨ ਦਲਿਤਾਂ ਅਤੇ ਅਤਿ-ਪਿਛੜੇ ਭਾਈਚਾਰਿਆਂ ’ਤੇ ਸਭ ਤੋਂ ਵੱਧ ਅੱਤਿਆਚਾਰ ਹੋਏ।
ਬਿਹਾਰ : ਰਾਜ ਸਭਾ ਲਈ ਗਣਿਤ ਅਤੇ ਗੱਠਜੋੜ ਦੀ ਰਣਨੀਤੀ
ਵਿਰੋਧੀ ਧਿਰ ਦੇ ਨੇਤਾ ਤੇਜਸਵੀ ਯਾਦਵ ਲਗਾਤਾਰ ਰਾਜ ਸਭਾ ਚੋਣਾਂ ਲਈ ਇਕ ਸਾਂਝਾ ਉਮੀਦਵਾਰ ਉਤਾਰਨ ਦੀ ਰਣਨੀਤੀ ’ਤੇ ਕੰਮ ਕਰ ਰਹੇ ਹਨ ਅਤੇ ਗੱਠਜੋੜ ’ਚ ਏਕਤਾ ਯਕੀਨੀ ਬਣਾਉਣ ਲਈ ਗੱਠਜੋੜ ਸਹਿਯੋਗੀਆਂ ਨਾਲ ਤਾਲਮੇਲ ਬਿਠਾ ਰਹੇ ਹਨ। ਉਹ ਸਾਂਝੇ ਉਮੀਦਵਾਰ ਲਈ ਲੋੜੀਂਦਾ ਸਮਰਥਨ ਯਕੀਨੀ ਬਣਾਉਣ ਅਤੇ ਆਮ ਸਹਿਮਤੀ ਬਣਾਉਣ ਲਈ ਮਹਾਗੱਠਜੋੜ ਦੀ ਗਿਣਤੀ ਦਾ ਵੀ ਮੁਲਾਂਕਣ ਕਰ ਰਹੇ ਹਨ।
ਇਸ ਦੌਰਾਨ, ਅਪ੍ਰੈਲ ’ਚ ਬਿਹਾਰ ਤੋਂ ਖਾਲੀ ਹੋ ਰਹੀਆਂ 5 ਸੀਟਾਂ ’ਚੋਂ 4 ’ਤੇ ਐੱਨ. ਡੀ. ਏ. ਦਾ ਕਬਜ਼ਾ ਹੋਣਾ ਤੈਅ ਮੰਨਿਆ ਜਾ ਰਿਹਾ ਹੈ, ਕਿਉਂਕਿ ਵਿਧਾਨ ਸਭਾ ’ਚ ਜਦ-ਯੂ ਦੀ ਅਗਵਾਈ ਵਾਲੇ ਗੱਠਜੋੜ ਦੀ ਤਾਕਤ ਮਜ਼ਬੂਤ ਹੈ। ਰਾਜ ਸਭਾ ਦੀ ਇਕ ਸੀਟ ਜਿੱਤਣ ਲਈ 243 ਮੈਂਬਰੀ ਬਿਹਾਰ ਵਿਧਾਨ ਸਭਾ ’ਚ ਘੱਟੋ-ਘੱਟ 41 ਵਿਧਾਇਕਾਂ ਦੇ ਸਮਰਥਨ ਦੀ ਲੋੜ ਹੁੰਦੀ ਹੈ। 202 ਸੀਟਾਂ ਦੇ ਨਾਲ, ਐੱਨ. ਡੀ. ਏ. ਆਸਾਨੀ ਨਾਲ 4 ਸੀਟਾਂ ਜਿੱਤ ਸਕਦਾ ਹੈ, ਜਿਸ ’ਚ ਜਦ-ਯੂ ਅਤੇ ਭਾਜਪਾ 2-2 ਸੀਟਾਂ ’ਤੇ ਦਾਅਵਾ ਕਰ ਰਹੇ ਹਨ। ਇਹ 4 ਸੀਟਾਂ ਜਿੱਤਣ ਤੋਂ ਬਾਅਦ ਵੀ ਐੱਨ. ਡੀ. ਏ. ਕੋਲ 38 ਵਾਧੂ ਵੋਟਾਂ ਬਚਣਗੀਆਂ, ਜੋ 41 ਦੇ ਅੰਕੜੇ ਤੋਂ ਸਿਰਫ਼ ਤਿੰਨ ਘੱਟ ਹਨ।
ਮਹਾਗੱਠਜੋੜ, ਜਿਸ ਨੂੰ ਨਵੰਬਰ 2025 ਦੀਆਂ ਬਿਹਾਰ ਵਿਧਾਨ ਸਭਾ ਚੋਣਾਂ ’ਚ ਕਰਾਰੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ, ਕੋਲ ਸਿਰਫ 35 ਮੈਂਬਰ ਹਨ, ਜਿਨ੍ਹਾਂ ’ਚ ਆਰ. ਜੇ. ਡੀ. ਦੇ 25 ਵਿਧਾਇਕ ਸ਼ਾਮਲ ਹਨ। ਇਹ ਲੋੜੀਂਦੀ 41 ਦੀ ਗਿਣਤੀ ਤੋਂ 6 ਘੱਟ ਹੈ।
ਏ. ਆਈ. ਐੱਮ. ਆਈ. ਐੱਮ. ਨੇ ਪਿਛਲੇ ਨਵੰਬਰ ’ਚ ਬਿਹਾਰ ’ਚ 5 ਸੀਟਾਂ ਜਿੱਤੀਆਂ ਸਨ, ਜਿਨ੍ਹਾਂ ’ਚੋਂ ਜ਼ਿਆਦਾਤਰ ਬੰਗਾਲ ਅਤੇ ਨੇਪਾਲ ਦੀ ਸਰਹੱਦ ਨਾਲ ਲੱਗੇ ਪੂਰਬੀ ਹਿੱਸੇ ਦੇ ਮੁਸਲਿਮ ਬਹੁਗਿਣਤੀ ਸੀਮਾਂਚਲ ਖੇਤਰ ’ਚ ਸਨ। ਏ. ਆਈ. ਐੱਮ. ਆਈ. ਐੱਮ. ਦੇ ਪੰਜ ਵਿਧਾਇਕਾਂ ਤੋਂ ਇਲਾਵਾ, ਤੇਜਸਵੀ ਇਕੋ-ਇਕ ਬਸਪਾ ਵਿਧਾਇਕ ’ਤੇ ਵੀ ਧਿਆਨ ਕੇਂਦਰਿਤ ਕਰ ਰਹੇ ਹਨ ਅਤੇ ਕਥਿਤ ਤੌਰ ’ਤੇ ਮਾਇਆਵਤੀ ਤੋਂ ਮਹਾਗੱਠਜੋੜ ਦੇ ਉਮੀਦਵਾਰ ਲਈ ਸਮਰਥਨ ਮੰਗਣ ਲਈ ਇਕ ਦੂਤ ਭੇਜਿਆ ਹੈ।
ਕਰਨਾਟਕ : ਕਾਂਗਰਸ ’ਚ ਲੀਡਰਸ਼ਿਪ ਦਾ ਸੰਘਰਸ਼
ਕਰਨਾਟਕ ’ਚ ਸੱਤਾਧਾਰੀ ਕਾਂਗਰਸ ’ਚ ਸੱਤਾ ਦਾ ਸੰਘਰਸ਼ ਸ਼ਾਂਤ ਹੋਣ ਦਾ ਨਾਂ ਨਹੀਂ ਲੈ ਰਿਹਾ। ਉਪ-ਮੁੱਖ ਮੰਤਰੀ ਡੀ. ਕੇ. ਸ਼ਿਵਕੁਮਾਰ ਦੇ 40 ਸਮਰਥਕ ਵਿਧਾਇਕ ਆਪਣੇ ਨੇਤਾ ਨੂੰ ਸੂਬੇ ਦੇ ਸਰਵਉੱਚ ਅਹੁਦੇ (ਮੁੱਖ ਮੰਤਰੀ) ’ਤੇ ਬਿਠਾਉਣ ਦੀ ਰਣਨੀਤੀ ’ਤੇ ਚਰਚਾ ਕਰਨ ਲਈ ਇਕ ਹੋਟਲ ’ਚ ਇਕੱਠੇ ਹੋਏ। ਮਗਦੀ ਤੋਂ ਸ਼ਿਵਕੁਮਾਰ ਦੇ ਵਫ਼ਾਦਾਰ ਵਿਧਾਇਕ ਐੱਚ. ਸੀ. ਬਾਲਕ੍ਰਿਸ਼ਨ ਨੇ ਇਸ ਬੈਠਕ ਦਾ ਆਯੋਜਨ ਕੀਤਾ ਸੀ, ਜਿੱਥੇ ਸੱਤਾ ਦੀ ਵੰਡ ਨੂੰ ਲੈ ਕੇ ਜਾਰੀ ਉਲਝਣ ਨੂੰ ਖ਼ਤਮ ਕਰਨ ’ਤੇ ਚਰਚਾ ਹੋਈ। ਬੈਠਕ ’ਚ ਬਾਲਕ੍ਰਿਸ਼ਨ ਨੇ ਇਸ ਗੱਲ ’ਤੇ ਜ਼ੋਰ ਦਿੱਤਾ ਕਿ ਪਾਰਟੀ ਹਾਈਕਮਾਂਡ ਨੂੰ ਜਲਦੀ ਫੈਸਲਾ ਲੈਣ ਦੀ ਲੋੜ ਹੈ।
ਇਸ ਦੌਰਾਨ, ਕਾਂਗਰਸ ਹਾਈਕਮਾਂਡ ਨੇ ਕੇਰਲ, ਤਾਮਿਲਨਾਡੂ, ਪੱਛਮੀ ਬੰਗਾਲ, ਅਾਸਾਮ ਅਤੇ ਪੁਡੂਚੇਰੀ ’ਚ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਪੂਰੀਆਂ ਹੋਣ ਤੱਕ ‘ਇੰਤਜ਼ਾਰ ਕਰੋ ਅਤੇ ਦੇਖੋ’ ਦਾ ਸੰਕੇਤ ਦਿੱਤਾ ਹੈ। ਸਿੱਧਰਮਈਆ ਅਤੇ ਸ਼ਿਵਕੁਮਾਰ ਦੇ ਵਿਚਾਲੇ ਟਕਰਾਅ ਪਿਛਲੇ ਸਾਲ ਨਵੰਬਰ ਅਤੇ ਦਸੰਬਰ ’ਚ ਸਿਖਰ ’ਤੇ ਪਹੁੰਚ ਗਿਆ ਸੀ, ਜਿਸ ਨਾਲ ਕਾਂਗਰਸ ਦੀ ਕੇਂਦਰੀ ਲੀਡਰਸ਼ਿਪ ਨੂੰ ਦਖਲ ਦੇਣਾ ਪਿਆ ਅਤੇ ਦੋਵਾਂ ਨੂੰ ਉਦੋਂ ਤੱਕ ਸ਼ਾਂਤ ਰਹਿਣ ਦਾ ਹੁਕਮ ਦਿੱਤਾ ਗਿਆ ਜਦੋਂ ਤੱਕ ਕਿ ਕੋਈ ਸਮਝੌਤਾ ਨਾ ਹੋ ਜਾਵੇ।
ਐੱਨ. ਸੀ. ਪੀ. (ਅਜੀਤ ਪਵਾਰ ਗੁੱਟ) : ਸੁਨੇਤਰਾ ਪਵਾਰ ਦੀ ਨਵੀਂ ਜ਼ਿੰਮੇਵਾਰੀ
ਉਪ-ਮੁੱਖ ਮੰਤਰੀ ਸੁਨੇਤਰਾ ਪਵਾਰ ਨੂੰ ਸਰਬਸੰਮਤੀ ਨਾਲ ਅਜੀਤ ਪਵਾਰ ਦੀ ਅਗਵਾਈ ਵਾਲੀ ਐੱਨ. ਸੀ. ਪੀ. ਦਾ ਰਾਸ਼ਟਰੀ ਪ੍ਰਧਾਨ ਚੁਣਿਆ ਗਿਆ ਹੈ, ਜਦਕਿ ਉਨ੍ਹਾਂ ਦੇ ਵੱਡੇ ਬੇਟੇ ਪਾਰਥ ਪਵਾਰ ਨੂੰ ਜਲਦੀ ਹੀ ਪਾਰਟੀ ਦਾ ਰਾਸ਼ਟਰੀ ਜਨਰਲ ਸਕੱਤਰ ਨਾਮਜ਼ਦ ਕੀਤਾ ਜਾ ਸਕਦਾ ਹੈ।
ਇਹ ਐਲਾਨ ਸੀਨੀਅਰ ਐੱਨ. ਸੀ. ਪੀ. ਨੇਤਾ ਪ੍ਰਫੁੱਲ ਪਟੇਲ ਵੱਲੋਂ ਕੀਤਾ ਗਿਆ, ਜਿਨ੍ਹਾਂ ਨੂੰ ਪਾਰਟੀ ਦਾ ਕਾਰਜਕਾਰੀ ਰਾਸ਼ਟਰੀ ਪ੍ਰਧਾਨ ਨਿਯੁਕਤ ਕੀਤਾ ਗਿਆ ਸੀ ਅਤੇ ਉਨ੍ਹਾਂ ਨੇ ਹੀ ਸੁਨੇਤਰਾ ਪਵਾਰ ਦੇ ਨਾਂ ਦਾ ਪ੍ਰਸਤਾਵ ਰੱਖਿਆ ਸੀ।
ਸਿਆਸੀ ਗਲਿਆਰਿਆਂ ’ਚ ਚਰਚਾ ਹੈ ਕਿ ਸੁਨੇਤਰਾ ਪਵਾਰ ਅਤੇ ਉਨ੍ਹਾਂ ਦੇ ਬੇਟੇ ਪਾਰਥ ਪਵਾਰ ਦੀਆਂ ਨਿਯੁਕਤੀਆਂ ਇਸ ਤਰ੍ਹਾਂ ਕੀਤੀਆਂ ਗਈਆਂ ਹਨ ਤਾਂ ਜੋ ਭਵਿੱਖ ’ਚ ਦੋਵੇਂ ਐੱਨ. ਸੀ. ਪੀ. ਗੁੱਟਾਂ ਦੇ ਰਲੇਵੇਂ ਦੀ ਕੋਈ ਸੰਭਾਵਨਾ ਨਾ ਰਹੇ। ਸੁਨੇਤਰਾ ਬਾਰਾਮਤੀ ਤੋਂ ਉਪ-ਚੋਣ ਲੜਨਗੇ। ਇਸ ਸੀਟ ਦੀ ਅਜੀਤ ਪਵਾਰ ਨੇ 8 ਵਾਰ ਨੁਮਾਇੰਦਗੀ ਕੀਤੀ ਸੀ।
—ਰਾਹਿਲ ਨੋਰਾ ਚੋਪੜਾ
ਭਾਰਤ 'ਚ ਵਿਕਸਿਤ ਟੈਕਨਾਲੋਜੀ ਦੀ ਪਹਿਲਾਂ ਵਿਦੇਸ਼ਾਂ ਨੂੰ ਵਿਕਰੀ ਨਾ ਕੀਤੀ ਜਾਵੇ
NEXT STORY 
