ਦੇਸ਼ ’ਚ ਇਨ੍ਹੀਂ ਦਿਨੀਂ ਲੋਕਾਂ ਵੱਲੋਂ ਬਿਜਲੀ ਜਾਂ ਮੋਬਾਈਲ ਫ਼ੋਨਾਂ ਦੇ ਟਾਵਰਾਂ ਅਤੇ ਪਾਣੀ ਦੀਆਂ ਉੱਚੀਆਂ ਟੈਂਕੀਆਂ ਆਦਿ ’ਤੇ ਚੜ੍ਹ ਕੇ ਆਪਣੀਆਂ ਉਚਿਤ-ਅਣਉਚਿਤ ਮੰਗਾਂ ਮਨਵਾਉਣ ਦਾ ਰੁਝਾਨ ਵਧ ਰਿਹਾ ਹੈ। ਉਨ੍ਹਾਂ ਦੀਆਂ ਇਨ੍ਹਾਂ ਹਰਕਤਾਂ ਨਾਲ ਪ੍ਰਸ਼ਾਸਨ ਲਈ ਸਮੱਸਿਆ ਪੈਦਾ ਹੋ ਜਾਂਦੀ ਹੈ ਅਤੇ ਅਜਿਹਾ ਕਰਨ ਵਾਲਿਆਂ ਨੂੰ ਕਿਸੇ ਤਰ੍ਹਾਂ ਰਾਜ਼ੀ ਕਰ ਕੇ ਹੇਠਾਂ ਉਤਾਰਨਾ ਪੈਂਦਾ ਹੈ, ਜਿਨ੍ਹਾਂ ਦੀਆਂ ਪਿਛਲੇ ਲਗਭਗ ਢਾਈ ਮਹੀਨਿਆਂ ਦੀਆਂ ਘਟਨਾਵਾਂ ਹੇਠਾਂ ਦਰਜ ਹਨ :
* 13 ਜੁਲਾਈ ਨੂੰ ‘ਪਟਨਾ’ (ਬਿਹਾਰ) ਦੇ ‘ਨੌਬਤਪੁਰ’ ’ਚ ਇਕ ਨਾਬਾਲਗਾ ਆਪਣੇ ਪ੍ਰੇਮੀ ਨਾਲ ਵਿਆਹ ਦੀ ਮੰਗ ਨੂੰ ਲੈ ਕੇ ਮੋਬਾਈਲ ਟਾਵਰ ’ਤੇ ਚੜ੍ਹ ਗਈ, ਜਿਸ ਤੋਂ ਬਾਅਦ ਘੰਟਿਆਂ ਤੱਕ ਹੰਗਾਮਾ ਹੁੰਦਾ ਰਿਹਾ ਅਤੇ ਬੜੀ ਮੁਸ਼ਕਲ ਨਾਲ ਉਹ ਹੇਠਾਂ ਉੱਤਰਨ ਲਈ ਮੰਨੀ।
* 18 ਜੁਲਾਈ ਨੂੰ ‘ਸ਼ਿਓਪੁਰ’ (ਮੱਧ ਪ੍ਰਦੇਸ਼) ਦੇ ‘ਵਿਜੈਪੁਰ ਕਸਬੇ’ ’ਚ ਆਪਣੀ ਪਤਨੀ ਦੇ ਰੁੱਸ ਕੇ ਪੇਕੇ ਚਲੇ ਜਾਣ ਅਤੇ ਪੁਲਸ ਵੱਲੋਂ ਉਸ ਦੀ ਕੋਈ ਸੁਣਵਾਈ ਨਾ ਕਰਨ ਤੋਂ ਨਾਰਾਜ਼ ਇਕ ਨੌਜਵਾਨ 60 ਫੁੱਟ ਉੱਚੀ ਪਾਣੀ ਦੀ ਟੈਂਕੀ ’ਤੇ ਜਾ ਚੜ੍ਹਿਆ।
* 1 ਅਗਸਤ ਨੂੰ ‘ਟੀਕਮਗੜ੍ਹ’ (ਮੱਧ ਪ੍ਰਦੇਸ਼) ਦੇ ‘ਪਲੇਰਾ’ ਜਨਪਦ ਦੇ ਇਕ ਪਿੰਡ ’ਚ ਲੰਬੇ ਸਮੇਂ ਤੋਂ ਗੰਭੀਰ ਪੀਣ ਵਾਲੇ ਪਾਣੀ ਦੇ ਸੰਕਟ ਤੋਂ ਪ੍ਰੇਸ਼ਾਨ ਔਰਤਾਂ ਪਾਣੀ ਦੀ ਸਪਲਾਈ ਨਿਯਮਿਤ ਕਰਨ ਦੀ ਮੰਗ ’ਤੇ ਜ਼ੋਰ ਦੇਣ ਲਈ ਪਿੰਡ ਦੀ ਖ਼ਾਲੀ ਪਈ ਪਾਣੀ ਦੀ ਟੈਂਕੀ ’ਤੇ ਚੜ੍ਹ ਗਈਆਂ। ਇਲਾਕੇ ਦੇ ਤਹਿਸੀਲਦਾਰ ਨੇ ਕਿਸੇ ਤਰ੍ਹਾਂ ਪਾਣੀ ਦੀ ਨਿਯਮਿਤ ਸਪਲਾਈ ਕਰਨ ਦਾ ਭਰੋਸਾ ਦੇ ਕੇ ਉਨ੍ਹਾਂ ਨੂੰ ਹੇਠਾਂ ਉਤਰਨ ਲਈ ਰਾਜ਼ੀ ਕੀਤਾ।
* 7 ਅਗਸਤ ਨੂੰ ‘ਗਯਾ’ (ਬਿਹਾਰ) ਦੇ ‘ਵਜ਼ੀਰਗੰਜ’ ’ਚ ਮਾਤਾ-ਪਿਤਾ ਵੱਲੋਂ ਮੋਬਾਈਲ ਫ਼ੋਨ ਲੈ ਕੇ ਨਾ ਦੇਣ ਤੋਂ ਨਾਰਾਜ਼ ‘ਅੰਕਿਤ ਕੁਮਾਰ’ ਨਾਂ ਦਾ ਇਕ ਮੁੰਡਾ 1.33 ਲੱਖ ਵੋਲਟ ਸਮਰੱਥਾ ਵਾਲੀ ਬਿਜਲੀ ਲਾਈਨ ਦੇ 100 ਫੁੱਟ ਉੱਚੇ ਟਾਵਰ ’ਤੇ ਜਾ ਚੜ੍ਹਿਆ ਅਤੇ ਉੱਥੇ ਇਕੱਠੇ ਹੋਏ ਪਿੰਡ ਵਾਸੀਆਂ ਅਤੇ ਆਪਣੇ ਪਰਿਵਾਰਕ ਮੈਂਬਰਾਂ ਵੱਲੋਂ ਮੋਬਾਈਲ ਫ਼ੋਨ ਲੈ ਕੇ ਦੇਣ ਦਾ ਭਰੋਸਾ ਦੇਣ ’ਤੇ ਹੀ ਟਾਵਰ ਤੋਂ ਹੇਠਾਂ ਉਤਰਿਆ।
* 8 ਅਗਸਤ ਨੂੰ ‘ਸ਼੍ਰਾਵਸਤੀ’ (ਉੱਤਰ ਪ੍ਰਦੇਸ਼) ਦੇ ‘ਮਲਹੀਪੁਰ’ ’ਚ 26 ਸਾਲਾ ‘ਅਨਿਲ ਕੁਮਾਰ’ ਨਾਂ ਦਾ ਨੌਜਵਾਨ, ਜਿਸ ਦਾ ਪਹਿਲਾਂ ਹੀ 2 ਵਾਰ ਵਿਆਹ ਹੋ ਚੁੱਕਾ ਸੀ ਅਤੇ ਦੋ ਬੱਚੇ ਵੀ ਸਨ, ਮੋਬਾਈਲ ਟਾਵਰ ’ਤੇ ਜਾ ਚੜ੍ਹਿਆ। ਉਸ ਦੀ ਮੰਗ ਇਹ ਸੀ ਕਿ ਉਸ ਦੀ ਰੁੱਸੀ ਹੋਈ ਪ੍ਰੇਮਿਕਾ ਨੂੰ ਮੌਕੇ ’ਤੇ ਬੁਲਾ ਕੇ ਉਸ ਨਾਲ ਮਿਲਾਇਆ ਜਾਵੇ। ‘ਅਨਿਲ ਕੁਮਾਰ’ ਦੇ ਮਾਂ-ਬਾਪ ਨੇ ਬੜੀ ਮੁਸ਼ਕਲ ਨਾਲ ਉਸ ਨੂੰ ਹੇਠਾਂ ਉਤਰਨ ਲਈ ਰਾਜ਼ੀ ਕੀਤਾ।
* 10 ਅਗਸਤ ਨੂੰ ‘ਨੂਹ’ (ਹਰਿਆਣਾ) ’ਚ ਆਪਣੇ ਮਾਮੇ ਦੀ ਧੀ ਨਾਲ ਵਿਆਹ ਕਰਨ ਦੀ ਿਜ਼ੱਦ ’ਤੇ ਅੜਿਆ ‘ਕੈਫ਼’ ਨਾਂ ਦਾ ਨੌਜਵਾਨ 100 ਫੁੱਟ ਉੱਚੇ ‘ਮੋਬਾਈਲ ਟਾਵਰ’ ’ਤੇ ਚੜ੍ਹ ਗਿਆ ਅਤੇ 5 ਘੰਟੇ ਤੱਕ ਚੱਲੇ ਇਸ ਘਟਨਾਕ੍ਰਮ ਤੋਂ ਬਾਅਦ ਆਪਣੇ ਰਿਸ਼ਤੇਦਾਰਾਂ ਵੱਲੋਂ ਸਮਝਾਉਣ ’ਤੇ ਹੀ ਟਾਵਰ ਤੋਂ ਹੇਠਾਂ ਉਤਰਿਆ।
* 10 ਅਗਸਤ ਨੂੰ ਹੀ ‘ਕਾਨਪੁਰ’ ’ਚ ਪ੍ਰਸ਼ਾਸਨ ਵੱਲੋਂ ਆਪਣੇ ਮਕਾਨ ਦੀ ਉਸਾਰੀ ’ਤੇ ਰੋਕ ਲਾਉਣ ਤੋਂ ਨਾਰਾਜ਼ ਇਕ ਔਰਤ ਹੱਥ ’ਚ ਪੈਟਰੋਲ ਦੀ ਬੋਤਲ ਲੈ ਕੇ ਪਾਣੀ ਦੀ ਟੈਂਕੀ ’ਤੇ ਚੜ੍ਹ ਗਈ ਅਤੇ ਆਤਮਦਾਹ ਦੀ ਧਮਕੀ ਦੇ ਕੇ ਹੰਗਾਮਾ ਕੀਤਾ।
* 10 ਅਗਸਤ ਨੂੰ ਹੀ ‘ਮਊ’ (ਉੱਤਰ ਪ੍ਰਦੇਸ਼) ਦੇ ‘ਰੈਕਵਾਰੇਡੀਹ’ ਿਪੰਡ ’ਚ ਇਕ ਔਰਤ ਪਤੀ ਵਲੋਂ ਉਸ ਦੀ ਮਰਜ਼ੀ ਦੇ ਿਬਨਾਂ ਦੂਜਾ ਿਵਆਹ ਕਰ ਲੈਣ ਦੇ ਿਵਰੁੱਧ ਰੋਸ ਜ਼ਾਹਿਰ ਕਰਨ ਲਈ ਮਾਸੂਮ ਬੇਟੇ ਨਾਲ ਪਾਣੀ ਦੀ ਟੈਂਕੀ ’ਤੇ ਚੜ੍ਹ ਗਈ। ਪੁਲਸ ਨੇ ਮੌਕੇ ’ਤੇ ਪਹੁੰਚ ਕੇ ਦੋਵਾਂ ਨੂੰ ਸੁਰੱਿਖਅਤ ਹੇਠਾਂ ਉਤਾਰਿਆ।
* 11 ਅਗਸਤ ਨੂੰ ‘ਪੀਲੀਭੀਤ’ (ਉੱਤਰ ਪ੍ਰਦੇਸ਼) ਦੇ ‘ਬੀਸਲਪੁਰ’ ਖੇਤਰ ’ਚ ਇਕ ਵਿਆਹੁਤਾ ਸਹੁਰੇ ਵਾਲਿਆਂ ’ਤੇ ਤਸ਼ੱਦਦ ਦਾ ਦੋਸ਼ ਲਾਉਂਦਿਆਂ ਮੋਬਾਈਲ ਟਾਵਰ ’ਤੇ ਚੜ੍ਹ ਗਈ, ਜਿਸ ਨੂੰ ਪੁਲਸ ਨੇ ਸਮਝਾ-ਬੁਝਾ ਕੇ ਹੇਠਾਂ ਉਤਾਰਿਆ।
* 11 ਅਗਸਤ ਨੂੰ ਹੀ ‘ਜਮਸ਼ੇਦਪੁਰ’ (ਝਾਰਖੰਡ) ’ਚ ਦਾਜ ਦੇ ਲਾਲਚੀ ਸਹੁਰਿਆਂ ਵੱਲੋਂ ਤਸ਼ੱਦਦ ਦੇ ਮਾਮਲੇ ’ਚ ਪੁਲਸ ਵੱਲੋਂ ਕਾਰਵਾਈ ਨਾ ਕਰਨ ਤੋਂ ਨਾਰਾਜ਼ ਇਕ ਔਰਤ ਮੋਬਾਈਲ ਟਾਵਰ ’ਤੇ ਚੜ੍ਹ ਗਈ ਜਿਸ ’ਤੇ ਡੀ. ਸੀ. ਅਤੇ ਐੱਸ. ਐੱਸ. ਪੀ. ਨੂੰ ਘਟਨਾ ਸਥਾਨ ’ਤੇ ਦੇਰ ਰਾਤ ਪਹੁੰਚ ਕੇ ਔਰਤ ਨੂੰ ਹੇਠਾਂ ਉਤਰ ਆਉਣ ਲਈ ਸਮਝਾਉਣਾ ਪਿਆ।
ਆਪਣੀ ਜਾਨ ਜੋਖਮ ’ਚ ਪਾ ਕੇ ਆਪਣੀਆਂ ਸਹੀ ਜਾਂ ਗਲਤ ਮੰਗਾਂ ਮਨਵਾਉਣ ਦਾ ਇਹ ਤਰੀਕਾ ਕਿਸੇ ਵੀ ਨਜ਼ਰੀਏ ਤੋਂ ਉਚਿਤ ਨਹੀਂ ਕਿਹਾ ਜਾ ਸਕਦਾ। ਅਜਿਹਾ ਕਰਨ ਵਾਲਿਆਂ ਦੀ ਵਜ੍ਹਾ ਨਾਲ ਨਾ ਸਿਰਫ਼ ਪ੍ਰਸ਼ਾਸਨ ਨੂੰ ਪ੍ਰੇਸ਼ਾਨੀ ਹੁੰਦੀ ਹੈ ਸਗੋਂ ਉਨ੍ਹਾਂ ਦੀ ਜਾਨ ਵੀ ਜਾ ਸਕਦੀ ਹੈ ਜਾਂ ਹੇਠਾਂ ਡਿੱਗ ਕੇ ਹੱਡੀ-ਪੱਸਲੀ ਵੀ ਟੁੱਟ ਸਕਦੀ ਹੈ।
ਇਸ ਲਈ ਲੋਕਾਂ ਨੂੰ ਅਜਿਹਾ ਕਰਨ ਤੋਂ ਪਹਿਲਾਂ ਸੋਚਣਾ ਚਾਹੀਦਾ ਹੈ ਕਿ ਅਜਿਹੇ ਕਦਮ ਚੁੱਕ ਕੇ ਉਹ ਨਾ ਸਿਰਫ਼ ਆਪਣੀ ਜਾਨ ਨੂੰ ਜੋਖਮ ’ਚ ਪਾਉਂਦੇ ਹਨ ਸਗੋਂ ਪ੍ਰਸ਼ਾਸਨ ਅਤੇ ਆਪਣੇ ਪਰਿਵਾਰਕ ਮੈਂਬਰਾਂ ਲਈ ਵੀ ਵੱਡੀ ਪ੍ਰੇਸ਼ਾਨੀ ਪੈਦਾ ਕਰ ਦਿੰਦੇ ਹਨ।
—ਵਿਜੇ ਕੁਮਾਰ
ਨੋਲਨ ਦੀ ਫ਼ਿਲਮ ‘ਦ ਓਡਿਸੀ’ ਅੱਜ ਦੇ ਲਈ ਪ੍ਰਾਸੰਗਿਕ ਕਿਉਂ ?
NEXT STORY 
