ਫਗਵਾੜਾ (ਜਲੋਟਾ)-ਏ. ਟੀ. ਐੱਮ. (ਆਟੋਮੇਟਿਡ ਟੈਲਰ ਮਸ਼ੀਨ) ਸਾਡੇ ਰੋਜ਼ਾਨਾ ਜੀਵਨ ਦਾ ਇਕ ਲਾਜ਼ਮੀ ਹਿੱਸਾ ਬਣ ਗਿਆ ਹੈ ਕਿਉਂਕਿ ਇਹ ਨਕਦੀ ਕੱਢਵਾਉਣ, ਬਾਕੀ ਰਾਸ਼ੀ ਦੀ ਜਾਂਚ ਕਰਨ ਅਤੇ ਪੈਸੇ ਟ੍ਰਾਂਸਫਰ ਕਰਨ ਦਾ ਸਭ ਤੋਂ ਆਸਾਨ ਅਤੇ ਸੁਵਿਧਾਜਨਕ ਤਰੀਕਾ ਹੈ। ਹਾਲਾਂਕਿ ਏ. ਟੀ. ਐੱਮ. ਧੋਖਾਦੇਹੀ ਬੈਂਕਾਂ ਅਤੇ ਵਿਅਕਤੀਆਂ ਲਈ ਇਕ ਗੰਭੀਰ ਚਿੰਤਾ ਦਾ ਵਿਸ਼ਾ ਬਣ ਗਈ ਹੈ। ਇਸ ਲਈ ਸਾਨੂੰ ਸਾਰਿਆਂ ਨੂੰ ਸਾਵਧਾਨ ਰਹਿੰਦੇ ਹੋਏ ਏ. ਟੀ. ਐੱਮ. ਕਾਰਡ ਦੀ ਮਹੱਤਤਾ ਸਮਝਣੀ ਚਾਹੀਦੀ ਹੈ। ਨਹੀਂ ਤਾਂ ਸਾਡੀ ਨਿੱਜੀ ਜਿਹੀ ਗਲਤੀ ਨਾਲ ਬੈਂਕ ਖਾਤਾ ਖਾਲੀ ਹੋ ਸਕਦਾ ਹੈ। ਇਸ ਲਈ ਅਜ਼ਨਬੀਆਂ ਤੋਂ ਬਚੋ, ਕਿਸੇ ਨਾਲ ਵੀ ਆਪਣੀ ਨਿੱਜੀ ਜਾਣਕਾਰੀ ਸਾਂਝੀ ਨਾ ਕਰੋ।
ਧੋਖੇਬਾਜ਼ ਨੌਸਰਬਾਜ਼ਾਂ ਦੀ ਨਜ਼ਰ ਹਮੇਸ਼ਾ ਅਜਿਹੇ ਮਾਸੂਮ ਲੋਕਾਂ ’ਤੇ ਟਿਕੀ ਰਹਿੰਦੀ ਹੈ, ਜੋ ਘਰ ਤੋਂ ਬੈਂਕ ਦੇ ਏ. ਟੀ. ਐੱਮ. ਕਾਊਂਟਰ ਤੱਕ ਕਾਰਡ ਦੀ ਵਰਤੋਂ ਕਰਕੇ ਪੈਸੇ ਕੱਢਵਾਉਣ ਆਉਂਦੇ ਹਨ। ਇਸ ਦਾ ਪ੍ਰਤੱਖ ਪ੍ਰਮਾਣ ਹਾਲ ਹੀ ਵਿਚ ਸਥਾਨਕ ਸਤਨਾਮਪੁਰਾ ਇਲਾਕੇ ਵਿਚ ਏ. ਟੀ. ਐੱਮ. ’ਤੇ ਕਰੀਬ 40,000 ਰੁਪਏ ਦੀ ਠੱਗੀ ਦਾ ਸ਼ਿਕਾਰ ਹੋਏ ਅਰੁਣ ਕੁਮਾਰ ਦੇ ਮਾਮਲੇ ਤੋਂ ਮਿਲ ਰਿਹਾ ਹੈ, ਜਿਸ ਸਬੰਧੀ ਪੁਲਸ ਵੱਲੋਂ ਜਾਂਚ ਦਾ ਦੌਰ ਜਾਰੀ ਹੈ।
ਇਹ ਵੀ ਪੜ੍ਹੋ: ਅਮਰੀਕਾ-ਈਰਾਨ ਜੰਗ ਵਿਚਾਲੇ ਭਾਰਤ ਸਣੇ ਕਈ ਦੇਸ਼ਾਂ ਦੀਆਂ ਫਲਾਈਟਾਂ ਰੱਦ, ਪਰੇਸ਼ਾਨੀ 'ਚ ਪਏ ਯਾਤਰੀ
ਇਸ ਮਾਮਲੇ ਵਿਚ ਅਣਪਛਾਤੇ ਵਿਅਕਤੀ ’ਤੇ ਭਰੋਸਾ ਕਰਨਾ ਹੀ ਪੀੜਤ ਅਰੁਣ ਕੁਮਾਰ ਨੂੰ ਮਹਿੰਗਾ ਪਿਆ ਹੈ। ਦੱਸ ਦੇਈਏ ਕਿ ਕੁਝ ਸਮਾਂ ਪਹਿਲਾਂ ਥਾਣਾ ਸਿਟੀ ਫਗਵਾੜਾ ਦੀ ਪੁਲਸ ਵੱਲੋਂ ਬੇਨਕਾਬ ਕੀਤੇ ਗਏ ਬੈਂਕ ਏ. ਟੀ. ਐੱਮ. ਫਰਾਡ ਗੈਂਗ ਦੇ 2 ਸ਼ਾਤਰ ਨੌਸਰਬਾਜ਼ਾਂ ਦੀ ਗ੍ਰਿਫ਼ਤਾਰੀ ਕਰ ਕੇ ਉਨ੍ਹਾਂ ਕੋਲੋਂ ਵੱਖ-ਵੱਖ ਬੈਂਕਾਂ ਦੇ 73 ਏ. ਟੀ. ਐੱਮ. ਕਾਰਡ ਬਰਾਮਦ ਕੀਤੇ ਗਏ ਸਨ।
ਸਬੰਧਤ ਨੌਸਰਬਾਜ਼ਾਂ ਵੱਲੋਂ ਉਦੋਂ ਦਿਨ-ਦਿਹਾੜੇ ਫਗਵਾੜਾ ਦੀ ਇਕ ਔਰਤ ਦੇ ਪੁੱਤਰ ਨਾਲ ਜਾਲਸਾਜ਼ੀ ਕਰ ਕੇ ਉਸ ਦੇ ਬੈਂਕ ਖਾਤੇ ਵਿਚੋਂ ਏ. ਟੀ. ਐੱਮ. ਕਾਰਡ ਦੀ ਵਰਤੋਂ ਕਰਕੇ ਕਰੀਬ 5,82,000 ਰੁਪਏ ਸਾਫ਼ ਕਰ ਦਿੱਤੇ ਗਏ ਸਨ। ਉਦੋਂ ਉਕਤ ਗੈਂਗ ਵੱਲੋਂ ਧੋਖਾਦੇਹੀ ਦਾ ਇਕ ਤਰੀਕਾ ਅਪਣਾਇਆ ਗਿਆ ਸੀ, ਜਿੱਥੇ ਉਨ੍ਹਾਂ ਨੇ ਏ. ਟੀ. ਐੱਮ. ਕਾਰਡ ਦੀ ਅਦਲਾ-ਬਦਲੀ ਕੀਤੀ ਸੀ। ਇਸ ਦਾ ਖ਼ੁਲਾਸਾ ਉਦੋਂ ਖੁਦ ਫਗਵਾੜਾ ਪੁਲਸ ਨੇ ਕਰਦੇ ਹੋਏ ਦੱਸਿਆ ਸੀ ਕਿ ਪੀੜਤ ਵੱਲੋਂ ਅਣਜਾਣ ਲੋਕਾਂ ’ਤੇ ਵਿਸ਼ਵਾਸ ਕਰਨਾ ਉਸ ਨੂੰ ਮਹਿੰਗਾ ਪਿਆ ਹੈ ਪਰ ਜਾਣਕਾਰਾਂ ਦੀ ਰਾਏ ਵਿਚ ਏ. ਟੀ. ਐੱਮ. ਕਾਰਡ ਦੀ ਵਰਤੋਂ ਕਰਕੇ ਕਾਊਂਟਰਾਂ ’ਤੇ ਨਿਰਦੋਸ਼ ਲੋਕਾਂ ਨੂੰ ਧੋਖਾ ਦੇਣ ਲਈ ਸ਼ਾਤਰ ਨੌਸਰਬਾਜ਼ ਕਈ ਤਰ੍ਹਾਂ ਦੀਆਂ ਵੱਖ-ਵੱਖ ਤਕਨੀਕਾਂ ਦੀ ਵਰਤੋਂ ਕਰਦੇ ਹਨ।
ਇਹ ਵੀ ਪੜ੍ਹੋ: ਜਲੰਧਰ ਦੇ ਕਰੀਬ 12 ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ! ਪਈਆਂ ਭਾਜੜਾਂ, ਪੁਲਸ ਦਾ ਖ਼ੁਲਾਸਾ
ਕੈਸ਼ ਟ੍ਰੈਪਿੰਗ
ਕੈਸ਼ ਟ੍ਰੈਪਿੰਗ ਇਕ ਅਜਿਹੀ ਤਕਨੀਕ ਹੈ, ਜਿੱਥੇ ਧੋਖੇਬਾਜ਼ ਕੈਸ਼ ਡਿਸਪੈਂਸਰ (ਜਿੱਥੋਂ ਪੈਸੇ ਨਿਕਲਦੇ ਹਨ) ਦੇ ਅੰਦਰ ਇਕ ਡਿਵਾਈਸ ਰੱਖ ਦਿੰਦਾ ਹੈ, ਜੋ ਲੈਣ-ਦੇਣ ਪੂਰਾ ਹੋਣ ਤੋਂ ਬਾਅਦ ਨਕਦੀ ਨੂੰ ਬਾਹਰ ਆਉਣ ਤੋਂ ਰੋਕਦਾ ਹੈ। ਇਸ ਤੋਂ ਬਾਅਦ ਜਾਲਸਾਜ਼ ਕਾਰਡ ਧਾਰਕ ਦੇ ਏ. ਟੀ. ਐੱਮ. ਤੋਂ ਬਾਹਰ ਜਾਣ ਦਾ ਇੰਤਜ਼ਾਰ ਕਰਦਾ ਹੈ ਅਤੇ ਫਿਰ ਫਸੇ ਹੋਏ ਕੈਸ਼ ਨੂੰ ਕੱਢ ਲੈਂਦਾ ਹੈ। ਕੈਸ਼ ਟ੍ਰੈਪਿੰਗ ਦਾ ਸ਼ਿਕਾਰ ਹੋਣ ਤੋਂ ਬਚਣ ਲਈ ਹਮੇਸ਼ਾ ਇਹ ਜਾਂਚ ਕਰਨੀ ਚਾਹੀਦੀ ਹੈ ਕਿ ਏ. ਟੀ. ਐੱਮ. ਛੱਡਣ ਤੋਂ ਪਹਿਲਾਂ ਸਾਰੀ ਨਕਦੀ ਨਿਕਲ ਗਈ ਹੈ ਜਾਂ ਨਹੀਂ ਅਤੇ ਨਕਦੀ ਫਸਣ ’ਤੇ ਤੁਰੰਤ ਬੈਂਕ ਨੂੰ ਸੂਚਿਤ ਕਰੋ।
ਗਲਤ ਪਿਨ ਪੈਡ
ਗਲਤ ਪਿਨ ਪੈਡ ਇਕ ਅਜਿਹੀ ਤਕਨੀਕ ਹੈ, ਜਿੱਥੇ ਧੋਖੇਬਾਜ਼ ਪਿਨ ਨੰਬਰ ਨੂੰ ਕੈਪਚਰ ਕਰਨ ਲਈ ਅਸਲੀ ਦੇ ਉੱਪਰ ਇਕ ਨਕਲੀ ਕੀਪੈਡ ਲਗਾ ਦਿੰਦਾ ਹੈ। ਨਕਲੀ ਕੀਪੈਡ ਨੂੰ ਅਸਲੀ ਦੀ ਤਰ੍ਹਾਂ ਦਿਖਣ ਲਈ ਡਿਜ਼ਾਈਨ ਕੀਤਾ ਜਾਂਦਾ ਹੈ ਅਤੇ ਕਾਰਡਧਾਰਕ ਨਕਲੀ ਕੀਪੈਡ ’ਤੇ ਪਿਨ ਨੰਬਰ ਦਰਜ ਕਰਦਾ ਹੈ, ਜੋ ਕਿ ਉਸ ਨੂੰ ਚੋਰੀ ਕਰ ਲੈਂਦਾ ਹੈ। ਝੂਠੇ ਪਿਨ ਪੈਡ ਤੋਂ ਬਚਣ ਲਈ ਪਿਨ ਨੰਬਰ ਦਰਜ ਕਰਨ ਤੋਂ ਪਹਿਲਾਂ ਹਮੇਸ਼ਾ ਇਹ ਜਾਂਚ ਕਰਨੀ ਚਾਹੀਦੀ ਹੈ ਕਿ ਕੀਪੈਡ ਢਿੱਲਾ ਤਾਂ ਨਹੀਂ ਹੈ ਜਾਂ ਕੋਈ ਵਾਧੂ ਬਟਨ ਤਾਂ ਨਹੀਂ ਲੱਗੇ ਹੋਏ।
ਫਿਸ਼ਿੰਗ ਘਪਲੇ
ਫਿਸ਼ਿੰਗ ਘਪਲੇੱ ਅਜਿਹੀਆਂ ਤਕਨੀਕਾਂ ਹਨ, ਜਿੱਥੇ ਧੋਖੇਬਾਜ਼ ਕਾਰਡ ਧਾਰਕ ਦੀ ਨਿੱਜੀ ਅਤੇ ਵਿੱਤੀ ਜਾਣਕਾਰੀ ਪ੍ਰਾਪਤ ਕਰਨ ਲਈ ਬੈਂਕ ਜਾਂ ਵਿੱਤੀ ਸੰਸਥਾ ਹੋਣ ਦਾ ਨਾਟਕ ਕਰਦੇ ਹੋਏ ਨਕਲੀ ਈਮੇਲ, ਟੈਕਸਟ ਸੰਦੇਸ਼ ਭੇਜਦੇ ਹਨ ਜਾਂ ਫੋਨ ਕਾਲ ਕਰਦੇ ਹਨ। ਇਕ ਵਾਰ ਕੋਈ ਮਾਸੂਮ ਇਨ੍ਹਾਂ ਦੇ ਜਾਲ ਵਿਚ ਫਸ ਗਿਆ ਤਾਂ ਨੌਸਰਬਾਜ਼ ਪਲਕ ਝਪਕਦੇ ਹੀ ਬੈਂਕ ਖਾਤੇ ਨੂੰ ਸਾਫ਼ ਕਰ ਦਿੰਦੇ ਹਨ। ਇਸ ਤੋਂ ਬਚਣ ਲਈ ਕਿਸੇ ਨੂੰ ਵੀ ਆਪਣੇ ਬੈਂਕ ਏ. ਟੀ. ਐੱਮ. ਕਾਰਡ ਦਾ ਵੇਰਵਾ ਜਾਂ ਪਿਨ ਨੰਬਰ ਸਾਂਝਾ ਨਾ ਕਰੋ ਅਤੇ ਫੇਕ ਕਾਲਰਾਂ ਤੋਂ ਬਚੋ।
ਇਹ ਵੀ ਪੜ੍ਹੋ: ਹੋਲੇ-ਮਹੱਲੇ ਮੌਕੇ ਸ੍ਰੀ ਕੀਰਤਪੁਰ ਸਾਹਿਬ ਦੇ ਧਾਰਮਿਕ ਸਥਾਨਾਂ ’ਤੇ ਲੱਖਾਂ ਦੀ ਤਾਦਾਦ 'ਚ ਸੰਗਤ ਹੋਈ ਨਤਮਸਤਕ
ਨਕਲੀ ਏ. ਟੀ. ਐੱਮ. ਮਸ਼ੀਨਾਂ
ਗੱਲ ਸੁਣਨ ਜਾਂ ਪੜ੍ਹਨ ਵਿਚ ਭਾਵੇਂ ਚੌਕਾਉਣ ਵਾਲੀ ਲੱਗੇ ਪਰ ਅਜਿਹਾ ਵੀ ਹੋ ਰਿਹਾ ਹੈ ਕਿ ਧੋਖੇਬਾਜ਼ ਨਕਲੀ ਏ. ਟੀ. ਐੱਮ. ਮਸ਼ੀਨਾਂ ਵਰਗੇ ਦਿਖਣ ਵਾਲੇ ਡਿਵਾਈਸ ਲਗਾ ਦਿੰਦੇ ਹਨ। ਨਕਲੀ ਏ. ਟੀ. ਐੱਮ. ਮਸ਼ੀਨਾਂ ਇਕ ਨਵੀਂ ਤਕਨੀਕ ਹੈ, ਜਿਸਦੀ ਵਰਤੋਂ ਧੋਖੇਬਾਜ਼ਾਂ ਵੱਲੋਂ ਕਾਰਡ ਦੀ ਜਾਣਕਾਰੀ ਚੋਰੀ ਕਰਨ ਲਈ ਕੀਤੀ ਜਾਂਦੀ ਹੈ। ਮਸ਼ੀਨ ਇਕ ਅਸਲੀ ਏ. ਟੀ. ਐੱਮ. ਮਸ਼ੀਨ ਦੀ ਤਰ੍ਹਾਂ ਦਿਖਦੀ ਅਤੇ ਚੱਲਦੀ ਹੈ ਪਰ ਇਸਨੂੰ ਕਾਰਡ ਦੀ ਜਾਣਕਾਰੀ ਚੋਰੀ ਕਰਨ ਲਈ ਡਿਜ਼ਾਈਨ ਕੀਤਾ ਗਿਆ ਹੈ। ਇਕ ਵਾਰ ਕਾਰਡ ਪਾਉਣ ਤੋਂ ਬਾਅਦ, ਮਸ਼ੀਨ ਕਾਰਡ ਨੂੰ ਪੜ੍ਹਦੀ ਹੈ ਅਤੇ ਪਿਨ ਨੂੰ ਕੈਪਚਰ ਕਰ ਲੈਂਦੀ ਹੈ। ਇਸ ਤੋਂ ਬਾਅਦ ਜਾਲਸਾਜ਼ ਇਸ ਜਾਣਕਾਰੀ ਦੀ ਵਰਤੋਂ ਫਰਜ਼ੀ ਏ. ਟੀ. ਐੱਮ. ਕਾਰਡ ਬਣਾਉਣ ਅਤੇ ਪੀੜਤ ਦੇ ਖਾਤੇ ਵਿਚੋਂ ਪੈਸੇ ਕੱਢਵਾਉਣ ਲਈ ਕਰ ਸਕਦਾ ਹੈ।
ਕਾਰਡ ਸਕਿਮਿੰਗ
ਕਾਰਡ ਸਕਿਮਿੰਗ ਏ. ਟੀ. ਐੱਮ. ਕਾਊਂਟਰਾਂ ’ਤੇ ਲੋਕਾਂ ਨੂੰ ਧੋਖਾ ਦੇਣ ਲਈ ਧੋਖੇਬਾਜ਼ਾਂ ਵੱਲੋਂ ਵਰਤੀਆਂ ਜਾਣ ਵਾਲੀਆਂ ਸਭ ਤੋਂ ਆਮ ਤਕਨੀਕਾਂ ਵਿਚੋਂ ਇਕ ਹੈ। ਇਸ ਤਕਨੀਕ ਵਿਚ ਜਾਲਸਾਜ਼ ਏ. ਟੀ. ਐੱਮ. ਮਸ਼ੀਨ ਦੇ ਕਾਰਡ ਸਲਾਟ ਦੇ ਉੱਪਰ ‘ਸਕਿਮਰ’ ਨਾਮਕ ਇਕ ਛੋਟਾ ਜਿਹਾ ਉਪਕਰਨ ਸਥਾਪਿਤ ਕਰ ਦਿੰਦਾ ਹੈ। ਸਕਿਮਰ ਕਾਰਡ ਦੇ ਡੇਟਾ ਨੂੰ ਪੜ੍ਹਦਾ ਹੈ ਅਤੇ ਇਸਨੂੰ ਇਕ ਡਿਵਾਈਸ ਵਿਚ ਸਟੋਰ ਕਰ ਲੈਂਦਾ ਹੈ।
ਜਦੋਂ ਕਾਰਡਧਾਰਕ ਕਾਰਡ ਪਾਉਂਦਾ ਹੈ ਤਾਂ ਸਕਿਮਰ ਕਾਰਡ ਦੇ ਡੇਟਾ ਅਤੇ ਪਿਨ ਨੰਬਰ ਨੂੰ ਕੈਪਚਰ ਕਰ ਲੈਂਦਾ ਹੈ। ਜਾਲਸਾਜ਼ ਫਿਰ ਕੈਪਚਰ ਕੀਤੇ ਡੇਟਾ ਦੀ ਵਰਤੋਂ ਕਾਰਡ ਦਾ ਕਲੋਨ ਬਣਾਉਣ ਲਈ ਕਰ ਸਕਦਾ ਹੈ ਅਤੇ ਗੈਰ-ਕਾਨੂੰਨੀ ਲੈਣ-ਦੇਣ ਲਈ ਇਸਦੀ ਵਰਤੋਂ ਕਰ ਸਕਦਾ ਹੈ। ਕਾਰਡ ਸਕਿਮਿੰਗ ਦਾ ਸ਼ਿਕਾਰ ਹੋਣ ਤੋਂ ਬਚਣ ਲਈ, ਕਾਰਡ ਪਾਉਣ ਤੋਂ ਪਹਿਲਾਂ ਹਮੇਸ਼ਾ ਕਿਸੇ ਵੀ ਸ਼ੱਕੀ ਉਪਕਰਨ ਲਈ ਏ. ਟੀ. ਐੱਮ. ਮਸ਼ੀਨ ਦੀ ਚੰਗੀ ਤਰ੍ਹਾਂ ਜਾਂਚ ਕਰਨੀ ਬੇਹੱਦ ਜ਼ਰੂਰੀ ਹੈ।
ਸ਼ੋਲਡਰ ਸਰਫਿੰਗ
ਸ਼ੋਲਡਰ ਸਰਫਿੰਗ ਇਕ ਹੋਰ ਤਕਨੀਕ ਹੈ, ਜਿਸ ਵਿਚ ਜਾਲਸਾਜ਼ ਕਾਰਡਧਾਰਕ ਦੇ ਨੇੜੇ ਖੜ੍ਹਾ ਹੋ ਕੇ ਏ. ਟੀ. ਐੱਮ. ਕੀਪੈਡ ’ਤੇ ਕਾਰਡਧਾਰਕ ਵੱਲੋਂ ਦਰਜ ਕੀਤੇ ਪਿਨ ਨੰਬਰ ਨੂੰ ਬਹੁਤ ਚਲਾਕੀ ਨਾਲ ਦੇਖਦਾ ਹੈ। ਇਕ ਵਾਰ ਪਿਨ ਨੰਬਰ ਦੇਖੇ ਜਾਣ ਤੋਂ ਬਾਅਦ ਧੋਖੇਬਾਜ਼ ਇਸਦੀ ਵਰਤੋਂ ਨਕਦੀ ਕੱਢਵਾਉਣ ਜਾਂ ਗੈਰ-ਕਾਨੂੰਨੀ ਲੈਣ-ਦੇਣ ਕਰਨ ਲਈ ਕਰ ਸਕਦਾ ਹੈ। ਇਸ ਦਾ ਸ਼ਿਕਾਰ ਹੋਣ ਤੋਂ ਬਚਣ ਲਈ ਪਿਨ ਨੰਬਰ ਦਰਜ ਕਰਦੇ ਸਮੇਂ ਹਮੇਸ਼ਾ ਕੀਪੈਡ ਨੂੰ ਦੂਜੇ ਹੱਥ ਨਾਲ ਢੱਕ ਲੈਣਾ ਚਾਹੀਦਾ ਹੈ ਅਤੇ ਆਪਣੇ ਆਲੇ-ਦੁਆਲੇ ਬਾਰੇ ਸੁਚੇਤ ਰਹਿਣਾ ਚਾਹੀਦਾ ਹੈ।
ਇਹ ਵੀ ਪੜ੍ਹੋ: ਰੂਪਨਗਰ ਜ਼ਿਲ੍ਹੇ 'ਚ ਕੱਲ੍ਹ ਤੋਂ 4 ਮਾਰਚ ਤੱਕ ਛੁੱਟੀਆਂ ਦਾ ਐਲਾਨ! ਬੰਦ ਰਹਿਣਗੇ ਸਕੂਲ
ਏ. ਟੀ. ਐੱਮ. ਕਾਰਡ ਟ੍ਰੈਪਿੰਗ
ਕਾਰਡ ਟ੍ਰੈਪਿੰਗ ਇਕ ਅਜਿਹੀ ਤਕਨੀਕ ਹੈ ਜਿੱਥੇ ਧੋਖੇਬਾਜ਼ ਕਾਰਡ ਸਲਾਟ ਦੇ ਅੰਦਰ ਇਕ ਅਜਿਹਾ ਡਿਵਾਈਸ ਰੱਖ ਦਿੰਦਾ ਹੈ, ਜੋ ਲੈਣ-ਦੇਣ ਪੂਰਾ ਹੋਣ ਤੋਂ ਬਾਅਦ ਕਾਰਡ ਨੂੰ ਬਾਹਰ ਆਉਣ ਤੋਂ ਰੋਕਦਾ ਹੈ। ਇਸ ਤੋਂ ਬਾਅਦ ਜਾਲਸਾਜ਼ ਕਾਰਡਧਾਰਕ ਦੇ ਏ. ਟੀ. ਐੱਮ. ਤੋਂ ਜਾਣ ਦਾ ਇੰਤਜ਼ਾਰ ਕਰਦਾ ਹੈ ਅਤੇ ਫਿਰ ਫਸੇ ਹੋਏ ਕਾਰਡ ਨੂੰ ਕੱਢ ਲੈਂਦਾ ਹੈ।
ਜਾਲਸਾਜ਼ ਫਿਰ ਗੈਰ-ਕਾਨੂੰਨੀ ਲੈਣ-ਦੇਣ ਕਰਨ ਲਈ ਫਸੇ ਹੋਏ ਕਾਰਡ ਦੀ ਵਰਤੋਂ ਕਰ ਸਕਦਾ ਹੈ। ਕਾਰਡ ਟ੍ਰੈਪਿੰਗ ਤੋਂ ਬਚਣ ਲਈ ਹਮੇਸ਼ਾ ਇਹ ਜਾਂਚ ਕਰਨੀ ਚਾਹੀਦੀ ਹੈ ਕਿ ਏ. ਟੀ. ਐੱਮ. ਛੱਡਣ ਤੋਂ ਪਹਿਲਾਂ ਕਾਰਡ ਬਾਹਰ ਆ ਗਿਆ ਹੈ ਜਾਂ ਨਹੀਂ ਅਤੇ ਕਾਰਡ ਫਸਣ ਦੀ ਸੂਰਤ ਵਿਚ ਤੁਰੰਤ ਬੈਂਕ ਨੂੰ ਸੂਚਿਤ ਕਰੋ।
ਇਸ ਤਰ੍ਹਾਂ ਦੀ ਧੋਖਾਦੇਹੀ ਤੋਂ ਬਚਣ ਲਈ ਗਾਹਕਾਂ ਨੂੰ ਹਮੇਸ਼ਾ ਬੈਂਕ ਦੇ ਅੰਦਰ ਸਥਿਤ ਏ. ਟੀ. ਐੱਮ. ਮਸ਼ੀਨਾਂ ਜਾਂ ਸੁਰੱਖਿਅਤ ਥਾਵਾਂ ’ਤੇ ਲੱਗੀਆਂ ਮਸ਼ੀਨਾਂ ਦੀ ਹੀ ਵਰਤੋਂ ਕਰਨੀ ਚਾਹੀਦੀ ਹੈ। ਇਸ ਲਈ ਜਾਗਰੂਕ ਰਹੋ ਕਿਤੇ ਅਜਿਹਾ ਨਾ ਹੋਵੇ ਕਿ ਤੁਸੀਂ ਭੋਲੇਪਨ ਵਿਚ ਬੈਂਕ ਵਿਚ ਜਮ੍ਹਾ ਆਪਣੀ ਮਿਹਨਤ ਦੀ ਕਮਾਈ ਇਕ ਛੋਟੀ ਜਿਹੀ ਗਲਤੀ ਕਰਕੇ ਗਵਾ ਬੈਠੋ।
ਇਹ ਵੀ ਪੜ੍ਹੋ: ਜਲੰਧਰ ਵਾਸੀ ਦੇਣ ਧਿਆਨ! 4 ਮਾਰਚ ਲਈ ਵੱਡਾ ਐਲਾਨ, ਬੰਦ ਰਹਿਣਗੀਆਂ ਇਹ ਮਸ਼ਹੂਰ ਦੁਕਾਨਾਂ
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਬੇਸਹਾਰਾ ਪਸ਼ੂਆਂ ਦੀ ਲਪੇਟ ’ਚ ਆ ਕੇ ਨੌਜਵਾਨ ਦੀ ਮੌਤ, ਪਿਤਾ ਜ਼ਖਮੀ
NEXT STORY 
