ਜਿਵੇਂ ਕਿ ਅਸੀਂ ਸਮੇਂ-ਸਮੇਂ ’ਤੇ ਲਿਖਦੇ ਰਹਿੰਦੇ ਹਾਂ, ਦੇਸ਼ ’ਚ ਭ੍ਰਿਸ਼ਟਾਚਾਰ ਦਾ ਮਹਾਰੋਗ ਇਸ ਸਮੇਂ ਆਪਣੇ ਸਿਖਰ ’ਤੇ ਪਹੁੰਚਿਆ ਹੋਇਆ ਹੈ, ਜਿਸ ’ਚ ਹੇਠਾਂ ਤੋਂ ਲੈ ਕੇ ਉਪਰ ਤੱਕ ਦੇ ਲੋਕ ਸ਼ਾਮਲ ਪਾਏ ਜਾ ਰਹੇ ਹਨ। ਹਾਲ ਹੀ ’ਚ 2 ਹੋਰ ਮਾਮਲੇ ਸਾਹਮਣੇ ਆਏ ਹਨ ਜਿਨ੍ਹਾਂ ’ਚ ਸੱਤਾ ਦੇ ਸੰਸਥਾਨ ਨਾਲ ਜੁੜੇ ਮੌਜੂਦਾ ਅਤੇ ਸਾਬਕਾ ਸੱਤਾਧਾਰੀਆਂ ਦੇ ਨਾਂ ਵੱਖ-ਵੱਖ ਘਪਲਿਆਂ ’ਚ ਸ਼ਾਮਲ ਪਾਏ ਗਏ ਹਨ। ਪਹਿਲਾ ਮਾਮਲਾ ਪੱਛਮੀ ਬੰਗਾਲ ਦੇ ਸਿੱਖਿਆ ਮੰਤਰੀ ਪਰੇਸ਼ ਚੰਦਰ ਅਧਿਕਾਰੀ ਦੀ ਧੀ ਅੰਕਿਤਾ ਅਧਿਕਾਰੀ ਨੂੰ ਅਣਉਚਿਤ ਢੰਗ ਨਾਲ ਨੌਕਰੀ ਦੇਣ ਨਾਲ ਸਬੰਧਤ ਹੈ। ਸੂਬੇ ’ਚ ਕੁਝ ਸਮਾਂ ਪਹਿਲਾਂ ਹੋਏ ਐੱਸ. ਐੱਸ. ਸੀ. ਭਰਤੀ ਘਪਲੇ ਦੇ ਮਾਮਲੇ ’ਚ 20 ਮਈ ਨੂੰ ਕਲਕੱਤਾ ਹਾਈਕੋਰਟ ਨੇ ਮਹੱਤਵਪੂਰਨ ਫੈਸਲਾ ਸੁਣਾਉਂਦੇ ਹੋਏ ਇਕ ਸਰਕਾਰੀ ਸਹਾਇਤਾ ਪ੍ਰਾਪਤ ਸਕੂਲ ’ਚ ਪਰੇਸ਼ ਚੰਦਰ ਅਧਿਕਾਰੀ ਦੀ ਧੀ ਅੰਕਿਤਾ ਅਧਿਕਾਰੀ ਦੀ ਨੌਕਰੀ ਖਤਮ ਕਰਨ ਦੇ ਹੁਕਮ ਦਿੱਤੇ ਹਨ।
ਇਸ ਸਬੰਧ ’ਚ ਇਕ ਪੀੜਤ ਨੇ ਰਿੱਟ ਦਾਇਰ ਕਰ ਕੇ ਭਰਤੀ ਪ੍ਰੀਖਿਆ ’ਚ ਮੰਤਰੀ ਅਧਿਕਾਰੀ ਦੀ ਧੀ ਤੋਂ ਵੱਧ ਅੰਕ ਲਿਆਉਣ ਦੇ ਬਾਵਜੂਦ ਉਸ ਨੂੰ ਅਹੁਦੇ ਤੋਂ ਵਾਂਝਿਆਂ ਕਰਨ ਅਤੇ ਸਿੱਖਿਆ ਮੰਤਰੀ ਵੱਲੋਂ ਨਿਯਮ ਵਿਰੁੱਧ ਤਰੀਕੇ ਨਾਲ ਆਪਣੀ ਧੀ ਨੂੰ ਨੌਕਰੀ ਦਿਵਾਉਣ ਦਾ ਦੋਸ਼ ਲਗਾਇਆ ਸੀ। ਇਸ ਦੇ ਕਾਰਨ ਕੋਰਟ ਨੇ ਪਿਛਲੇ ਦਿਨੀਂ ਕੇਂਦਰੀ ਜਾਂਚ ਬਿਊਰੋ (ਸੀ. ਬੀ. ਆਈ.) ਨੂੰ ਦੋਵਾਂ ਕੋਲੋਂ ਪੁੱਛਗਿੱਛ ਕਰਨ ਦੇ ਹੁਕਮ ਦਿੱਤੇ ਸਨ। ਇਸ ਦਰਮਿਆਨ ਪਰੇਸ਼ ਚੰਦਰ ਅਧਿਕਾਰੀ 21 ਮਈ ਨੂੰ ਸੀ. ਬੀ. ਆਈ. ਦਫਤਰ ਪਹੁੰਚੇ। ਉਨ੍ਹਾਂ ਦੇ ਵਿਰੁੱਧ ਸੀ. ਬੀ. ਆਈ. ਨੇ ਵੀਰਵਾਰ ਨੂੰ ਹੀ ਧੋਖਾਦੇਹੀ ਅਤੇ ਭ੍ਰਿਸ਼ਟਾਚਾਰ ਦੀ ਸਾਜ਼ਿਸ਼ ਰਚਣ ਵਾਲੇ ਦੋਸ਼ ’ਚ ਐੱਫ. ਆਈ. ਆਰ. ਦਰਜ ਕੀਤੀ ਸੀ। ਇਸ ਦੇ ਨਾਲ ਹੀ ਜਸਟਿਸ ਅਵਿਜੀਤ ਗੰਗੋਪਾਧਿਆਏ ਨੇ ਸਿੱਖਿਆ ਮੰਤਰੀ ਦੀ ਧੀ ਅੰਕਿਤਾ ਨੂੰ ਨਵੰਬਰ 2018 ਤੋਂ ਹੁਣ ਤੱਕ ਬਤੌਰ ਅਧਿਆਪਕ ਲਈ ਗਈ ਤਨਖਾਹ ਦੀ ਸਾਰੀ ਰਕਮ ਦੋ ਕਿਸ਼ਤਾਂ ’ਚ ਰਜਿਸਟਰਾਰ ਕੋਲ ਜਮ੍ਹਾ ਕਰਵਾਉਣ ਦਾ ਹੁਕਮ ਦੇਣ ਦੇ ਇਲਾਵਾ ਉਸ ਨੂੰ ਸਕੂਲ ’ਚ ਦਾਖਲ ਹੋਣ ਤੋਂ ਵੀ ਰੋਕ ਦਿੱਤਾ ਹੈ।
ਭ੍ਰਿਸ਼ਟਾਚਾਰ ਦਾ ਦੂਜਾ ਮਾਮਲਾ ਸਾਬਕਾ ਰੇਲ ਮੰਤਰੀ ਅਤੇ ਰਾਜਦ ਸੁਪਰੀਮੋ ਲਾਲੂ ਯਾਦਵ ਦੇ ਪਰਿਵਾਰ ਨਾਲ ਸਬੰਧਤ ਹੈ ਜਿਨ੍ਹਾਂ ਦੇ ਭ੍ਰਿਸ਼ਟਾਚਾਰ ਦਾ ਸੇਕ ਉਨ੍ਹਾਂ ਦੀ ਪੰਜਵੀਂ ਧੀ ਹੇਮਾ ਯਾਦਵ ਤੱਕ ਪਹੁੰਚ ਗਿਆ ਹੈ। ਹਾਲ ਹੀ ’ਚ ਸੀ. ਬੀ. ਆਈ. ਨੇ ਯਾਦਵ ਪਰਿਵਾਰ ਦੇ 15 ਟਿਕਾਣਿਆਂ ’ਤੇ ਛਾਪੇਮਾਰੀ ਦੇ ਬਾਅਦ ਲਾਲੂ ਪ੍ਰਸਾਦ, ਰਾਬੜੀ ਦੇਵੀ ਤੇ ਮੀਸਾ ਭਾਰਤੀ ਦੇ ਨਾਲ ਹੇਮਾ ਯਾਦਵ ਦੇ ਵਿਰੁੱਧ ਵੀ ਮਾਮਲਾ ਦਰਜ ਕੀਤਾ ਹੈ। ਹੇਮਾ ਯਾਦਵ ਸਿਆਸਤ ’ਚ ਨਹੀਂ ਹੈ ਅਤੇ ਇਸ ਤੋਂ ਪਹਿਲਾਂ ਉਸ ਦਾ ਨਾਂ ਕਿਸੇ ਮਾਮਲੇ ’ਚ ਨਹੀਂ ਆਇਆ ਸੀ। ਨੌਕਰੀ ਦੇ ਬਦਲੇ ਜ਼ਮੀਨ ਘਪਲੇ ਦੇ ਇਸ ਮਾਮਲੇ ’ਚ ਕੁਲ 15 ਵਿਅਕਤੀਆਂ ਦੇ ਵਿਰੁੱਧ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਇਨ੍ਹਾਂ ’ਚ ਕੁਝ ਅਜਿਹੇ ਅਪਾਤਰ ਲੋਕ ਵੀ ਸ਼ਾਮਲ ਹਨ ਜਿਨ੍ਹਾਂ ਨੇ ਨੌਕਰੀ ਹਾਸਲ ਕਰਨ ਲਈ ਲਗਭਗ ਨਾਮਾਤਰ ਮੁੱਲ ’ਤੇ ਉਨ੍ਹਾਂ ਨੂੰ ਜ਼ਮੀਨ ਦਿੱਤੀ। ਇਹ ਮਾਮਲਾ 2004-2009 ਦੇ ਦਰਮਿਆਨ ਦਾ ਹੈ ਜਦੋਂ ਲਾਲੂ ਪ੍ਰਸਾਦ ਯਾਦਵ ਨੇ ਰੇਲ ਮੰਤਰੀ ਰਹਿਣ ਦੌਰਾਨ ਰੇਲਵੇ ਦੇ ਵੱਖ-ਵੱਖ ਵਿਭਾਗਾਂ ’ਚ ਗਰੁੱਪ ਡੀ ਦੀਆਂ ਨੌਕਰੀਆਂ ਦੇਣ ਦੇ ਬਦਲੇ ’ਚ ਆਪਣੇ ਪਰਿਵਾਰ ਦੇ ਵੱਖ-ਵੱਖ ਮੈਂਬਰਾਂ ਤੇ ਉਨ੍ਹਾਂ ਦੁਆਰਾ ਸੰਚਾਲਿਤ ਇਕ ਪ੍ਰਾਈਵੇਟ ਕੰਪਨੀ ਦੇ ਨਾਂ ’ਤੇ ਜ਼ਮੀਨ ਪ੍ਰਾਪਤ ਕੀਤੀ। ਇਸ ਮਾਮਲੇ ’ਚ ਜੋ ਤੱਥ ਸਾਹਮਣੇ ਆਏ ਹਨ ਉਨ੍ਹਾਂ ਦੇ ਅਨੁਸਾਰ ਘੱਟੋ-ਘੱਟ 7 ਮਾਮਲਿਆਂ ’ਚ ਰਾਬੜੀ ਦੇਵੀ, ਮੀਸਾ ਭਾਰਤੀ, ਹੇਮਾ ਯਾਦਵ, ਲਾਲੂ ਪਰਿਵਾਰ ਵੱਲੋਂ ਸੰਚਾਲਿਤ ਇਕ ਪ੍ਰਾਈਵੇਟ ਕੰਪਨੀ ਦੇ ਨਾਂ ਜ਼ਮੀਨ ਟਰਾਂਸਫਰ ਕੀਤੀ ਗਈ ਅਤੇ ਇਸ ਦੇ ਲਈ ਕੋਈ ਇਸ਼ਤਿਹਾਰ ਆਦਿ ਵੀ ਨਹੀਂ ਦਿੱਤੇ ਗਏ। ਇਸ ਤੋਂ ਪਹਿਲਾਂ ਲਾਲੂ ਪਰਿਵਾਰ ਦੇ ਤੇਜਸਵੀ ਯਾਦਵ, ਤੇਜ ਪ੍ਰਤਾਪ, ਮੀਸਾ ਭਾਰਤੀ ਅਤੇ ਮੀਸਾ ਦੇ ਪਤੀ ਸ਼ੈਲੇਸ਼ ਦਾ ਨਾਂ ਵੱਖ-ਵੱਖ ਮਾਮਲਿਆਂ ’ਚ ਆ ਚੁੱਕਾ ਹੈ। ਹੇਮਾ ਯਾਦਵ ਦਾ ਵਿਆਹ ਦਿੱਲੀ ਦੇ ਇਕ ਸਿਆਸੀ ਪਰਿਵਾਰ ’ਚ ਹੋਇਆ ਹੈ। ਉਸ ਦਾ ਪਤੀ ਵੀ ਸਿਆਸਤ ’ਚ ਸਰਗਰਮ ਹੈ।
ਸੀ. ਬੀ. ਆਈ. ਨੇ ਇਸ ਮਾਮਲੇ ’ਚ ਲਾਲੂ ਯਾਦਵ ਦੀ ਪਤਨੀ ਰਾਬੜੀ ਦੇਵੀ ਦੀ ਭੈਣ ਦੇ ਪਿੰਡ ਸੇਲਾਰਕਲਾਂ ’ਚ ਵੀ ਛਾਪੇਮਾਰੀ ਕੀਤੀ ਹੈ। ਬਿਹਾਰ ਦੇ ਸਾਬਕਾ ਉਪ-ਮੁੱਖ ਮੰਤਰੀ ਅਤੇ ਰਾਜ ਸਭਾ ਮੈਂਬਰ ਸੁਸ਼ੀਲ ਕੁਮਾਰ ਮੋਦੀ (ਭਾਜਪਾ) ਨੇ ਲਾਲੂ ਪਰਿਵਾਰ ਨੂੰ ਭ੍ਰਿਸ਼ਟਾਚਾਰ ਦਾ ਪ੍ਰਤੀਕ ਦੱਸਦੇ ਹੋਏ ਟਵੀਟ ਕੀਤਾ ਹੈ ਕਿ ‘‘ਤੁਸੀਂ ਮੈਨੂੰ ਜ਼ਮੀਨ ਦਿਓ, ਮੈਂ ਤੁਹਾਨੂੰ ਨੌਕਰੀ ਦਿਆਂਗਾ। ਇਹ ਲਾਲੂ ਦਾ ਨਾਅਰਾ ਸੀ।’’ਦੱਸਿੱਆ ਜਾਂਦਾ ਹੈ ਕਿ ਜਦੋਂ ਲਾਲੂ ਪ੍ਰਸਾਦ ਯਾਦਵ ਕੇਂਦਰੀ ਮੰਤਰੀ ਸੀ ਉਸ ਸਮੇਂ ਕਈ ਲੋਕਾਂ ਤੋਂ ਬੇਹੱਦ ਮਹਿੰਗੀ ਜ਼ਮੀਨ ਲੈ ਕੇ ਉਨ੍ਹਾਂ ਨੂੰ ਨੌਕਰੀ ਦਿੱਤੀ ਗਈ ਸੀ। ਅਜਿਹਾ ਲੱਗਦਾ ਹੈ ਕਿ ਸਾਡੇ ਦੇਸ਼ ’ਚ ਸਿਆਸਤਦਾਨ ਆਪਣੇ ਬੱਚਿਆਂ ਨੂੰ ਵਿਰਾਸਤ ’ਚ ਭਾਰੀ ਧਨ ਜਾਇਦਾਦ ਦੇ ਨਾਲ-ਨਾਲ ਭ੍ਰਿਸ਼ਟਾਚਾਰ ਅਤੇ ਸੱਤਾ ਨਾਲ ਚਿੰਬੜ ਕੇ ਰਹਿਣ ਦਾ ਸਬਕ ਵੀ ਦੇ ਰਹੇ ਹਨ। ਲਾਲੂ ਯਾਦਵ ਦੀ ਧੀ ਮੀਸਾ ਭਾਰਤੀ ਵੱਲੋਂ ਰਾਜ ਸਭਾ ਲਈ ਨਾਮਜ਼ਦਗੀ ਭਰਵਾਉਣਾ ਇਸੇ ਦਾ ਇਕ ਹਿੱਸਾ ਹੈ। ਬੰਗਾਲ ਦੇ ਸਿੱਖਿਆ ਮੰਤਰੀ ਤੇ ਸਾਬਕਾ ਰੇਲ ਮੰਤਰੀ ਦੀਆਂ ਔਲਾਦਾਂ ਦੇ ਭ੍ਰਿਸ਼ਟਾਚਾਰ ਦੀਆਂ ਉਕਤ ਉਦਾਹਰਣਾਂ ਤੋਂ ਸਪੱਸ਼ਟ ਹੈ ਕਿ ਦੇਸ਼ ’ਚ ਭ੍ਰਿਸ਼ਟਾਚਾਰ ਦੀਆਂ ਜੜ੍ਹਾਂ ਕਿਸ ਤਰ੍ਹਾਂ ਡੂੰਘੀਆਂ ਹੋ ਚੁੱਕੀਆਂ ਹਨ। ਜੇਕਰ ਸਾਡੇ ਸਿਆਸਤਦਾਨ ਹੀ ਇਸ ਤਰ੍ਹਾਂ ਦੀ ਉਦਾਹਰਣ ਪੇਸ਼ ਕਰਨਗੇ ਤਾਂ ਫਿਰ ਦੇਸ਼ ਦੇ ਲੋਕ ਭ੍ਰਿਸ਼ਟ ਆਚਰਨ ’ਚ ਕਿਉਂ ਨਾ ਸ਼ਾਮਲ ਹੋਣਗੇ।
ਵਿਜੇ ਕੁਮਾਰ
ਪਾਕਿ ਸਿਆਸੀ ਅਸਥਿਰਤਾ ਨਾਲ ਖਾਨਾਜੰਗੀ ਦੇ ਨੇੜੇ ਮਹਿੰਗਾਈ ਵਧਣ, ਵਿਦੇਸ਼ੀ ਮੁਦਰਾ ਘਟਣ ਨਾਲ ਅਰਥਵਿਵਸਥਾ ਚੌਪਟ
NEXT STORY