ਜੀ. ਬੀ. ਸਿੰਘ
ਹਿਮਾਚਲ ਪ੍ਰਦੇਸ਼ ਨੂੰ ਵਿਸ਼ਵ ਪੱਧਰ ’ਤੇ ਨਿਵੇਸ਼ਕਾਂ ਦਾ ਪਸੰਦੀਦਾ ਸਥਾਨ ਬਣਾਉਣ ਦਾ ਸੂਬੇ ਦੇ ਮੁੱਖ ਮੰਤਰੀ ਜੈਰਾਮ ਠਾਕੁਰ ਦਾ ਸੁਪਨਾ ਅਤੇ ਵਿਜ਼ਨ ਹੁਣ ਮੂਰਤ ਰੂਪ ਲੈਂਦਾ ਦਿਸ ਰਿਹਾ ਹੈ। ਉਹ ਇਸ ਸੂਬੇ ਦੇ ਪਹਿਲੇ ਅਜਿਹੇ ਮੁੱਖ ਮੰਤਰੀ ਹਨ, ਜਿਨ੍ਹਾਂ ਨੇ ਨਵੀਂ ਦਿੱਲੀ ਸਥਿਤ 50 ਤੋਂ ਵੱਧ ਦੇਸ਼ਾਂ ਦੇ ਡਿਪਲੋਮੈਟਾਂ ਦੇ ਨਾਲ ਰੂ-ਬਰੂ ਹੋ ਕੇ ਉਨ੍ਹਾਂ ਨੂੰ ਆਪਣੇ-ਆਪਣੇ ਮੁਲਕ ਦੇ ਉਦਯੋਗਿਕ ਘਰਾਣਿਆਂ ਅਤੇ ਨਿਵੇਸ਼ਕਾਂ ਨੂੰ ਹਿਮਾਚਲ ਪ੍ਰਦੇਸ਼ ’ਚ ਨਿਵੇਸ਼ ਲਈ ਉਤਸ਼ਾਹਿਤ ਕਰਨ ਦਾ ਸੱਦਾ ਵੀ ਦਿੱਤਾ ਅਤੇ ਉਨ੍ਹਾਂ ਨੂੰ ਇਸ ਪਹਾੜੀ ਸੂਬੇ ਦੀਆਂ ਖੂਬੀਆਂ ਅਤੇ ਆਪਣੀ ਸਰਕਾਰ ਦੀਆਂ ਯੋਜਨਾਵਾਂ ਵੀ ਦੱਸੀਆਂ। ਇਨ੍ਹਾਂ ਡਿਪਲੋਮੈਟਾਂ ਨੇ ਜਿਸ ਤਰ੍ਹਾਂ ਮੁੱਖ ਮੰਤਰੀ ਦੀ ਪੇਸ਼ਕਸ਼ ਨੂੰ ਲੈ ਕੇ ਉਤਸ਼ਾਹ ਦਿਖਾਇਆ, ਉਸ ਨਾਲ ਹਿਮਾਚਲ ਇਕ ਨਵਾਂ ਇਤਿਹਾਸ ਰਚਣ ਲਈ ਅੱਗੇ ਵਧ ਰਿਹਾ ਹੈ।
ਹਿਮਾਚਲ ਪ੍ਰਦੇਸ਼ ਨੂੰ ਉਦਯੋਗਿਕ ਹੱਬ ਅਤੇ ਨਿਵੇਸ਼ਕਾਂ ਦਾ ਪਸੰਦੀਦਾ ਸਥਾਨ ਬਣਾਉਣ ਦੀਆਂ ਗੱਲਾਂ ਤਾਂ ਸਾਲਾਂ ਤੋਂ ਹੁੰਦੀਆਂ ਆਈਆਂ ਹਨ ਪਰ ਪਹਿਲੀ ਵਾਰ ਸੂਬੇ ਦੇ ਕਿਸੇ ਮੁੱਖ ਮੰਤਰੀ ਨੇ ਦ੍ਰਿੜ੍ਹ ਸਿਆਸੀ ਇੱਛਾ-ਸ਼ਕਤੀ ਦਾ ਸਬੂਤ ਦਿੰਦੇ ਹੋਏ ਜ਼ਮੀਨੀ ਪੱਧਰ ’ਤੇ ਸੰਜੀਦਾ ਪਹਿਲ ਕੀਤੀ ਹੈ ਅਤੇ ਪਹਿਲੀ ਵਾਰ ਪੂਰੀ ਤਿਆਰੀ ਨਾਲ ਸੂਬਾਈ ਸਰਕਾਰ ਨੇ ਨਿਵੇਸ਼ਕਾਂ ਤਕ ਪਹੁੰਚਣ ਦਾ ਯਤਨ ਕੀਤਾ ਹੈ।
ਹਿਮਾਚਲ ਪ੍ਰਦੇਸ਼ ’ਚ ਸੱਤਾ ਸੰਭਾਲਣ ਦੇ ਪਹਿਲੇ ਦਿਨ ਤੋਂ ਹੀ ਜੈਰਾਮ ਠਾਕੁਰ ਨੇ ਆਪਣੇ ਇਰਾਦੇ ਸਪੱਸ਼ਟ ਕਰ ਦਿੱਤੇ ਸਨ। ਦੇਸ਼-ਵਿਦੇਸ਼ ਦੇ ਉਦਯੋਗਿਕ ਨਕਸ਼ੇ ’ਤੇ ਹਿਮਾਚਲ ਪ੍ਰਦੇਸ਼ ਨੂੰ ਉਭਾਰਨ ਲਈ ਅਫਸਰਸ਼ਾਹੀ ਨੂੰ ਕਾਰਗਰ ਮਾਸਟਰ ਪਲਾਨ ਬਣਾਉਣ ਦੇ ਕੰਮ ’ਤੇ ਲਾਇਆ ਅਤੇ ਇਕ ਤਰ੍ਹਾਂ ਨਾਲ ਇਸ ਸੁਪਨੇ ਨੂੰ ਸਾਕਾਰ ਕਰਨ ਦੀ ਕਮਾਨ ਪੂਰੀ ਤਰ੍ਹਾਂ ਆਪਣੇ ਹੱਥ ’ਚ ਲੈ ਲਈ। ਆਪਣੀ ਸਰਕਾਰ ਦਾ ਇਕ ਸਾਲ ਦਾ ਕਾਰਜਕਾਲ ਪੂਰਾ ਹੋਣ ਤੋਂ ਬਾਅਦ ਮੁੱਖ ਮੰਤਰੀ ਜੈਰਾਮ ਠਾਕੁਰ ਸੂਬੇ ’ਚ ਨਿਵੇਸ਼ ਨੂੰ ਸੱਦਾ ਦੇਣ ਦੇ ਮੋਰਚੇ ’ਤੇ ਪੂਰੀ ਤਰ੍ਹਾਂ ਡਟ ਗਏ। ਇਸ ਸਾਲ 30-31 ਜਨਵਰੀ ਨੂੰ ਬੈਂਗਲੁਰੂ ਅਤੇ ਹੈਦਰਾਬਾਦ ’ਚ ਰੋਡ ਸ਼ੋਅ ਕਰ ਕੇ ਦੇਸ਼ ਦੇ ਵੱਡੇ ਉਦਯੋਗਿਕ ਘਰਾਣਿਆਂ ਨੂੰ ਆਕਰਸ਼ਿਤ ਕਰਨ ਦਾ ਸਿਲਸਿਲਾ ਉਨ੍ਹਾਂ ਨੇ ਸ਼ੁਰੂ ਕੀਤਾ। ਫਿਰ ਜੂਨ ਮਹੀਨੇ ’ਚ ਮੁੱਖ ਮੰਤਰੀ ਜਰਮਨੀ, ਨੀਦਰਲੈਂਡ ਅਤੇ ਦੁਬਈ ’ਚ ਰੋਡ ਸ਼ੋਅ ਕਰ ਕੇ ਉਥੋਂ ਦੇ ਉੱਦਮੀਆਂ ਅਤੇ ਉਦਯੋਗਿਕ ਘਰਾਣਿਆਂ ਨਾਲ ਰੂ-ਬਰੂ ਹੋਏ। ਇਨ੍ਹਾਂ ਦੇਸ਼ਾਂ ਦੇ ਉੱਦਮੀਆਂ ਅਤੇ ਲੀਡਰਸ਼ਿਪ ਨੇ ਮੁੱਖ ਮੰਤਰੀ ਦੀ ਖੁੱਲ੍ਹੀ ਸੋਚ ਅਤੇ ਸੂਬੇ ਦੀ ਨਿਵੇਸ਼ ਮਿੱਤਰ ਉਦਯੋਗਿਕ ਨੀਤੀ ਦੀ ਖੁੱਲ੍ਹ ਕੇ ਸ਼ਲਾਘਾ ਕੀਤੀ।
ਹਾਲ ਹੀ ’ਚ ਮੁੱਖ ਮੰਤਰੀ ਜੈਰਾਮ ਠਾਕੁਰ ਨਵੀਂ ਦਿੱਲੀ ’ਚ 50 ਤੋਂ ਵੱਧ ਦੇਸ਼ਾਂ ਦੇ ਡਿਪਲੋਮੈਟਾਂ ਨਾਲ ਰੂ-ਬਰੂ ਹੋਣ ਤੋਂ ਇਲਾਵਾ ਕਈ ਉਦਯੋਗਿਕ ਘਰਾਣਿਆਂ ਨਾਲ ਵੀ ਵਨ-ਟੂ-ਵਨ ਮਿਲੇ ਅਤੇ ਹਿਮਾਚਲ ’ਚ ਨਿਵੇਸ਼ ਲਈ ਕਈ ਸਮਝੌਤਾ ਮੈਮੋਰੰਡਮਜ਼ ’ਤੇ ਦਸਤਖਤ ਤੋਂ ਤੁਰੰਤ ਬਾਅਦ ਗੁਜਰਾਤ ’ਚ ਰੋਡ ਸ਼ੋਅ ਲਈ ਨਿਕਲੇ ਅਤੇ ਉਥੇ ਵੀ ਉੱਦਮੀਆਂ ਦਾ ਜ਼ਬਰਦਸਤ ਰਿਸਪੌਂਸ ਮਿਲਿਆ। ਮੁੱਖ ਮੰਤਰੀ ਦੀ ਇਸ ਕਾਰਗਰ ਪਹਿਲ ਅਤੇ ਦੇਸ਼-ਵਿਦੇਸ਼ ਦੇ ਵੱਡੇ ਉਦਯੋਗਿਕ ਘਰਾਣਿਆਂ ਵਲੋਂ ਦਿਖਾਏ ਗਏ ਉਤਸ਼ਾਹ ਦੀ ਧਮਕ ਨਾ ਸਿਰਫ ਦੇਸ਼ ਦੇ ਉਦਯੋਗਿਕ ਦ੍ਰਿਸ਼ ’ਚ ਸੁਣੀ ਜਾ ਰਹੀ ਹੈ ਸਗੋਂ ਸੂਬੇ ਦੇ ਉਦਯੋਗਿਕ ਹੱਬ ਦੇ ਰੂਪ ’ਚ ਉੱਭਰਨ ਦੀਆਂ ਸਰਕਾਰ ਦੀਆਂ ਉਮੀਦਾਂ ਵੀ ਪ੍ਰਵਾਨ ਚੜ੍ਹਦੀਆਂ ਦਿਸ ਰਹੀਆਂ ਹਨ।
ਇਸ ਸਾਲ 7 ਅਤੇ 8 ਨਵੰਬਰ ਨੂੰ ਧਰਮਸ਼ਾਲਾ ’ਚ ਗਲੋਬਲ ਇਨਵੈਸਟਰ ਮੀਟ ਹੋਣੀ ਹੈ ਅਤੇ ਇਸ ਦੇ ਲਈ ਹੁਣੇ ਤੋਂ ਪੂਰਾ ਮਾਹੌਲ ਤਿਆਰ ਹੋ ਗਿਆ ਹੈ। ਸੂਬਾਈ ਸਰਕਾਰਾਂ ਨੇ 85 ਹਜ਼ਾਰ ਕਰੋੜ ਦੇ ਨਿਵੇਸ਼ ਨਾਲ ਹਜ਼ਾਰਾਂ ਨੌਜਵਾਨਾਂ ਨੂੰ ਰੋਜ਼ਗਾਰ ਦੇਣ ਦਾ ਟੀਚਾ ਰੱਖਿਆ ਹੈ ਅਤੇ ਹੁਣ ਤਕ ਕਈ ਹਜ਼ਾਰ ਕਰੋੜ ਦੇ ਐੱਮ. ਓ. ਯੂ. ’ਤੇ ਵੱਖ-ਵੱਖ ਉਦਯੋਗਿਕ ਘਰਾਣਿਆਂ ਦੇ ਨਾਲ ਦਸਤਖਤ ਹੋਣੇ ਕੋਈ ਮਾਮੂਲੀ ਉਪਲੱਬਧੀ ਨਹੀਂ ਹੈ।
ਅਜਿਹਾ ਪਹਿਲੀ ਵਾਰ ਹੋਇਆ ਹੈ ਕਿ ਸੂਬੇ ਦੇ ਕਿਸੇ ਮੁੱਖ ਮੰਤਰੀ ਨੇ ਆਪਣੀ ਸੋਚ, ਸੰਕਲਪ, ਪ੍ਰਤੀਬੱਧਤਾ ਅਤੇ ਦ੍ਰਿੜ੍ਹ ਇੱਛਾ-ਸ਼ਕਤੀ ਨੂੰ ਧਰਾਤਲ ’ਤੇ ਦਿਖਾਉਂਦੇ ਹੋਏ ਨਾ ਸਿਰਫ ਹਿਮਾਚਲ ਨੂੰ ਦੇਸ਼ ਦਾ ਉਦਯੋਗਿਕ ਹੱਬ ਬਣਾਉਣ ਦਾ ਬੀੜਾ ਚੁੱਕਿਆ ਹੈ ਸਗੋਂ ਖੁਦ ਨਿਵੇਸ਼ਕਾਂ ਨਾਲ ਰੂ-ਬਰੂ ਹੋ ਕੇ ਉਨ੍ਹਾਂ ਨੇ ਬੜੀ ਗਰਮਜੋਸ਼ੀ ਨਾਲ ਹਿਮਾਚਲ ਪ੍ਰਦੇਸ਼ ’ਚ ਨਿਵੇਸ਼ ਦਾ ਸੱਦਾ ਦਿੱਤਾ ਹੈ ਅਤੇ ਸੂਬਾਈ ਸਰਕਾਰ ਵਲੋਂ ਉਨ੍ਹਾਂ ਨੂੰ ਪੂਰੇ ਸਹਿਯੋਗ ਦਾ ਭਰੋਸਾ ਦਿਵਾਇਆ ਹੈ।
ਹਾਈਕਮਾਨ ’ਚ ਵਧਿਆ ਰੁਤਬਾ, ਕਾਂਗਰਸ ਕੋਮਾ ’ਚ
ਲੋਕ ਸਭਾ ਚੋਣਾਂ ’ਚ ਹਿਮਾਚਲ ਦੀਆਂ 4 ਸੀਟਾਂ ’ਤੇ ਜਿਸ ਤਰ੍ਹਾਂ ਧਮਾਕੇਦਾਰ ਜਿੱਤ ਦੇ ਨਾਲ ਭਾਜਪਾ ਵੋਟ ਫੀਸਦੀ ਦੇ ਮਾਮਲੇ ’ਚ ਦੇਸ਼ ਭਰ ’ਚ ਅੱਵਲ ਰਹੀ ਹੈ, ਉਸ ਨਾਲ ਕੇਂਦਰੀ ਲੀਡਰਸ਼ਿਪ ਦੀ ਸ਼ਾਬਾਸ਼ ਹਾਸਲ ਕਰਨ ਦੇ ਨਾਲ-ਨਾਲ ਮੁੱਖ ਮੰਤਰੀ ਇਸ ਸੂਬੇ ’ਚ ਸਟਾਰ ਰਾਜਨੇਤਾ ਦੇ ਰੂਪ ’ਚ ਵੀ ਮਜ਼ਬੂਤੀ ਨਾਲ ਸਥਾਪਿਤ ਹੋਏ ਹਨ, ਜਦਕਿ ਸੂਬੇ ਦੇ ਸਾਰੇ 68 ਵਿਧਾਨ ਸਭਾ ਖੇਤਰਾਂ ’ਚ ਕਾਂਗਰਸ ਮੂਧੇ ਮੂੰਹ ਡਿਗ ਕੇ ਹੁਣ ਤਕ ਕੋਮਾ ’ਚ ਹੈ। ਕਾਂਗਰਸ ਦੇ ਮੁੱਖ ਨੇਤਾਵਾਂ ਦੇ ਹਲਕਿਆਂ ’ਚ ਵੀ ਜਿਸ ਤਰ੍ਹਾਂ ਭਾਜਪਾ ਨੇ ਭਾਰੀ-ਭਰਕਮ ਲੀਡ ਹਾਸਲ ਕੀਤੀ ਹੈ, ਉਸ ਨਾਲ ਅਜਿਹੇ ਨੇਤਾਵਾਂ ਦੀ ਜ਼ਮੀਨ ਵੀ ਹਿੱਲੀ ਹੋਈ ਹੈ।
ਸਿਆਸੀ ਆਬਜ਼ਰਵਰ ਵੀ ਮੰਨਦੇ ਹਨ ਕਿ ਮੋਦੀ ਲਹਿਰ ਦੇ ਨਾਲ-ਨਾਲ ਇਸ ਪਹਾੜੀ ਸੂਬੇ ’ਚ ਮੁੱਖ ਮੰਤਰੀ ਜੈਰਾਮ ਠਾਕੁਰ ਦੀ ਸਾਫ-ਸੁਥਰੀ ਦਿੱਖ ਅਤੇ ਜ਼ਮੀਨੀ ਪੱਧਰ ’ਤੇ ਲਾਗੂ ਕੀਤੀਆਂ ਗਈਆਂ ਉਨ੍ਹਾਂ ਦੀਆਂ ਯੋਜਨਾਵਾਂ ਨੇ ਵੀ ਜਨਤਾ ’ਤੇ ਆਪਣਾ ਡੂੰਘਾ ਅਸਰ ਦਿਖਾਇਆ ਹੈ। ਇਹੀ ਕਾਰਣ ਹੈ ਕਿ ਭਾਜਪਾ ਲੀਡਰਸ਼ਿਪ ਸਾਹਮਣੇ ਵੀ ਜੈਰਾਮ ਠਾਕੁਰ ਦਾ ਕੱਦ ਅਤੇ ਰੁਤਬਾ ਵਧਿਆ ਹੈ। ਇਸ ਸੂਬੇ ਦੀ ਰਾਜਨੀਤੀ ’ਚ ਵੀ ਇਹ ਸਾਫ ਸੰਕੇਤ ਚਲੇ ਗਏ ਹਨ ਕਿ ਹਿਮਾਚਲ ਪ੍ਰਦੇਸ਼ ਭਾਜਪਾ ’ਚ ਹੁਣ ਜੈਰਾਮ ਠਾਕੁਰ ਹੀ ‘ਆਲ ਇਨ ਆਲ’ ਹਨ ਅਤੇ ਮੋਦੀ ਸਰਕਾਰ ਅਤੇ ਭਾਜਪਾ ਹਾਈਕਮਾਨ ਦਾ ਪੂਰਾ ਆਸ਼ੀਰਵਾਦ ਉਨ੍ਹਾਂ ਨੂੰ ਹਾਸਲ ਹੈ।
ਉਪ-ਚੋਣਾਂ ਦੀ ਬਿੜਕ ਅਤੇ ਭਾਜਪਾ ਆਤਮ-ਵਿਸ਼ਵਾਸ ਵਿਚ
ਇਸ ਵਾਰ ਲੋਕ ਸਭਾ ਚੋਣਾਂ ’ਚ ਭਾਜਪਾ ਨੇ ਦੋ ਨਿਵਰਤਮਾਨ ਸੰਸਦ ਮੈਂਬਰਾਂ ਦੀਆਂ ਟਿਕਟਾਂ ਕੱਟ ਕੇ ਆਪਣੇ ਦੋ ਵਿਧਾਇਕ ਮੈਦਾਨ ’ਚ ਉਤਾਰੇ ਸਨ ਅਤੇ ਦੋਵੇਂ ਹੀ ਜੇਤੂ ਰਹੇ। ਸਿਰਮੌਰ ਜ਼ਿਲੇ ਦੇ ਪੱਛਾਦ ਤੋਂ ਸੁਰੇਸ਼ ਕਸ਼ਯਪ ਅਤੇ ਧਰਮਸ਼ਾਲਾ ਤੋਂ ਕਿਸ਼ਨ ਕਪੂਰ, ਜੋ ਜੈਰਾਮ ਠਾਕੁਰ ਮੰਤਰੀ ਮੰਡਲ ’ਚ ਮੰਤਰੀ ਵੀ ਸਨ, ਵਲੋਂ ਸੰਸਦ ਮੈਂਬਰ ਚੁਣੇ ਜਾਣ ਤੋਂ ਬਾਅਦ ਇਨ੍ਹਾਂ ਦੋਵਾਂ ਵਿਧਾਨ ਸਭਾ ਖੇਤਰਾਂ ’ਚ ਹੋਣ ਵਾਲੀਆਂ ਉਪ-ਚੋਣਾਂ ਦੀ ਬਿੜਕ ਹੁਣੇ ਤੋਂ ਸੁਣਾਈ ਦੇਣ ਲੱਗੀ ਹੈ। ਲੋਕ ਸਭਾ ਚੋਣਾਂ ’ਚ ਧਮਾਕੇਦਾਰ ਜਿੱਤ ਹਾਸਲ ਕਰਨ ਤੋਂ ਬਾਅਦ ਹੀ ਭਾਜਪਾ ਵਰਕਰਾਂ ਦਾ ਉਤਸ਼ਾਹ 7ਵੇਂ ਆਸਮਾਨ ’ਤੇ ਹੈ, ਜਦਕਿ ਕਾਂਗਰਸ ’ਚ ਨਿਰਾਸ਼ਾ ਦਾ ਆਲਮ ਹੈ। ਅਜਿਹੀ ਹਾਲਤ ’ਚ ਮੁੱਖ ਮੰਤਰੀ ਜੈਰਾਮ ਠਾਕੁਰ ਇਨ੍ਹਾਂ ਦੋਵਾਂ ਸੀਟਾਂ ਨੂੰ ਲੈ ਕੇ ਨਿਸ਼ਚਿੰਤ ਹਨ।
'ਜ਼ਿਆਦਾ ਆਕਰਸ਼ਕ' ਦਿਖਾਉਣ ਲਈ ਸੱਪ 'ਤੇ ਅੱਤਿਆਚਾਰ
NEXT STORY 
