ਨਸ਼ੇ ਦੀ ਆਦਤ ਨਾਲ ਜਿੱਥੇ ਦੇਸ਼ ਦੇ ਨੌਜਵਾਨਾਂ ਦੀ ਸਿਹਤ ਖਰਾਬ ਹੋ ਰਹੀ ਹੈ, ਉੱਥੇ ਹੀ ਇਸ ਦੀ ਵਰਤੋਂ ਨਾਲ ਹੋਣ ਵਾਲੀਆਂ ਮੌਤਾਂ ਕਾਰਨ ਬਜ਼ੁਰਗ ਮਾਤਾ-ਪਿਤਾ ਦਾ ਸਹਾਰਾ ਖੁੱਸ ਰਿਹਾ ਹੈ, ਬੱਚੇ ਅਨਾਥ ਹੋ ਰਹੇ ਹਨ ਅਤੇ ਔਰਤਾਂ ਦੀ ਮਾਂਗ ਵੀ ਸੁੰਨੀ ਹੋ ਰਹੀ ਹੈ।
ਤ੍ਰਾਸਦੀ ਇਹ ਹੈ ਕਿ ਇਕ ਪਾਸੇ ਨਸ਼ੇੜੀ ਵਧੇਰੇ ਨਸ਼ੇ ਦੀ ਵਰਤੋਂ ਕਰ ਕੇ ਖੁਦ ਜਾਨ ਗੁਆ ਰਹੇ ਹਨ, ਤਾਂ ਦੂਜੇ ਪਾਸੇ ਨਸ਼ੇ ਦੇ ਮਾੜੇ ਪ੍ਰਭਾਵਾਂ ਕਰ ਕੇ ਹਿੰਸਕ ਹੋ ਕੇ ਜਬਰ-ਜ਼ਨਾਹ, ਚੋਰੀਆਂ, ਕਤਲ ਅਤੇ ਲੁੱਟਮਾਰ ਤੱਕ ਕਰ ਰਹੇ ਹਨ, ਜਿਸ ਦੀਆਂ ਇਸੇ ਸਾਲ ਦੀਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
* 20 ਜਨਵਰੀ ਨੂੰ ਪੁਲਸ ਨੇ ‘ਗੁਰੂਗ੍ਰਾਮ’ (ਹਰਿਆਣਾ) ਦੇ ਇਕ ਮਕਾਨ ’ਚ ਦਾਖਲ ਹੋ ਕੇ ਉੱਥੋਂ ਮੋਬਾਈਲ ਫੋਨ, ਗਹਿਣੇ ਅਤੇ ਨਕਦੀ ਚੋਰੀ ਕਰਨ ਦੇ ਦੋਸ਼ ਹੇਠ 4 ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਉਨ੍ਹਾਂ ਚਾਰਾਂ ਨੇ ਕਬੂਲ ਕੀਤਾ ਕਿ ਉਹ ਆਪਣੀ ਨਸ਼ੇ ਦੀ ਰੋਜ਼ਾਨਾ ਖੁਰਾਕ ਅਤੇ ਹੋਰ ਲੋੜਾਂ ਪੂਰੀਆਂ ਕਰਨ ਲਈ ਚੋਰੀ ਕਰਦੇ ਸਨ।
* 20 ਮਾਰਚ ਨੂੰ ‘ਉੱਤਰ-ਪੱਛਮੀ ਦਿੱਲੀ’ ’ਚ ਪੁਲਸ ਨੇ ਆਪਣੀ ਨਸ਼ੇ ਦੀ ਆਦਤ ਪੂਰੀ ਕਰਨ ਲਈ ਇਕ ਮਕਾਨ ’ਚੋਂ 90 ਲੱਖ ਰੁਪਏ ਦੀ ਕੀਮਤ ਦੇ ਸੋਨੇ ਅਤੇ ਡਾਇਮੰਡ ਦੇ ਗਹਿਣੇ ਚੋਰੀ ਕਰਨ ਦੇ ਦੋਸ਼ ਹੇਠ ‘ਸੰਨੀ ਸਰਕਾਰ’ ਨਾਂ ਦੇ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕੀਤਾ।
* 4 ਅਪ੍ਰੈਲ ਨੂੰ ‘ਬੈਂਗਲੁਰੂ’ (ਕਰਨਾਟਕ) ਪੁਲਸ ਨੇ ਇਕ ਨਸ਼ਾ ਮੁਕਤੀ ਕੇਂਦਰ ਤੋਂ ਭੱਜੇ ਹੋਏ 2 ਨਸ਼ੇੜੀਆਂ ’ਚੋਂ ਇਕ ਨੂੰ ਗ੍ਰਿਫ਼ਤਾਰ ਕੀਤਾ। ਨਸ਼ਾ ਮੁਕਤੀ ਕੇਂਦਰ ਦੇ ਸੰਚਾਲਕ ’ਤੇ ਹਮਲਾ ਕਰ ਕੇ ਭੱਜੇ ਦੋਵੇਂ ਨਸ਼ੇੜੀ ਇਕ ਆਟੋ ਚਾਲਕ ’ਤੇ ਹਮਲਾ ਕਰ ਕੇ ਆਟੋ ਵੀ ਲੁੱਟ ਕੇ ਲੈ ਗਏ ਸਨ, ਜੋ ਉਨ੍ਹਾਂ ਨੇ 5000 ਰੁਪਏ ’ਚ ਹੀ ਵੇਚ ਦਿੱਤਾ ਸੀ।
* 17 ਅਪ੍ਰੈਲ ਨੂੰ ‘ਕੋਰਬਾ’ (ਛੱਤੀਸਗੜ੍ਹ) ’ਚ ਬੀ-ਫਾਰਮੇਸੀ ਦੀ ਪੜ੍ਹਾਈ ਕਰਨ ਵਾਲੇ ਇਕ ਨੌਜਵਾਨ ਨੂੰ ਆਪਣੀ ਨਸ਼ੇ ਦੀ ਆਦਤ ਪੂਰੀ ਕਰਨ ਲਈ ਵੱਖ-ਵੱਖ ਮਕਾਨਾਂ ਅਤੇ ਦੁਕਾਨਾਂ ’ਚ ਚੋਰੀਆਂ ਕਰਨ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ।
* 30 ਮਈ ਨੂੰ ‘ਨਾਗਪੁਰ’ (ਮਹਾਰਾਸ਼ਟਰ) ਦੇ ‘ਕਲਾਮਨਾ’ ਥਾਣੇ ਦੀ ਪੁਲਸ ਨੇ ਨਸ਼ੇ ਲਈ ਚੋਰੀਆਂ ਕਰਨ ਵਾਲੇ ਇਕ ਗਿਰੋਹ ਦੇ 2 ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕਰ ਕੇ ਉਨ੍ਹਾਂ ਕੋਲੋਂ ਸੋਨੇ-ਚਾਂਦੀ ਦੇ ਗਹਿਣੇ, ਲੈਪਟਾਪ ਅਤੇ ਹੋਰ ਕੀਮਤੀ ਸਾਮਾਨ ਬਰਾਮਦ ਕੀਤਾ।
* 23 ਜੂਨ ਨੂੰ ‘ਸ਼੍ਰੀਗੰਗਾਨਗਰ’ (ਰਾਜਸਥਾਨ) ’ਚ ਇਕ ਨਸ਼ੇੜੀ ਈ-ਰਿਕਸ਼ਾ ਚਾਲਕ ਨੇ ਇਕ 13 ਸਾਲਾ ਮਾਸੂਮ ਬੱਚੀ ਨੂੰ ਅਗਵਾ ਕਰ ਕੇ ਇਕ ਹੋਟਲ ’ਚ ਵੇਚ ਦਿੱਤਾ, ਜਿੱਥੇ 5 ਦਿਨਾਂ ਤੱਕ ਉਸ ਨੂੰ ਬੰਧਕ ਬਣਾ ਕੇ 32 ਵਿਅਕਤੀਆਂ ਨੇ ਸਮੂਹਿਕ ਜਬਰ-ਜ਼ਨਾਹ ਕੀਤਾ।
* 10 ਜੁਲਾਈ ਨੂੰ ‘ਪਾਲਕੁਰਥੀ’ (ਤੇਲੰਗਾਨਾ) ’ਚ ਸ਼ਰਾਬ ਦੇ ਨਸ਼ੇ ’ਚ ਧੁੱਤ ‘ਵੈਂਕੰਮਾ’ ਨਾਂ ਦਾ ਸ਼ਰਾਬੀ ਬੱਸ ਅੱਡੇ ’ਤੇ ਖੜ੍ਹੀ ਟ੍ਰਾਂਸਪੋਰਟ ਕਾਰਪੋਰੇਸ਼ਨ ਦੀ ਬੱਸ ਚੋਰੀ ਕਰ ਕੇ 21 ਕਿਲੋਮੀਟਰ ਤੱਕ ਲੈ ਗਿਆ, ਜਿੱਥੇ ਪੁਲਸ ਨੇ ਉਸ ਨੂੰ ਫੜ ਲਿਆ।
* 22 ਜੁਲਾਈ ਨੂੰ ‘ਸੀਤਾਪੁਰ’ (ਉੱਤਰ ਪ੍ਰਦੇਸ਼) ’ਚ ਨਸ਼ੇ ’ਚ ਧੁੱਤ ਇਕ ਨੌਜਵਾਨ ਇਕ 5 ਸਾਲਾ ਮਾਸੂਮ ਨਾਲ ਜਬਰ-ਜ਼ਨਾਹ ਕਰ ਕੇ ਫਰਾਰ ਹੋ ਗਿਆ। ਲਹੂ-ਲੁਹਾਨ ਬੱਚੀ ਨੂੰ ਇਲਾਜ ਲਈ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ ਹੈ।
* 27 ਜੁਲਾਈ ਨੂੰ ‘ਬਹਿਰੋੜ’ (ਰਾਜਸਥਾਨ) ’ਚ ਇਕ ਇੰਜੀਨੀਅਰ ਨੇ ਸ਼ਰਾਬ ਦੇ ਨਸ਼ੇ ’ਚ ਆਪਣੀ ਪਤਨੀ ਦੇ ਚਰਿੱਤਰ ’ਤੇ ਸ਼ੱਕ ਕਰਦੇ ਹੋਏ 2 ਦਿਨ ਤੱਕ ਉਸ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕਰਨ ਤੋਂ ਬਾਅਦ ਗਲਾ ਘੁੱਟ ਕੇ ਹੱਤਿਆ ਕਰ ਦਿੱਤੀ।
* 28 ਜੁਲਾਈ ਨੂੰ ‘ਰਾਏਪੁਰ’ (ਮੱਧ ਪ੍ਰਦੇਸ਼) ’ਚ ਇਕ ਸ਼ਰਾਬੀ ਨੌਜਵਾਨ ਨੂੰ ਥਾਣੇ ਦੇ ਬਾਹਰ ਖੜ੍ਹੀ ਪੁਲਸ ਦੀ ਬੋਲੈਰੋ ਗੱਡੀ ਚੋਰੀ ਕਰਨ ਅਤੇ ਬਾਜ਼ਾਰ ’ਚ ਬਹੁਤ ਲਾਪਰਵਾਹੀ ਨਾਲ ਭਜਾ ਕੇ 6 ਵਿਅਕਤੀਆਂ ਨੂੰ ਜ਼ਖਮੀ ਕਰ ਦੇਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ।
* 28 ਜੁਲਾਈ ਨੂੰ ਹੀ ‘ਜੈਪੁਰ’ (ਰਾਜਸਥਾਨ) ਦੇ ‘ਬਿੰਦਾਯਕਾ’ ’ਚ ਕੁਝ ਦੋਸਤਾਂ ਨੇ ਸ਼ਰਾਬ ਪਾਰਟੀ ਦਾ ਖਰਚਾ ਉਠਾਉਣ ਨੂੰ ਲੈ ਕੇ ਹੋਏ ਝਗੜੇ ’ਚ ਆਪਣੇ ਹੀ ਇਕ ਦੋਸਤ ‘ਦਿਨੇਸ਼’ ਉਰਫ਼ ‘ਦਰਸ਼ਨ’ ਦੀ ਗਲਾ ਘੁੱਟ ਕੇ ਹੱਤਿਆ ਕਰ ਦਿੱਤੀ।
* 29 ਜੁਲਾਈ ਨੂੰ ‘ਪਲਾਮੂ’ (ਝਾਰਖੰਡ) ’ਚ ਇਕ ਕਲਯੁਗੀ ਪੁੱਤਰ ਨੇ ਸ਼ਰਾਬ ਲਈ ਪੈਸੇ ਨਾ ਦੇਣ ’ਤੇ ਆਪਣੀ ਬਜ਼ੁਰਗ ਮਾਂ ਨੂੰ ਕੁਹਾੜੀ ਨਾਲ ਵੱਢ ਦਿੱਤਾ।
* 30 ਜੁਲਾਈ ਨੂੰ ‘ਹਿਸਾਰ’ ਦੀ ਪੁਲਸ ਨੇ ਇਕ ਨਸ਼ੇੜੀ ਨੂੰ ਨਸ਼ੇ ਦੀ ਆਦਤ ਪੂਰੀ ਕਰਨ ਲਈ ਆਪਣੀ ਭੈਣ ਦਾ ਮੰਗਲਸੂਤਰ ਚੋਰੀ ਕਰ ਕੇ 50,000 ਰੁਪਏ ’ਚ ਗਹਿਣੇ ਰੱਖਣ ਦੇ ਦੋਸ਼ ’ਚ ਗ੍ਰਿਫ਼ਤਾਰ ਕੀਤਾ।
* ਅਤੇ ਹੁਣ 31 ਜੁਲਾਈ ਨੂੰ ‘ਕੋਲਮ’ (ਕੇਰਲ) ’ਚ ਸ਼ਰਾਬ ਪੀਣ ਦੌਰਾਨ ਕੁਝ ਦੋਸਤਾਂ ਵਿਚਾਲੇ ਹੋਏ ਝਗੜੇ ਨੇ ਇਸ ਹੱਦ ਤੱਕ ਗੰਭੀਰ ਰੂਪ ਧਾਰਨ ਕਰ ਲਿਆ ਕਿ ਉਨ੍ਹਾਂ ਨੇ ਆਪਣੇ ਹੀ ਸਾਥੀ ਦਾ ਛੁਰਾ ਮਾਰ ਕੇ ਕਤਲ ਕਰ ਦਿੱਤਾ।
ਯਕੀਨੀ ਹੀ ਇਹ ਘਟਨਾਵਾਂ ਬਹੁਤ ਹੀ ਦੁਖਦਾਈ ਹਨ। ਇਸ ਲਈ ਇਨ੍ਹਾਂ ਨੂੰ ਰੋਕਣ ਲਈ ਦੇਸ਼ ’ਚ ਨਸ਼ੇ ਦੀ ਸਪਲਾਈ ਦੇ ਸੋਮੇ ਬੰਦ ਕਰਨ, ਨਸ਼ੇ ਦੇ ਸੌਦਾਗਰਾਂ ਨੂੰ ਫੜ ਕੇ ਸਖ਼ਤ ਤੋਂ ਸਖ਼ਤ ਸਜ਼ਾ ਦੇਣ ਅਤੇ ਨਸ਼ੇੜੀ ਨੌਜਵਾਨਾਂ ਦਾ ਸਰਕਾਰੀ ਨਸ਼ਾ ਮੁਕਤੀ ਕੇਂਦਰਾਂ ’ਚ ਸੁਚਾਰੂ ਢੰਗ ਨਾਲ ਇਲਾਜ ਯਕੀਨੀ ਬਣਾਉਣ ਦੀ ਤੁਰੰਤ ਲੋੜ ਹੈ।
—ਵਿਜੇ ਕੁਮਾਰ
ਚੀਨ ਦੀਆਂ ਯੂਨੀਵਰਸਿਟੀਆਂ ਦੇ ਉਭਾਰ ਤੋਂ ਸਿੱਖ ਸਕਦਾ ਹੈ ਭਾਰਤ
NEXT STORY 
