ਪਿਛਲੇ ਕੁਝ ਸਾਲਾਂ ਦੌਰਾਨ ਭਾਜਪਾ ਬਹੁਤ ਤੇਜ਼ੀ ਨਾਲ ਸਫਲਤਾ ਦੀਆਂ ਪੌੜੀਆਂ ਚੜ੍ਹੀ ਅਤੇ ਇਕ ਸਮੇਂ ਦੇਸ਼ ਦੇ 20 ਤੋਂ ਵੱਧ ਸੂਬਿਆਂ ’ਤੇ ਇਸ ਦਾ ਅਤੇ ਸਹਿਯੋਗੀ ਪਾਰਟੀਆਂ ਦਾ ਸ਼ਾਸਨ ਸਥਾਪਿਤ ਹੋ ਗਿਆ।
ਪਰ ਭਾਜਪਾ ਦੀ ਸਹਿਯੋਗੀ ਪਾਰਟੀਆਂ ਨਾਲੋਂ ਦੂਰੀ ਵਧਣ ਅਤੇ ਭਾਜਪਾ ਦੇ ਅੰਦਰ ਵੀ ਅਸੰਤੋਸ਼ ਕਾਰਣ ਜਲਦੀ ਹੀ ਭਾਜਪਾ ਦੀ ਲੀਡ ਨੂੰ ਮੱਧ ਪ੍ਰਦੇਸ਼, ਛੱਤੀਸਗੜ੍ਹ, ਰਾਜਸਥਾਨ ਵਿਚ ਮਿਲੀਆਂ ਹਾਰਾਂ ਅਤੇ ਹਾਲ ਹੀ ਵਿਚ ਸੰਪੰਨ ਮਹਾਰਾਸ਼ਟਰ ਅਤੇ ਹਰਿਆਣਾ ਦੀਆਂ ਚੋਣਾਂ ਵਿਚ ਆਸ ਮੁਤਾਬਿਕ ਪ੍ਰਦਰਸ਼ਨ ਨਾ ਕਰ ਸਕਣ ਕਾਰਣ ਬ੍ਰੇਕ ਲੱਗਣੀ ਸ਼ੁਰੂ ਹੋ ਗਈ ਪਰ ਹੁਣ ਵੀ ਇਨ੍ਹਾਂ ਦਾ ਸ਼ਾਸਨ 16 ਸੂਬਿਆਂ ਵਿਚ ਹੈ।
ਹਰਿਆਣਾ ਦੀਆਂ ਚੋਣਾਂ ਵਿਚ ਭਾਜਪਾ ਵਲੋਂ ਖੜ੍ਹੇ ਕੀਤੇ ਗਏ 12 ਮੰਤਰੀਆਂ ’ਚੋਂ 8 ਨੂੰ ਹਾਰ ਦਾ ਮੂੰਹ ਦੇਖਣਾ ਪਿਆ ਅਤੇ ਇਸ ਨੂੰ ਆਪਣੀ ਧੁਰਵਿਰੋਧੀ ‘ਜਜਪਾ’ ਨਾਲ ਗੱਠਜੋੜ ਕਰਕੇ ਸਰਕਾਰ ਬਣਾਉਣ ਲਈ ਮਜਬੂਰ ਹੋਣਾ ਪਿਆ, ਜਿਸ ਨੂੰ ਮਜ਼ਬੂਤੀ ਪ੍ਰਦਾਨ ਕਰਨਾ ਹੁਣ ਦੋਵਾਂ ਦੀ ਜ਼ਿੰਮੇਵਾਰੀ ਹੈ।
ਓਧਰ ਮਹਾਰਾਸ਼ਟਰ ਵਿਚ ਭਾਜਪਾ ਨੇ ਸ਼ਿਵ ਸੈਨਾ ਨਾਲ ਮਿਲ ਕੇ ਚੋਣ ਲੜੀ ਪਰ ਸੱਤਾ ਦੀ ਹਿੱਸੇਦਾਰੀ ਦੇ ਸਵਾਲ ’ਤੇ ਦੋਵਾਂ ਪਾਰਟੀਆਂ ਵਿਚ ਠਣ ਜਾਣ ਨਾਲ ਨਾ ਸਿਰਫ ਦੋਵਾਂ ਪਾਰਟੀਆਂ ਦਾ 30 ਸਾਲ ਪੁਰਾਣਾ ਗੱਠਜੋੜ ਟੁੱਟ ਗਿਆ, ਸਗੋਂ ਕਿਸੇ ਵੀ ਪਾਰਟੀ ਦੇ ਸਰਕਾਰ ਬਣਾਉਣ ਵਿਚ ਸਫਲ ਨਾ ਹੋਣ ’ਤੇ ਉਥੇ ਰਾਸ਼ਟਰਪਤੀ ਸ਼ਾਸਨ ਲਗ ਗਿਆ ਹੈ।
ਇਸ ਸਮੇਂ ਸ਼ਿਵ ਸੈਨਾ ਤੋਂ ਇਲਾਵਾ ਭਾਜਪਾ ਦੇ ਅਨੇਕ ਗੱਠਜੋੜ ਸਹਿਯੋਗੀ ਇਸ ਤੋਂ ਨਾਰਾਜ਼ ਚੱਲ ਰਹੇ ਹਨ। ਨਿਤੀਸ਼ ਕੁਮਾਰ ਨੇ ਭਾਜਪਾ ਤੋਂ ਦੂਰੀ ਦਾ ਸੰਕੇਤ ਦਿੰਦੇ ਹੋਏ ਕਿਹਾ ਹੈ ਕਿ ਰਾਜਗ ਦੇ ਨਾਲ ਇਸ ਦਾ ਗੱਠਜੋੜ ਸਿਰਫ ਬਿਹਾਰ ਤਕ ਹੀ ਸੀਮਤ ਹੈ।
ਝਾਰਖੰਡ ਵਿਚ ‘ਆਜਸੂ’ ਅਤੇ ‘ਲੋਜਪਾ’ ਤੋਂ ਇਲਾਵਾ ਆਸਾਮ ਵਿਚ ‘ਆਸੂ’, ਉੱਤਰ ਪ੍ਰਦੇਸ਼ ਵਿਚ ‘ਅਪਨਾ ਦਲ’ ਅਤੇ ਕੇਰਲ ਵਿਚ ‘ਕੇਰਲ ਜਨ ਪਕਸ਼ਮ’ ਤੋਂ ਇਲਾਵਾ ਹੋਰ ਅਨੇਕ ਛੋਟੀਆਂ ਪਾਰਟੀਆਂ ਇਸ ਨਾਲ ਨਾਰਾਜ਼ ਚੱਲ ਰਹੀਆਂ ਹਨ ਅਤੇ ਪਿਛਲੇ ਦਿਨੀਂ ਤਾਂ ਝਾਰਖੰਡ ਵਿਚ ‘ਆਜਸੂ’ ਅਤੇ ‘ਲੋਜਪਾ’ ਨੇ ਭਾਜਪਾ ਨਾਲੋਂ ਵੱਖ ਹੋ ਕੇ ਆਜ਼ਾਦਾਨਾ ਤੌਰ ’ਤੇ ਚੋਣ ਲੜਨ ਦਾ ਐਲਾਨ ਵੀ ਕਰ ਦਿੱਤਾ ਸੀ।
ਅਜਿਹੇ ਵਿਚ ਇਕ ਪਾਸੇ ਜਿੱਥੇ ਮਹਾਰਾਸ਼ਟਰ ਵਿਚ ਜ਼ਮਹੂਰੀ ਸਰਕਾਰ ਦਾ ਗਠਨ ਵਿਚਾਲੇ ਲਟਕਿਆ ਹੋਇਆ ਹੈ ਅਤੇ ਰਾਕਾਂਪਾ, ਸ਼ਿਵ ਸੈਨਾ ਅਤੇ ਕਾਂਗਰਸ ਵਲੋਂ ਭਾਜਪਾ ਨੂੰ ਸੱਤਾ ਵਿਚ ਨਾ ਆਉਣ ਦੇਣ ਅਤੇ ਆਪਣੀ ਸਰਕਾਰ ਬਣਾਉਣ ਲਈ ਸਿਰਖਪਾਈ ਕੀਤੀ ਜਾ ਰਹੀ ਹੈ, ਉਥੇ ਹੀ ਭਾਜਪਾ ਲੀਡਰਸ਼ਿਪ ਨੇ ਆਪਣੇ ਨਾਰਾਜ਼ ਗੱਠਜੋੜ ਸਹਿਯੋਗੀਆਂ ਪ੍ਰਤੀ ਨਰਮ ਰਵੱਈਆ ਅਪਣਾਉਣ ਦੇ ਸੰਕੇਤ ਦੇੇਣ ਤੋਂ ਇਲਾਵਾ ਉਨ੍ਹਾਂ ਨੂੰ ਰਾਜ਼ੀ ਕਰਨ ਦੇ ਯਤਨ ਸ਼ੁਰੂ ਕੀਤੇ ਹਨ।
ਇਸੇ ਲਈ ਭਾਜਪਾ ਹਾਈਕਮਾਨ ਨੇ ਕੇਂਦਰੀ ਮੰਤਰੀਆਂ ਅਤੇ ਬੁਲਾਰਿਆਂ ਨੂੰ ਸ਼ਿਵ ਸੈਨਾ ਨੇਤਾਵਾਂ ਊਧਵ ਠਾਕਰੇ, ਉਨ੍ਹਾਂ ਦੇ ਪੁੱਤਰ ਆਦਿੱਤਿਆ ਠਾਕਰੇ ਅਤੇ ਪਾਰਟੀ ਦੇ ਹੋਰ ਨੇਤਾਵਾਂ ’ਤੇ ਨਿੱਜੀ ਹਮਲੇ ਨਾ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।
ਝਾਰਖੰਡ ਵਿਚ ਵੀ ਨਾਰਾਜ਼ ਗੱਠਜੋੜ ਸਹਿਯੋਗੀਆਂ ‘ਲੋਜਪਾ’ ਅਤੇ ‘ਆਜਸੂ’ ਦੀ ਨਾਰਾਜ਼ਗੀ ਦੂਰ ਕਰਨ ਲਈ ਅਮਿਤ ਸ਼ਾਹ ਨੇ ਖ਼ੁਦ ਪਹਿਲ ਕਰਦੇ ਹੋਏ ‘ਆਜਸੂ’ ਪ੍ਰਧਾਨ ਸੁਦੇਸ਼ ਮਹਤੋ ਨੂੰ ਦਿੱਲੀ ਬੁਲਾ ਕੇ ਉਨ੍ਹਾਂ ਨੂੰ ਮਨਾਉਣ ਦੀ ਕੋਸ਼ਿਸ਼ ਕੀਤੀ ਹੈ, ਜਿਸ ’ਤੇ ਆਜਸੂ ਨੇ 10 ਸੀਟਾਂ ’ਤੇ ਹੀ ਚੋਣਾਂ ਲੜਨ ’ਤੇ ਸਹਿਮਤੀ ਜ਼ਾਹਿਰ ਕਰ ਦਿੱਤੀ ਹੈ।
ਝਾਰਖੰਡ ਦੇ ਮੁੱਖ ਮੰਤਰੀ ਰਘੁਵਰ ਦਾਸ (ਭਾਜਪਾ) ਦੇ ਸ਼ਾਸਨ ਵਿਚ ਭਾਜਪਾ ਵਰਕਰਾਂ ਦੀ ਅਣਡਿੱਠਤਾ ਹੋਣ ਕਾਰਣ ਨਾਰਾਜ਼ ਹੋ ਕੇ ਘਰ ਬੈਠੇ ਭਾਜਪਾ ਵਰਕਰਾਂ ਨੂੰ ਮਨਾਉਣ ਦੀ ਕਵਾਇਦ ਵੀ ਸ਼ੁਰੂ ਹੋ ਗਈ ਹੈ।
ਇਸੇ ਦੌਰਾਨ ਭਾਜਪਾ ਨਾਲ ਨਾਰਾਜ਼ ਚੱਲ ਰਹੇ ‘ਲੋਜਪਾ’ ਦੇ ਮੁਖੀ ਚਿਰਾਗ ਪਾਸਵਾਨ ਨੇ 17 ਨਵੰਬਰ ਨੂੰ ਨਵੀਂ ਦਿੱਲੀ ਵਿਚ ਹੋਈ ਗੱਠਜੋੜ ਦੀ ਬੈਠਕ ਵਿਚ ਕਿਹਾ, ‘‘ਸਹਿਯੋਗੀ ਪਾਰਟੀਆਂ ਵਿਚ ਬਿਹਤਰ ਤਾਲਮੇਲ ਹੋਣਾ ਚਾਹੀਦਾ ਹੈ, ਜਿਸ ਦੇ ਲਈ ਰਾਜਗ ਨੂੰ ਇਕ ਕਨਵੀਨਰ ਨਿਯੁਕਤ ਕਰਨ ਦੀ ਲੋੜ ਹੈ।’’ ਜਦ (ਯੂ) ਪਹਿਲਾਂ ਹੀ ਇਹ ਮੰਗ ਉਠਾ ਚੁੱਕਾ ਹੈ।
ਸਹਿਯੋਗੀ ਪਾਰਟੀਆਂ ਦੀ ਨਾਰਾਜ਼ਗੀ ਨੂੰ ਮਹਿਸੂਸ ਕਰਦੇ ਹੋਏ ਹੀ ਉਕਤ ਬੈਠਕ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਨਾਰਾਜ਼ ਦਲਾਂ ਨੂੰ ਮਨਾਉਣ ਦੀ ਲੋੜ ਜਤਾਉਂਦੇ ਹੋਏ ਕਿਹਾ :
‘‘ਅਸੀਂ ਪਰਿਵਾਰ ਹਾਂ। ਅਸੀਂ ਲੋਕ ਮਿਲ ਕੇ ਲੋਕਾਂ ਲਈ ਕੰਮ ਕਰਦੇ ਹਾਂ। ਸਾਨੂੰ ਵੱਡਾ ਲੋਕ ਫਤਵਾ ਮਿਲਿਆ ਹੈ ਅਤੇ ਸਾਨੂੰ ਉਸਦਾ ਸਨਮਾਨ ਕਰਨਾ ਚਾਹੀਦਾ ਹੈ।’’ ਸ਼ਿਵ ਸੈਨਾ ਦਾ ਨਾਂ ਲਏ ਬਿਨਾਂ ਉਨ੍ਹਾਂ ਨੇ ਕਿਹਾ, ‘‘ਵਿਚਾਰਧਾਰਾ ਇਕ ਨਾ ਹੋਣ ਦੇ ਬਾਵਜੂਦ ਅਸੀਂ ਇਕੋ ਜਿਹਾ ਸੋਚਣ ਵਾਲੇ ਲੋਕ ਹਾਂ। ਅਨੇਕ ਛੋਟੇ-ਛੋਟੇ ਵਿਵਾਦਾਂ ਤੋਂ ਸਾਨੂੰ ਪ੍ਰੇਸ਼ਾਨ ਨਹੀਂ ਹੋਣਾ ਚਾਹੀਦਾ ਅਤੇ ਆਪਸੀ ਤਾਲਮੇਲ ਲਈ ਤਾਲਮੇਲ ਕਮੇਟੀ ਬਣਾਉਣੀ ਚਾਹੀਦੀ ਹੈ।’’
ਅਸੀਂ ਤਾਂ ਵਾਰ-ਵਾਰ ਲਿਖਦੇ ਆ ਰਹੇ ਹਾਂ ਕਿ ਭਾਜਪਾ ਨੂੰ ਆਪਣੇ ਸਹਿਯੋਗੀ ਦਲਾਂ ਨੂੰ ਨਾਲ ਲੈ ਕੇ ਚੱਲਣਾ ਚਾਹੀਦਾ ਹੈ। ਭਾਜਪਾ ਲੀਡਰਸ਼ਿਪ ਇਸ ਸਲਾਹ ’ਤੇ ਗੰਭੀਰਤਾ ਨਾਲ ਸੋਚ-ਵਿਚਾਰ ਕਰੇ ਅਤੇ ਜਿੰਨੀ ਜਲਦੀ ਇਹ ਤਾਲਮੇਲ ਕਮੇਟੀ ਬਣਾਈ ਜਾ ਸਕੇ, ਓਨਾ ਹੀ ਚੰਗਾ ਹੋਵੇਗਾ। ਜਿਵੇਂ ਕਿ ਅਸੀਂ 14 ਨਵੰਬਰ ਦੇ ਸੰਪਾਦਕੀ ‘ਆਖਿਰ ਭਾਜਪਾ ਆਪਣੇ ਸਹਿਯੋਗੀ ਦਲਾਂ ਨੂੰ ਕਿਉਂ ਨਹੀਂ ਸੰਭਾਲ ਪਾ ਰਹੀ’ ਵਿਚ ਲਿਖਿਆ ਸੀ :
‘‘ਭਾਜਪਾ ਅਤੇ ਸਹਿਯੋਗੀ ਦਲਾਂ ਵਿਚ ਵਧ ਰਹੀ ਦੂਰੀ ਨਿਸ਼ਚੈ ਹੀ ਭਾਜਪਾ ਦੇ ਹਿੱਤ ਵਿਚ ਨਹੀਂ ਹੈ। ਇਸ ਲਈ ਜਿੰਨੀ ਜਲਦੀ ਭਾਜਪਾ ਲੀਡਰਸ਼ਿਪ ਸਹਿਯੋਗੀ ਦਲਾਂ ਦੇ ਨਾਲ ਆਪਸ ਵਿਚ ਮਿਲ-ਬੈਠ ਕੇ ਮਤਭੇਦ ਦੂਰ ਕਰ ਸਕੇ, ਇਸਦੇ ਅਤੇ ਸਹਿਯੋਗੀ ਦਲਾਂ ਲਈ ਓਨਾ ਹੀ ਚੰਗਾ ਹੋਵੇਗਾ। ਭਾਜਪਾ ਲੀਡਰਸ਼ਿਪ ਨੂੰ ਮੰਨਣਾ ਹੋਵੇਗਾ ਕਿ ਇਸ ਤਰ੍ਹਾਂ ਪੁਰਾਣੇ ਸਾਥੀ ਗੁਆਉਣਾ ਪਾਰਟੀ ਅਤੇ ਰਾਜਗ ਨੂੰ ਕਮਜ਼ੋਰ ਹੀ ਕਰੇਗਾ।’’
–ਵਿਜੇ ਕੁਮਾਰ
ਬਿਨਾਂ ਹੈਲਮੇਟ ਮੋਟਰਸਾਈਕਲ ਚਲਾਉਣ ਵਾਲਿਆਂ ਨੂੰ ਹੈਲਮੇਟ ਉਧਾਰ ਦੇਣ ਦੀ ਚੰਗੀ ਮੁਹਿੰਮ
NEXT STORY 
