ਅੱਜ ਦੁਨੀਆ ਭਰ ’ਚ ਲੋਕ ਜਿਥੇ ਛੋਟੀਆਂ-ਛੋਟੀਆਂ ਗੱਲਾਂ ਨੂੰ ਲੈ ਕੇ ਸੜਕਾਂ ’ਤੇ ਉਤਰ ਰਹੇ ਹਨ, ਉਥੇ ਹੀ ਇਕ-ਦੂਜੇ ਦੇ ਵਿਰੁੱਧ ਬੇਰਹਿਮੀ ਨਾਲ ਚਾਕੂ-ਛੁਰੀਆਂ ਦੀ ਵਰਤੋਂ ਕਰ ਰਹੇ ਹਨ ਜਿਨ੍ਹਾਂ ਦਾ ਨਤੀਜਾ ਦੁਖਦਾਈ ਘਟਨਾਵਾਂ ’ਚ ਨਿਕਲ ਰਿਹਾ ਹੈ। ਇਸੇ ਸੰਬੰਧ ’ਚ ਪਿਛਲੇ 6 ਮਹੀਨਿਆਂ ’ਚ ਸਾਹਮਣੇ ਆਈਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
* 3 ਜੁਲਾਈ, 2025 ਨੂੰ ‘ਕਾਸਗੰਜ’ (ਉੱਤਰ ਪ੍ਰਦੇਸ਼) ’ਚ ਸਬਜ਼ੀ ’ਚ ਨਮਕ ਵੱਧ ਹੋਣ ਤੋਂ ਨਾਰਾਜ਼ ‘ਰਾਮੂ’ ਨਾਂ ਦੇ ਵਿਅਕਤੀ ਨੇ ਪੌੜੀਅਾਂ ’ਤੇ ਖੜ੍ਹੀ ਅਾਪਣੀ ਗਰਭਵਤੀ ਪਤਨੀ ‘ਬ੍ਰਜਬਾਲਾ’ ਨੂੰ ਇੰਨੀ ਜ਼ੋਰ ਨਾਲ ਥੱਪੜ ਮਾਰਿਆ ਕਿ ਲੜਖੜਾ ਕੇ ਹੇਠਾਂ ਡਿੱਗਣ ਕਾਰਨ ਉਹ ਗੰਭੀਰ ਤੌਰ ’ਤੇ ਜ਼ਖਮੀ ਹੋ ਗਈ ਅਤੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ।
* 31 ਅਕਤੂਬਰ, 2025 ਨੂੰ ‘ਦਿੱਲੀ’ ਵਿਚ ‘ਮੰਗੋਲਪੁਰੀ’ ਵਿਚ 2 ਨੌਜਵਾਨਾਂ ਨੇ ਇਕ ਨੌਜਵਾਨ ਤੋਂ 10 ਰੁਪਏ ਮੰਗੇ ਅਤੇ ਨੌਜਵਾਨ ਵਲੋਂ ਨਾ ਦੇਣ ’ਤੇ ਚਾਕੂ ਮਾਰ ਕੇ ਉਸ ਦੀ ਹੱਤਿਆ ਕਰ ਦਿੱਤੀ।
* 2 ਨਵੰਬਰ, 2025 ਨੂੰ ‘ਹਰਿਦੁਆਰ’ (ਉੱਤਰਾਖੰਡ) ’ਚ 3 ਵਿਅਕਤੀ ਇਕ ਦੁਕਾਨਦਾਰ ਕੋਲ 1000 ਰੁਪਏ ਦਾ ਸਾਮਾਨ ਉਧਾਰ ਲੈਣ ਲਈ ਆਏ ਤਾਂ ਦੁਕਾਨਦਾਰ ਨੇ ਪਹਿਲਾਂ ਉਨ੍ਹਾਂ ਨੂੰ ਪਿਛਲੇ ਬਕਾਏ ਦਾ ਭੁਗਤਾਨ ਕਰਨ ਲਈ ਕਿਹਾ। ਇਸ ’ਤੇ ਗੁੱਸੇ ’ਚ ਆ ਕੇ ਤਿੰਨਾਂ ਨੇ ਦੁਕਾਨਦਾਰ ਨੂੰ ਇੰਨਾ ਕੁੱਟਿਆ ਕਿ ਉਸ ਦੀ ਮੌਤ ਹੋ ਗਈ।
* 24 ਦਸੰਬਰ, 2025 ਨੂੰ ‘ਮੁੰਬਈ’ (ਮਹਾਰਾਸ਼ਟਰ) ਦੇ ‘ਬੈਂਗਨਵਾੜੀ’ ਇਲਾਕੇ ’ਚ ‘ਬਿਰਿਆਨੀ’ ਵਿਚ ਨਮਕ ਵੱਧ ਹੋਣ ’ਤੇ ਗੁੱਸੇ ’ਚ ਆ ਕੇ ‘ਮੰਜੂਰ ਹੁਸੈਨ’ ਨਾਂ ਦੇ ਵਿਅਕਤੀ ਨੇ ਅਾਪਣੀ ਪਤਨੀ ‘ਨਾਜੀਆ ਪ੍ਰਵੀਨ’ ਦੀ ਬੇਰਹਿਮੀ ਨਾਲ ਕੁੱਟ-ਕੁੱਟ ਕੇ ਹੱਤਿਆ ਕਰ ਦਿੱਤੀ।
* 1 ਜਨਵਰੀ, 2026 ਨੂੰ ‘ਮੁੰਬਈ’ (ਮਹਾਰਾਸ਼ਟਰ) ’ਚ ਇਕ ਔਰਤ ਨੇ ਨਵੇਂ ਸਾਲ ਦਾ ਜਸ਼ਨ ਮਨਾਉਣ ਦੇ ਬਹਾਨੇ ਅਾਪਣੇ ਪ੍ਰੇਮੀ ਨੂੰ ਅਾਪਣੇ ਘਰ ’ਚ ਮਿਲਣ ਲਈ ਸੱਦ ਕੇ ਉਸ ਨਾਲ ਸਰੀਰਕ ਸੰਬੰਧ ਬਣਾਏ ਅਤੇ ਇਸ ਦੌਰਾਨ ਅਚਾਨਕ ਉਸ ਦਾ ਪ੍ਰਾਈਵੇਟ ਪਾਰਟ ਕੱਟ ਦਿੱਤਾ ਕਿਉਂਕਿ ਉਸ ਦੇ ਪ੍ਰੇਮੀ ਨੇ ਉਸ ਨਾਲ ਵਿਆਹ ਕਰਨ ਤੋਂ ਨਾਂਹ ਕਰ ਦਿੱਤੀ ਸੀ।
* 24 ਜਨਵਰੀ, 2026 ਨੂੰ ‘ਫਰੀਦਾਬਾਦ’ (ਹਰਿਆਣਾ) ਦੇ ‘ਝਾੜਸੇਂਤਲੀ’ ਪਿੰਡ ’ਚ ਇਕ ਵਿਅਕਤੀ ਨੇ ਅਾਪਣੀ 4 ਸਾਲਾ ਬੇਟੀ ਵਲੋਂ 50 ਤੱਕ ਗਿਣਤੀ ਨਾ ਲਿਖ ਸਕਣ ’ਤੇ ਗੁੱਸੇ ’ਚ ਆ ਕੇ ਉਸ ਨੂੰ ਇੰਨਾ ਕੁੱਟਿਆ ਕਿ ਉਸ ਦੀ ਮੌਤ ਹੋ ਗਈ।
* 28 ਜਨਵਰੀ, 2026 ਨੂੰ ‘ਲੁਧਿਆਣਾ’ (ਪੰਜਾਬ) ’ਚ ਕਿੰਨਰਾਂ ਦੇ 2 ਧੜਿਅਾਂ ਦਰਮਿਆਨ ਚੱਲ ਰਹੀ ਰੰਜਿਸ਼ ਨੇ ਖੌਫਨਾਕ ਰੂਪ ਧਾਰਨ ਕਰ ਲਿਆ। ਦੋਸ਼ ਹੈ ਕਿ ਇਕ ਧੜੇ ਨੇ ਦੂਸਰੇ ਧੜੇ ਨਾਲ ਸੰਬੰਧਤ ਨੌਜਵਾਨ ਨੂੰ ਅਗਵਾ ਕਰ ਕੇ ਉਸ ਦਾ ਪ੍ਰਾਈਵੇਟ ਪਾਰਟ ਕੱਟ ਦਿੱਤਾ।
* 28 ਜਨਵਰੀ ਨੂੰ ਹੀ ‘ਦਿੱਲੀ’ ਦੇ ਵਸੰਤਕੁੰਜ ’ਚ ਬੀੜੀ ਜਲਾਉਣ ਲਈ ਮਾਚਿਸ ਨੂੰ ਲੈ ਕੇ ਹੋਏ ਝਗੜੇ ’ਚ ਕੁਝ ਅਣਪਛਾਤੇ ਹਮਲਾਵਰਾਂ ਨੇ ‘ਕਰਣ’ ਨਾਂ ਦੇ ਨੌਜਵਾਨ ਦੀ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ।
* 29 ਜਨਵਰੀ, 2026 ਨੂੰ ‘ਮੁੰਬਈ’ ਦੀ ਲੋਕਲ ਟ੍ਰੇਨ ’ਚ ਸਵਾਰ 2 ਔਰਤਾਂ ਨੂੰ ਧੱਕ ਕੇ ਅੱਗੇ ਵਧਣ ਦੀ ਕੋਸ਼ਿਸ਼ ਕਰ ਰਹੇ ‘ਓਂਕਾਰ ਸ਼ਿੰਦੇ’ ਨਾਂ ਦੇ ਨੌਜਵਾਨ ਨੂੰ ‘ਅਾਲੋਕ ਸਿੰਘ’ ਨਾਂ ਦੇ ਇਕ ਹੋਰ ਯਾਤਰੀ ਵਲੋਂ ਟੋਕਣ ’ਤੇ ‘ਓਂਕਾਰ ਸ਼ਿੰਦੇ’ ਨੂੰ ਇੰਨਾ ਗੁੱਸਾ ਆਇਆ ਕਿ ਉਸ ਨੇ ਗੁੱਸੇ ’ਚ ਆ ਕੇ ‘ਆਲੋਕ ਸਿੰਘ’ ’ਤੇ ਤੇਜ਼ਧਾਰ ਹਥਿਆਰ ਨਾਲ ਵਾਰ ਕਰ ਦਿੱਤਾ ਜਿਸ ਨਾਲ ਉਸ ਦੀ ਮੌਤ ਹੋ ਗਈ।
* 30 ਜਨਵਰੀ, 2026 ਨੂੰ ‘ਗ੍ਰੇਟਰ ਨੋਇਡਾ’ (ਉੱਤਰ ਪ੍ਰਦੇਸ਼) ਦੇ ‘ਕੁੜੀਖੇੜਾ’ ਪਿੰਡ ’ਚ ‘ਬੁਲੇਟ’ ਮੋਟਰਸਾਈਕਲ ਤੋਂ ਪਟਾਕੇ ਵਜਾਉਣ ਤੇ ਇਕ ਨੌਜਵਾਨ ਦੀ ਇੱਟਾਂ ਨਾਲ ਕੁੱਟ-ਕੁੱਟ ਕੇ ਹੱਤਿਆ ਕਰ ਦੇਣ ਦੇ ਦੋਸ਼ ’ਚ ਪੁਲਸ ਨੇ 4 ਵਿਅਕਤੀਅਾਂ ਨੂੰ ਗ੍ਰਿਫਤਾਰ ਕੀਤਾ।
* 31 ਜਨਵਰੀ, 2026 ਨੂੰ ‘ਗਾਜ਼ੀਆਬਾਦ’ (ਉੱਤਰ ਪ੍ਰਦੇਸ਼) ’ਚ ਇਕ ਢਾਬੇ ’ਤੇ ਖਾਣਾ ਪਰੋਸਣ ’ਚ ਹੋਈ ਦੇਰੀ ਨੂੰ ਲੈ ਕੇ ਸ਼ੁਰੂ ਹੋਇਆ ਮਾਮੂਲੀ ਵਿਵਾਦ ਦੇਖਦੇ ਹੀ ਦੇਖਦੇ ਖੂਨੀ ਟਕਰਾਅ ’ਚ ਬਦਲ ਗਿਆ ਅਤੇ ਇਸ ਝਗੜੇ ’ਚ 2 ਨੌਜਵਾਨਾਂ ਦੀ ਹੱਤਿਆ ਕਰ ਦਿੱਤੀ ਗਈ ਜਦਕਿ ਇਕ ਹੋਰ ਗੰਭੀਰ ਰੂਪ ’ਚ ਜ਼ਖਮੀ ਹੋ ਗਿਆ।
* ਅਤੇ ਹੁਣ 1 ਫਰਵਰੀ, 2026 ਨੂੰ ‘ਇੰਦੌਰ’ (ਮੱਧ ਪ੍ਰਦੇਸ਼) ’ਚ ਅਾਪਣੀ ਮਾਂ ਦੇ ਦੂਜੇ ਵਿਆਹ ਤੋਂ ਗੁੱਸੇ ’ਚ ਆਏ ਨੌਜਵਾਨ ਨੇ ਅਾਪਣੇ ਮਤਰੇਏ ਪਿਓ ’ਤੇ ਹਮਲਾ ਕਰ ਕੇ ਉਸ ਨੂੰ ਮਾਰ ਦਿੱਤਾ ਅਤੇ ਵਿਆਹ ਦੇ 29ਵੇਂ ਦਿਨ ਹੀ ਉਸ ਦੀ ਮਾਂ ਦੁਬਾਰਾ ਵਿਧਵਾ ਹੋ ਗਈ।
ਉਕਤ ਘਟਨਾਵਾਂ ਤੋਂ ਸਪੱਸ਼ਟ ਹੈ ਕਿ ਅੱਜ ਦੇ ਜ਼ਮਾਨੇ ’ਚ ਲੋਕਾਂ ’ਚ ਅਸਹਿਣਸ਼ੀਲਤਾ ਕਿਸ ਕਦਰ ਵਧ ਗਈ ਹੈ ਜਿਸ ਦੇ ਭਿਆਨਕ ਨਤੀਜੇ ਨਿਕਲ ਰਹੇ ਹਨ। ਯਕੀਨਨ ਹੀ ਇਹ ਲੋਕਾਂ ’ਚ ਵਧ ਰਹੀ ਸੌੜੀ ਸੋਚ ਦਾ ਹੀ ਨਤੀਜਾ ਹੈ।
ਅੱਜ ਟੈਲੀਵਿਜ਼ਨ ਅਤੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ’ਤੇ ਦਿਖਾਈ ਜਾਣ ਵਾਲੀ ਹਿੰਸਕ ਸਮੱਗਰੀ ਦਾ ਵੀ ਲੋਕਾਂ ’ਤੇ ਉਲਟ ਪ੍ਰਭਾਵ ਪੈ ਰਿਹਾ ਹੈ ਜਿਸ ਦੇ ਲਈ ਸਮਾਜ ’ਚ ਹਾਂਪੱਖੀ ਵਿਚਾਰਧਾਰਾ ਨੂੰ ਵਧਾਉਣ ਦੀ ਲੋੜ ਹੈ।
–ਵਿਜੇ ਕੁਮਾਰ
ਨਾਰਕੋਟਿਕਸ ਅਤੇ ਨਵੇਂ ਹਾਈਬ੍ਰਿਡ ਯੁੱਧ ਦੀ ਭੂ-ਰਾਜਨੀਤੀ
NEXT STORY 
