ਭਾਰਤੀ ਫੌਜ, ਰੱਖਿਆ ਖੋਜ ਸੰਗਠਨ ਅਤੇ ਸੰਵੇਦਨਸ਼ੀਲ ਸਰਕਾਰੀ ਵਿਭਾਗਾਂ ਦੀ ਜੰਗੀ ਪੱਖੋਂ ਅਹਿਮ ਜਾਣਕਾਰੀ ਹਾਸਲ ਕਰਨ ਲਈ ਪਾਕਿਸਤਾਨ ਦੀ ਖੁਫੀਆ ਏਜੰਸੀ ਆਈ. ਐੱਸ. ਆਈ. ਵੱਲੋਂ ‘ਹਨੀ ਟ੍ਰੈਪ’ ਦੇ ਹੱਥਕੰਡਿਆਂ ਦੀ ਲਗਾਤਾਰ ਵਰਤੋਂ ਕੀਤੀ ਜਾ ਰਹੀ ਹੈ।
ਇਸ ਲਈ ਪਾਕਿਸਤਾਨੀ ਮਹਿਲਾ ਏਜੰਟ ਭਾਰਤੀ ਫੌਜ ਦੇ ਕੁਝ ਅਧਿਕਾਰੀਆਂ ਅਤੇ ਆਮ ਲੋਕਾਂ ਨੂੰ ਬੋਗਸ ਨਾਵਾਂ ਨਾਲ ਵੀਡੀਓ ਕਾਲ ਕਰ ਕੇ ਅਸ਼ਲੀਲ ਹਰਕਤਾਂ ਰਾਹੀਂ ਉਨ੍ਹਾਂ ਨੂੰ ਵੀ ਅਜਿਹਾ ਹੀ ਕਰਨ ਲਈ ਉਕਸਾਉਂਦੀਆਂ ਹਨ ਅਤੇ ਸੋਸ਼ਲ ਮੀਡੀਆ ਰਾਹੀਂ ਉਨ੍ਹਾਂ ਦੇ ‘ਰੂਪ ਜਾਲ’ ’ਚ ਫਸ ਕੇ ਇਹ ਲੋਕ ਭਾਰਤੀ ਫੌਜ ਦੀਆਂ ਅਹਿਮ ਜਾਣਕਾਰੀਆਂ ਉਨ੍ਹਾਂ ਨੂੰ ਦੇ ਕੇ ਦੇਸ਼ ਨਾਲ ਗੱਦਾਰੀ ਕਰ ਰਹੇ ਹਨ, ਜਿਨ੍ਹਾਂ ਦੀਆਂ ਇਸੇ ਸਾਲ ਦੀਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
* 4 ਜਨਵਰੀ ਨੂੰ ‘ਅੰਬਾਲਾ’ (ਹਰਿਆਣਾ) ’ਚ ‘ਹਨੀ ਟ੍ਰੈਪ’ ਦਾ ਸ਼ਿਕਾਰ ਹੋ ਕੇ ਭਾਰਤੀ ਫੌਜ ਦੀਆਂ ਯੂਨਿਟਾਂ ਦੀ ਲੋਕੇਸ਼ਨ, ਮੂਵਮੈਂਟ ਅਤੇ ਤਾਇਨਾਤੀ ਨਾਲ ਜੁੜੀ ਗੁਪਤ ਜਾਣਕਾਰੀ ਪਾਕਿਸਤਾਨ ਭੇਜਣ ਵਾਲੇ ਇਕ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਉਸ ਦੇ ਮੋਬਾਈਲ ਤੋਂ ਵ੍ਹਟਸਐਪ ਚੈਟ ਅਤੇ ਵਾਇਸ ਕਾਲ ਨਾਲ ਜੁੜੇ ਅਹਿਮ ਸਬੂਤ ਮਿਲੇ।
* 11 ਮਾਰਚ ਨੂੰ ‘ਲਖਨਊ’ (ਉੱਤਰ ਪ੍ਰਦੇਸ਼) ’ਚ ਖੁਦ ਨੂੰ ‘ਕੀਰਤੀ ਕੁਮਾਰੀ’ ਦੱਸਣ ਵਾਲੀ ਇਕ ਪਾਕਿਸਤਾਨੀ ਮਹਿਲਾ ਏਜੰਟ ਵੱਲੋਂ ‘ਹਨੀ ਟ੍ਰੈਪ’ ’ਚ ਫਸਾਏ ਗਏ ਭਾਰਤੀ ਹਵਾਈ ਫੌਜੀ ਦੇ ਲਾਂਸ ਨਾਇਕ ‘ਆਦਰਸ਼ ਕੁਮਾਰ’ ਉਰਫ਼ ‘ਲੱਕੀ’ ਨੂੰ ਜੰਗੀ ਬੇੜੇ ‘ਆਈ. ਐੱਨ. ਐੱਸ. ਵਿਕਰਾਂਤ’ ਅਤੇ ‘ਆਈ. ਐੱਨ. ਐੱਸ. ਇਕਸ਼ਕ’ ਦੀਆਂ ਫੋਟੋਆਂ ਤੇ ਹੋਰ ਜਾਣਕਾਰੀ ਭੇਜਣ ਦੇ ਦੋਸ਼ ’ਚ ਗ੍ਰਿਫ਼ਤਾਰ ਕੀਤਾ ਗਿਆ।
ਇਸ ਤੋਂ ਪਹਿਲਾਂ ਇਸੇ ਪਾਕਿਸਤਾਨੀ ਏਜੰਟ ਨੇ ਗੋਆ ’ਚ ਸਮੁੰਦਰੀ ਫੌਜ ਦੇ ਸ਼ਿਪਯਾਰਡ ’ਤੇ ਪਾਰਟ-ਟਾਈਮ ਨੌਕਰੀ ਕਰਨ ਵਾਲੇ ‘ਰਾਮ ਸਿੰਘ’ ਨੂੰ ਆਪਣੇ ਰੂਪ ਜਾਲ ’ਚ ਫਸਾ ਕੇ ਉਸ ਕੋਲੋਂ ਸ਼ਿਪਯਾਰਡ ’ਤੇ ਆਉਣ ਵਾਲੇ ਜੰਗੀ ਬੇੜਿਆਂ ਦੀਆਂ ਫੋਟੋਆਂ ਅਤੇ ਹੋਰ ਜਾਣਕਾਰੀਆਂ ਪ੍ਰਾਪਤ ਕੀਤੀਆਂ ਸਨ।
* 22 ਮਾਰਚ ਨੂੰ ‘ਚਾਬੁਆ’ (ਅਾਸਾਮ) ’ਚ ‘ਹਨੀ ਟ੍ਰੈਪ’ ’ਚ ਫਸੇ ਭਾਰਤੀ ਹਵਾਈ ਫੌਜ ਸਟੇਸ਼ਨ ਦੇ ‘ਮਲਟੀ-ਟਾਸਕਰਸ ਸਟਾਫ’ ਦੇ ਮੈਂਬਰ ‘ਸੁਮਿਤ ਕੁਮਾਰ’ ਨੂੰ ਪਾਕਿਸਤਾਨ ਲਈ ਜਾਸੂਸੀ ਕਰਨ ਅਤੇ ਸੰਵੇਦਨਸ਼ੀਲ ਰੱਖਿਆ ਜਾਣਕਾਰੀ ਸਾਂਝੀ ਕਰਨ ਦੇ ਦੋਸ਼ ਹੇਠ ਰਾਜਸਥਾਨ ਇੰਟੈਲੀਜੈਂਸ ਅਤੇ ਹਵਾਈ ਫੌਜ ਇੰਟੈਲੀਜੈਂਸ ਨੇ ਮਿਲ ਕੇ ਗ੍ਰਿਫ਼ਤਾਰ ਕੀਤਾ।
ਪਾਕਿਸਤਾਨੀ ਹੈਂਡਲਰਸ ਨੇ ‘ਸੁਮਿਤ ਕੁਮਾਰ’ ਨੂੰ ‘ਹਨੀ ਟ੍ਰੈਪ’ ’ਚ ਫਸਾ ਕੇ ਅਤੇ ਪੈਸਿਆਂ ਦਾ ਲਾਲਚ ਦੇ ਕੇ ‘ਸੁਖੋਈ ਫਾਈਟਰ ਜੈੱਟਸ’, ‘ਮਿਜ਼ਾਈਲ ਸਿਸਟਮ’ ਅਤੇ ਫੌਜੀ ਟਿਕਾਣਿਆਂ ਦੀਆਂ ਸੰਵੇਦਨਸ਼ੀਲ ਲੋਕੇਸ਼ਨਾਂ ਦੀ ਜਾਣਕਾਰੀ ਹਾਸਲ ਕਰਨ ਲਈ ਵਰਤਿਆ ਸੀ।
* 1 ਜੂਨ ਨੂੰ ਜੰਮੂ-ਕਸ਼ਮੀਰ ਪੁਲਸ ਅਤੇ ਫੌਜ ਦੀ ਇਕ ਸਾਂਝੀ ਮੁਹਿੰਮ ਦੌਰਾਨ ਜੰਮੂ ਜ਼ਿਲੇ ਦੇ ‘ਸਤਵਾਰੀ’ ਇਲਾਕੇ ਤੋਂ ਇਕ ਨੌਜਵਾਨ ਨੂੰ ਪਾਕਿਸਤਾਨ ਦੀ ਇਕ ਮਹਿਲਾ ਏਜੰਟ ਨੂੰ ਰੱਖਿਆ ਅਦਾਰਿਆਂ ਦੀਆਂ ਫੋਟੋਆਂ ਸਾਂਝੀਆਂ ਕਰਨ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ।
ਪੁਲਸ ਅਨੁਸਾਰ ਉਸ ਨੂੰ ਇਕ ਔਰਤ ਨੇ ਆਪਣੇ ਆਪ ਨੂੰ ‘ਸੁੰਦਰਬਨੀ’ ’ਚ ਤਾਇਨਾਤ ਬੀ. ਐੱਸ. ਐੱਫ. ਦੀ ਮੁਲਾਜ਼ਮ ਦੱਸ ਕੇ ਆਪਣੇ ਜਾਲ ’ਚ ਫਸਾਇਆ। ਜਾਂਚ ’ਚ ਪੁਸ਼ਟੀ ਹੋਈ ਕਿ ਉਕਤ ਨੌਜਵਾਨ ਨੇ ਕੁਝ ਰੁਪਇਆਂ ਦੇ ਬਦਲੇ ’ਚ ਉਸ ਨੂੰ ਫੋਟੋਆਂ ਭੇਜੀਆਂ ਸਨ।
* ਅਤੇ ਹੁਣ 8 ਅਗਸਤ ਨੂੰ ਦਿੱਲੀ ਪੁਲਸ ਨੇ ਸੰਵੇਦਨਸ਼ੀਲ ਰੱਖਿਆ ਜਾਣਕਾਰੀ ਪਾਕਿਸਤਾਨ ਨਾਲ ਸਾਂਝੀ ਕਰਨ ਦੇ ਦੋਸ਼ ’ਚ ਭਾਰਤੀ ਹਵਾਈ ਫੌਜ ਦੇ ਇਕ ਵਿੰਗ ਕਮਾਂਡਰ ਨੂੰ ‘ਆਫੀਸ਼ੀਅਲ ਸੀਕ੍ਰੇਟ ਐਕਟ’ ਅਧੀਨ ਗ੍ਰਿਫ਼ਤਾਰ ਕੀਤਾ ਹੈ।
ਇਸ ਅਧਿਕਾਰੀ ਨੂੰ ਆਈ. ਐੱਸ. ਆਈ. ਦੀ ਇਕ ਮਹਿਲਾ ਏਜੰਟ ਨੇ ਸੋਸ਼ਲ ਮੀਡੀਆ ਰਾਹੀਂ ‘ਹਨੀ ਟ੍ਰੈਪ’ ’ਚ ਫਸਾ ਲਿਆ ਸੀ। ਔਰਤ ਨੇ ਅਧਿਕਾਰੀ ਨਾਲ ਸੰਪਰਕ ਸਥਾਪਿਤ ਕਰਨ ਤੋਂ ਬਾਅਦ ਵੀਡੀਓ ਕਾਲ ਅਤੇ ਹੋਰ ਡਿਜੀਟਲ ਮਾਧਿਅਮਾਂ ਰਾਹੀਂ ਉਸ ਨਾਲ ਗੱਲਬਾਤ ਸ਼ੁਰੂ ਕਰ ਦਿੱਤੀ ਸੀ।
ਜ਼ਿਕਰਯੋਗ ਹੈ ਕਿ ਪਾਕਿਸਤਾਨ ਸਿਰਫ਼ ਭਾਰਤੀ ਹਵਾਈ ਫੌਜ ਦੇ ਮੈਂਬਰਾਂ ਨੂੰ ਹੀ ‘ਹਨੀ ਟ੍ਰੈਪ’ ’ਚ ਫਸਾਉਣ ਦੀ ਕੋਸ਼ਿਸ਼ ਨਹੀਂ ਕਰਦਾ, ਸਗੋਂ ਉਹ ਸਮੁੰਦਰੀ ਫੌਜ ਅਤੇ ਰੱਖਿਆ ਨਾਲ ਜੁੜੇ ਹੋਰ ਵਿਭਾਗਾਂ ਦੇ ਮੁਲਾਜ਼ਮਾਂ ਅਤੇ ਆਮ ਲੋਕਾਂ ਨੂੰ ਵੀ ਨਿਸ਼ਾਨਾ ਬਣਾਉਂਦਾ ਹੈ।
ਪਾਕਿਸਤਾਨ ਦੇ ਹਾਕਮਾਂ ਨੂੰ ਪਤਾ ਹੈ ਕਿ ਭਾਰਤ ਦੀ ਸਭ ਤੋਂ ਵੱਡੀ ਫੌਜੀ ਤਾਕਤ ਹਵਾਈ ਫੌਜ ਹੈ। 1999 ਦੀ ਕਾਰਗਿਲ ਜੰਗ ਤੋਂ ਲੈ ਕੇ 2019 ’ਚ ਕੀਤੀ ਗਈ ‘ਬਾਲਾਕੋਟ ਸਟ੍ਰਾਈਕ’ ਅਤੇ ‘ਆਪ੍ਰੇਸ਼ਨ ਸਿੰਧੂਰ’ ਤੱਕ ਭਾਰਤੀ ਹਵਾਈ ਫੌਜ ਨੇ ਪਾਕਿਸਤਾਨ ਨੂੰ ਭਾਰੀ ਸੱਟ ਮਾਰੀ ਸੀ। ਇਸੇ ਲਈ ਭਾਰਤੀ ਹਵਾਈ ਫੌਜ ਦੀ ਤਿਆਰੀ ਅਤੇ ਤਾਇਨਾਤੀ ਦੀ ਜਾਣਕਾਰੀ ਇਕੱਠੀ ਕਰਨ ਲਈ ਪਾਕਿਸਤਾਨ ਭਾਰਤੀ ਹਵਾਈ ਫੌਜ ਨਾਲ ਜੁੜੇ ਲੋਕਾਂ ਨੂੰ ਖਾਸ ਤੌਰ ’ਤੇ ਨਿਸ਼ਾਨਾ ਬਣਾ ਰਿਹਾ ਹੈ।
ਯਕੀਨਨ ਤੌਰ ’ਤੇ ਰਾਸ਼ਟਰੀ ਸੁਰੱਖਿਆ ਲਈ ਆਨਲਾਈਨ ‘ਹਨੀ ਟ੍ਰੈਪ’ ਬਹੁਤ ਵੱਡਾ ਖਤਰਾ ਬਣਦਾ ਜਾ ਰਿਹਾ ਹੈ, ਇਸ ਲਈ ਭਾਰਤੀ ਸੁਰੱਖਿਆ ਅਦਾਰਿਆਂ ’ਚ ਨਿਗਰਾਨੀ ਵਧਾਉਣ ਅਤੇ ਫੜੇ ਜਾਣ ਵਾਲੇ ਦੋਸ਼ੀਆਂ ਵਿਰੁੱਧ ਤੁਰੰਤ ਕਾਰਵਾਈ ਕਰਦਿਆਂ ਉਨ੍ਹਾਂ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾ ਦੇਣ ਦੀ ਲੋੜ ਹੈ ਤਾਂ ਜੋ ਇਸ ਤੋਂ ਦੂਜਿਆਂ ਨੂੰ ਵੀ ਸਬਕ ਮਿਲ ਸਕੇ।
—ਵਿਜੇ ਕੁਮਾਰ
ਲੋਕਤੰਤਰ ’ਚ ਵਿਰੋਧ, ਪ੍ਰਦਰਸ਼ਨ ਅਤੇ ਸਰਕਾਰ ਦੀ ਜ਼ਿੰਮੇਵਾਰੀ !
NEXT STORY 
